Anmelden
  • Index
  • » Neueste Beiträge

Neueste Beiträge

Anekdoten mit unseren Langohren

U la la i hanes riese Problem mit dr Babette, si isch scho 29j. u jede Winter gseht si verhudlet us u sobaud si im Summerchleid isch gseht si wieder wunderschön us. I has würkli no nie fertig brocht se schön übere Winter z bringe, was ig scho aues gschtudiert ha. Faus es Häärlinge wäre si die ou im Summer do u zwar denn erscht rächt wüus warm isch, äs wärde aui glichviu bürschtet. Si het sone blödi angwohnheit dass si ihre Hingerteil am Chäuber Iglu geit go rangge, nid 5 Minute nei nei dr haub Nomittag schteit si dört u ränggelet. Geschter hani gseit "so das Iglu ruhm ig jetzt wäg villicht reagiert si uf das  Polyeschter? beidi Füdlisite si fasch blutt, do chunnt dr Benj u seit "nei niemous nimmsch du mir mis Iglu wäg das isch mis chline Hüsli u das lieb ig sooooooo". Do hets bir Babette am Haus agfange blutti Schteue z gäh auso hani mit mim bewährte Essigwasser gwäsche u de mis berühmte Eutergel drüber gschtriche um d Hut z beruhige. E Bekannti het mir dr Rat gäh mit Homeopatie z probiere, es wird jede Tag schlimmer do hani doch dr TA lo cho. Das sig eidütig e Piuz i söu gone Saubi hole mit Cortison, eis Tübeli choschtet 17.50 u längt genau für ei Tag när isches scho fertig. I ha wöue Imaferol hole aber mi überchunts nümme si maches nümm. Was gits de derfür? nüt isch sini antwort, das verschtohni jetzt nid es hei soviu Tier Piuze u plötzli gits eifach nümme um se z wäsche? Mitem Imaferol het me se einisch gwäsche u es het sofort ufghört, u jetzt söu ig mit dere Cortisonsaubi mi Esu e Wuche behandle? Am Sunndig hase gschäret das no grad e warme Tag isch gsi u denn hase mit Betadinseife abegwäsche das isch jo ou gäge Piuze, überau hani früschi Schteue gfunde ou grad näbe dere Schteu woni 2 Tag lang mit dere Saubi ha igschtriche. I ha wieder aglüte u gseit eso göng das nid di Eselin sigg baud am ganze Körper vou Piuze es müessi öpis go, nöchscht Wuche bini nidemou dehei, jetzt chunnt er morn chonne Hutprob näh zum genau beschtimme wases fürne Chäfer isch. Mir hei Nachts no Minustämparature u am Tag isches ou nid warm de channi di Eselin doch nid aubot abewäsche Heinomole, dir gsehts i ha würkli es riese Problem.


Anekdoten mit unseren Langohren

Mir hei jo sehr lang viu Schnee gha u umso lenger isches gange bis aue wieder vergange isch, us däm Grund hei mir di meischte Wäge wo um d Weide füehre zue gmacht u numme dr churz wo i ober Schtau füehrt u befeschtigt isch offe glo es si glich no 70 Meter gsi. D Cindy wo jo ab u zue ihres schpezielle Gudeli chunnt cho abhole het dr ganz Winter ihres schpieli nid chönne mache wüu di angere eifach nid vo Huus si, wott heisse bim Schtau si bliebe. Ei Tag si si doch äntli wieder go schpaziere u do het d Cindy ufzmou afo schreie, "aber Cindy was isch de los? was hesch? was schreisch de ömu eso?"i ha nid verschtande um was es gange isch do mir äbe das schpieli lang nümme gmacht hei. Es het seeeehr lang duret bis mis Hirni mir äntli d antwort gä het u klar bini sofort go nes Rüebli hole u d Cindy hets sich nid chönne verchlemme z säge "wirsch ou nume no euter we so lang muesch schtudiere". Das isch e frächi Täsche äbe Cindy Malaika wie si leibt und lebt. Mis Mandli u ig hei e schwär Transport gha wo üs bi de Esle verbi gfüehrt het auso hani d Esle ufetriebe, aber haut do fäut doch eini? Jo wär scho? natürli d Cindy auso hani grüeft "Cindy wo bisch ? chumm gang mit de angere ufe" . Do plötzli chunnt si düre Plastigvorhang u schimmpft "due mi doch nid verrate i ha mi dänk do inne verschteckt bis di angere wäg si dass du mir wieder öpis chasch gä" wosi fertig kifflet het, het si sich umdräit u isch wieder düre Vorhang i Schtau z rügg u dört z warte. Mir hei Problemlos mit üsem schwärtransport düre chönne, si het schön im Schtau gwartet äbe ufs Gudeli.

Futterreste von Pferden

Hoppla ist nicht die feine Art die Esel mit den Resten der Pferde zu füttern, diese suchen sich die besten Sachen raus, schädlich ist es nicht nur traurig da sie doch für ihre Esel Pension bezahlen. Aus was für einem Grund wird es so gehandhabt ? Das ist etwa so wie wenn sie im Restaurant nur die vielen Reste der andern Gäste erhalten und doch den vollen Preis bezahlen.

Futterreste von Pferden

Ich habe kürzlich festgestellt, dass meine drei Esel, welche ich in einem Pferdepensionsstall eingestellt habe, unter anderem mit sehr kurzen Heuresten, welche von den den Pferden nicht gefressen werden, gefüttert werden. Was muss ich davon halten? Wer kann mich beraten?

Anekdoten mit unseren Langohren

So sit 7 Wuche si jo d Aisha, Nela u dr Figaro i ihrem nöiie Schtau u so hani dänkt ig müess mou go ineluege was d S... u ihri 4 Esle so machi, obs ächt göng ohni mi? WAS ig chöng nid zeue, moumou aber dr Bosco isch jo scho vor de angere umpaziert worde wüuuer fasch düre dräit het mit dene rossige Wiber. Mou  si heis ganz schön chönne irichte, klar hei si nid soviu Platz wie bi üs aber derfür het d S.... viu meh Zyt um mit ihne go z loufe oder Wägele. Si si aui dusse ufem Sandplatz gschtande u hei gsünnelet, dr erscht wo isch cho grüezi säge isch dr Bosco, dä isch wiene Chläblus . I hane gschtrichelet u bi de zu de angere gange, dr Figaro hani churz chönne chnuddle u när ischer i userscht Egge gschtande u het dere Sach i rueh zuegluegt. Es isch mega schwierig di angere go z begrüesse weme immer dr Bosco im Schlepptou het. Si gseh aui guet us numme d S... het gmeint dass dr Aisha ihre Schpäckhaus leider no gar nüt wäg si. Aber das isch jo klar schliesslich het si ne jo nid i 2 Monnet sondern i 7 j. ufboue de chaner jo ou nid i 7 Wuche scho wäg si. "Hei Figaro chumm doch ou no chli zu üs" i hane probiert zu us z löcke aber er het zur antwort gä "we öpis vomer wotsch de chunsch zu mir u zwar allei ohni dä gross Böggemöff". Obwou dr Bosco ihm nie öpis z leid do het ma dr Figaro ihn nid, är het eifach vo afang a grad ufgäh u nie versuecht wär dr Schef sig ab z klähre. Z Neli isch gottlob nie rossig worde u we d S... wäg muess chasi dr Sandplatz eso abtrenne dass di chline ungerdüre i Schtau chöi u di grosse ungers Dach. Nach langem Esle u Platz bewundere simer äntli derzue cho dr S.. ihri Wohnig go azluege, u isch das schön aber ihre arbeitsplatz het mir scho z dänke gä? si gseht nämmli grad ufe Sandplatz abe zu de Esle do frog i mi wiesi ächt do wott schaffe????

Anekdoten mit unseren Langohren

Mir hei e Bärg i dr nöchi u dä heisst Graitery u genau wäge däm hei mir vom 20 Novämber bis am 20 Jänner ke Sunne, nei ke angscht si schynt scho aber nid zum Huus u do mir ke Näbu hei isch das nid witer schlimm. Dä Bärg het e Ischnit u genau dört düre chunnt si de am 20 Jänner wieder 10 Minute, u de jede Tag 10 Minute lenger. I sueche äbe scho lang öper wo mir würd häufe dä Bärg e chli abztrage u somit hätte mir dr ganz Winter Sunne aber bis jetzt het sich no niemmer gmäude u de bliebts haut eso. Genau ufe Mittag weni wott d Esle wieder i Schtau schperre chunnt die Sunne u mit sore chraft dass es mir diräkt het weh do die Esle i z schtaune u drum mache mir jetzt überläbensträning. Hää wie das sött go??? froget dir öich? ganz eifach i lo di Esle lo sünnele u go i dr zwüschezyt go z Mittag ässe, vo Zyt zu Zyt rüefi use "bitte einisch dräie damit dir uf beidne site brun wärdet". Jetzt müesse d Esle äbe vo ihrne Debo wosi überau e chli agsetzt hei zerre drum heisst das überläbensträning, so um di viertuvoreis geit d Sunne wieder hingerem Bärg düre u i ga go de Esle z Läbe rette i däm ig ihne ihres Mittagshöi fuettere. Mi muess äbe fexibelllll si u d Esle sis uf aui fäu ou.

Kotwasser

Kotwasser hat nichts mit Durchfall zu tun, der Mist sieht normal aus aber jedesmal wenn der Esel windet /furzt kommt etwas Wasser mit. Laut TA haben sie eine Studie gemacht und die Ursache nicht rausgefunden, es passiert nur in den Wintermonaten wenn die Esel ausschliesslich mit Heu gefüttert werden. Es kann in einer Gruppe nur ein Tier daran leiden obwohl sie nicht richtig darunter leiden höchstens wenn sie eine Decke aufhaben und der Besitzer sie jeden Tag waschen muss. Jetzt die gute Nachricht auf anraten des TA bekommt meine Stute jeden abend einen Esslöffel Oregano über ihr Futter und innert 2 Tagen furzte sie nur noch drocken, als nach 14 Tagen das Gläschen leer war und ich nicht sofort einkaufen ging fing sie schon nach 2 Tagen wieder an, ok mehr einkaufen und über den ganzen Winter geben. Uebrigens war das dass erste mal das ein Esel dieses Problem hatte muss also nicht heissen dass es nächsten Winter wieder auftritt.

Anekdoten mit unseren Langohren

Langsam hanis druf wienie di Dechine muess näie, immer das uf trünne vo dene Nöt isch müehsam u drum hani dänkt i chönnt doch die Dechine grad vo grunduf säuber näie. I ha no überau gnue Schtoff ume u so hani e nöii für d Cindy gnäit, leider isch dr Schtoff cremfarbig aber mi chase jo wäsche. Vo dr Ronja ihrer Dechi hani no Schtoff woni am Rügge usegnoh ha u dermit hani er Cindy e schöne Haususschnitt gnäit, dr Ronja ihri isch nämmli Pink u de macht das Rändli a dr Cindy ihrer e schöne Kontrascht. I wirde uf d suechi nach geeignetem Schtoff go u sobaud i gfunde ha foni a Esudechine z näiie das isch nämmli e Marktlücke. Sit mir d Esle angers i de Schtallige iquartiert hei isch em Benj sini Box gradus vom Schtaugang, da mir jo z Höi vo dr Büni diräkt abe gheie bliebt nachem Fuettere geng viu Höiblüemt ufe Bode u jetzt hani agfange das em Benj ine z wüsche. Dr Benj isch jo äbe dä wo z Höi nümme guet cha chöiie u drum igweichti Höicops überchunnt u sit ig agfange ha ihm das Höiblüemt z gä maner fasch nid warte u schtosst si Chopf gäge d Türe zum säge pressier e chli. Eigentlich bliebt jo am obe nachem Fuettere z Höi für e morge no im Schtaugang u de hets am afang vo däm schpieli numme am morge Höiblüemt gä aber da dr Benj esone fröid het hani haut agfange scho am obe z Höi z schüttle damit ig ihm ou am obe scho chli cha inewüsche. Jo jo was me do nid aues macht für di geliebte Langohre, mängisch muess ig ab mir säuber lache.

Anekdoten mit unseren Langohren

I ha doch letschte Summer mini Esudechine i d ornig brocht aber irgendwie ändere sich die i de Plastigseck u jetzt wose ha wöue bruche wüus chaut isch worde passt wieder di einti oder angeri überhoupt nümme. WAAAAAS dir weit säge miner Esle heige sich veränderet oder besser gseit ihri Poschtur? Hmm villicht heit dir jo rächt uf aui fäu bini wieder am abändere e jo süsch ischs mir jo längwilig. I has scho es paar mou gschriebe dass ig vorne bi dr Bruscht die Verschlüss abnieme u de die zwe Laschene wo witer füre chömme zämenäie u de schlüft dr Esu eifach ine u mini Wöschmaschine het fröid wes nümme derewäg lährmet. Ufem Rügge trenn ig uf u nimme bis 20cm Schtoff use u de wird dr Haususschnitt outomatisch chliner, mi dünkts eifach di Dechi dörft bim Haus witer ufe cho u drum baschtli dört mit angerem Schtoff fasch wienes Haustuech dra. So i muess go witer näihe bis zum nöchschte mou.

Anekdoten mit unseren Langohren

Mini Deko uf de Houzruggle hei d Lüt vom 23.11 bis afang Januar chönne beschtuhne u när isch dr Buur sis Houz cho heihole u mini Deko isch verschwunde, aber i muess säge si het doch viu lenger em Wätter u Schturm druzet. Di Wöschhänki isch eidütig am difisiuschte gsi oder dr Schtandort isch weniger gschützt gsi aus di angere, henu nüt isch für immer - aber es gseht scho chli lär us. Wieni jo gschriebe ha si aui Eseli vo de obere Schtallige abe züglet u mini befürchtig isch gsi ob si ächt di Schtäu ou mögi werme? di cheutischti Nacht isch Minus 8 Grad gsi u i ha eifach no e Wuudechi bir Türe aneghänkt u es isch nie unger 4 Grad worde, zwüsche dinne 5 - 8 Grad u dusse Minus Grade hei d Eseli chönne wähle u mi muess nid zwöi mou froge wosi am liebschte si gsi. Vieli Lüt meine d Esle heige nid chaut aber das schtimmt eifach nid, es sött eifach es paar Grad wermer drin si aus dusse, es verlangt niemer 20 Grad im Schtau nei nei, es längt wes eifach es paar Grad ungerschied si. Es duret doch no chli lenger bis üsi nöii Website gebore isch u drum darf ig no chli schriebe. Bis jetzt simmer ohni Dechi zrächt cho gottlob, sogar dr Benj het no nie gseit är heig chaut u gli heimir wieder Sunne ab em 20 Januar chunnt si jede Tag e chli lenger u de wärde mir aui - das heisst mis Mandli u aui 9 Eseli sünnele, judihui.

Anekdoten mit unseren Langohren

I ha jo verzeut wie dr Benj immer vor z Huus isch cho brüelle u när hanim Mädesüess über sis Fuetter gschtröit u er het ufghört schreie, är isch eine wo bi de erschte chaute Tage sofort nach sinere Dechi schreit jede Winter z gliche. Jetzt hei mir scho Minus 8 Grad gha u är isch no nid ei Tag ideckt gsi im gägeteil, är gseht us wiene Junge . Sit Johre het er nid so nes schöns Fäli gha wie jetzt, im geits prächtig u das aus dank em Mädesüess? I verschtohs nid aber es het ihm guet do u är hets sofort gmerkt u immer wieder verlangt, jetzt gib ihms no drü mou pro Wuche. Geschter isch d Sandra nach 8 Johr mit ihrne 3 Esle uszoge, es isch ruhig worde u es het Platz gäh i dr Sattuchammere. Es isch für aui e komischi Situation, d Esle müesse sich i dr Herde wieder nöi Ordne, hüt woni vor Höibühni Oepfu abegschosse ha hani grüeft "chömid use es git öpis guets" aber es isch niemer meh use cho do hani gmerkt dass jo mini Herde gschrumpft isch. I ha schribverbot übercho da üsi Hommepage nöi gmacht wird, dir heit jo sicher scho gmerkt dass me sich nüme het chönne iloge. Auso i weiss nid genau wie langs geit aber chömet eifach cho ineluege u de merket dir jo de schnäu obs angers usgseht, mir fröie üs auso bis bald.

Anekdoten mit unseren Langohren

So dr Bosco isch wäg u es isch sehr sehr ruhig ohni ihn, obwou er niemmer blogget het aber eifach mit sim schtändige kontrolliere vo de Schtuetene ob ächt eini rossig si, si schtöh mängisch e Schtund am gliche Ort u döse ruhig vor sich hie. D Bsitzere gloubts no nid u wotts de säuber probiere wesi ihri 4 Esle äntli bi sich het, ig hoffe eifach dass es de guet geit. D Schtuetene u ihri Füli das isch jo e eigeni Gschicht, auso we e Schtuete es Füli überchunnt de wird si fasch outomatisch suber im Schtau. Grad eso isches ou mit Inca u dr Jakari gsi, mit Jährig het d Jakari säuber e Boxe übercho u isch vom erschte Tag a suber gsi, aui Bolle si uf eim Hufe gsi öpe 40cm breit u bir Inca si Bolle uf 2m verteilet gsi. Wo vor 2 Monet dr Bosco cho isch hani haut di zwöi wieder zäme do bis er de wieder göngi, u was isch passiert? d Jakari het em Mami gseit si sig e söinigu u d Inca het sich würkli wieder zäme gno u d Bolle si nume no uf 1m breit verteilet gsi. Dr Bosco isch wäg u d Jakari wieder i ihrem Böxli u sehr suber u d Inca macht wieder breiter, wose druf agschbroche ha het si zur antwort gä " i luege dänk scho dass ig nid uf de Bolle schlofe".

Anekdoten mit unseren Langohren

Wieni jo scho verzeut ha isch üsi Hündin Sina rächt aut u het doch jede Tag meh müeh gha mit go loufe, zwüsche dine het si gschwanket oder isch sogar eifach umgheit. We mir hei wöue go loufe het si scho nach 200 Meter gseit "i ma nümme", im Januar wär si 12 jährig worde u das isch es schöns auter für ne Bärnerseenehündin. Z schlimmschte aber isch gsi überau wosi gläge isch het si ganz viu Urin verlohre so dass ig jede Tag di Sache ha müesse wächsle u ou si isch nümme wou gsi u so hani am Zischtig mit mim Maa diskutiert u mir si üs einig worde dass es Zyt isch d Sina z erlöse. Am andere Tag bini nachem Mittag zu üsem letschte Schpaziergang gschtartet, es isch wahnsiinig idrücklich gsi, i ha eigentlich im Sinn gha ihre no so viu z säge wie si e super Hündin sig gsi  u si üs aui di Johr soviu fröid gmacht het. Aber es isch unmüglich gsi, jedesmou weni ha wöue afo rede hani so müesse briegge dass ig ke Wort use brocht ha do isch d Sina jewils ihre Chopf a mim Bei cho riebe zum säge "es isch guet so es schtimmt", grad wie jetzt bim schriebe loufe d Träne numme so abe. Dr ganz Wäg bis zum Parkplatz isch si au paar Meter bliebe schtoh u het i d Ferni gluegt, si het links u rächts vom Wäg aues no einisch agluegt so richtig zum Abschied näh. Mir si zum Tierarzt gfahre, ruhig isch si ine u är het mir no aues wöue erklähre, i ha abgwunke u gseit "dir chöid nid mit mir rede miner Ohre si zue, ig weiss  wies geit" u när hani mi numme no uf d Sina konzentriert u se gschtrichelet bis aues verbi isch gsi. U wieder het er mir wöue säge si sig Tod, i ha gseit "ig weiss aber i bi no nid fertig mit Abschied näh" u do het er sich zrügg zoge u mir d Zyt gäh. I ha scho mänge Hung gha aber no nie eini wo so viu  gred het u jedesmou weni de Lüt gseit ha si wöu immer z letschte Wort ha het si bäuet u somit z letschte Wort gha, adie Sina u danke für aues.

Anekdoten mit unseren Langohren

Nei aber ou isch das e Kataschtrofe Wuche, am Sunndig het dr Bosco wieder wäge dr Cindy ghängschtelet u so hani am Nomittag dänkt i nähmse mit dr Soraya grad mit um mitem Hung go schpaziere so heig dr Bosco Rueh. I ha z grosse Töri für di andere ufdoh u bi go schpaziere, woni nachere Schtund wieder dehei bi gsi bini grad i ober Schtau um d Bouele ga zämeläse u früsch i z schtröie. Mis Mandli macht z gliche im ungere Schtau u schickt de di chline Esle ufe - u so hani gwartet - u scho isch dr Benj u d Ronja cho. "Hallo Babettli chumm hei " hani grüeft u do hase ganz langsam dr Wäg gseh ufeschliche. "Aber Babettli hesch ke Hunger ? hase gfrogt, wo si g a n z langsam näbe mir düre geit hani gseh dass si überau am Chopf blüetet."Herrjeses was isch de mit dir? sofort hani se ungersuecht u gseh dass di Verletzige numme am Chopf si, i bi go Betadin, Gaseblätzli u Saubi hole u hase ganz süfferli so guet si mi het lo mache putzt u gsaubet u derbi gmerkt dass si e Schock het. I ha gschtudiert was me bi Schock git aber irgendwie bini grad säuber näbe de Schueh gschtande u so hani ere Hömeopatin aglüte u di het nach mine Schilterige z richtige Mittu gnennt wore ha chönne gä. Jo was isch passiert? es het numme ei erklährig gä dr Bosco het si Fruscht wüu ig mit dr rössige Cindy wäg bi z Babettli vertöfflet. Er het se wöue beschtige u si het grad e Bürzliboum gmacht. Wo sich Babette langsam dank de Mitteli beruhigt het simmer ane Geburtstag, aber i bi gar nid ruhig gsi u ha baud wieder hei wöue. Am angere morge woni i Schtau bi hani gseh wiesi dr Chopf het lo hange u numme z Churzfuetter gfrässe het aber ke Höi, auso we e Esu nüt frisst isch das Alarmschtuefe rot. Mir isch ufgfaue dass si beidsitig am Hausafang dick gschwulle isch u dr Chopf nid het chönne dräie woni mit Gudeli glöckt ha. Aui 2 Schtund hetsi nöiii Chügeli übercho u i ha e Oschteopat gsuecht, mitem Tierschpitau gredt aber genau die wo mitem mobile Röntgegrät arbeitet het am Mändig ke Zyt gha u am Zischtig frei. Super es het aues klappet wie am Schnüerrli, nei i ha ke Tierarzt lo cho dä hät sowiso nüt angers chönne feschtschteue aus ig u di Wundpfleg channi aus Pferdesamariter säuber. I hase im Schtau glo u ha beobachtet wie si sich ganz langsam u behuetsam bewegt het, am angere Tag isch äntli Tierärztin cho Röntge. Zerscht emou wie söu ig ächt z Babettli fixiere wese weder am Chopf no Haus darf alänge weme nid weiss ob si öpis broche het? I hase ganz i Egge drückt u ruhig ufse igred u so het si chönne schtäche, langsam isch si ruhig worde u mir hei aues parat gmacht zum Röntge, e Schurz u Häntsche für mi u denn d Eselin i di richtigi Position bringe. Vom Chopf dr Haus ab e schöni gradi Linie zum Rügge, ei Hang ungerem Chinni di angere um d Röntgeplatte hingerdra z hebe, do het mir d Babette ihres verletzte Ohr a mini Backe drückt u so hani grad chönne gschbühre obs heiss sig, gottlob nid si lohts nämli nid lo alänge är hets fasch abgrisse. Ok z Biud isch guet worde numme hetme gseh dass dr zwöit Würbu chli useschteit, isch ächt das normau bi de Esle? D Tieräztin het im Internet es verglichsbiud gsuecht isch aber nid fündig worde do het si gmeint mi chönnt doch eifach vomene angere Esu no es Biud mache, wär würd das lo gscheh ohni z Sediere? Natürli d Cindy di macht aues mit, i hase i üses Böxli gnoh u re d Sache erklährt, si isch schön anegschtande u denn no einisch z gliche prozedere. Ei Hang unger z Chini u mit dr angere d Platte hebe, do hets gheisse dr Chopf vor Cindy isch z höch obe - jo bini öpe e Tintefisch mit mehrere Arme? aber schliesslich bini e Frou u di hei doch immer e Idee auso bini mit mim Chini dr Cindy zwüsche d Ohre u hase abedrückt bis d Tierärztin gseit het es isch guet. Wome di Biuder mitenang vergliche het hei beidi Wirbusüle glich usgseh auso isch nüt broche aber e Oschteopatin muess doch no cho. Klar isch no einisch e Tag vergange bis si Zyt het gha aber hüt isch si cho u het gmerkt dass e Würbu verschobe isch gsi auso het d Babette unwahrschinlich Glück gha isch di ganzi Gschicht guet use cho. Dr Bosco muess si leider umplaziere i bi nümme gwillt in no bis zur Wiehnacht z betröie, bi 10 Schtuetene isch immer di einti oder angeri rössig u er dräit im rote.

Anekdoten mit unseren Langohren

Auso i has eifach nid wöue igseh dass ig sött Esle abboue aber sit dr Bosco do isch u aues drunter u drüber geit ani fasch nüme warte bis di 4 Esle um d Wiehnacht gö. Obwou dr vorder Bsitzer gseit het dr Bosco reagieri nid uf d Schtuete, dräit er bi üs fasch düre u het doch probiert di chlini 89cm Cindy z decke. I bi i dr Wohnig gsi u ha plötzli d Cindy panisch ghöre schreie - klar bini sofort use go luege was los isch u do hani gseh dass dr Bosco di chlini Cindy über di ganzi Weid gjagt het, di armi het noch und noch mit beidne Bei hinger use gschlage aber si isch dä gross Möff eifach nid los worde u so hani derzwüsche müesse. Es bliebt mir eifach nüt angers übrig aus zwe Gruppe z mache, di chline u rössige si abtrennt vo de angere es isch schad aber es darf eifach nid si dass dä 400kg schwär Esu uf di chline schtigt.
Woni wieder einisch mit Esu u Hung unterwägs bi gsi u überau di dürre Pflanze gseh ha wo zum Teil sehr luschtig usgseh hani plötzli e luschtegi Idee gha. E Buur het 16 Schter Holz am Wäg glageret, schöni Rugle in Reih und Glied, i ha Moos ab de Schteine gno u wienes Chüssi ufene Rugu gleit u so hani di dürre Sache schön chönne dri schtecke. Es gseht jedes vo dene 5 Deko ganz anders us, mängisch weni e Zweig mit schöne Farbige Bletter abknickt ha si vor luter schüttle aui Bletter abgheit u i ha nume no es Gerippe i dr Hand gha. Oder dr Esu het gmeint äs sig für ihn u het fröidig dervo gfrässe weni abglänkt bi gsi wüui wieder öpis schöns gseh ha. Einisch hani e Ascht mit sehr grosse Bletter gseh u us däm hani dänkt chönnti grad e Wöschhänki mache, auso hani no zwe Aschtgable mitgno, zerscht hani die i d Rugle gschteckt u denn dä Ascht druf, drunter hets ou Moos u schöni roti Erdbeeribletter. Es isch schön z gseh wie d Schpaziergänger druf reagiere u mängisch isch öpis nöis igschteckt wo nid vo mir isch. Dr Wind het ou si fröid u bloset d Bletter furt u d Vögu frässe d Beeri vo de Escht, es macht nüt ou we me nid weiss wie lang di Deko z beschtuhne isch schliesslich isch aues vergänglich.

Anekdoten mit unseren Langohren

D Bsitzere vor Nely, Aisha u em Figaro het sich no e grosse Wallach kouft u dä schteit jetzt natürli ou no bi üs bis si im Dezämber - Januar äntli i ihres Huus cha zügle. I bi mir jo l35cm grossi Esle gwohnt gsi u dr Bosco misst l40cm aber irgendwie chöme mir di paar Zentimeter riesig vor. Das isch e Elefant u ke Esu meh, aues a däm Tier isch mega riesig u ne Chraft het er, aues wo 18 Johr ghaute het ou bi de Ross geit plötzli kaputt. Do probierter im Schtau über d z Wändli dr Darinka ihre Sauzläckschtei z frässe, drückt derbi so fescht abe dass es grad d Schrube dür d öffnige schriesst. I bi gotte froh dass er nid weiss wieviu Chraft er überhout het, nei nei ig wott nid Jammere är isch e ganz e liebe aber eifach riesig. Ohni Chötteli go loufe geit gar nid, mi mane eifach nid haute, ei Tag hets Bsitzere probiert u es isch nid lang gange u dr Bosco isch wieder dehei gsi u si no lang nid. Natürli isch si ne cho hole u isch no einisch gange aber wohlweislich dasmou mit Chötteli über d Nase. Woni mis chline Grosschind i de Ferie ha gha hani immer gluegt wo dr Bosco sig u de simmer i anger Schtau go schaffe, zwüsche düre hani immer wieder usem Schtau gluegt was das Chindli mache u es isch nid lang gange isch dä riesig Esu hinger ihm gschtande u het ne abgschnüfflet. Wo dr Lenjo ihn het wöue schtrichele hani gseit "das  geit nid si Chopf isch viu z wyt obe" do het dr Bosco gmeint "i cha dänk mi Chopf abehebe u de cha mi dr Lenjo ou schtrichele" u genauso het ers gmacht.

Anekdoten mit unseren Langohren

I ha scho so viu verzeut dass ig  gar nümme weiss was dir so aues wüsst vo minere Esufarm, auso mängisch goni is Autersheim go Musige mit minere Zithere. Wies es so isch weme immer mitem gliche Inschtrumänt schpiut tönts ufts  mou aues glich u drum verzeui zwüschedüre vo mine Esle u di aute Lüt lose ganz gschpannt zue. Woni wieder  bine bi gsi hei si gfrogt ob si nid einisch dörfi cho d Eseli bsueche? aber sicher scho di Langohre fröie sich nämmli über jede Bsuech. Es isch nid lang gange u e ganze Bus vou Heimbewohner si cho uii isch das es gschnäder gsi, uf einere Site si d Esle i Reih und Glied gschtande u uf dr andere Site si di Bewohner mit ihrne Rouschtüu u Rollatore gsi u aui hei grossi Ouge gmacht. D Frog het me sich chönne schteue wär do jetzt wär genau Beobachtet, d Lüt wäre ganz gärn mitts i di Herde go Knuddle aber das isch doch nid ganz eso eifach gsi. I ha di liebe Lüt uf üse Sitzplatz gführt, wo aui es Plätzli hei gha bini go d Cindy di chlini Muus  hole u di isch ganz säubverschtäntlich zwüsche dene Gfährt gschtande u het sich lo schtrichele derbi dr Chopf immer e chli witer ufe Tisch gschtreckt u het gmeint mir merkis nid, ha ha ha. Hei hei di Lüt fröid gha a däm Usflug u do hani verschproche i chömi de mit dr Cindy si cho bsueche wes nümme so heiss sig. Letschte Zitschtig hani grad gäbig Zyt gha u so hani mi ufe Wäg gmacht mit dr Cindy go di Liebe Lüt im Autersheim go bsueche, das heisst zerscht vo mir z Bärgli abe -dür Moutier . u de wieder z Bärgli ufe zum Heim. Es si no nid viu Lüt ume gsi aber so hani besser für jedes einzelne guet  Zyt gha u di fröid wome i dene Ouge vo de aute Lüt het gse isch eifach mega schön gsi u d Cindy hets sowiso gnosse wesi so im mittupunkt isch gsi. Jedi Person wo uf Terasse cho isch het aus erschts gfrogt "dreit si? überchunnt si es Jungs?" nei nei d Cindy dreit numme z Mittagässe mitt sich ume, d Schwöschter het vo aune es Foti mit dr Cindy gmacht - es isch würkli e schöne Nomittag gsi. Nach anderthaub Schtund hei mir üs wieder müesse ufe Heiwäg mache wodoch e Schtund het duret.

Anekdoten mit unseren Langohren

Mir hei üs jo füre Umzug am Tag des Pferdes in Solothurn agmäudet u de heissts immer "bitte d Tier schön zwäg mache" jo aber wie? schliesslich wott ig miner Esle nid verchleide u se zum Clohn mache. I ha hin u här überleit u plötzli hani e Idee gha, i ha e Frou lehre kenne wo ou gärn schnurpfet u mir hei üs zäme do, im Gartehüsli simmer zäme a zwene Näimaschine ghocket u hei mini Idee i d Tat umgsetzt. Zerscht hani dr Germain mini Idee erklährt u mir hei gradiburgeret wiemer am beschte näie das es guet chunnt, si het no ihri Sunndighose wore nüme gange si gschbändet u mini Schwiegerdochter het zwöi schwarzi Lindüecher übrig gha,  es isch nid unbedingt dr richtig Schtoff gsi aber derfür gratis. Mir hei das Fixlintuech verschnitte, derbi hani müesse ufpasse dass es vier Dechine gä het, denn isches mitemene wisse Bändeli igfasset worde. Het scho nid schlächt usgseh, denn isch es Schtück Vorhang drüber cho wott grad wie Schpitze isch u das hei mir du vo Hang müesse anäie. Mir hei no vorne u hinger Schnüerli agnäit um di Dechi am Esu azbinde, denn si d Ohre dra cho, natürli ou schwarz mit Vorhang dra u am Schpitz hani vo dene Vorhängschnüer lo usehange. I ha mis wärch agluegt u di Ohre si nid so gsi wienie mirs vorgschteut ha, auso wieder ufmache - u jetzt? weni doch di Schnüer diräckt i d Noht vo dene Ohre dri näie de müesst doch das se so usgseh- we dr Esu d Ohre dobe het de hange di Schnüerli schön nidsi aber we si d Ohre chli sitwärts use hei de mache di Schnüerli grad wiene Räche. U i cha öich säge genau wieni mir das vorgschteut ha hets när usgseh u mir hei a däm 5 Kilometer länge Umzug sehr sehr viu Applous dörfe iheimsche für di schön zwäggmachte Eseli, churz gseit di Schtunde hei sich uf aui fäu glohnt.

Anekdoten mit unseren Langohren

I ha zwe Fründinnen wo sit Johre zumene verwarloste Esuwallach luege wonere Samichlouszunft ghört u di hei dä eifach bimene Buur igschteut gha u ds ganze Johr hets sich nie öper um dä Esu kümmeret aber we de Samichlouszyt cho isch si di liebe Samichlöis cho u hei vo däm Eseli verlangt das er drü Tag super söu mitschpiele u dä Löu hets de no gmacht. Sit di zwe Froue zuenim luege geits ihm guet u är darf es Esugrächts Läbe füere, är heisst Balzli, jedes Johr we de di Samichlouszyt verbi isch het dä arm Kärli ds ganze Füdli offe jo grad bluedig vom viele Ahängerfahre. Obwou di Froue äxtra zwöi Seili hei mitgäh es churzes um ihn im Ahänger az binde u de z länge um mit ihm z loufe aber si schaffes nid dä Esu richtig z schütze u di Froue dörfe de wieder drei Wuche Wundpfleg mache bis aues verheilet isch. Us däm Grund bini a mini Näimaschine ghocket u ha e wundervolli Dechi zum Samichlouse gnäit, i ha es Linelintuech gno  rote Schtoff drübergleit u denn es Rändli vom Lintuech umeglitzt u so hets e wisse Rand gä u z wichtigschte isch dr Füdischutz isch grad a dere Dechi agnäit u de merke si gar nid das di Deko Dechi eigentlich e Schutz für e Esu isch. We de di Froue dr Balzli usegäh lege si nim eifach di Dechi a u di bliebt druf biser wieder Hei chunnt u so ischer gschützt u mir hei gwunne für so öpis chame doch guet zwe Tag a d Näimaschine sitze find ig u zahle chame das sowieso nid.

Anekdoten mit unseren Langohren

.Im Früelig hani afo Waudäperi sammle da ig jo mit dr aute Sina nume no langsam vorwärts chumme, ihre isches nid rächt gsi u si het aupot gseit "chumm de öpe", es het nid soviu gä aber doch für jedes Eseli 3 bis 4 u das zwöimou am Tag u das het gschmöckt. Wo si langsam fertig si gsi hei d Himmbeeri agfange aber es het nid viu gä u denn hei d Brombeeri agfange u das het gha sooooooo viu u do hani gseit "die si jetzt für mi" . Sack u Seckli vou hani zwöi mou am Tag hei gno u grad i d Gfrüehri do damit ig de chönni Gonfi mache wes vo dr Mängi h r rändieri. E Frou het gmeint si legi si immer zerscht ufenes Chuechebläch u denn für es paar Minute i d Gfrühri de chömmi di Würmli use. W A S ? Würmli i de Beeri das geit jo gar nid auso bini sofort hei go luege u woni de Seck ufdo ha si überau gfrohrni Würmli dra gsi igitt di Beeri cha ha wär wott abr ig mache sicher nid dermit Gonfi. Zyt vom  Holunder isch cho u do hani zerscht Sirup gmacht u mitem nöchschte hani dänkt Gonfi z mache u ha zu mim Mandli gseit "für d Gonfi müessi mir di Beeri chli besser putze" u so simmer 3 Schtund do gsässe u hei erläse. Mit dr Zyt hei d Finger afo chläbe u so hani es Chübeli Wasser zuemer gno u ha so chönne d Händ zwüschedri schwänke, nach es paar mou schwänke hani ufds mou gseh das es Würmli a mine Finger het, nei nei das darf nid si hets emänd do drin ou Würmli? Es isch grad Schtauzyt gsi u drum hani gseit "jetzt legi di Beeri is Wasser u de gsehmer obs Madli drin het" mir si go d Esle füettere u womer dermit fertig si gsi bini wieder zu de Beeri ha aber kes Würmli ufem Wasser gseh. I ha se is Löcherbecki glährt u was isch füre cho? dr ganz Bode vom Becki isch vou Madli gsi u mis Mandli het gmeint "jetzt chasch doch Gonfi mache d Würmli si jo jetzt aui dusse" schpinsch das Biud chani nümme vergässe nei nei i schbände di Holunderbeeri gärn de Hühner di hei fröid wes no Fleich dra het". I ha mir gschwore numme no vo Frücht Gonfi z mache wome guet dri gseht u sicher isch das ke Fleisch drin läbt.

Anekdoten mit unseren Langohren

Wieni scho mehrmous erklährt ha dünkt mi d Esle z beobachte sig fasch z wichtigschte a dr ganze Hautig, mir si jo es paar Tag wäg gsi u woni wieder dehei bi gsi hets mi dünkt mitem Figaro schtimme öpis nid. Woni am Mittag wägem Rägewätter hau wöue Höi fuettere schtatt Weidegang si aui usserdem Figaro bim ungere Schtau gsi, komisch woisch de dä ganz allei ? I bine go sueche u hane ganz allei im obere Schtau gfunde i hanim haut dört e chli Höi gä u bi du säuber go ässe, di ganzi Truppe isch bim ungere Schtau ume glümlet u si si nid Motiwiert gsi im Räge ume z loufe, dr Figaro isch bis i d Mittuschtation cho u het dört längwilig us dr Wösch gluegt. Hmm irgendöpis schtimmt nid mit ihm, är isch angersch aus süsch. Klar är isch jo nid blöd u het scho lang gmerkt dass dr Benj immer im Verschteckte sini igweichte Höicops überchunnt, schpiut er emänd aute Esu? I ha Bsitzere gfrogt ob emänd öpis vorgfaue sig wo mir abwäsend sige gsi u si het gmeint är sig scho dr vorder Tag so komisch gsi u heig nid wöue sis Höi frässe. Detektiv arbeit isch witer gange, aui hei du am Nomittag no chli uf d Weid chönne u do hani gseh dass er sis Höi am Mittag nid gfrässe het aber im Gras ischer wieder normau gsi. Am obe het er siner Rüebli u Oepfuschtückli gfrässe aber vom Höi het er wieder nid wöue u isch go Schtrou frässe, auso fasse mir zäme Gras, Ruebli u Oepfu si chüel -  Schtroh weiss ig nid u Höi ou nid has no nie säuber gässe, es Zahnproblem chas nid si. Wone so frogend agluegt ha u är do gschtande isch u es paar Schtrohhaume us sine Muhwinkle ghanget si bini zuenim i d Box u hase wöue use zie - är het sich haub abdräit u gmeint "läng mi nid a" jo aber Figaro i wett eifach wüsse was du hesch? hani gantwortet u versuecht sin Chopf go azlänge - do het er sich komplett dräit u i ha nume no sis Hingerteil dörfe aluege. D Atmig isch normau gsi u dr Buch het ou ruhig usgseh ," Figaro säg doch was nid i dr Ordnig isch mit dir? i has no einisch probiert näbe ihm düre z go do het er sis Bei azoge u gseit "we mi nid i Rueh losch de Schtüpfi i di" ok i hane verschtande u bi mit dr Sina go loufe. Bim Buur obe wo so viu überfahrni Pflümli liege hets uviu Wäschbi gha i ha gluegt das ig schnäu verbi bi aber d Sina het no unbedingt öpis müesse schnüffle. Wo mir witer wei ziet d Sina plötzli ihres Bei a u cha fasch nüme loufe "aber Sine was isch los? bisch öpe blöd gläge? chumm mir wei go schpaziere. Si isch es paar Schritt cho u de hetsi wieder schtiu gha u immer wieder das Bei a zoge, i ha Chnochebrächer gschpiut u ihres Bei zwöi drümou hinger use zoge aber es isch nid besser worde u so hei mir haut nume e churze Wög gmacht u si wieder hei. I ha no mou dr Bsitzere vom Figaro aglüte um z Froge was si mit ihm gmacht heige u do git si zur antwort dass si si go loufe u dä Maa wo ne gfüehrt het z schpoht reagiert het u ner vo dene Pflümli gfrässe het - jo jetzt isch aues klar är isch vomene Wäschpi gschtoche worde im Muhh u drum het er nume chüelendi Sache gfrässe. Detektivarbeit beendet u ou d Sina isch gschtoche worde i Fuess u het drum nüme wöue loufe, jetzt füehri si immer uf dere Schtrosse site wos kener Pflümli het u mir passiere di Schteu schnäu schnäu.

Anekdoten mit unseren Langohren

Was ? dir meinet ig söi dr Tierarzt lo cho do frog ig mi für was, di behandle d Esle immer no wie chlini Ross u derbi reagiere die ganz angers, do geit e TA um e Junge Hängscht z Kaschtriere, är frogt "wie schwär isch er öpe? är rächnet Dosis abe bis es zum Gwicht passt u denn schprützt er di ganzi Mängi uf einisch ine u isch denn erschtuhnt we das Hängschtli schtirbt. Mi TA het ou glich agfange mit dr Gwichtsfrog u weni 120kg gseit ha de het er afang für 80kg gä u gluegt wiener Reagiert, är het sini siebe Sache parat gmacht u isch wieder cho luege u je nachdäm wi das Hängschtli reagiert het het wieder für 20kg nochegschprützt u höchscht säute het no dr räschte müesse gä u es hets jede guet überschtande. Nei nei gömer wieder zrügg zum Benj, är überchunnt mitem iverschtäntnis vor Bsitzere jede Mittag e chli Mädesüess über sini Höicops u i cha öich säge es isch sehr sehr ruhig bis üs ufem Hof, u weni am obe mit sim Chübeli chume de luegt är mir entgäge  u wartet schön bis ig dr Schtau zwäg gmacht ha. Es geit üs aune guet u vorauem em Benj u üsne Ohre.

Anekdoten mit unseren Langohren

Hüt hani wieder einisch z Gschpräch mitem Benj siner Bsitzere gsuecht u mir hei zäme hin u här überleit was ächt mit ihm los sigi, i ha ihre vom Mädesüess verzeut wome fasch für aui Wehwehchen cha bruche u si het sich iferschtande erklährt das mir das einisch probiere. Es isch  fasch nid us z haute wener aui 10 Minute schreit u villicht het er würkli irgendwo Schmärze, i hanim am Mittag zwe Prise Mädesüess über sis Müesli gschtröit u bis am obe hani ke Mucks me vonim ghört???? I bi säuber ganz erschtuhnt gsi, cha das würkli si dass er nach einisch Mädesüess dr ganz Nomittag ruhig isch? i wirdes de morn gseh was er macht, i dänke i gibe no einisch am Mittag Mädesüess u denn höri wieder uf u wener de wieder afoht schreie de weiss ig dass er irgendwo Schmärze het u s nid nume bättlet isch gsi. Mängisch muess me e rächte sueche bis me verschteit was mit de Längohre los isch.

Anekdoten mit unseren Langohren

jo jo dr Proffesor Benjamin Balthasar Blüemchen churz Benj gnannt git mir scho z dänke, är het rächti Problem zum frässe u überchunnt drum drümou igweichti Höicops u öpe no chli Gras. D schwierigkeit isch ihm sis Chübeli z gä ohni das di ander s mitüberchöme u vor luter glüschtele Söiferlätsche hei. Aber füre Benj wo 28j. isch schtimmts eifach nid wene irgendwo ischperre bis er fertig gfrässe heig, nei nei dr Herr wott i dr Quarantäneschtation frässe damit er jederzyt de andere is Gras cha fouge, um churz druf wieder cho z bättle um no meh. I cha öich verschpräche esones Organ wie dä het gits nid so schnäu no mou, är jammeret dass me cha meine sis Läbe hangi dervo ab, u we mir zwöi e chli wei ufem Bänkli höckle wiesechs jo für Pensionierti ghört chunnt er ganz noch a Zuun - fixiert üs mit sine Ouge - u foht wieder a mit sim schreie. Mir schteue üsi Hörgrät ab u düe dergliche mir ghöri nüt u är zieht sich wieder is Hüsli zrügg aber immer mit Ouge Kontakt zu üs, kener 10 Minute schpöter widerhout sich das schpieli bises üs z viu wird u mir irgendöpis gö go wärche . Fasch aui siner Zähn waggele u är het ke chraft me zum verbisse u drum läbt er sehr guet mit de Höicops aber was er süsch no wett das hani bis jetzt leider no nid verschtande, är gseht guet us u het sicher ke Hunger.

Anekdoten mit unseren Langohren

I ha äntli dr richtig Platz für d Dana Datooba gfunde u es het langsam aber sicher gheisse abschied z näh, säubverschtäntlich erklähri de Füli immer dass si nid wäg müesse wüu si emänd nid Lieb sige gsi, nei nei aber mi cha nid z ganze Läbe bim Mami bliebe. Es git no viu schöni Plätz für Eseli u dört warte zwe Wallache uf d Dana Datooba, jede Tag hare vom nöie Schtau verzeut u dr Dunja hanis ou erklährt dass ihri Tochter baud geit. D Dunja het das sofort kapiert u si het sich richtig Zickig gä dr Dana gägenüber u so isch di haut zu de andere Esle, mängi Tage het sich Dunja drei vier Schtund äxtra amene angere Ort ufghaute, es isch sehr idrücklich gsi. Jo dr Tag isch cho wos het gheisse Abschied z näh, mir hei zerscht aue Papierkram erledigt u denn simmer go d Dana hole u hei du scho chli Druck usgüebt damit si schnäu verlade isch gsi bevor si überhoupt rächt gmerkt het um was es geit. Hand ufs Härz wär verloht scho gärn sis Mami, sini Herde ., di vertrouti Umgäbig u schliesslich Miiiiiiiiiii? D Dunja isch dr ganz Nomitag im obere Schtau bliebe u het immer wieder gröchelet u gluegt ob ächt dr Transporter ihri Dana wieder bringi, üs beidne isches glich schwär gsi ums Härz. Am andere morge hanere sofort dii guete Nachrichte überbrocht das d Dana dr Transport guet überschtande heig u sich uf dr Aup scho mit dene zwe Wallache zäme gfunde heig. Nach 2 Std isch ihri nöii Bsitzere scho emou allei mit ihre go loufe u si het das super gmacht, dr Schtau isch äbe no nid fertig u drum isch d Dana zerscht ou no uf d Aup. Aber irgendwie hets mit dene Froue wo d Aup bewirtschaften nid so rächt klappet, obwou si am afang gseit hei si dörfi d Dana jederzyt go bsueche isches bim zwöitemou scho zviu gsi u drum het si di drei Esle nachere Wuche hei ghout. Jetzt schlofe haut di drü no für ne Monnet im Chueschtau bis ihri Weidehütte gflickt isch, d Dana macht das super guet es isch eifach e Schatz u ig ha natürli uuu fröid weni nume gueti Nachrichte ghöre.

  • Index
  • » Neueste Beiträge

Board Info

Board Statistiken
 
Gesamtzahl Themen:
145
Gesamtzahl Umfragen:
5
Gesamtzahl Beiträge:
1166
Beiträge diese Woche:
1
Benutzer-Info
 
Gesamtzahl Benutzer:
727
Neuester Benutzer:
lui