Anmelden
  • Index
  • » Neueste Beiträge

Neueste Beiträge

Anekdoten mit unseren Langohren

Wieni jo scho verzeut ha isch üsi Hündin Sina rächt aut u het doch jede Tag meh müeh gha mit go loufe, zwüsche dine het si gschwanket oder isch sogar eifach umgheit. We mir hei wöue go loufe het si scho nach 200 Meter gseit "i ma nümme", im Januar wär si 12 jährig worde u das isch es schöns auter für ne Bärnerseenehündin. Z schlimmschte aber isch gsi überau wosi gläge isch het si ganz viu Urin verlohre so dass ig jede Tag di Sache ha müesse wächsle u ou si isch nümme wou gsi u so hani am Zischtig mit mim Maa diskutiert u mir si üs einig worde dass es Zyt isch d Sina z erlöse. Am andere Tag bini nachem Mittag zu üsem letschte Schpaziergang gschtartet, es isch wahnsiinig idrücklich gsi, i ha eigentlich im Sinn gha ihre no so viu z säge wie si e super Hündin sig gsi  u si üs aui di Johr soviu fröid gmacht het. Aber es isch unmüglich gsi, jedesmou weni ha wöue afo rede hani so müesse briegge dass ig ke Wort use brocht ha do isch d Sina jewils ihre Chopf a mim Bei cho riebe zum säge "es isch guet so es schtimmt", grad wie jetzt bim schriebe loufe d Träne numme so abe. Dr ganz Wäg bis zum Parkplatz isch si au paar Meter bliebe schtoh u het i d Ferni gluegt, si het links u rächts vom Wäg aues no einisch agluegt so richtig zum Abschied näh. Mir si zum Tierarzt gfahre, ruhig isch si ine u är het mir no aues wöue erklähre, i ha abgwunke u gseit "dir chöid nid mit mir rede miner Ohre si zue, ig weiss  wies geit" u när hani mi numme no uf d Sina konzentriert u se gschtrichelet bis aues verbi isch gsi. U wieder het er mir wöue säge si sig Tod, i ha gseit "ig weiss aber i bi no nid fertig mit Abschied näh" u do het er sich zrügg zoge u mir d Zyt gäh. I ha scho mänge Hung gha aber no nie eini wo so viu  gred het u jedesmou weni de Lüt gseit ha si wöu immer z letschte Wort ha het si bäuet u somit z letschte Wort gha, adie Sina u danke für aues.

Anekdoten mit unseren Langohren

Nei aber ou isch das e Kataschtrofe Wuche, am Sunndig het dr Bosco wieder wäge dr Cindy ghängschtelet u so hani am Nomittag dänkt i nähmse mit dr Soraya grad mit um mitem Hung go schpaziere so heig dr Bosco Rueh. I ha z grosse Töri für di andere ufdoh u bi go schpaziere, woni nachere Schtund wieder dehei bi gsi bini grad i ober Schtau um d Bouele ga zämeläse u früsch i z schtröie. Mis Mandli macht z gliche im ungere Schtau u schickt de di chline Esle ufe - u so hani gwartet - u scho isch dr Benj u d Ronja cho. "Hallo Babettli chumm hei " hani grüeft u do hase ganz langsam dr Wäg gseh ufeschliche. "Aber Babettli hesch ke Hunger ? hase gfrogt, wo si g a n z langsam näbe mir düre geit hani gseh dass si überau am Chopf blüetet."Herrjeses was isch de mit dir? sofort hani se ungersuecht u gseh dass di Verletzige numme am Chopf si, i bi go Betadin, Gaseblätzli u Saubi hole u hase ganz süfferli so guet si mi het lo mache putzt u gsaubet u derbi gmerkt dass si e Schock het. I ha gschtudiert was me bi Schock git aber irgendwie bini grad säuber näbe de Schueh gschtande u so hani ere Hömeopatin aglüte u di het nach mine Schilterige z richtige Mittu gnennt wore ha chönne gä. Jo was isch passiert? es het numme ei erklährig gä dr Bosco het si Fruscht wüu ig mit dr rössige Cindy wäg bi z Babettli vertöfflet. Er het se wöue beschtige u si het grad e Bürzliboum gmacht. Wo sich Babette langsam dank de Mitteli beruhigt het simmer ane Geburtstag, aber i bi gar nid ruhig gsi u ha baud wieder hei wöue. Am angere morge woni i Schtau bi hani gseh wiesi dr Chopf het lo hange u numme z Churzfuetter gfrässe het aber ke Höi, auso we e Esu nüt frisst isch das Alarmschtuefe rot. Mir isch ufgfaue dass si beidsitig am Hausafang dick gschwulle isch u dr Chopf nid het chönne dräie woni mit Gudeli glöckt ha. Aui 2 Schtund hetsi nöiii Chügeli übercho u i ha e Oschteopat gsuecht, mitem Tierschpitau gredt aber genau die wo mitem mobile Röntgegrät arbeitet het am Mändig ke Zyt gha u am Zischtig frei. Super es het aues klappet wie am Schnüerrli, nei i ha ke Tierarzt lo cho dä hät sowiso nüt angers chönne feschtschteue aus ig u di Wundpfleg channi aus Pferdesamariter säuber. I hase im Schtau glo u ha beobachtet wie si sich ganz langsam u behuetsam bewegt het, am angere Tag isch äntli Tierärztin cho Röntge. Zerscht emou wie söu ig ächt z Babettli fixiere wese weder am Chopf no Haus darf alänge weme nid weiss ob si öpis broche het? I hase ganz i Egge drückt u ruhig ufse igred u so het si chönne schtäche, langsam isch si ruhig worde u mir hei aues parat gmacht zum Röntge, e Schurz u Häntsche für mi u denn d Eselin i di richtigi Position bringe. Vom Chopf dr Haus ab e schöni gradi Linie zum Rügge, ei Hang ungerem Chinni di angere um d Röntgeplatte hingerdra z hebe, do het mir d Babette ihres verletzte Ohr a mini Backe drückt u so hani grad chönne gschbühre obs heiss sig, gottlob nid si lohts nämli nid lo alänge är hets fasch abgrisse. Ok z Biud isch guet worde numme hetme gseh dass dr zwöit Würbu chli useschteit, isch ächt das normau bi de Esle? D Tieräztin het im Internet es verglichsbiud gsuecht isch aber nid fündig worde do het si gmeint mi chönnt doch eifach vomene angere Esu no es Biud mache, wär würd das lo gscheh ohni z Sediere? Natürli d Cindy di macht aues mit, i hase i üses Böxli gnoh u re d Sache erklährt, si isch schön anegschtande u denn no einisch z gliche prozedere. Ei Hang unger z Chini u mit dr angere d Platte hebe, do hets gheisse dr Chopf vor Cindy isch z höch obe - jo bini öpe e Tintefisch mit mehrere Arme? aber schliesslich bini e Frou u di hei doch immer e Idee auso bini mit mim Chini dr Cindy zwüsche d Ohre u hase abedrückt bis d Tierärztin gseit het es isch guet. Wome di Biuder mitenang vergliche het hei beidi Wirbusüle glich usgseh auso isch nüt broche aber e Oschteopatin muess doch no cho. Klar isch no einisch e Tag vergange bis si Zyt het gha aber hüt isch si cho u het gmerkt dass e Würbu verschobe isch gsi auso het d Babette unwahrschinlich Glück gha isch di ganzi Gschicht guet use cho. Dr Bosco muess si leider umplaziere i bi nümme gwillt in no bis zur Wiehnacht z betröie, bi 10 Schtuetene isch immer di einti oder angeri rössig u er dräit im rote.

Anekdoten mit unseren Langohren

Auso i has eifach nid wöue igseh dass ig sött Esle abboue aber sit dr Bosco do isch u aues drunter u drüber geit ani fasch nüme warte bis di 4 Esle um d Wiehnacht gö. Obwou dr vorder Bsitzer gseit het dr Bosco reagieri nid uf d Schtuete, dräit er bi üs fasch düre u het doch probiert di chlini 89cm Cindy z decke. I bi i dr Wohnig gsi u ha plötzli d Cindy panisch ghöre schreie - klar bini sofort use go luege was los isch u do hani gseh dass dr Bosco di chlini Cindy über di ganzi Weid gjagt het, di armi het noch und noch mit beidne Bei hinger use gschlage aber si isch dä gross Möff eifach nid los worde u so hani derzwüsche müesse. Es bliebt mir eifach nüt angers übrig aus zwe Gruppe z mache, di chline u rössige si abtrennt vo de angere es isch schad aber es darf eifach nid si dass dä 400kg schwär Esu uf di chline schtigt.
Woni wieder einisch mit Esu u Hung unterwägs bi gsi u überau di dürre Pflanze gseh ha wo zum Teil sehr luschtig usgseh hani plötzli e luschtegi Idee gha. E Buur het 16 Schter Holz am Wäg glageret, schöni Rugle in Reih und Glied, i ha Moos ab de Schteine gno u wienes Chüssi ufene Rugu gleit u so hani di dürre Sache schön chönne dri schtecke. Es gseht jedes vo dene 5 Deko ganz anders us, mängisch weni e Zweig mit schöne Farbige Bletter abknickt ha si vor luter schüttle aui Bletter abgheit u i ha nume no es Gerippe i dr Hand gha. Oder dr Esu het gmeint äs sig für ihn u het fröidig dervo gfrässe weni abglänkt bi gsi wüui wieder öpis schöns gseh ha. Einisch hani e Ascht mit sehr grosse Bletter gseh u us däm hani dänkt chönnti grad e Wöschhänki mache, auso hani no zwe Aschtgable mitgno, zerscht hani die i d Rugle gschteckt u denn dä Ascht druf, drunter hets ou Moos u schöni roti Erdbeeribletter. Es isch schön z gseh wie d Schpaziergänger druf reagiere u mängisch isch öpis nöis igschteckt wo nid vo mir isch. Dr Wind het ou si fröid u bloset d Bletter furt u d Vögu frässe d Beeri vo de Escht, es macht nüt ou we me nid weiss wie lang di Deko z beschtuhne isch schliesslich isch aues vergänglich.

Anekdoten mit unseren Langohren

D Bsitzere vor Nely, Aisha u em Figaro het sich no e grosse Wallach kouft u dä schteit jetzt natürli ou no bi üs bis si im Dezämber - Januar äntli i ihres Huus cha zügle. I bi mir jo l35cm grossi Esle gwohnt gsi u dr Bosco misst l40cm aber irgendwie chöme mir di paar Zentimeter riesig vor. Das isch e Elefant u ke Esu meh, aues a däm Tier isch mega riesig u ne Chraft het er, aues wo 18 Johr ghaute het ou bi de Ross geit plötzli kaputt. Do probierter im Schtau über d z Wändli dr Darinka ihre Sauzläckschtei z frässe, drückt derbi so fescht abe dass es grad d Schrube dür d öffnige schriesst. I bi gotte froh dass er nid weiss wieviu Chraft er überhout het, nei nei ig wott nid Jammere är isch e ganz e liebe aber eifach riesig. Ohni Chötteli go loufe geit gar nid, mi mane eifach nid haute, ei Tag hets Bsitzere probiert u es isch nid lang gange u dr Bosco isch wieder dehei gsi u si no lang nid. Natürli isch si ne cho hole u isch no einisch gange aber wohlweislich dasmou mit Chötteli über d Nase. Woni mis chline Grosschind i de Ferie ha gha hani immer gluegt wo dr Bosco sig u de simmer i anger Schtau go schaffe, zwüsche düre hani immer wieder usem Schtau gluegt was das Chindli mache u es isch nid lang gange isch dä riesig Esu hinger ihm gschtande u het ne abgschnüfflet. Wo dr Lenjo ihn het wöue schtrichele hani gseit "das  geit nid si Chopf isch viu z wyt obe" do het dr Bosco gmeint "i cha dänk mi Chopf abehebe u de cha mi dr Lenjo ou schtrichele" u genauso het ers gmacht.

Anekdoten mit unseren Langohren

I ha scho so viu verzeut dass ig  gar nümme weiss was dir so aues wüsst vo minere Esufarm, auso mängisch goni is Autersheim go Musige mit minere Zithere. Wies es so isch weme immer mitem gliche Inschtrumänt schpiut tönts ufts  mou aues glich u drum verzeui zwüschedüre vo mine Esle u di aute Lüt lose ganz gschpannt zue. Woni wieder  bine bi gsi hei si gfrogt ob si nid einisch dörfi cho d Eseli bsueche? aber sicher scho di Langohre fröie sich nämmli über jede Bsuech. Es isch nid lang gange u e ganze Bus vou Heimbewohner si cho uii isch das es gschnäder gsi, uf einere Site si d Esle i Reih und Glied gschtande u uf dr andere Site si di Bewohner mit ihrne Rouschtüu u Rollatore gsi u aui hei grossi Ouge gmacht. D Frog het me sich chönne schteue wär do jetzt wär genau Beobachtet, d Lüt wäre ganz gärn mitts i di Herde go Knuddle aber das isch doch nid ganz eso eifach gsi. I ha di liebe Lüt uf üse Sitzplatz gführt, wo aui es Plätzli hei gha bini go d Cindy di chlini Muus  hole u di isch ganz säubverschtäntlich zwüsche dene Gfährt gschtande u het sich lo schtrichele derbi dr Chopf immer e chli witer ufe Tisch gschtreckt u het gmeint mir merkis nid, ha ha ha. Hei hei di Lüt fröid gha a däm Usflug u do hani verschproche i chömi de mit dr Cindy si cho bsueche wes nümme so heiss sig. Letschte Zitschtig hani grad gäbig Zyt gha u so hani mi ufe Wäg gmacht mit dr Cindy go di Liebe Lüt im Autersheim go bsueche, das heisst zerscht vo mir z Bärgli abe -dür Moutier . u de wieder z Bärgli ufe zum Heim. Es si no nid viu Lüt ume gsi aber so hani besser für jedes einzelne guet  Zyt gha u di fröid wome i dene Ouge vo de aute Lüt het gse isch eifach mega schön gsi u d Cindy hets sowiso gnosse wesi so im mittupunkt isch gsi. Jedi Person wo uf Terasse cho isch het aus erschts gfrogt "dreit si? überchunnt si es Jungs?" nei nei d Cindy dreit numme z Mittagässe mitt sich ume, d Schwöschter het vo aune es Foti mit dr Cindy gmacht - es isch würkli e schöne Nomittag gsi. Nach anderthaub Schtund hei mir üs wieder müesse ufe Heiwäg mache wodoch e Schtund het duret.

Anekdoten mit unseren Langohren

Mir hei üs jo füre Umzug am Tag des Pferdes in Solothurn agmäudet u de heissts immer "bitte d Tier schön zwäg mache" jo aber wie? schliesslich wott ig miner Esle nid verchleide u se zum Clohn mache. I ha hin u här überleit u plötzli hani e Idee gha, i ha e Frou lehre kenne wo ou gärn schnurpfet u mir hei üs zäme do, im Gartehüsli simmer zäme a zwene Näimaschine ghocket u hei mini Idee i d Tat umgsetzt. Zerscht hani dr Germain mini Idee erklährt u mir hei gradiburgeret wiemer am beschte näie das es guet chunnt, si het no ihri Sunndighose wore nüme gange si gschbändet u mini Schwiegerdochter het zwöi schwarzi Lindüecher übrig gha,  es isch nid unbedingt dr richtig Schtoff gsi aber derfür gratis. Mir hei das Fixlintuech verschnitte, derbi hani müesse ufpasse dass es vier Dechine gä het, denn isches mitemene wisse Bändeli igfasset worde. Het scho nid schlächt usgseh, denn isch es Schtück Vorhang drüber cho wott grad wie Schpitze isch u das hei mir du vo Hang müesse anäie. Mir hei no vorne u hinger Schnüerli agnäit um di Dechi am Esu azbinde, denn si d Ohre dra cho, natürli ou schwarz mit Vorhang dra u am Schpitz hani vo dene Vorhängschnüer lo usehange. I ha mis wärch agluegt u di Ohre si nid so gsi wienie mirs vorgschteut ha, auso wieder ufmache - u jetzt? weni doch di Schnüer diräckt i d Noht vo dene Ohre dri näie de müesst doch das se so usgseh- we dr Esu d Ohre dobe het de hange di Schnüerli schön nidsi aber we si d Ohre chli sitwärts use hei de mache di Schnüerli grad wiene Räche. U i cha öich säge genau wieni mir das vorgschteut ha hets när usgseh u mir hei a däm 5 Kilometer länge Umzug sehr sehr viu Applous dörfe iheimsche für di schön zwäggmachte Eseli, churz gseit di Schtunde hei sich uf aui fäu glohnt.

Anekdoten mit unseren Langohren

I ha zwe Fründinnen wo sit Johre zumene verwarloste Esuwallach luege wonere Samichlouszunft ghört u di hei dä eifach bimene Buur igschteut gha u ds ganze Johr hets sich nie öper um dä Esu kümmeret aber we de Samichlouszyt cho isch si di liebe Samichlöis cho u hei vo däm Eseli verlangt das er drü Tag super söu mitschpiele u dä Löu hets de no gmacht. Sit di zwe Froue zuenim luege geits ihm guet u är darf es Esugrächts Läbe füere, är heisst Balzli, jedes Johr we de di Samichlouszyt verbi isch het dä arm Kärli ds ganze Füdli offe jo grad bluedig vom viele Ahängerfahre. Obwou di Froue äxtra zwöi Seili hei mitgäh es churzes um ihn im Ahänger az binde u de z länge um mit ihm z loufe aber si schaffes nid dä Esu richtig z schütze u di Froue dörfe de wieder drei Wuche Wundpfleg mache bis aues verheilet isch. Us däm Grund bini a mini Näimaschine ghocket u ha e wundervolli Dechi zum Samichlouse gnäit, i ha es Linelintuech gno  rote Schtoff drübergleit u denn es Rändli vom Lintuech umeglitzt u so hets e wisse Rand gä u z wichtigschte isch dr Füdischutz isch grad a dere Dechi agnäit u de merke si gar nid das di Deko Dechi eigentlich e Schutz für e Esu isch. We de di Froue dr Balzli usegäh lege si nim eifach di Dechi a u di bliebt druf biser wieder Hei chunnt u so ischer gschützt u mir hei gwunne für so öpis chame doch guet zwe Tag a d Näimaschine sitze find ig u zahle chame das sowieso nid.

Anekdoten mit unseren Langohren

.Im Früelig hani afo Waudäperi sammle da ig jo mit dr aute Sina nume no langsam vorwärts chumme, ihre isches nid rächt gsi u si het aupot gseit "chumm de öpe", es het nid soviu gä aber doch für jedes Eseli 3 bis 4 u das zwöimou am Tag u das het gschmöckt. Wo si langsam fertig si gsi hei d Himmbeeri agfange aber es het nid viu gä u denn hei d Brombeeri agfange u das het gha sooooooo viu u do hani gseit "die si jetzt für mi" . Sack u Seckli vou hani zwöi mou am Tag hei gno u grad i d Gfrüehri do damit ig de chönni Gonfi mache wes vo dr Mängi h r rändieri. E Frou het gmeint si legi si immer zerscht ufenes Chuechebläch u denn für es paar Minute i d Gfrühri de chömmi di Würmli use. W A S ? Würmli i de Beeri das geit jo gar nid auso bini sofort hei go luege u woni de Seck ufdo ha si überau gfrohrni Würmli dra gsi igitt di Beeri cha ha wär wott abr ig mache sicher nid dermit Gonfi. Zyt vom  Holunder isch cho u do hani zerscht Sirup gmacht u mitem nöchschte hani dänkt Gonfi z mache u ha zu mim Mandli gseit "für d Gonfi müessi mir di Beeri chli besser putze" u so simmer 3 Schtund do gsässe u hei erläse. Mit dr Zyt hei d Finger afo chläbe u so hani es Chübeli Wasser zuemer gno u ha so chönne d Händ zwüschedri schwänke, nach es paar mou schwänke hani ufds mou gseh das es Würmli a mine Finger het, nei nei das darf nid si hets emänd do drin ou Würmli? Es isch grad Schtauzyt gsi u drum hani gseit "jetzt legi di Beeri is Wasser u de gsehmer obs Madli drin het" mir si go d Esle füettere u womer dermit fertig si gsi bini wieder zu de Beeri ha aber kes Würmli ufem Wasser gseh. I ha se is Löcherbecki glährt u was isch füre cho? dr ganz Bode vom Becki isch vou Madli gsi u mis Mandli het gmeint "jetzt chasch doch Gonfi mache d Würmli si jo jetzt aui dusse" schpinsch das Biud chani nümme vergässe nei nei i schbände di Holunderbeeri gärn de Hühner di hei fröid wes no Fleich dra het". I ha mir gschwore numme no vo Frücht Gonfi z mache wome guet dri gseht u sicher isch das ke Fleisch drin läbt.

Anekdoten mit unseren Langohren

Wieni scho mehrmous erklährt ha dünkt mi d Esle z beobachte sig fasch z wichtigschte a dr ganze Hautig, mir si jo es paar Tag wäg gsi u woni wieder dehei bi gsi hets mi dünkt mitem Figaro schtimme öpis nid. Woni am Mittag wägem Rägewätter hau wöue Höi fuettere schtatt Weidegang si aui usserdem Figaro bim ungere Schtau gsi, komisch woisch de dä ganz allei ? I bine go sueche u hane ganz allei im obere Schtau gfunde i hanim haut dört e chli Höi gä u bi du säuber go ässe, di ganzi Truppe isch bim ungere Schtau ume glümlet u si si nid Motiwiert gsi im Räge ume z loufe, dr Figaro isch bis i d Mittuschtation cho u het dört längwilig us dr Wösch gluegt. Hmm irgendöpis schtimmt nid mit ihm, är isch angersch aus süsch. Klar är isch jo nid blöd u het scho lang gmerkt dass dr Benj immer im Verschteckte sini igweichte Höicops überchunnt, schpiut er emänd aute Esu? I ha Bsitzere gfrogt ob emänd öpis vorgfaue sig wo mir abwäsend sige gsi u si het gmeint är sig scho dr vorder Tag so komisch gsi u heig nid wöue sis Höi frässe. Detektiv arbeit isch witer gange, aui hei du am Nomittag no chli uf d Weid chönne u do hani gseh dass er sis Höi am Mittag nid gfrässe het aber im Gras ischer wieder normau gsi. Am obe het er siner Rüebli u Oepfuschtückli gfrässe aber vom Höi het er wieder nid wöue u isch go Schtrou frässe, auso fasse mir zäme Gras, Ruebli u Oepfu si chüel -  Schtroh weiss ig nid u Höi ou nid has no nie säuber gässe, es Zahnproblem chas nid si. Wone so frogend agluegt ha u är do gschtande isch u es paar Schtrohhaume us sine Muhwinkle ghanget si bini zuenim i d Box u hase wöue use zie - är het sich haub abdräit u gmeint "läng mi nid a" jo aber Figaro i wett eifach wüsse was du hesch? hani gantwortet u versuecht sin Chopf go azlänge - do het er sich komplett dräit u i ha nume no sis Hingerteil dörfe aluege. D Atmig isch normau gsi u dr Buch het ou ruhig usgseh ," Figaro säg doch was nid i dr Ordnig isch mit dir? i has no einisch probiert näbe ihm düre z go do het er sis Bei azoge u gseit "we mi nid i Rueh losch de Schtüpfi i di" ok i hane verschtande u bi mit dr Sina go loufe. Bim Buur obe wo so viu überfahrni Pflümli liege hets uviu Wäschbi gha i ha gluegt das ig schnäu verbi bi aber d Sina het no unbedingt öpis müesse schnüffle. Wo mir witer wei ziet d Sina plötzli ihres Bei a u cha fasch nüme loufe "aber Sine was isch los? bisch öpe blöd gläge? chumm mir wei go schpaziere. Si isch es paar Schritt cho u de hetsi wieder schtiu gha u immer wieder das Bei a zoge, i ha Chnochebrächer gschpiut u ihres Bei zwöi drümou hinger use zoge aber es isch nid besser worde u so hei mir haut nume e churze Wög gmacht u si wieder hei. I ha no mou dr Bsitzere vom Figaro aglüte um z Froge was si mit ihm gmacht heige u do git si zur antwort dass si si go loufe u dä Maa wo ne gfüehrt het z schpoht reagiert het u ner vo dene Pflümli gfrässe het - jo jetzt isch aues klar är isch vomene Wäschpi gschtoche worde im Muhh u drum het er nume chüelendi Sache gfrässe. Detektivarbeit beendet u ou d Sina isch gschtoche worde i Fuess u het drum nüme wöue loufe, jetzt füehri si immer uf dere Schtrosse site wos kener Pflümli het u mir passiere di Schteu schnäu schnäu.

Anekdoten mit unseren Langohren

Was ? dir meinet ig söi dr Tierarzt lo cho do frog ig mi für was, di behandle d Esle immer no wie chlini Ross u derbi reagiere die ganz angers, do geit e TA um e Junge Hängscht z Kaschtriere, är frogt "wie schwär isch er öpe? är rächnet Dosis abe bis es zum Gwicht passt u denn schprützt er di ganzi Mängi uf einisch ine u isch denn erschtuhnt we das Hängschtli schtirbt. Mi TA het ou glich agfange mit dr Gwichtsfrog u weni 120kg gseit ha de het er afang für 80kg gä u gluegt wiener Reagiert, är het sini siebe Sache parat gmacht u isch wieder cho luege u je nachdäm wi das Hängschtli reagiert het het wieder für 20kg nochegschprützt u höchscht säute het no dr räschte müesse gä u es hets jede guet überschtande. Nei nei gömer wieder zrügg zum Benj, är überchunnt mitem iverschtäntnis vor Bsitzere jede Mittag e chli Mädesüess über sini Höicops u i cha öich säge es isch sehr sehr ruhig bis üs ufem Hof, u weni am obe mit sim Chübeli chume de luegt är mir entgäge  u wartet schön bis ig dr Schtau zwäg gmacht ha. Es geit üs aune guet u vorauem em Benj u üsne Ohre.

Anekdoten mit unseren Langohren

Hüt hani wieder einisch z Gschpräch mitem Benj siner Bsitzere gsuecht u mir hei zäme hin u här überleit was ächt mit ihm los sigi, i ha ihre vom Mädesüess verzeut wome fasch für aui Wehwehchen cha bruche u si het sich iferschtande erklährt das mir das einisch probiere. Es isch  fasch nid us z haute wener aui 10 Minute schreit u villicht het er würkli irgendwo Schmärze, i hanim am Mittag zwe Prise Mädesüess über sis Müesli gschtröit u bis am obe hani ke Mucks me vonim ghört???? I bi säuber ganz erschtuhnt gsi, cha das würkli si dass er nach einisch Mädesüess dr ganz Nomittag ruhig isch? i wirdes de morn gseh was er macht, i dänke i gibe no einisch am Mittag Mädesüess u denn höri wieder uf u wener de wieder afoht schreie de weiss ig dass er irgendwo Schmärze het u s nid nume bättlet isch gsi. Mängisch muess me e rächte sueche bis me verschteit was mit de Längohre los isch.

Anekdoten mit unseren Langohren

jo jo dr Proffesor Benjamin Balthasar Blüemchen churz Benj gnannt git mir scho z dänke, är het rächti Problem zum frässe u überchunnt drum drümou igweichti Höicops u öpe no chli Gras. D schwierigkeit isch ihm sis Chübeli z gä ohni das di ander s mitüberchöme u vor luter glüschtele Söiferlätsche hei. Aber füre Benj wo 28j. isch schtimmts eifach nid wene irgendwo ischperre bis er fertig gfrässe heig, nei nei dr Herr wott i dr Quarantäneschtation frässe damit er jederzyt de andere is Gras cha fouge, um churz druf wieder cho z bättle um no meh. I cha öich verschpräche esones Organ wie dä het gits nid so schnäu no mou, är jammeret dass me cha meine sis Läbe hangi dervo ab, u we mir zwöi e chli wei ufem Bänkli höckle wiesechs jo für Pensionierti ghört chunnt er ganz noch a Zuun - fixiert üs mit sine Ouge - u foht wieder a mit sim schreie. Mir schteue üsi Hörgrät ab u düe dergliche mir ghöri nüt u är zieht sich wieder is Hüsli zrügg aber immer mit Ouge Kontakt zu üs, kener 10 Minute schpöter widerhout sich das schpieli bises üs z viu wird u mir irgendöpis gö go wärche . Fasch aui siner Zähn waggele u är het ke chraft me zum verbisse u drum läbt er sehr guet mit de Höicops aber was er süsch no wett das hani bis jetzt leider no nid verschtande, är gseht guet us u het sicher ke Hunger.

Anekdoten mit unseren Langohren

I ha äntli dr richtig Platz für d Dana Datooba gfunde u es het langsam aber sicher gheisse abschied z näh, säubverschtäntlich erklähri de Füli immer dass si nid wäg müesse wüu si emänd nid Lieb sige gsi, nei nei aber mi cha nid z ganze Läbe bim Mami bliebe. Es git no viu schöni Plätz für Eseli u dört warte zwe Wallache uf d Dana Datooba, jede Tag hare vom nöie Schtau verzeut u dr Dunja hanis ou erklährt dass ihri Tochter baud geit. D Dunja het das sofort kapiert u si het sich richtig Zickig gä dr Dana gägenüber u so isch di haut zu de andere Esle, mängi Tage het sich Dunja drei vier Schtund äxtra amene angere Ort ufghaute, es isch sehr idrücklich gsi. Jo dr Tag isch cho wos het gheisse Abschied z näh, mir hei zerscht aue Papierkram erledigt u denn simmer go d Dana hole u hei du scho chli Druck usgüebt damit si schnäu verlade isch gsi bevor si überhoupt rächt gmerkt het um was es geit. Hand ufs Härz wär verloht scho gärn sis Mami, sini Herde ., di vertrouti Umgäbig u schliesslich Miiiiiiiiiii? D Dunja isch dr ganz Nomitag im obere Schtau bliebe u het immer wieder gröchelet u gluegt ob ächt dr Transporter ihri Dana wieder bringi, üs beidne isches glich schwär gsi ums Härz. Am andere morge hanere sofort dii guete Nachrichte überbrocht das d Dana dr Transport guet überschtande heig u sich uf dr Aup scho mit dene zwe Wallache zäme gfunde heig. Nach 2 Std isch ihri nöii Bsitzere scho emou allei mit ihre go loufe u si het das super gmacht, dr Schtau isch äbe no nid fertig u drum isch d Dana zerscht ou no uf d Aup. Aber irgendwie hets mit dene Froue wo d Aup bewirtschaften nid so rächt klappet, obwou si am afang gseit hei si dörfi d Dana jederzyt go bsueche isches bim zwöitemou scho zviu gsi u drum het si di drei Esle nachere Wuche hei ghout. Jetzt schlofe haut di drü no für ne Monnet im Chueschtau bis ihri Weidehütte gflickt isch, d Dana macht das super guet es isch eifach e Schatz u ig ha natürli uuu fröid weni nume gueti Nachrichte ghöre.

Anekdoten mit unseren Langohren

Wo di Eseli ufem Trekking si gsi isch do dehei ganz e komischi Schtimmig gsi, obwou i es paarmou erklährt ha dass si nume uf Trekking sige u de wieder hei chömi heisis gloub ig nid rächt gloubt. Di ganzi Wuche het kene grüeft u si si mehrheitlich ganz verlohre ume gschtande es et eifach nid gschtume für se, wosi am Fritig obe aui wieder i ihrne Boxe gschtande si het Dunja ganz komischi Grüsch vo sch gä " Uuuuuhhh uuuhhh  uuuhh" d übersetzig "äntli simer aui wieder vereint. D Wuche druf isches chlises Grüppli vo Moutier bis Röthebach gwanderet äbe grad dört hi wo si de abem Winter wärde Wohne we d Wohnig vo dr Bsitzere bouet isch, nach 7 Johr wärde si d Esufarm verloh, dass wird de für aui sehr truurig si. Wesi aube so vomene Trekking Heichöme losi gärn de Chinder zue was si so aues erläbt hei, bim erschte Trekking si si düre Waud u dört si zwe Tanne i de andere Böim ghanget u di Chinder wo z Neli u d Inca hei gfüehrt si eifach unger düre. Wo d Aisha das gseh het het si dänkt i go mim Fründineli grad noche u isch doch tatsächlich unger dere Tanne verkeilet gsi das si nüme vorwärts u ou nüme rückwärts het chönne. Di zwöi erschte Eseli si 1m08cm gsi u d Aisha misst 1m33cm u das isch eidüdig z gross gsi u so isch ine nüt angers übrig bliebe aus d Sache us de Seck uf Aishas rügge z näh bis si nüme verkeilet isch gsi.   Bim zwöite Trekking het es ungübts Chind mitem Neli übere Tierschtopp wöue wo äxtra es Brätt am Rand het gha, jo z Neli ohni Gepäck hät scho Platz gha aber si isch mite ganze Täsche natürli viu breiter gsi u isch mit ihrne Hingerbei dri gheit. Gottlob isch si e Esu, si isch nämli ganz ruhig bliebe u het gwartet bis me se zerscht vom Gepäck u när us dere gfährliche Situation befreit het u Gott sei dank es het ihre nüt gmacht. Das zeigt eifach wieder das me d Ouge überau muess ha u nüt säubverschtäntlich isch u me immer ou für di andere muess dänke, aber gottlob überwiege di luschtige momänte.

Anekdoten mit unseren Langohren

Es isch wieder einisch Zyt gsi dass d Sandra mit Chinder ufenes Trekking isch, si het sich entschlosse ou Darinka u d Inca vo mir mit z näh, dr Figaro het es Wägeli dörfe zieh u so si si am Zischtig los. D Yakari isch di ganzi Zyt näbem Mami gschtande u het gluegt was si do für komischi Sache am Mami ufe Rügge binde, i hanere versuecht z erklähre dass ihres Mami für es paar Tag mit de Chinder uf Trekking göngi u si allei müessi bi de angere dehei bliebe, si het gar nid wöue zuelose. Wo di Chinder, Erwachsne u d Esle si zwäg gsi hani d Yakari ine Box gschperrt, i ha nid wöue dass si emänd no dürs Schtromband em Mami hingernoche göngi. Sobaud me nüme gseh u ghört het vo dr Gruppe hase wieder usegloh u si isch überau go z Mami sueche, obwou si scho 2 j. isch hanget si haut no schüüli an ihm. Am Fritig obe si si wieder heicho u mir hei d Inca wo übrigens zerscht mou uf Trekking mit isch grad vor dr Box vo ihrem Gepäck befreit u d Yakari isch schier über d Boxewand gumpet. Am andere morge isch aues wieder guet gsi, d Yakari isch selig gsi dass si ihres Mami wieder het gha, Trekking Esle dass si wieder imene Schtroubett hei chöne schlofe. Nachem Mittag hei d Chinder d Eseli  parat gmacht um d Eutere am Bahnhof go z hole, d Yakari isch ganz noch bim Mami gschtande u het z verschtoh gä "dasmou chumi mit nume dass das klar isch" u säubverschtäntlich het simit dörfe ufes mini Trekking.

Anekdoten mit unseren Langohren

Wieni jo scho verzeut ha brüete jedes Johr Schwaubeli im obere Schtau u ou das Johr het si wieder afo Eier lege. Glichzitig isch ou e Huusrotschwanz i Schtau gschpaziert "hei du we de scho Flügu hesch de würd ig dir arote z Flüge süsch wirsch emänd no vomene Esu vertschaupet". I ha mir nid witer Gedanke gmacht schliesslich hets jo drü Vogunäschtli i däm Schtau. Ei morge bim mischte chunnt d Frou Schwaube ine setzt sich ufe Näschtlirand u luegt ganz verdatteret dri, si het ihre Chopf ganz schregg gha u i das Näschtli gluegt. Was het si ächt?? si het jo no gar nid afo brüete? I has nid verschtande u es paar Tag schpöter hani Schwanzfädere gse, "aha jetzt isch si am brüete de isch jo aues guet. Schpöter hani ufzmou gseh das d r Huusrotschwanz het afo fuettere aber ou ds Schwaubeli, hä '?? was isch de das? langsam aber sicher bini druuscho bi dere Gschicht. Dr Huusrotschwanz het ihri Eier is Schwaubenäscht gleit drum het den z Schwaubeli so komisch gluegt, wo mir üsi Esuwanderig hei gha hei d Teilnähmer das Wunder säuber chönne luege, zwöi verschiedeni Sorte Jungvögu hei übere Näschtrand gluegt. Chumm hei si afo ufe Rand z sitze isch scho d Huusrotschwanzmueter mit eim ums andere dervo gfloge aber überau im Schtau si Jungvögu ghocket u hei ufe abtransport gwartet. 2 wo inere Boxe am Bode ghöcklet si hani mitem Chröieli i d höchi glüpft nid das si öpe no vertschaupet wärdi. d Schwaubemueter isch leider z schpäht cho aui si scho wäg gsi u si isch ganz verlohre do ghöcklet u het d Wäut nid verschtande. Bi de Schwaubeli isches jo so dass di nöie Eier scho unger de Jungvögu si u praktisch scho vo dene usbrüete wärde, chumm si si nämli usgfloge geits nid lang u si foht scho wieder afo fuetere. Dasmou isch das Näschtli lang frei bliebe u ersch jetzt isch dr Huusrotschwanz wieder am brüete. Ei Tag isch z Schwaubeli i Schtau cho chere "hei chunsch öpe cho luege ob dis Näschtli wieder frei sig?" hanis gfrogt u schpöter am obe hanis verschtande, si isch cho säge ig müess de luege am obe heige de ihri Junge Flugschtund. Mir si chum nachem Schtaune vor em Huus ghocket do isch d Schou abgange, es isch jedesmou wunderschön u intressant z luege wiesi Luupings mache u mängisch fasch zäme flüge u immer wieder über üsi Chöpf u ds Huus, was ig no nid usegfunde ha wosi brüetet het.

Anekdoten mit unseren Langohren

Wo ei Mueter ihri Tochter het abgäh zum Feschtli isch si es paar Minute mit üs glüfe, ihre 5j. Bueb het nume gnärvt är isch umegsecklet, het bägget, sis Schirmtschäpi ir Gägend umegschosse u das immer um miner Esle u d Chinder ume. Es paar mou hane ermahnt aber es het nüt gnützt, i liebe Chinder aber es git seregi woni am liebschte i d Wüeschti würd schicke u dä isch eidütig eine dervo gsi, u wi bini froh gsi wosi gseit het si göng jetzt mit ihrem Bueb Hei, Hurra. Genau die Frou ischäbe ou eini gsi vo dene wo ihres Meitschi mitem Outo isch cho abhole nachem Feschtli u wosi gseh het wies schön isch bi üs u di Chinder so glücklich si gsi um di Esle het si mi agfrogt ob mi nid für ihri Tochter ou sones Feschtli chönnt mache nöchscht Wuche? O mein Gott u das e Nomittag lang mit däm Sürmu wie söu ächt das go? irgendwie geits jo immer u so hani zuegseit, klar mit gmischte Gfüu. E Wuche schpöter wieder z gliche Schpieli, grad woni mit de drü Eseli ha wöue losloufe chunnt d Sina u meint si chömmi de dasmou mit, "auso guet aber de muesch loufe gäu". I bi chumm ungerwägs gsi hanis scho beröit d Hündin mitgno z ha, bschdändig hani müesse ufse warte wüu si eifach vom Auter hät gar nümme schnäu cha loufe. "Gäu Sina wardisch de eifach irgendwo ungerwägs we de nümme magsch, hani zuere gseit u bi glüfe schliesslich hei jo d Chinder uf üs gwartet, pünktlich bini acho u ha de Chinder d Eseli vorgschteut , d Sina isch niene gsi. I ha zwöimou grüeft u mir de dänkt das si scho uf üsem Wäg wartet si kennt sich jo us, sobaud aui Chinder uf d Eseli verteilet si gsi hei mir üs ufe Heiwäg gmacht . Bim chline Bachlouf wo d Sina jedesmou geit go drinke het si uf üs gwartet, di Chinder hei gluegt wo d Hündin dürs Dickicht us cho isch. Dr Sürmu het wieder sini Schou abzoge u i ha für mi dänkt wie schafft die Mueter das dr ganz Tag, i bi nume froh gsi das miner Esle so Chinder sicher si, die hei sich gar nid lo Schtresse. Wo aui am bürschte si gsi het dä Bueb natürli ou wöue häufe u i hanim klar gmacht dass är nume zu de Tier ine chönni wener ruhig bliebi süsch müess är dusse bliebe. D Mueter het gmeint si göng jetzt go dr Tisch schön schmücke u mi gloubts fasch nid, aber chumm isch si wäg gsi het er ganz ruhig chönne Esle bürschte, do frogt me sich wär jetzt eigentlich z Problem isch ? d Mueter oder z Chind? Ou das Geburtstagfescht isch z ändi gange u aune hets natürli wieder sehr sehr guet gfaue, danke Eseli für öii Geduld.

Anekdoten mit unseren Langohren

Wieder einisch bini für ne Chindergeburtstag agfrogt worde, aber sicher so öpis mache mir doch gärn u so hani sofort zuegseit. A däm Tag hani drü Eseli nachem Weide zwäg gmacht, nämli d Cindy, d Soraya u d Babette u bi de Chinder entgäge gange, es isch eifach mängisch schwierig we d Lüt nid chöi zue lose. Em Friede z lieb mit mim schwierige Nachbar hani äxtra gäge z Dorf füre abgmacht damit niemer mit em Outo hingerefahri aber es klappet eifach nie. Chum bini ufem änge Waudwäg ungerwägs gsi isch scho zerschte Outo entgäge cho, super i allei mit drei Esle u Gägeverchehr. I hase zimmli bös agluegt use mache z chehre es isch nid eifach gsi aber sie isch säuber tschuld gsi wesi nid cha lose, chumm zum Waud us isch scho wieder eini cho. Mi muess sich jo nid verwundere dass d Chinder nid lose wes d Eutere ou nid chöi, irgend einisch bini bim verabredete Platz acho u mir hei de Eutere no einisch erklährt dass de d Chinder bi üsem Zeiche am viertu vor Füfi uf si warti. I ha de 10 Chinder üsi drü Eseli vorgschteut u denn hei immer zwöi chönne es Eseli füehre, es isch veiechli guet gange u mir si di eieihaub Kilometer zur Esufarm gschpaziert. Es het aune warm gmacht u si hei sofort aui ihri Jagge abzogge das isch grad e gueti Situation gsi um de Chinder z erklähre dass äbe d Eseli ou gärn wette ihri Winterhoor los wärde u so heimer afo Schtriegle. I ha fasch nid noche möge mit Schtriegle putze so ifrig hei di 10 Chinder di drü Eseli bürschtet, wo das so guet gange isch hani gseit äs warte no mänge angere dass si putzt wärdi u zum Teil äbe sehr grossi. Aui hei sofort igwilligt u gmeint si heige würkli ke angscht u so si 10 Chinder zwüsch u um 15 Esle gsi u hei bürschtet, es isch sones schöns Biud gsi, mi het nid chönne säge wär glücklicher isch gsi. D Ouge vo de Chinder u Esle hei grad glich glüchtet, nachere Schtund hase äntli zum Chueche u z drinke wöue füehre aber si hei no nid gnue gha, he nu de machet doch witer hani dänkt. Am vieri hani gseit wesi jetzt nid äntli chömmi cho Chueche ässe u Gschänkli verteili sigs de Zyt zum Hei go u do si si doch äntli cho, u e haub Schtund schpöter si doch tatsächlich 5 Outo cho Chinder hole, soviu zum zuelose.

Anekdoten mit unseren Langohren

Nach 4 Tag hei sich dr Ruedi u dr Figaro äntli gfunde u hei afo schpiele, dir hättet em siner Auge söue gseh - so öpis vo Häppy isch er gsi, si hei einang im Hängschtbiss ume gfüehrt u de si si wieder gägenang gschtiege oder de het dr Ruedi wo jo viu chliner aus dr Figaro isch gsi ne probiert i d Nase z chlemme. Dr Figaro het so vo obenherab langsam sini Nase gsänkt u jedesmou we dr anger het gmeint -so jetzt verwütschi aber sini Nase" het er dr Chopf eifach wieder e chli witer ufe gno u dr Ruedi het is lähre bisse. Es isch solang guet gange bis em Ruedi sini Fründin z Leni i d nöchi isch cho u de het dr Ruedi sofort gmeint är müessi si verdeitige u het dr Figaro zimmli ruch agriffe das ig doch ha müesse rüefe äs göng de ou chli finer. Geschter nach dr Esuwanderig si si wieder abghout worde u dr Figaro het em Ruedi ganz trurig nochegluegt winer igschtiege isch, wär weiss villicht chöme si de wieder einisch, aber ig weiss jo ou gar nid wie lang dr Figaro no bi üs isch. Mir hei wieder e sehr schöni luschtegi Esuwanderig gha, d Lüt hei enang ou sehr intressant gfunde u es isch gfachgsimplet worde, ei Familie het üs über ne nöii Ischtröi Namens Waldbode ufklährt.

Anekdoten mit unseren Langohren

Jo jo das si wieder drei aschdrängendi Tag gsi bis dr Figaro het Rueh gä, zwüschedüre hani d Ferieesle wäg gschperrt u de wieder dr Figaro. Aber wär no viu blöder het do isch d Darinka gsi, so hase gar nid kennt, irgendwie het si di frömde Esle d Schuld gä dass si 5 Tag a dr BEA het müesse si derbi hei di zwe doch gar nüt derfür chönne. I sonere Situation si üser Wägli nid so gäbig, jedesmou we dr Figaro d Lena het wöue Beschtige isch si was gisch was hesch dür d Wägli abgsecklet u dr Figaro hinger dri. "Hei Figaro we nid ufhörsch ihre noche z Galoppiere hesch de öpe e Härzbaragge u de isch de fertig mit Trekking" nach zwöi mou um d Weid Galoppiere ischer schwär atmend do gschtande u het gfluchet "di blödi Gumsle söu doch äntli bliebe schtoh, i bi doch ke Jungschpunn meh mit mine 28j." Nach drü Tag isches ihm z blöd worde u är hetse gar nüme beachtet u ou d Darinka het äntli Rueh gä, di angere hei eigentlich nume wöue go grüezi säge aber di zwöi si immer dervo gsecklet u so si üsi chli hässig worde u heise aus "blödi zickigi Esle "betitlet u jetzt si si z mitts i dr Gruppe.

Anekdoten mit unseren Langohren

Churz vor dr BEA het sich öper wo mit sim Esu het söue mitmache zrügg zoge u es het e freii Boxe gha, d Presidäntin het überau ume Telefoniert aber es het niemer wöue siner Esle 5 Tag a d BEA gä u do isch d afrog cho ob ächt nid d Darinka wett cho? I ha mir das lang lang überleit, z letschte mou wosi 10 Tag dört isch gsi het si rächt dr BEA Koller gha, hmm irgendöper muess haut sis Tier uslehne süsch hei jo die Bsuecher nüt z luege. 2 Tag vorhär hani agfange ihre das schmackhaft mache, am Tag wosi abghout isch worde u ig ihre z Haufter agleit ha isch si wine kläpfte Aff do gschtande, es het mir fasch z Härz abdrückt." Oh Darinka es isch jo nume für 5 Tag das geit schnäu verbi wirsch gseh u när chunsch sofort wieder hei". mir hei se zum Ahänger gführt u do isch si natürli nid sofort igschtige isch jo klar sie  het nid wäg wöue u i hase eigendlich ou gar nid wöue gä. Nach 2 - 3 Minute isch si dinne gsi u si si abgfahre, i weiss scho jetzt das mi nöchscht Johr niemer meh muess froge mi antwort wird nei si. Es si 2 Esle agmäudet gsi für 14 Tag zu üs i d Ferie z cho u somit hani dr Figaro jede Tag druf vorbereitet. Wo Darinka isch heicho hase grad bim obere Schtau usegloh u  gseit "chaisch säuber abe schpringe", i ha dänkt so chönn si di verschpannige vom Transport löse, si isch aber zerscht zu de  chline go grüezi säge läck das hättet dir söue gseh, das isch es Gschrei gsi jede het grüeft u käschet zum froge "wo bisch gsi? schön das wieder dehei bisch. I hare müesse säge si söu äntli abe go i ihri Box u ou dört go grüezi säge, i dänke sie het sehr sehr guet gschlofe, eis het mi scho möge si het nämli nid mit mir wöue schmuse si isch beleidigt gsi, ich has chönne verschtoh. Am angere morge woni aui ha use glo het dr Figaro nume e vermeintlich frömde Esu bim Mischt gseh schtoh u isch grad wiene Furie ufse los. "Nume das es grad weisch hie bini de dr Chef u wemer fräch chunsch de biss ig di is Füdli" d Darinka het sich umdräit u gseit "he schpinsch i bi hie dehei ig wohne do i bi nume 5 Tag a dr BEA gsi du Löu" do het dr Figaro si Fähler igseh.

Eselwanderung am 01. Mai in Bülach

Mit viel Wetterglück konnten wir unsere angekündigte Wanderung am 01. Mai 2018 in Bülach durchführen. Leider waren wir nur wenige TeilnehmerInnen. Aber alle Wanderer (7 Personen) und unsere 3 Esel genossen den Tag. Nicht zu kühl und nicht zu warm. Also perfektes Wanderwetter. Gemütliche Mittagspause mit Grillfeuer und Kaffee aus der Thermoskanne. Für die Esel eine kleine Magerwiesenweide.
Nach 3 1/2-stündiger Wanderung kehrten wir zufrieden und entspannt zum Stall zurück. Viele Gespräche über Esel und alles Mögliche wurden geführt. Schade, dass nicht mehr Eselfreunde teilnehmen konnten!

Anekdoten mit unseren Langohren

I ha gmeint i heig äntli e Platz gfunde für Dana Datooba, es isch e sehr Sympatischi Familie u Platz hei si wägerli gnue aber d Weid wo 24 Std Täglich zur freie verfüegig schteit isch öpe 30m breit u 60m läng. Es si scho zwöi Ross u e chline Esu bi dene Lüt, es het ca 8 Nachbare u dervo Reklamiert eine scho wenes Chind lachet oder dr Güggu chräit. I ha probiert z erklähre wie dr Grüschpegu schtiegt we 3 Esle ufem Hof läbe u jederzyt ufem ganze Areau ume chöi schpaziere, grad üsi Dana isch so eini, wesi zum Schtau us chunnt u d Mueter nid sofort gseht de rüeft si eifach mou i d Rundi bis d Mueter antwort git. U z zwöite isch di riesegi Weid wo fasch nüme wachst u das isch äbe genau z Problem, di Tier si so gigerig uf grüens dass sie jede Seich zäme frässe nume wüus grüen usgseht oder das Gresli wo probiert z wachse wird sofort gfrässe u isch doch e Eiwissbombe. I gseht das so dass i 24 Std fasch nüt äbe zletsch doch e hufe wird wome gar nid dänkt. Währent dene 2 Std wo mir dört si gsi het dä chli Esu nid einisch dr Chopf ufgha u mi hets ghört wiener Gresli um Gresli abzupft het, schad hets nid klappet.

Anekdoten mit unseren Langohren

Heit dir öich Gedanke über d Aisha Gschicht gmacht? eigentlich weiss ig genau wo z Problem liegt, da me sich nach au dene Johr dra gwöhnt het dass si schwierig tuet chame gar nüme ohni Negativ z dänke zuere u si gschpührt genau was me vore dänkt u macht genau das so zum säge "du erwardisch das jo genau so vo mir". We si uf Trekking isch mit Chinder gö die ganz unbelaschtet uf se zue u putze ihri Huf wosi ganz eifach git, we de di Chinder wieder ufem Hof si verzeue si mir voller Schtouz wie si guet mitgarbeitet het u de gib ig zur antwort "auso jede Tag wemere sött d Huf mache chunnt eifach schnäu eis vo öich s cho mache". Wesich einisch di blöde Negative Gedanke im Hirni ignischtet hei chamese fasch nüme ignoriere. Z gliche passiert weme mitem Ahänger sött hingerzi fahre de muess me nämli grad verchert Ränke aus weme numme mit em Outo rückwärts fahrt äbe z Hirni usschaute, us däm Grund chöis d Manne viuuuuuu besser aus mir Froue, oder schtimmts öpe nid????

Anekdoten mit unseren Langohren

Eigentlich hei mi miner Esle au di Johr rächt entschlöinigt aber ei Tag bini ab minere Schnäuikeit grad verchlüpft. I ha mit mim Mandli diskutiert wenn das ächt d Schwaubeli chömmi? u chumm hani im obere Schtau agfange mit mischte simmer doch tatsächlich zwöi ume Chopf gfloge. Di hei mi so verchlüpft dass ig grad reflexartig obsi zum Näschtli glängt ha u dr ganz Inhaut usezoge ha, wüu mir i Sinn cho isch dass mir se no nid putzt hei. Im nachhinein isch mir ufgfaue  dass weni d Schpinnhumpele abeputzt ha gar nid soviu Materiau uf däm Näschtli isch gsi. Das wott heisse das d Schwaubeli scho z Näschtli nöi uspouschteret hei u ig has wieder use grumt, "exgüsi liebi Schwaubeli i bi grad echli z schnäu si, jetzt müesst dir di ganzi arbeit no einisch mache". Es isch ke Tag vergange u z Näschtli het wieder guet usgseh, es het ou eis Näschtli im Ufenthautsruum aber das isch grad ungerem Eternitdach u do si letsch Johr di Junge verdohret vor Hitz u drum binis sofort go kaputt mache. Hüt hani gseh dass si scho höcklet u brüetet, bi dere cheuti muess si di Eier scho guet werme. Was di Gschicht mit Esle z tue het froge dir öich? d Schwaubeli bruche sehr viu Insekte um di Junge uf z zieh u di chöi miner Esle nüme bloge.

  • Index
  • » Neueste Beiträge

Board Info

Board Statistiken
 
Gesamtzahl Themen:
143
Gesamtzahl Umfragen:
5
Gesamtzahl Beiträge:
1156
Benutzer-Info
 
Gesamtzahl Benutzer:
656
Neuester Benutzer:
Baumann Nicole