Anmelden
  • Index
  • » Benutzer
  • » Dolotelley
  • » Profil

Beiträge

Beiträge

16-Mai-2018 19:51:43
Lustige Geschichten
Kategorie: Esel
Forum: Diverses

Churz vor dr BEA het sich öper wo mit sim Esu het söue mitmache zrügg zoge u es het e freii Boxe gha, d Presidäntin het überau ume Telefoniert aber es het niemer wöue siner Esle 5 Tag a d BEA gä u do isch d afrog cho ob ächt nid d Darinka wett cho? I ha mir das lang lang überleit, z letschte mou wosi 10 Tag dört isch gsi het si rächt dr BEA Koller gha, hmm irgendöper muess haut sis Tier uslehne süsch hei jo die Bsuecher nüt z luege. 2 Tag vorhär hani agfange ihre das schmackhaft mache, am Tag wosi abghout isch worde u ig ihre z Haufter agleit ha isch si wine kläpfte Aff do gschtande, es het mir fasch z Härz abdrückt." Oh Darinka es isch jo nume für 5 Tag das geit schnäu verbi wirsch gseh u när chunsch sofort wieder hei". mir hei se zum Ahänger gführt u do isch si natürli nid sofort igschtige isch jo klar sie  het nid wäg wöue u i hase eigendlich ou gar nid wöue gä. Nach 2 - 3 Minute isch si dinne gsi u si si abgfahre, i weiss scho jetzt das mi nöchscht Johr niemer meh muess froge mi antwort wird nei si. Es si 2 Esle agmäudet gsi für 14 Tag zu üs i d Ferie z cho u somit hani dr Figaro jede Tag druf vorbereitet. Wo Darinka isch heicho hase grad bim obere Schtau usegloh u  gseit "chaisch säuber abe schpringe", i ha dänkt so chönn si di verschpannige vom Transport löse, si isch aber zerscht zu de  chline go grüezi säge läck das hättet dir söue gseh, das isch es Gschrei gsi jede het grüeft u käschet zum froge "wo bisch gsi? schön das wieder dehei bisch. I hare müesse säge si söu äntli abe go i ihri Box u ou dört go grüezi säge, i dänke sie het sehr sehr guet gschlofe, eis het mi scho möge si het nämli nid mit mir wöue schmuse si isch beleidigt gsi, ich has chönne verschtoh. Am angere morge woni aui ha use glo het dr Figaro nume e vermeintlich frömde Esu bim Mischt gseh schtoh u isch grad wiene Furie ufse los. "Nume das es grad weisch hie bini de dr Chef u wemer fräch chunsch de biss ig di is Füdli" d Darinka het sich umdräit u gseit "he schpinsch i bi hie dehei ig wohne do i bi nume 5 Tag a dr BEA gsi du Löu" do het dr Figaro si Fähler igseh.

08-Mai-2018 19:05:34
Lustige Geschichten
Kategorie: Esel
Forum: Diverses

I ha gmeint i heig äntli e Platz gfunde für Dana Datooba, es isch e sehr Sympatischi Familie u Platz hei si wägerli gnue aber d Weid wo 24 Std Täglich zur freie verfüegig schteit isch öpe 30m breit u 60m läng. Es si scho zwöi Ross u e chline Esu bi dene Lüt, es het ca 8 Nachbare u dervo Reklamiert eine scho wenes Chind lachet oder dr Güggu chräit. I ha probiert z erklähre wie dr Grüschpegu schtiegt we 3 Esle ufem Hof läbe u jederzyt ufem ganze Areau ume chöi schpaziere, grad üsi Dana isch so eini, wesi zum Schtau us chunnt u d Mueter nid sofort gseht de rüeft si eifach mou i d Rundi bis d Mueter antwort git. U z zwöite isch di riesegi Weid wo fasch nüme wachst u das isch äbe genau z Problem, di Tier si so gigerig uf grüens dass sie jede Seich zäme frässe nume wüus grüen usgseht oder das Gresli wo probiert z wachse wird sofort gfrässe u isch doch e Eiwissbombe. I gseht das so dass i 24 Std fasch nüt äbe zletsch doch e hufe wird wome gar nid dänkt. Währent dene 2 Std wo mir dört si gsi het dä chli Esu nid einisch dr Chopf ufgha u mi hets ghört wiener Gresli um Gresli abzupft het, schad hets nid klappet.

03-Mai-2018 19:33:27
Lustige Geschichten
Kategorie: Esel
Forum: Diverses

Heit dir öich Gedanke über d Aisha Gschicht gmacht? eigentlich weiss ig genau wo z Problem liegt, da me sich nach au dene Johr dra gwöhnt het dass si schwierig tuet chame gar nüme ohni Negativ z dänke zuere u si gschpührt genau was me vore dänkt u macht genau das so zum säge "du erwardisch das jo genau so vo mir". We si uf Trekking isch mit Chinder gö die ganz unbelaschtet uf se zue u putze ihri Huf wosi ganz eifach git, we de di Chinder wieder ufem Hof si verzeue si mir voller Schtouz wie si guet mitgarbeitet het u de gib ig zur antwort "auso jede Tag wemere sött d Huf mache chunnt eifach schnäu eis vo öich s cho mache". Wesich einisch di blöde Negative Gedanke im Hirni ignischtet hei chamese fasch nüme ignoriere. Z gliche passiert weme mitem Ahänger sött hingerzi fahre de muess me nämli grad verchert Ränke aus weme numme mit em Outo rückwärts fahrt äbe z Hirni usschaute, us däm Grund chöis d Manne viuuuuuu besser aus mir Froue, oder schtimmts öpe nid????

03-Mai-2018 19:22:53
Lustige Geschichten
Kategorie: Esel
Forum: Diverses

Eigentlich hei mi miner Esle au di Johr rächt entschlöinigt aber ei Tag bini ab minere Schnäuikeit grad verchlüpft. I ha mit mim Mandli diskutiert wenn das ächt d Schwaubeli chömmi? u chumm hani im obere Schtau agfange mit mischte simmer doch tatsächlich zwöi ume Chopf gfloge. Di hei mi so verchlüpft dass ig grad reflexartig obsi zum Näschtli glängt ha u dr ganz Inhaut usezoge ha, wüu mir i Sinn cho isch dass mir se no nid putzt hei. Im nachhinein isch mir ufgfaue  dass weni d Schpinnhumpele abeputzt ha gar nid soviu Materiau uf däm Näschtli isch gsi. Das wott heisse das d Schwaubeli scho z Näschtli nöi uspouschteret hei u ig has wieder use grumt, "exgüsi liebi Schwaubeli i bi grad echli z schnäu si, jetzt müesst dir di ganzi arbeit no einisch mache". Es isch ke Tag vergange u z Näschtli het wieder guet usgseh, es het ou eis Näschtli im Ufenthautsruum aber das isch grad ungerem Eternitdach u do si letsch Johr di Junge verdohret vor Hitz u drum binis sofort go kaputt mache. Hüt hani gseh dass si scho höcklet u brüetet, bi dere cheuti muess si di Eier scho guet werme. Was di Gschicht mit Esle z tue het froge dir öich? d Schwaubeli bruche sehr viu Insekte um di Junge uf z zieh u di chöi miner Esle nüme bloge.

22-Apr-2018 18:54:32
Lustige Geschichten
Kategorie: Esel
Forum: Diverses

Jo dasmou hei sich d Esle sehr verschetzt, si hei no aui ihre Winterpeuz u das bi 27 Grad u plötzli vchas nid schnäu gnue go mit Hoor los wärde. Si schabe sich überau wo öpis füreschteit u ig ma fasch nid noche mit Schtrigle, die hätte scho chli früecher chönne afo, jetzt Schtresse mi sogar no d Esle wo doch eigentlich Entschleuniger si. Jo süsch gits nüt z verzeue u we dir öpe no freii Zyt heit a dr BEA wärde no Häufer gsuecht, üsi Darinka wird ou 5 Tag dört si, di ganze 10 Tag hätt ig se nid gä wägem BEA Koller aber 5 Tag wird si scho überläbe. D Sina üsi Bärnersennehündin alteret jede Tag fasch e Monet, es wird immer müehsamer mit ihre go z loufe, es isch nid luschtig zue z luege u bricht eim fasch z Härz, si isch 11j. u das isch es rächts Auter für di Rasse.

06-Apr-2018 19:38:42
Lustige Geschichten
Kategorie: Esel
Forum: Diverses

D Aisha u nig si nid unbedingt di beschte Fründine, irgendwie verschtöh mir üs nid, weni öpis vore wott luegt si mi mit grosse Ouge a grad wie weni e angeri Schproch würd rede. Mit sovielne Esle i scho ha z tüe gha hani nie eso Problem gha wie mit dr Aisha. Wenn se wott vorwärtsdriebe u hinger ihre mit de Händ wädlu luegt si zuemer u meint "a bisch am Schpinnhumpele abebutze jo es isch nötig", aues wo bi de angere Esle würkt isch würkigslos bi ihre. Mis Mandli het ou sini liebi müeh mit ihre, ei Tag het er wöue d Wasserchessle uslähre u do isch d Aisha i dr Türe gschtande, "hei gang uf d site i muess düre" ke Reaktion vor Aisha auso no einisch aber e chli gschtresster "Aisha dr Chessu isch schwär gang e Schritt uf d Site" es isch nüt z mache gsi d Aisha het z verschtoh gä do schtohni u do bliebeni. Mis Mandli het versuecht se wäg z schtosse, aber versuechet mou 300 Kg. Esu wäg z schiebe, es isch ussichtslos gsi do ischer zrugg bis z hingerscht i d Boxe het dr Chessu abgschteut u isch mit alouf dr Aisha hinger is Füdli gsecklet u do het si doch vor luter Chlupf e Schritt uf z site gmacht u är het äntli düre chönne. I hät das natürli u gärn gseh, das het müesse u luschtig usgseh. Do ei Tag hani wöue d Dunja Boxe mischte u d Aisha isch no am nocheputze gsi, jetzt hani zwe Müglichkeite gha, entweder mi z Närve um se use  z bringe oder eifach probiere um se ume z mischte. I ha mi für di zwöite müglichkeit entschiede u ha mis Taxi mit Bouele gfüut u plötzli hani ihres Hingerteil a mim gschpührt, i bi e Schritt vorwärts u ha witer gsammlet u do hanse wieder gschpührt. Hmm das isch komisch, klar di Boxe isch nid riesig aber mir zwone sötte doch Platz ha näbenang? i bi witer minere arbeit noche do hase z dritte mou gschpührt, auso do bini fasch scho sicher gsi dass si das äxtra macht. Wie scho mängisch gschriebe liebeni so Schpieli, i ha e Schritt vorwärts u sitwärts gmacht u si isch genau glich hingertsi mir noche cho bis si wieder mis Füdli gschpührt het, genau das isch äbe ou d Aisha, 70 mou schture Esu schpiele u ufzmou uf sone fini Art cho schpiele. Oder wesi nid wott loufe de chame es Schtrouschnürli ihre ume Haus lege u bevor mes zäme het louft si scho vorwärts. Oder einisch chummi mit dr Garette u mag grad schüsst nid düre "hei Aisha chaisch e chli umeschtoh? lueg es fäut nid viu, vorne zwe Zentimeter ume "si machts u ig unglöibigi Ouge "genau u hinger muesch e chli meh ume öpe 10cm" u si machts u i verschtoh d Wäut nümme. Wem mir das nume einisch öper chönnt erklähre, 70 mou i verschtoh nid was du vo mir wotsch u ei Tag schänkt si eim e sones Erfougserläbnis, mir säge immer dr Aisha muess me d Sache 10 Minute vorhär säge damit si sich die Sach guet überlege cha.

17-Mär-2018 20:41:12
Lustige Geschichten
Kategorie: Esel
Forum: Diverses

Am Figaro sini Bsitzere isch mitemene Bekannte u zwöi Chinder cho wos so chaut isch gsi "gäu dir nähmet de de Esle d Dechine nume im Schtau drap zum bürschte u nid verusse, es isch nämli sehr chaut". Si hei uf mi glost u di Tier im Schtau zwäg gmacht, si  het aune e dünneri Dechi ungere Sattu gleit wo bis hingere glängt het, guet i bi z friede gsi. Wosi nachere guete Schtund wieder dehei si gsi hei si d Esle a dr Mischtmuur abunde, Bsitzere het afo uschratze u di angere hei d Sättu u di dünni Dechi wäggnoh. I darf jo nid immer go dri rede u drum hani nume dürs Fäischter zuegluegt, d Aisha het so fescht gschlotteret u niemmer hets gseh, si si i dere chaute Bise gschtande u hei e boge Rügge gmacht. I bi grad sowit gsi mi azlege u use go z luege do het d Bsitzere äntli gseh wie si schlottere u het d awisig gä d Esle wieder zue z decke. Schpöter wo aui wieder Hei si hani zum Fäischter us gseh wie dr Figaro so komisch schteit "was isch ächt los mit ihm? är het jo sini Dechi a u es gseht us wie wener sich würd z Hingere abgfrühre?" I ha öpis angers gmacht u woni nachere haub Schtund wieder use gluegt ha ischer immer no so komisch do gschtande, es het mir ke Rueh glo u so bini use zuenim. "Hei Figaro was isch los? du hesch jo dini Dechi a u sötsch doch nüme chaut ha" är het gantwortet "lueg doch wie si mir Dechi hei agleit mis haube Hingerteil luegt jo use wües si vorne viu z äng hei i do". Jo do hani si Problem gseh u sofort di Dechi i d Ornig do, jo wemi nid immer derbi isch u aues säuber kontrolliert passiere äbe so blödi Sache.

17-Mär-2018 20:26:22
Lustige Geschichten
Kategorie: Esel
Forum: Diverses

Jo hüt heimer üsi aujährlechi Houptversammlig gha vor sehr sehr viu lähre Schtühl, u z Stefani hets guet gmeint u viu viu Schoggieili uf de Tische verteilet, aui die wo nid cho si u hei ghulfe Schoggi z ässe si grad Tschuld dass ig so mängs ha müesse süggele u dänk wieder öpis meh uf d Woog bringe. Es isch eifach schaad dass nid meh Mitglieder chöme, ig weiss di Zahlebigerei isch nid sehr intressant aber dir heit öich doch i däm Verein igschriebe de söttit dir doch ou es gwüsses interässe dra ha was mir mit de Mitgliederbiträg so mache? oder öpe nid? aber villicht wartet dir eifach bis z Protokol i dr nöchschte Esuposcht abdruckt wird, dass isch ou e müglichkeit, aber dass feine Desser wo mir hei dörfe zäme ässe  dass heit dir 100 % verpasst. Mi nimmt sich doch jedesmou am 1 Jänner so gwüssi Sache vor was me im nöie Johr wott ändere gäuet? wie wärs we dir öich für nöchscht Johr ganz fescht vornähmet a d Houptversammlig z cho? das wär es schöns danke füre e Vorschtand wo doch z ganze Johr für öii aliege jederzyt sich Zyt näme u viele Schtunde für öich arbeite.

09-Mär-2018 19:58:17
Lustige Geschichten
Kategorie: Esel
Forum: Diverses

Passiere öich mängisch ou so soublödi Sache?? woni mit dr Hündin bi dere grosse cheuti ungerwägs bi gsi hani Esubolle uf dr Schtross gseh, hmm hani dänkt do nütze si nüt hopp dermit ufs Land, i ha usghout u mit mine Muunbuuts dä Huffe wöue is Land schtüpfe. Ha wöue, i gloube i bi no nie so froh gsi um guet Pouschtereti Schueh, wär isch ou so blöd u wott bi Minus 12 Grad e gfrohrne Huffe Esubolle wägschtüpfe?, äbe ig, i ha mi in Grund u Bode gschämt u sofort gluegt ob mir ächt öper zuegluegt heig, nei mir si allei ungerwägs gsi. Im Summer wird d Bsitzere vo dr Nela, Aisha u em Figaro nach siebe Johr i ihres eigene Burehüsli zügle, i froge mi hüt scho über wän ig denn söu schriebe? Em Figaro sis Lieblingsschpiu isch jo mi probiere z Närve, i bin am Bouele zäme putze u do chunnt dr Figaro ume Mischtschtock u bliebt vor mir schtoh "hei du schteisch mir im Wäg, gang uf d site du Verchehrshindernis" är luegt mi nume schtumm a. " Hesch Tomate i de Ohre? du söusch mi düre lo i bi am wärche, los mach Platz,"  äntli bewegt er sich u loft dervo, he was isch de das? dä Herr isch am sch.... "stop Figaro mi louft doch nid bim mischte" dä Esu mit de Tomate i de Ohre git zur antwort "DU sötsch de äntli wüsse was de wotsch, woni am Platz ha wöue mischte hesch mi vorwärts driebe, bisch säuber tschuld. Sage u schreibe het är ä 10 Meter Schpur hingerloh. Jo irgendwie isches äuä scho mini schuld gs aber är hät jo eifach chönne säge oder es sich uf d Schtirne schriebe was er im Sinn heig, aber eifach mi verarsche isch eidütig Figaro Manier.

01-Mär-2018 20:41:25
Lustige Geschichten
Kategorie: Esel
Forum: Diverses

Es isch di ganzi Nacht Rueh gsi im Schtau somit hei sich aui mit dere Situation chönne afründe, nid numemir Lüt nei ou Tier müesse mängisch Flexibell si, klae heisst das richtig Flexibel aber mir gfauts viu besser weme bell betont. Wo se am morge ha wöue useloh hani er Dunja ihres hingere gseh, jetzt hani doch gmeint ich heig aune e Füdlilatz agnäit aber viellicht hase vergässe ? i bi i d Wohnig go Schtoff, Fade u Nodle go hole u zrügg i Schtau. Dana het gfrogt "chöi mir zwöi nid use?" nei muesch no schnäu warte i muess em Mami e Füdlilatz anäie" gesagt getan oder ömu fasch, söu doch einisch öper probiere mitere sone gwundernase öpis a z näie. "was machsch du do hingerem Mami? het si gfrogt " "pass uf süsch schtichi di oder z Mami mit minere Nodle we dini Nase so wyt füre hesch. D Dunja het verschtande um was es geit u isch ruhig gschtande aber Dana Datooba het aues ganz genau wöue gseh, "pass uf schtich nid mis Mami is Füdli gäu? gang jetzt us wäg du unmüglichs Ding. Zwüsche düre het si mir ihre schwär Chopf uf d Achsle gleit u gmeint "we mim Mami weh machsch de drück i di gäge Bode. "Isch jo guet, lo mi eifach lo schaffe de chöit dir ou baud use" woni so am näie bi gsehni uf z mou öpis bruuns im Schtrou liege? hmm was isch de das? nei i gloubes nid er Dunja ihre Füdlilatz de het si auso eine gha u Dana het ne z Nacht abgschrisse, auso isch dr Fähler gar nid bi mir gläge nei Dana isch tschuld gsi. So d cheuti isch verbi, hüt morge hei mir 15cm Nöischnee gha u Tämperatur isch uf 4 Grad gschtiege, guet so de chani scho baud di Dechine wieder abzieh hani so für mi dänkt. Churz vorem Mittag hets afo dri rägne u was hei di Esle gmacht?? si doch tatsächlich dusse gschtande, si hei sich sicher dänkt "mir si jo guet gschützt mit de Dechine" aber was si nid bedänkt hei dass si kener Wasserdichte Dechine hei dreit u so si si nass worde. Dr Fau isch klar gsi für mi, wosi für z Mittag wieder i ihre Boxe gschteut ha hani grad di nasse Dechine abzoge; läck bobi hättet dir das Gschrei söue ghöre "hei du chasch üs doch nid di warme Dechine abzie, gib üs sofort üsi  Pyschama zrügg" nüt do dir chöit öich jetzt wieder dra gwöhne ohni z si u ig muess se sowiso zerscht wieder dröchne.

27-Feb-2018 20:11:26
Lustige Geschichten
Kategorie: Esel
Forum: Diverses

Jo jo das chunnt dervo, do hani doch erscht grad gschriebe wie d Esle fröid heige a däm miude Winter u scho gfrühre mir üs z Hintere ab. D Cindy wo doch scho chli Schpäck het u me chönnt meine si sigi guet pouschteret für e Winter het wöue schtärbe, si het e Rägedechi wo nume e chli gfüetteret ich u das het ihre äbe nid glängt. Wo di Bise so het afo blose isch mer uf z mou ufgfaue wie mängi Dechi ke Füdlilatz het u i ha doch fasch nume Schtuetene, auso Näimaschine parat gmacht, e Resärvedechi füre gno u afo Füdliplätz a näie. Dir chöit öich gar nid vorschteue wie glücklich die Eselinne si gsi, klar het sich eini wieder müesse schnippisch üssere "das hät dir scho lang i Sinn chönne cho u nid erscht we mir üs z Hintere abgfrühre". D Cindy het immer wieder dünn gmischtet u das isch jo es Zeiche das si chaut hei, wo si di dicki Resärvedechi übercho het u gschpührt het wie warm die git het si sofort gseit "di isch de vo nun a mini klar?" Jo jo isch jo guet Cindy, d Babette het e Bucas u di si eigentlich süsch guet aber bi dere Bise het ou di nüme glängt u do hanere es warms Barchetlintuech zämegleit unger d Dechi gleit u sofort het me gschpührt wiesi warm het übercho. Isch mängisch scho guet weme Platz het u nid immer aues furt gheit, mi weiss nämli nie uf z mou chunnt genau die glägeheit. Hüt morge heimer Minus 13 Grad gha u do chöi di chline ihre Schtau nümme gnue erwärme u so isch z Wasser igfrohre, es isch drin Minus 1 gsi woni bi go Fuettere auso 14 Grad ungerschied, nid schlächt, aber äbe sobaud me dr Schtau ufduet chunnt d cheuti ihne. Hüt obe woni vo minere Eiertuur zrügg cho bi us scho wieder Minus 9 azeigt het bini i unger Schtau ha Dana Datooba zu ihrem Mami glo u den bini di chline go abehole u hase i Dana ihri Boxe gschperrt. D Esle si jo dr ganz Tag i dene verschiedene Boxe am nocheputze u kene se guet, klar we jetzt dr Tierschutz würd cho kontrolliere wäre si z viu aber so chöi si dr Schtau erwärme u wesi nid chaut hei de drinke si ou gnue. Auso liebi Lüt dänke dra d Esle hei überhoupt nid gärn chaut, im Winter schtärbe sehr viu Esle wüu d Lüt meine si heige nid chaut u we de eine scho chli agschlage isch de längt di cheuti um ihm dr räscht z gä. I ha mehreri Arüef pro Tag wo mi d Lüt froge "mi Esu schlotteret söu ne ächt decke? Jo jo jo u dr Schtau guet zuemache dass es nid zieht, chli meh fuettere u guet ischtröie.

16-Feb-2018 20:21:33
Lustige Geschichten
Kategorie: Esel
Forum: Diverses

Göht dir ou im Winter so gärn am morge go loufe we no niemer düre früsch Schnee isch tschaupet? auso mir macht das uuuu viu Schpass z luege wär u was do z Nacht aues isch ungerwägs gsi. Am meischte Schpure hets vom Fuchs gha u den vom Luchs, was ? Luchs? jo jo bi üs im Jura hets leider sehr vieli Luchse u di frässe pro Wuche es Reh. D Schpure vom Luchs gseh fasch us wie vomene grosse Hund, schön rund aber kener Abdrück vo de Negu wiemese bim Hund gseht, si ghöre jo zu de  Chatze u drum heiss si viu finieri Negu wo bim loufe kener Schpure hingerlöh. U den d Rehschpure wo sich oft irgendwo träffe u denn e lengeri Sitzig hei, mi chönnts ömu meine weme di viele Abdrück uf chlinem Platz gseht. E Hase isch ou ungerwägs gsi u den no d Chatzeschpure u hinger mir ar Sina u miner, hahaha. De Esle geits super dank däm miude Winter, geschter hani wieder einisch dr Mischtschtock verleit, nei nei ke angscht dir müesst mir nid cho häufe ne z finde, mi seit däm so wemene usäbnet. Woni so am arbeite bi chunnt ufzmou d Dana Datooba zue mir ufe "hei schpinsch? was wotsch du do obe? das isch kei Schpiuplatz gang sofort wieder abe" "nei nei i wott dir doch häufe i due träppele de drückts ne doch zäme oder?"  jo irgendwie hets si jo rächt nachem verlege duene mängisch no abe tschaupe das macht sehr viu us de gits sofort wieder mehr Platz. Aber dr Mischtschtock isch scho höcher u jetzt isch d Mischtrampi druf u do frog i mi wiesi wieder abe wott? "so hü gang abe u unmügliche Esu du" u was macht si? si wott doch tatsächlich über d Rampi abe wo doch sehr rütschig isch, gottlob het sis nach zwe Schritt gschpührt u isch doch sitwärts abe gschprunge, uff no mou guet usgange, was dere Gumsle doch immer wieder i Sinn chunnt.

02-Feb-2018 20:31:58
Lustige Geschichten
Kategorie: Esel
Forum: Diverses

So heit dir öich vo dere Bluetdrünschtige Gschicht erhout? jo mängisch bini haut scho diräkt aber es ischTatsache gsi. Mir hei jo 2 Büsi wo üsere Tochter übernoh u eine dervo heisst Chewi, normalerwis chunnt är üs cho wecke aber i dr letschti verseit er komplett. Mir heine übernoh wüu si bi ihre wäge de Schtrosse nid hei use chönne, u do bi üs gniesst ers i vou Züge, är schnurret no fasch me aus üse Hung. Wes dusse no fischter isch de muess er haut no warte, ei Morge am 5i seit mi Maa "woisch ächt dr Chewi? das isch nid normau dass er nid chunnt, hesch ne emänd i Chäuer gschperrt??" Di chogge Manne chlaue mir doch glatt eieihaub Schtunde Schlof, i bi d Schtägge ab um go z luege u was gsehni do? dr Chewi schteit a dr Huustüre ufe u seit lo mi use. "Hei du schpinsch d Vögeli u d Müsli schlofe no u i go ou no e Rundi is Bett", i ha rächtsumkehrt gmacht u bi wieder i mis warme Bett zrügg. Am haubi Siebni wo mer ihm grüeft hei ischer es paar Schritt wine Matscho gäge z Bett cho u het gfrogt "chunnt äntli öper u lot mi zu dere blöde Tür use? "Jo jo mir chömme jo scho meinsch öpe  u chöngsch d Müsli im Schlof überrasche? chumm hani d Tür ufgmacht ischer wasgischwashesch dervo, mir hei zerscht no üses z morge parat gmacht u womer 10 Minute nachem Chewi ou use hei wöue isch doch tatsächlich e toti Muus vor dr Tür gläge. Mir hei so müesse lache di Muus het würkli usgseh wie wesi würd schlofe, si isch schön ufem Rügge gläge u het ganz unversehrt usgseh, dr Chewi het üs dermit zeigt dass er würkli di Müüs im Schlof het killt. 

24-Jan-2018 20:15:06
Lustige Geschichten
Kategorie: Esel
Forum: Diverses

Bi üs ufem Hof het e Buur 2 Schottischi Hochlandrinder gha, besser gseit dr Kaschtriert Schtier het ere Frou ghört wone vor 17 Johr vorem Schlachthof grettet het une bim Buur igschteut u au Monet zauht het. U de isch no e Chueh do gsi, e Chrüzig zwüsche Walliser Kampfchueh u Schottisches Hochlandrind, i cha öich säge di het eim chönne aluege so mitemen Blick "no e Schritt gäge mi zue u de chummi" u do bini du aube sofort wäg, di het mir richtig angscht gmacht. Weme dänkt vo wo die chöme u wie Schteinig di Weide dört si u de wärde si zu üs brocht u schtöh je nach Witterig meh oder weniger im Pflüder u do si rächt wiud si chamene jo nid d Chlaue schnide u mangels steinige Weide chöis si se ou nid abbräche. Dr Lasur het ganz schlimmi Chlaue gha u het fasch nüme chönne loufe, d Tierärzti isch cho luege u het ou gmeint ne besser abztue. Jetzt isch d Frog gsi wie chöme di zwöi is Schlachthuus ? do si jo so wiud si gsi ,wärs unmüglich gsi si irgendwie izlade, dr Lasur het vo eim Hornschpitz zum andere schtouzi 125cm gmässe. Mit Brot het me se chönne anelöcke, u so hani em Buur dr Vorschlag gmacht se hie ufem Platz z schiesse u de grad izlade. I ha miner Esle i Ufenthautsruum gschperrt u vo dört heisi aues chönne zueluege, di zwöi si cho z Brot frässe u dr Maa vom Schlachthof het se ganz ruhig chönne schiesse, si hei ke Minute Schtress gha. Dr Lasur het sogar sis Brot witer gfrässe wo sini Fründin z Bode isch, genau es so muess es si, wie d Tier ghaute wärde u wie si tötet wärde dass muess schtimme. Die zwöi si iglade worde u das aues het sich jo vorem obere Schtau zuetreit, d Esle si ruhig gsi di einzegi wo gschlotteret het isch üse Hung gsi wägem Schiesslärm. Dr Transporter isch wäggfahre u do hani grad e Schrei usgloh dass er ganz erschrocke uf Bräms isch u mi ganz erschtuhnt agluegt het u dänkt was het ächt di Frou? E GANZE SEE VOU BLUET genau vorem Schtau, i hanim es Zeiche gmacht es sig guet är chönni fahre. Läck was mach ig jetzt?? d Esle schpinne jo wesi emene Ort Bluet schmöcke u schläckes mit Wonne aber doch nicht grad Literwis, do hani mir grad nid angers z häufe gwüsst aus em Herrgott z bitte är söu doch bitte mindeschdens 2 Schtunde richtig wässere u dr räscht würdi de no mitem Garteschluch wägwäsche. Jo liebi Lüt, dass Wätter womer am Mändig aui hei müesse ertrage isch wäge mire bitt gsi u dr Herrgott het wägerli z düe gha di Bluetlache wägzwäsche, exgüsi. Am Nomittag hani äntli d Esle wieder chönne useloh u do si si überau go schnüffle u zum Zuun go luege ob ächt d Chüeh no immer am Bode liegi.

19-Jan-2018 19:13:43
Lustige Geschichten
Kategorie: Esel
Forum: Diverses

Häufe öich ou öier Esle das dir Fit bliebet u nid ines Fitnessschtudio müesst go träniere? auso miner schmeisse mir sämtlichs Wärchzüg ufe Bode u weni reklamiere "dass isch de gfährlich es chönnt eine i d Gable tschaupe" gäbe si zur antwort "meinsch mir sige so blöd. Mängisch si si scho chli fräch aber i liebe se vo Härze, hüt isch d Reihe a dr Yakari gsi z Töchterli vor Inca, si het mir dr gross Chröiiu umgheit u het gmeint "so ischer viuuu besser wäggrumt". Churz druf isch d Inca zum Schtau us u d Yakari wo doch erscht no so grosskotzet do het isch fasch verzwiflet wüu si nid gwüsst het wie si jetzt zur Tür us söu wo doch dr Chröiu vor ihre am Bode gläge isch. Hi hi hi jetzt isches a mir gsi d Yakari uszlache, "so Fröilein wie wotsch äch das Problem löse? i hase es paar Minute lo zabble u när hani dr Chröiu ufgläse u d Yakari isch wasgischwashesch zum Schtau use düsset go z Mami sueche. Si het mir wöue e Schtreich schpiele u dä isch gwautig i d Hose, mir wei de luege obsi z nöchschtemou mis Wärchzüg i Rueh lot.

14-Jan-2018 18:11:08
Lustige Geschichten
Kategorie: Esel
Forum: Diverses

Woni hüt obe ha wöue Schtaune isch Dana Datooba z oberscht ufem Mischtschtock gschtande, normalerwis isch das jo dr Güggu wo ufem Mischt chräit. Klar si het nid kräiet u het irgendwie ganz guet usgseh, wie nes Biud, si het ke bewegig gmacht u het eifach i ei Richtig gschtarret. I bi uf mi Boueletuur gange u jedesmou we ni z Taxi ufe Mischt glährt ha hani irgendwas zur Dana gseit aber si het überhoupt nid reagiert. Langsam bini gwunderig worde, ob si emänd öperem Modäu schteit wo am Male isch? aber i ha niene öper gseh. "Hei Dana dr Mischtschtock isch ke Schpiuplatz chumm abe" ke reaktion, i ha i di glichi Richtig gluegt wie si aber immer no nüt gseh. "Hei Dana was um Herresgottwiue gsehsch du? muess ig jetzt öpe ou no z oberscht ufe dä chogge Mischtschtock chlättere nume zum gseh was du so gschpant beobachtisch?" Si het ke Mucks gmacht u i bi uf z Zeieschpitze gschtande um besser z gseh u do äntli hani ou öpis gseh bewege, "hei Mandeli gsesch du was das isch? är het churz gluegt u gmeint "das isch e Geiss vom Nachbar aber si isch userhaub vom Zuun i go nimms go säge". 5 Minute schpöter isch dr Nachbar lachend zu üs cho u het erklährt dass das es Reh sig gsi u es heig nid mit ihm wöue cho, he nu hani gseit "mir hei dir jo nume wöue zumene Bitz Fleisch ufem Täuer verhäufe".  Es isch immer wieder idrücklich wie guet di Esle gseh, wo das Reh wäg gschrunge isch het Dana dr Wäg abem Mischtschtock gfunde u aues isch wieder guet gsi.

05-Jan-2018 20:15:21
Lustige Geschichten
Kategorie: Esel
Forum: Diverses

Dr Figaro isch so ne rächt unterbeschäftigte Esu wo immer uf dr suechi isch wäner ächt chli chönnti närve u do bin ig haut scho no es gliebts Opfer bin ihm. Mit Froue schpiele isch jo unger siner würdi, we einisch d Dana Datooba hübscheli frogt "hei Figu schpiusch mit mir? de luegt er se nume verächtlich a u macht sone schnippischi bewegig mit dem Gring was soviu heisst wie "ig schpiele äuä mit Wibervöucher". I bi so igschpiut dass ig fasch geng mit dr gliche Boxe afo, nämli die wo am schneuschte gmacht isch u so hani nach 5 Minute scho eini vo 12 fertig, foni mit dr schlimschte a de geits e viertuschtung u de hani erscht eini. Jedesmou weni ine Boxe go schicki di Esle wo no am nocheputze si use i wott nämli nid um 8 bis 12 Esubei ume mischte u dr Figaro het sich mi Turnus genau gmerkt u jedesmou weni i d Dana Boxe wott de schteit er mir scho im Wäg u wott nid use u schteut siner Ohre uf dürzug. Hüt morge het mi Maa üses Schpiel dürenang brocht, är het mir di drei erschte Boxe scho gmischtet u so hani woni obe abe cho bi grad sofort bir Dana chönne afo. Dr Figaro isch i dr mittustation gsi u het mi gseh abecho u wahrschinlich dänkt "bis die di drei erschte Boxe gmischtet ha hani Zyt zum abe go" u woner 5 Minute schpöter i Schtau cho isch het er gseh dass ig scho vorim dört bi gsi, nei aber ou dir hättet däm si Gsichtsusdruck söue gseh, wener hätt chönne de hätt är sicher briegget wüu sis Schpieli dasmou i d Hose gange isch, jo jo dr schneuer isch dr ender, o was lieb ig di schpiele mit den schlaue Langohre.

31-Dez-2017 20:08:37
Lustige Geschichten
Kategorie: Esel
Forum: Diverses

D Cindy di chlini Muus wo jo immer e chli meh rächt het aus di angere darf am morge immer no chli i d Benj Boxe go nocheputze, normalerwis dueni zerscht mischte u denn machi no d Wasserchessle u irgendwie bini hüt einisch e chli angersch drine gsi u ha zerscht d Chessle usglährt. Eigentlich wärs sowiso gschider i würds so mache wenni nämli zerscht mischte u när z Wasser mache muess ig sofort ufs Hüsli. Auso woni am mischte bi gsehni wie d Cindy i dr Boxe schteit u ke Wank macht, hä uf was wartet si ächt? das isch jo ganz untipisch für si normalerwis isch si dr ganz Tag am Boxe nocheputze u gseht de ou derno us. "Hei Cindy was isch mit dir? machsch ke Seich? i ha probiert witer z mischte u immer wieder hani zur Cindy gluegt aber di het sich überhoupt nid bewegt u isch wiene Schtatue do gschtande do isch mir z blöd worde u i hase zum Böxli us gschickt. I ha mini arbeit fertig gmacht u ou d Chessle gfüut u bi du i unger Schtau u do het d Cindy scho gwartet das si no i d Darinka Boxe dörf go putze, i hase ine gloh u was hets si aus erschts gmacht? si isch go usem voue Wasserchessu drinke. Auso irgendwie hani si gar nid verschtande u derbi hetsi nume gwartet dass ig äntli em Benj si Chessu gfüut heigi mit früschem Wasser, mängisch ha ou ig müeh miner Esle z verschtoh weni mit mine Gedanke ganz amene angere Ort bi.

31-Dez-2017 19:54:53
Lustige Geschichten
Kategorie: Esel
Forum: Diverses

Am 24 Dezämber woni am Nomittag i Schtau bi hani dr Benj gseh liege das isch eigentlich gar nid düpisch, "Benj machsch es verdoiigsschlöfli?" hane gfrogt, är isch ganz ruhig gsi, hmm ig muessne im Oug bhaute. Nachere haub Schtund bini wieder go luege u do ischer ihre angere Boxe gläge u het gschlotteret "hei Benj hesch chaut ward ig hole dir e Dechi" mit sine 27 Johr het er scho müeh mit dr cheuti aber wes nid unbedingt muess si de probiers igs ohni. Am haubi vieri het er sich afo wäuze u do isch dr fau klar gsi är het e Kolik u das womer doch am obe wei Wiehnachte fire, "chumm Benj mir müesse go loufe damit dr Darm agregt wird" . Jede wo scho mou probiert het mitemene Esu go loufe wo Kolik het weiss wie aschträngend das isch, genau vorem Buur wo  üs nid mag ischer äbgläge u i hane fasch nüme chönne mache uftsschtoh, aber äntli ischer wieder uf de Scheichli gschtande u i hane vorwärts zoge u do ischer witer vorne wieder z bode, mitts ufem Schtrössli, hoffentlich chunnt nid grad öper mitem Outo hani dänkt. Dr Benj hets sich gwäutzt u gwäutzt u d Sina dr Hung het immer wieder gfrogt "gömmer jetzt witer?"  Läck het das Närve brucht "Sina schwieg du gsesch doch das dr Benj es Problem het" u zum Benj "bitti bitti Benj schtoh uf dass mir wieder hei chöi u ig em Tierarzt cha alüte. Nach gfühlte 30 Minute wo natürli nume 5 si gsi ischer äntli wieder ufgschtande u i hane heizue zoge u gluegt dass er jo nid no mou abliegi. D Bsitzere hani unger drei Telefonnummere nid gfunde, ihri Hömopatin het z Telefon ou nid abgnoh u do hani haut de Notfauarzt lo cho, mis Mandli isch vo eim Bei ufs andere gümperlet vor luter Närvösi, dr Minutezeiger het es Tämpo drufe gha u ig ha probiert ruhig z bliebe. Usgrächnet hüt het das müesse passiere wo mir doch fürs Apero zueschtändig si gsi u nid vo Huus si cho, miner Ching hei mir scho mängisch für gha bi mir chömmi immer zerscht d Esle u när si, mischt mischt mischt. Do isch dr Tierarzt äntli cho u wär isch ganz unschuldig vorem Schtau gschtande?? jo richtig dr Benj het gluegt wär do chömmi, aber bis dr Arzt siner Sache woner bruchi het zäme gha ischer wieder ihre Boxe gläge. Jo är ghöre fasch kener Darmgrüsch, das sig nid guet, dr Benj cha jo z Höi nüme frässe wüuu er ke Chraft me het zum chöiie u drum läbt er fasch nume vo Churzfuetter u de het er eifach z wenig Ballaschtschtoffe. Dr Benj het e Schluch dür d Nase bis i Mage übercho u denn 2 Liter warms Wasser mitemene Pulver wonim söu häufe dürez putze u natürli e Chrampflösendi u Schmärzschtiundi Schprütze. U äntli hei mir chönne go Wiehnacht fire aber i bi dr ganz obe nid ruehig gsi, womir si heicho bini sofort i Schtau go luege u är het immerno nid gmischtet gha u immer no gschlotteret, am morge isch gottlob wieder aues guet gsi.

22-Dez-2017 19:52:23
Lustige Geschichten
Kategorie: Esel
Forum: Diverses

Mir si agfrogt worde ob mir am Wiehnachtsmärit wöue mitmache? klar wei mir u so bini am Fritig obe nachem Schtau mache mit dr Cindy, dr Soraya u dr Babette gäge Ort abe glüfe. Es isch ganz luschtig gsi wie d Cindy di chlini Muus vorab glüfe isch grad wie wesi gwüsst hät wos düre göngi für i d Stadt abe, d Soraya u d Babette si hinger mir noche glüfe, es isch mängisch nid grad eifach mit drüne z loufe. Mitts düre Verchehr, unger chline Ungerführige düre woni immer ghofft ha dass nid grad e Zug chömi wemer äne use loufi, aber es het aues guet klappet, überau hets verchoufsbudeli gha jo aber wo hei si ächt üses Pärkli vorgseh? Do nach langem sueche hanis gfunde - ganz verschteckt näbem Schulhuus, jo u itz??? i wott doch miner Esle nid verschtecke do findet mi jo niemmer. E Maa het mit sim chline Bueb d Eseli gschtrichelet, do  hanim gseit i heig es Problem ob är mir ächt chönni häufe? Jo sicher was er de söu häufe het er gfrogt ? Entweder chönner d Esle hebe oder di Wabogitter füre trage um z Pärkli witer vorne ufzschteue, u für was meinet dir het är sich entschiede? klar dä schtarch Maa het miner Esle ghaute u i ha di schwäre Gitter dörfe zügle so nachem Motto "selbst ist die Frau".  Mir si gli umringt gsi vo Chinder wo hei wöue Eseli schtrichele u mängsmou si meh Chinder im Pärkli gsi aus Eseli, aber mini si sich so öpis gwöhnt. Zwüschedüre weni chaut ha gha hani de Chinder d Eseli gä u mir mitts düre Wiehnachtsmärit bummlet das het üs wieder e chli ufgwermt. So um di achti woni gseh ha wie d Cindy fasch schtängligse ischloft hani mi ufe 40 Minütig Heiwäg gmacht u bi gottefroh gsi dass aui e Rägedechi hei agha, äs het so richtig nass gschneit u übers offne Fäud hets üs fasch furtblose. Am Sunndig hani zerscht aui Boxe gmischtet u am 10 hani mi wieder ufe Wäg gmacht, ds Wätter isch gottlob  fründlicher gsi aber eifach chaut, es het dr ganz Tag viu Chinder u Lüt gha, i bi mir jo gwöhnt dr ganz Tag dusse dsi aber mit Bewegig u das cheibe umeschtoh ohni öpis z mache het mir dr räscht gä, i ha z gfüehl gha i sig bis zu de Chnoche ine verfrohre. I ha miner Ouge überau müesse ha mi gloubts gar nid was di Lüt de Esle aues wette Fuettere weni nid immer derzwüsche wär gange. Am viere hani de Esle gseit "so äs längt jetzt gömer hei" u hei di chönne Scheichle di si nämlich ou froh gsi wieder hei i warm Schtau z go, aber es isch glich schön gsi u mir gö sicher wieder nöchscht Johr.

22-Dez-2017 19:21:47
Kategorie: Esel
Forum: Fellpflege

Eigendlich bin ich komplett gegen das Scheren der Esel wenn nicht ein Medizinischer Notfall vorliegt, immer wieder werden die Esle geschoren um dem lästigen Winterfell entfernen zu entgehen und dann wird es wieder kalt und die Esel frieren sich den Hintern ab bis es den Besitzern endlich in den Sinn kommt die Langohren einzudecken. Die Natur hat das wunderbar eingerichtet, die Esel wissen genau wann der richtige Zeitpunkt ist um die überflüssigen Haare loszuwerden und wenn es wieder kältere Tage gibt hören sie sofort auf mit der Haarspende.

18-Dez-2017 19:26:16
Lustige Geschichten
Kategorie: Esel
Forum: Diverses

D Sina üse Hung isch natürli ou derbi gsi, d Chinder hei lang gha oder d Lehrerin het sich i dr Dischtanz verdoh, he nu hei mir dänkt irgend einisch wärde si de scho cho. U do uf einisch het me se ghört cho u so si mir ou langsam dr Wäg ab gäge d Chinder uiiii het das es Gschrei gäh wo si üs gseh hei, sofort si mir umringt gsi vo 50 Chinder mit ihrne Liechtli, d Soraya het e chli komisch us dr Wösch gluegt aber i hase beruhigt. Nach es paar Minute si aui witer glüfe gäge das grosse Füür zue, es isch doch immer wieder schön di fröid i de Ouge vo dene Chinder z gseh. Womer bim Füür acho si hei d Chinder afo singe u Färsli verzeue, i ha amüsiert zue glost u plötzli isch mir mi Hung i Sinn cho di hani jo komplett vergässe woisch si ächt? Mir si jo nid wyt vo dehei gsi do kennt si jede Wäg entweder isch si Hei oder si isch hie irgendwo, i ha überau umegluegt u do hase gseh wiesi überau isch go schnüffle obs öpis z frässe heig "Hei Sina mir si do" hani grüeft u do isch si fröidig zu üs cho, nüt passiert i ha mini Tier wieder aui zäme gha, nachere Schtund hei mir üs wieder ufe Heiwäg gmacht.

18-Dez-2017 19:15:57
Lustige Geschichten
Kategorie: Esel
Forum: Diverses

Wo mir vor 17 Johr hie hi züglet si hets im Schtetli am Samichlousobe e wunderschöne grosse Umzug gäh, vom Bahnhof bis i d Audstadt ischer gange. Ou mir si agfrogt worde ob mir wöui mitmache u do isch jo d antwort klar gsi, es het Schteuzemanne gha e chli komisch aber werum nid? denn hets Grittibänze i Läbesgrösse gha di arme hei chumm chönne loufe dos i ihrem Koschtüm kener Chnöi het gha hei si müesse gwagggle um vorwärts z cho. Denn hei Tambuure gschpiut u ufere schöne Kutsche isch dr Pere Noel mitgfüehrt worde, d Chinder si mit ihrne säuber gmachte Fackele mitglüfe u di ganzi Schtrecki si ganz viu Eutere mit Chinder gschtande u hei üs apploudiert. Jedes Johr isch dä Umzug e chli chürzer u chürzer worde, eigentlich schad. Einisch simmer grad hinger de Tambuure igreiet gsi, i ha gar nid gwüsst was mit dene Esle isch los gsi? i ha mi ganzi Chraft brucht um miner Tier zrügg z haute, entweder het se dr Takt is Füdli gschtoche oder si hei wöue mitmusiziere wär weiss. Z andere Johr heisi üs vor dr Kutsche igreiet u do ischs de Esle ganz gschmuech worde, he jo di Hufise vo däm zwöischpänner hei aber ou sehr viu Lärme gmacht. Das Johr hets plötzlich gheisse "mir mache ke Umzug" was? das gits doch nid dass isch doch schad aber do chame nüt mache hani dänkt. Do hani Bsuech vo zwone Lehrerinne übercho, si wöue säuber öpis organisiere ob ig ou derbi sig, aber sicher, mir hei überleit wome mit fasch 200 Persone so öpis chönnte dürefüehre? Nid wit vo üs isch e Töffschtrecki miteme Ungerschtand u dört hei si dörfe es grosses Füür mache, ibi am 6 Dezämber mit drü Eseli düre Waud schpaziert u bi go dr Schmutzli u dr Pere Noel go sueche. Chumm bini usem Waud cho hani di zwe scho gseh schtoh mit ihrne Fackele, si hei ganz besorgt gfrogt ob ächt d Esle nid angscht heige? Erschtens hei d Langohre scho bim nöcher cho Zyt gha um d Fackele azluege u überhoupt si si gar nid so ängschtlich schliesslich bin ig jo bine. 

25-Nov-2017 19:27:24
Lustige Geschichten
Kategorie: Esel
Forum: Diverses

Miner Esle si jo ganz guet erzoge si warte ganz ruhig bis si mi ghöre cho aber DENN geit Poscht ab, do muess ig mir lo säge "jetzt hei mir di so lang lo schlofe aber nun mal dali dali oder wotsch üs öpe lo verhungere????". Hüt am morge isches no rächt dunku gsi woni zu de Esle bi, i bi zur Tür i u ha Liecht gmacht u grad agfange d Beckeli i d Chrüpfli z  lähre. Do hets gschrei scho agfange u d Cindy di chlini Muus hets grad am lütischde düregäh, "aber Cindy du hesch jo scho öpis i dim Chrüpfli du bruchsch gar nid sones theater z mache, lueg doch mou". D Cindy het zur antwort gä "wie söii ächt öpis gseh we mi z Liecht dermasse bländet" u het derzue blinzlet wiene Wäutmeischterin, ig weiss gar nid über was d Lüt wo kener Esle hei chöi lache. Es geit aune guet nume hei si nid so fröid dass jetzt langsam dr Winter chunnt, ig gibe eifach so am vieri z früsche Schtrou i d Boxe u so gösi sicher i Schtau u si so nid z lang i dr cheuti. Boxetüre bliebe natürlich no offe schliesslich muess jede  zum Nachbar go luege ob dä z bessere Schtrou übercho heig, jo jo mi muess scho immer aues ganz genau abmässe u iteile, nid nume z frässe sondern ou d Schtrichueinheite.

25-Nov-2017 19:04:58
Kategorie: Esel
Forum: Diverses

Hallo Andrea, jo ou ig ha scho öfters afroge gha - lut de Aerzt schins di letschti müglichkeit um Babys z rette, leider hani dene bsorgte Eutere müesse säge dass i dr Schwytz niemer Eselmiuch produziert u ou we di Miuch guet u wärtvou sig so sigsi doch kes Wundermittu. Di letschti Frou woni ha am Telefon gha isch ganz trurig gsi u het gmeint dass me sich a jede Schtrohhaum chlammeri we d Aerzt nüme witer wüssi, i weiss u verschtohs ou nid werum i dr letschti soviu afrage chöme für Esumiuch. Woni einisch innert 3 Tag zwe afroge ha übercho bini mit mine 2 Schtuetene u de Füli zwe Schtund go loufe u womer wieder dehei si gsi hani d Füli zerscht abunde um d Schtuete z mäuche, bir zwöite Schtuete hani z Füli derbi glo u do hets uf dr einte Site drunke u i ha auf dr andere Site gmulche. Uf einisch het mir d Schtuete i äcke blose auem aschin  het si wöue säge "gäu losch min Chindli de ou no chli" , woni mis Fläschli vou ha gha hani wöue dene Lüt alüte, obwou i sicher 10 mou probiert ha het nie öper zrügg glüte, somit isch das Fläschi vou Esumiuch immer no i minere Tiefchüeltruhe.

29-Okt-2017 19:17:07
Lustige Geschichten
Kategorie: Esel
Forum: Diverses

So langsam wirds ou bis üs cheuter nach däm wunderschöne Herbscht, hüt morge isches nume 5 Grad gsi u woni vo de obere Schtallige abe cho bi hani ke Esu gseh. Hmm komisch het ächt mis Mandli vergässe di grosse use z loh? i bi zum Töri i u scho het e Esuchopf zur Türe use gluegt "he was machet dir im Schtau we doch Boxetüre offe si?" "meinsch mir wöue üs z Füdli abgfrühre?" heiss si gantwortet."  Was weit dir ächt im Winter mache wesnech jetzt scho z chaut isch? klar im Schtau isches immer 5 Grad wermer aus dusse, auso liebi Lüt dänket dra d Esle hei würkli nid gärn chaut. Dr Benj 27j. mitemene dicke Peuz u d Cindy di chlini Muus 17j. hei am meischte Müeh mit dr cheuti, dr Benj het letschte Winter cheutikolik gmacht u d Cindy wott nüme zum Schtau us u mischtet ganz dünn wiene Chueh u de isches höchschti Zyt um Mänteli z verteile. Mis agebot giut immer no, we öper wott cho sini Winterdechi  abändere de bitte nume es Telefonat u mini Näimaschine isch parat.

24-Okt-2017 18:45:57
Lustige Geschichten
Kategorie: Esel
Forum: Diverses

Auso mir isch öpis soublöds passiert ich chas fasch nid gloube, dr Profesor Balthasar Benjamin Blümchen churz Benj gnannt het jo mit sine 27j. nüme viu chraft um z Höi z frässe us däm Grund überchunnter drümou Churzfuetter. Normalerwis hani am morge wese useloh gha aui Boxetüre offe glo aber da er jetzt me Höi aus Schtrou uf sinere Matraze het u d Ronja u d Soraya chli uf Diät si hani haut rigoros d Türe zue gmacht. D Cindy üsi chlini schlaui Muus wo jo immer e chli meh darf aus aui di andere isch cho bättle um dass ig se söu i d Boxe vom Benj lo u do ig ihre nüt cha abschloh hase inegloh "aber gäu nume solang bi ig gmischtet ha" . I ha mini arbeit gmacht u d Ronja u d Soraya si cho luege ob si ächt ou ine dörfi aber i ha ke Musigghör gha, üse Hund chunnt mit cho mischte u liegt sider im Reseärveböxli. Woni fertig bi gsi hani müesse luege das d Hündin näbe aune dene Esle unbeschadet use het chönne u bi de di ungere Schtallige go mischte. Am Mittag hani z Höi ufem Drocheplatz verteilet u bi de säuber go ässe. Schpöter hase no chli is Gras glo zum nocheputze, mis Mandli het scho gseit d Cindy sigi irgendwie so komisch u ou mi hets dünkt. Nachere Schtund hani aui wieder usem Gras gschickt , hmm wo isch de eigentlich d Cindy? das isch jo ganz nöi das si säuber usem Gras geit hani so für mi dänkt u ha afo sueche wo si sich ächt verschteckt heig. Uf de Wägli hase niene gseh, i de ungere Schtallige isch si ou nid gsi, langsam bini unruhig worde u bi zletscht no i di obere Schtallige go luege u wär luegt mi usem Benj Böxli a????? ach Cindy das duet mir de leid dass ig di ha vergässe use z loh, irgendwie isch doch froh gsi dass si äntli ou no chli het chönne a d Sunne go, auso Hunger hets si jo nid müesse ha u Wasser hets si ou gha nume ke Gras aber das überläbt si scho. I wirde doch langsam euter es cheibe züg isch das mit dem auter.

13-Okt-2017 11:17:07
Lustige Geschichten
Kategorie: Esel
Forum: Diverses


https://www.eselfreunde.ch/images/agorapro/attachments/454/HelliHansen-Jacke.jpg

So mini liebe Lüt, jetzt hani no es Foti vo mir mit mim kaputte Helly Hansen Jäggli poschtet damit dir besser uf d suechi chöit go u ke usred meh heit dir wüsset jo nid wies genau sött usgseh. Weme gnau hieluegt gseht me das Loch im Ermel u wie huchdünn s dört isch, auso liebi Läser gät aues u suechet für mi das chogge Jäggli dr nöchschti Winter chunnt beschtimmt.

03-Okt-2017 19:02:39
Lustige Geschichten
Kategorie: Esel
Forum: Diverses

Am Samschtig sis drei e haub Wuche gsi dass ig Zwillinge verchouft ha, nach mehrere Telefonate hani mi für ne Blitzbsuech entschiede u mis Mandeli isch mit cho, schliesslich het er jo dr Platz no nie gseh. I ha mi no wöue Telefonisch amäude aber es het niemer abgnoh do simmer haut glich gfahre i hamer dänkt dass dr nöii Bsitzer sicher bi de Tier use isch. Zerscht hani mim Mandli d Boxe bim Buur zeigt wo di zwone z Nacht ungerbrocht si, mir hei sofort gseh dass d Wasserchesslehauterig verchehrt agschrubt si u d Chessle nid grad hange, ke sach das chame schnäu ändere. Mir si zu ihrem Huus ufegfahre, uf üses chlopfe het niemer antwort gä do simmer haut diräkt zu de Esle, d Tabea isch sofort cho grüezi säge für si schtimmt d Situation. D Kaila het ruhig witer gfrässe aber üs bschtändig im Blickfäut gha u ganz langsam isch si doch äntli cho grüesse so nach em Motto "du hesch üs do ane brocht u jetzt muesch nid meine wenn de chömisch müess mir sofort cho z schbringe. Klar isches weder für d Esle no für mi eifach gsi dä Bsitzerwächsu aber es het müesse si u weme gseht wie di nöiie Bsitzer di zwone verwöhne une e wunderbare Uslouf kreiirt hei de chunts scho guet. Wo di Lüt si cho d Zwillinge aluege u choufe hani dr vorschlag gmacht si söue doch zwöi drü mou cho üebe, aber irgendwie heiss si nie rächt Zyt gfunde u dehei soviu arbeit gha um aues vorzbereite dass si nume einisch si cho üebe, si hei gfunde dass sig doch nid nötig di zwone sige doch so guet erzoge. I ha mir fasch z Muu wundgredt um das Wäse vo de Esle z erklähre, dass me aui Liebi womene git drüfach zrügg überchunnt, aber dass si eifach ou Luscheibli chöi si u eim uf Prob schteue u genau das hei si du ou gmacht. Am morge früeh wesi di zwone vom Buur ufe füehre heissi 5 Minute u am obe hei sis uf sagehafti eieihaub Schtund brocht????????? für genau di glichi Schtrecki, äbe wie gseit Luuscheibli. I ha nim a z Härz gleit dass wener Problem heig dass är sofort alüti u so ischs Telefonat cho" HILFE mir wüsse eifach nid wieviu Druck mir dörfe usüebe mir weiss se jo nid vercheibe". Nume ke angscht so schnäu geit de das doch nid, auso mi Rat jedesmou we düre Tag zuene geisch de seisch ne "nume das es klar isch hüt obe gits de nid wieder sones Theater KLAR? je öfter du das seisch je besser geits ou säuber i di Chopf u du geisch scho ganz angers dra hi. Denn nimmsch es Schtäckli u bindisch es chräschliseckli dra u mit däm chaisch de chli driebe u wesi wieder wei bliebe schtoh seisch ganz Resolut chumm u ziesch e chli am Seili. I ha no e gueti Bekannti i dr nöchi u ha ihre dr Uftrag gä doch mou verbi z go um z häufe, grad am angere Tag isch si gange het zerscht no chli erklährt u denn si si go schpaziere u jedesmou wesi hei wöue schtoh bliebe het si se wieder vorwärts triebe u si hei mega guet glost. Zwöimou i dr Wuche geit si Frou go schaffe u de muess är di beide allei zum Buur abe bringe,  Tabea het nid rächt wöue loufe u do het er zuere gseit "wart nume sobaud du im Schtau bisch goni sofort dr Dolores go lüte u verzeue ihre was du für nes Theater machsch" chumm heig er das usgschbroche sig si wienes Schöfli glüfe grad wie wesis verschtande hät, aber 100% het si das verschtande i ha so müess lache. I ha ke angscht äs chunnt guet.

18-Sep-2017 19:12:14
Lustige Geschichten
Kategorie: Esel
Forum: Diverses

So mir heis gschafft, genau e Wuche hei mir brucht u jetzt schloft d Dana Datooba allei, am morge weni chumme lose sofort zum Mami bevor i ds Höi verteile, si drinkt es paar Minute u denn frisst si mit dr Mueter z Höi u aues isch ok. Am blötschte a dere ganze Sach het d Inca do, si het doch zäme mit dr Jakari di grossi Boxe vo dr Tabea übercho im ungere Schtau, jede obe isch si zerscht dunde gsi u im letschte Momänt wieder zu de obere Schtäu ufe gsecklet u i hase wieder müesse abefüehre. Esone schöni grossi Boxe aber irgendwie hets nid wöue schtimme für si, ei obe bini wieder abe cho u hase vorem Schtau gseh. Hmm söui ächt go z grosse Tor zuetue? nei nei si wird scho do bliebe, i bi no nid emou zum Töri i ischsi scho wieder dervo gsecklet, o blöd hät i doch nume uf mini erschti igäbig ghört. I ha di angere i ihri Boxe gschperrt, has Höi verteilet u ihri Rüebli mit e chli nütigs, bir Inca hani nume Höi inedo, wär nid wott wieni wird nid no belohnt. I bi i ober Schtau u ha di zwöi abetriebe u zungerscht isch doch di chogge Inca schtatt links gäge d Schtäu rächts abboge u wieder zu de obere Schtäu ufe gsecklet. "Auso Inca jetzt längts i go go z Nacht ässe u denn uf d Eiertuur, entweder chunnsch abe oder schlofsch dusse", vo wytem hets si mir zuegluegt wini i d Wohnig bi, 10 Minute schpöter woni am ässe bi gsi hase im Schtau ghört, schnäu bini go z Töri zuemache, mängisch darf me sich nid aues lo gfaue vo dene Langohre.

11-Sep-2017 19:03:15
Lustige Geschichten
Kategorie: Esel
Forum: Diverses

Wo Dunja so blöd do het wo Dana het afo lerne ire eigene Box z schlofe hani zuere gseit "du  muesch ou häufe damit sis kapiert". Hüt obe woni am nüni bi go Dana zum Mami loh het die ganz unmissverschtändlich gseit "fertig mit Säuge wär cha inere eigene Box frässe brucht när nid wöue cho Söige" Dana het d Wäut überhaupt nid verschtande, do schpiut si doch so gut mit  irer eigene Box u jetzt wird si vom Mami gschtrofft. Zerscht hani gseit "hei Dunja was söu das? aber när hase verschtande, si hiuft dr Dana mit dr nöie Situation fertig z wärde, wes nämli bim Mami ke Miuch meh git de chame jo grad i dr nöiie Boxe schloffe, i dänke morn obe gangi nüme go wächsle.

08-Sep-2017 20:09:36
Lustige Geschichten
Kategorie: Esel
Forum: Diverses

I ha de Esle erklährt dass es de Boxezüglete gäb we d Zwillinge wäg sige, die wo z zwöit si überchöme säuber e Boxe, "gäu Dana Datooba u Jakari de müesst dir de lehrne ohni Mami z schlofe". Am Mittwuch isches äntli sowyt gsi dass ig Zwillinge a ihre nöii Platz ha chönne bringe, z verlade isch gar nid eifach gsi, e Bsitzere wose eigentlich gar nid wett verchoufe u zwe Esle wo doch gärn wette do bliebe. Zwe Tag vorhär hani no probiert u do si si sofort ine gange wüu ig ruig gsi bi u villicht ou wüu ke Zwüschewand isch drin gsi? U de hani no di blödi Idee gha e Höisack ine z hänke, Kaila isch haub  ine u när hetsi das Netz ganz schtober agluegt u het ke Schritt me gmacht, auso Höisack wieder use u nes paar Gudeli gä u do isch si äntli ganz ine cho. Tabea isch cho ume Egge luege was ächt Kaila do guets überchömi? nach langem zögere isch si doch äntli cho u i ha mitere haub Schtund Verschpöhtig chönne schtarte. Am nöie Platz simmer scho Sehnsüchtig erwartet worde, aus erscht simmer go dr Schtau aluege, nach churzem zögere si si gwunderig go luege u sofort hei si vo däm feine Schtroh gfrässe. Nachere viertuschtund si si zu ihrem Huus ufe glüfe mit dene zwone, es si öbe drei Minute vom Buurehof wosi z Nacht ungerbrocht si zu ihrem eigene Huus mitemene grosse Ungerschtand, Weide u Wägli u dört verbringe si dr ganz Tag. I ha no verschiedeni Sache zum Outo us gno u bi de hinger noche glüffe u do hani gseh wie d Zwillinge immer wieder si bliebe schtoh u gluegt hei ob ig ou chömmi. Nach drei Schtund wo aui ruhig si gsi u aues agluegt u inspiziert hei bini ruhigem Gwüsse hei z gfahre. I bi scho wieder i Zytnoht gsi da ig no uf d Eiertour ha müesse, aui si scho a ihrem Platz i ihrne gwohnte Boxe gsi, dr ober Schtau hani fertig gha aber wo isch de di Dana Datooba? Hei Dana wo bisch? chumm es git z Nacht, komisch immer weme pressiert isch de geit grad nümme. Dana DANA langsam machsch mi hässig jetzt chumm wo hesch du di verschteckt??? do äntli hase gfunde im Resärveschtau isch si gschtande? "hei was machsch de du do? chumm a di Platz" do het si zur antwort gäh "DU hesch gseit we d Zwillinge wäg si de überchummi säuber e Box u do bini inere lähre Box. "Jo du hesch jo rächt aber mir fö nid hüt a weni wäg muess chaisch de morn afo," aha auso de goni haut wieder zum Mami go schlofe ". Es isch äbe scho so dass me ganz klar mitenang muess Komuniziere de chunnts guet. Am Mittwuch si d Zwillinge gange, am Donschtig het Dana ihres z Nacht i ihrer nöie Box gfrässe, d Dunja het Närvöser do aus Dana, i ha ou d Jakari zur Dana do aber das isch nid guet usecho di het so blöd do dass grad wieder ha zumMami gloh u dänkt jetzt konzentrieri mi  zerscht uf Dana. I hase i de höchschte Tön globt u bi vor dr Boxe bliebe schtoh, nachere haub Schtund hase wieder zum Mami gloh zum schlofe. Am Fritig obe ischsi scho vom haubi sächsi bis viertu ab siebni ganz ruhig a ihrem nöiie Platz bliebe, so wird ig jede obe schpöter i Schtau go u öpe nachere Wuche bliebt si de di ganzi Nacht.

29-Aug-2017 19:43:25
Lustige Geschichten
Kategorie: Esel
Forum: Diverses

So am Samschtig wirds ärnscht denn bring i nämli d Zwillinge a ihre nöi Platz,i bi froh um weniger arbeit u glichzytig drückts mir fasch ds Härz ab dass di zwone gö, aber ds Schicksau het mir unmissverstäntlich gseit dass ig müess ab boue, es schteit i de Schtärne wenn mis Mandli wieder cha häufe. I möcht mou froge ob dir ou so schpieli machet wieni mit mine Längohre? auso zum Bischpiu weni bim Weide Igang schtoh u ne rüefe de machi fasch wiene Barriere mit mim Arm, jede Esu wo bi mir verbi chunnt fahri übere Rügge. Auso einisch macht mi Arm di bewegig bi 89cm u denn wieder bi l35cm, i bruche ne nume ane z hebe u jede geit ungerdüre, i finde dass so luschtig über di verschiedene Rügge z schtrichele i verschieden höchine. I ha no chli nochedänkt, dass isch fasch wie Morse, einisch läng denn churz churz läng läng, villicht isch das e bricht oder ämänd es Lied? Wie chönnt me ächt das usefinde was es sötti heisse? schliesslich isches jo jede Tag angers da si nid i dr gliche Reihefoug chöme. Bi dr Aisha geit leider d Türe gäge ine uf u weni mitem Fuetter chume de het si nie hingertsi wöue, do hani agfange e Zougebühr i form vome Schtück Rüebli z gä u de   geits si schön e Schritt hingere u i cha mitem Höisack i d Boxe. We d Bsitzere säuber fuetteret de machts sis ganz angers u d Aisha luegt ganz verdatteret us dr Wösch u verschteit d Wäut gar nüme. Es cha ke angere Esu esones Gsicht mache wie d Dunja wese i de Ohre chräbele, si geit mitem Chopf fasch bis a Bode, d Ouge schliesst si um jo nid dür irgendwas aglänkt z wärde u de loht si d Ungerlippe bis a Bode lo hange u de muess ig ufhöre wüu i fasch nüme gseh vor lache. I ha grad wieder es Telefonat gha, d Zwillinge chani not nid bringe dr Schtau isch no nid fertig bis zum Wuchenändi, de haut de gömer nöchschti Wuche.

18-Aug-2017 19:42:51
Lustige Geschichten
Kategorie: Esel
Forum: Diverses

D Dana Datooba isch scho grösser aus ihri Mueter di wott emänd dr nöii Rekord bräche, di Familie chunnt immer aus erschti Hei dass heisst Dunja, Darinka u Dana. Hüt obe isch si si cho u i ha nume schnäu gluegt u gseit "chumm Darinka i di zwöiti Box, denn isch d Dunja cho u isch grad i di erschti Box u denn isch Darinka cho hääääääää di isch doch scho dinne? i ha chli gneuer gluegt u do hani gseh dass di erschti jo d Dana Datooba isch gsi u di het dergliche do si sig Darinka. Langsam muess ig äuä dene schwarz-brune Chöpf Nummere druf schribe, i ha Boxetüre wieder ufgmacht u ha gseit "so du Lusmeite chumm a di Platz" u mis het dünkt si heig glachet wosi bimer verbi isch. Im Mai isch si jo Jährig gsi u misst scho über 130cm, di wird zwüsche 135 u 140cm e uwäuts verschmusti schöni bruni Schtuete woni no muess es Plätzli finde, viellicht wüsst dir jo öper wo genau so öpis suecht.

18-Aug-2017 19:28:02
Lustige Geschichten
Kategorie: Esel
Forum: Diverses

I  dänke mir dass aui Eseli woni di ganze Johr mit viele guete Ratschleg cha häufe mir u mim Maa ghulfe hei dass die Gschicht doch no einigermasse guet usgeit, am Mändig genau ei Monet nach sim Unfau darf er Hei cho u mini Pfleg gniesse. Aune wo üs soviu Chraft gschickt hei u üs i ihri Gebät igschlosse hei e uwäuts härzliches dankeschön, es duet eim guet z wüsse dass me so treit wird. Mis Mandeli wird no lang a däm Unfau gnage aber wener wieder i sire Umgäbig cha si, de Eseli zuluege u süfferli ufem Hof umedässelet, si Garte cha go luege u vor auem wieder säuber Choche de isch d Wäut für ihn wieder in Ordnig. D Sina u d Langohre wärde de luege wener am Mändig usem Outo schtigt, auso weder de am Mittag vieli Esle ghöret schreie de wüsst de wiso - sie begrüesse mid Mandeli juheeeeeeeeeeee.

28-Jul-2017 14:41:13
Lustige Geschichten
Kategorie: Esel
Forum: Diverses

Irgendwie isch das nid üses Johr, zerscht di schlimmi Chrankheit vo mim Maa u jetzt das, bim letschte Gwitter hets richtig fescht i di obere Boxe grägnet, do hani mim Mandli gseit är söu doch bitte die Moos-chüssi go abem Dach putze. Am angere Tag ischer ufs Pultdach u het afo putze, es paar Tanne-escht wo grad ufem Dach ufgläge si het er abgsaget u abe gheit, i hase de witer füre gschleipft do ghöri wies Wärkzüg ufs Dach gheit. Mhh wieder mis Mandli, do het er doch immer müeh öpis vom Bode z hebe u de lot er z Wärchzüg lo gheie, i ha ufegluegt u gsehne niene, isch er emänd scho d Leiter abe cho? i ha überau ume gluegt u hane niene gseh. Wieder hani ufs Dach gluegt u do hani begriffe was passiert isch, mis Mandli isch dürs Dach gheit. I bi so schnäu wieni ha chönne uf di vorderi Site vom Schopf gschprunge u do hane gfunde, är isch ca 4 Meter i Ufenthautsruum vo de Esle abe gheit u di hei doch dört Döset u si so öpis vo verchlüpft. Si hei aui vo dusse ine gluegt u gschroue so öpis hani no nie ghört, si hei gar nümme ufgört. I ha z Tor zue do damit si nüme zuenim ine hei chönne u bi sofort go dr Ambulanz alüte u de wieder zu mim Maa, nei het jetzt das müesse si, är het u wäuts Schmärze gha u dusse hei d Esle komplett düre dräit. I ha versuecht di Esle witer wäg z triebe aber si si immer grad sofort wieder zrügg cho u hei gschroue das mir üs chumm verschtande hei. Schwärverletzt liegt er jetzt z Bärn im Schpitau u es wird e sehr sehr längi Zyt go bis er wieder Hei chunnt, auso we dir üs wieder e chli Chraft weit schicke de wär i froh aber bitte nid alüte, ha aui Häng vou z düe u ke Zyt zumTelefoniere. D Esle si 4 Tag Traumatisiert gsi, immer wieder si si go i Ufenthautsruum luege ob er immer no dört liegi u we eine e Bewegig gmacht het si si grad wyt dervo Galoppiert, langsam wärde si wieder normau. Ei obe bini am Telefon gsi do hani e Blitz gseh, sofort bini use um üse Hung wo angscht het vorem Gwitter go verrume aber si isch scho niene me gsi, zerscht bini z Fuess go sueche aber z Gwitter isch immer nöcher cho u i ha angscht wes Blitz dusse dsi auso bini mitem Outo go sueche hase aber niene gfunde. I bi wieder Hei u grad is Bett u ha für mi dänkt "jetzt hani gnue jetzt chöi mir aui i d Schueh blose einisch isch ou mini Geduld z änd" u bi sofort igschlofe. Am angere morge bini früeh use i dr Hoffnig d Hündin sig wieder Hei cho aber si isch immer no nid zrügg gsi, wieder bise go sueche, am achti hani uf Polizei aglüte us gmäude u e Schtund schpöter isch z Telefon cho si sig im Nachbardorf. Glücklich bise wieder go hole, d frog chame sich schteue wär meh fröid het gha si oder ig oder eifach beidi, wenigschtens die Gschicht isch guet usgange.

27-Jun-2017 19:56:50
Lustige Geschichten
Kategorie: Esel
Forum: Diverses

Auso vo de Esle gits nid viu z brichte, es geit ihne guet u si schtöhne wie nig unger dere Hitz u doch hei si no nid fertig ghöret. I ha jo scho öfters verzeut wie ig d Natur u ihri Tier beobachte u do hani folgendes gseh, mir hei das Johr wieder nöii Schwaubeli wo im Schtau Jungi ufzieh. Haut stop dass isch grad e chli schnäu gsi, nomou vo vorne auso di nöii Schwaubeli hei sich zerscht a mi müesse gwöhne, jedesmou weni ungerem Näschtli gmischtet ha bini vom übuschtem Beschimpft worde. Hei hallo i bi zerscht do gsi u we dir hie weit Jungi ufzieh de müesst dir mi ertrage, paschta, hani zuene gseit u mit dr Zyt si si ruhiger worde, aber weni im Schtau bi de chöme si nume ine cho chere u gö wieder use. Do eines Tages isch si doch zum Näschtli gfloge, si isch ufe Rand ghöcklet u het dri gluegt, ufzmou het si afo schnörrle, ganz ufgregt u glücklich u zwüschedüre het si sogar gurret. Für mi isch dr fau klar gsi, eis Vögeli het si Schale ufpickt, eso cha nume e glücklechi Muetter schnörrle u gurre. Vor 2 Tag isch am morge eis ufem Näschtrand gsässe, "aha hüt heiter Flugschtunde? dr ganz Tag hani immer wieder a Himmu gluegt ob igse gsengi, i ha bis am obe müesse warte aber när isches los gange. Di glückliche Eutere si mit ihrne drü Junge cho vordemonschtrieren wie guet si dass scho chöni, die schönschte Flugkünscht heissi üs zeigt u immer wieder über üsi Chöpf, denn wieder übers Huus u wieder ganz noch bi üs verbi. Mir hei nid emou müesse Itritt zahle für di Flugschou, es isch mega mega schön gsi, danke öich Schwaubeli.  Jo im Garte het di cheuti ou Schpure hingerlo u so si di haube Meetrübeli erfrohre u vom chline räschte hets es Birchermüesli ghä , natürli hei mir ou für d Vögeli lo si. E Amsle isch sehr sehr flissig cho hole für ihri Junge, doch einisch isch fertig gsi u do hetsi miner Heidubeeri wöue näh aber di si no nid rif u do hetsi haut e Höigümper packt. Aber was isch de los mit der Amsle? si isch immer wieder vo eim Eschtli zum andere gfloge u het üs schtober agluet, was isch los? gang doch is Näschtli u bring dine Junge dä Höigümper. Das Schpieli isch sicher 3 Minute gange do plötzli isch si mit däm Gümper im Schnabu abegschtoche u het ganz noch a dr Huusmur dä Gümper ines Ameisenäscht gha, si het dr Schnabu wieder usezoge u me het gseh dass ganz vieli Ameise a däm Höigümper ghanget si u di Böiti grad dopplet so dick isch gsi. Auso so öpis hani doch i mim ganze Läbe no nie gseh oder öpe dir?

21-Jun-2017 20:04:40
Lustige Geschichten
Kategorie: Esel
Forum: Diverses

Woni ei obe no mitem Hund bi go schpaziere isch si natürli wieder dürs höche Gras, "hei Sina chumm uf d Schtross cho loufe dr Buur hets nid gärn weme dürs Höigras louft" u was git si zur antwort ? " meinsch öpe e angere Hung heig siner Duftmarke uf dr Schtross hingerloh? sicher nid, i muess dänk dürs Gras süsch schmöcki jo nüt". Wosi rächt het si rächt aber ou ig ha rächt gha, d Sunne het so schön uf das höche Gras gschune u genau das isch zum Problem worde. Mir hei üse Schpaziergang gmacht u plötzlich het si sich afo  chratze, immer wieder u wieder, i ha mir no nüt derbi dänkt. Dehei acho hani mim Mandli sini obligati Glace brocht u ha säubverschtäntlich ou eini gschläcket, plötzli hets mi kutzelet am Haus u i bi go gschbühre ob emänd e Zägg umechrabli, ha aber nüt gschbührt usert dass es mi immer wieder kutzelet het. Am andere Morge hani gseh das mi Haus rundume zündrot isch gsi u pisse het, hei was isch de das? i ha chli Saubi agmacht u nüt witers dänkt. Langsam aber sicher hani afo düredräie so het das pisse, i ha es Tuech mit Essigwasser ume Haus dreit u has aubot müesse go früsch mache. Wohär hani de das wieder? i ha gschtudiert aber nüt use gfunde, u was isch de mit dr Sina los???? di hört jo gar nüme uf sich z chratze, sofort hase ou mit Essigwasser gwäsche, churzfrischtig hets e chli glinderet aber nid für lang. Si het sogar mit de Zähn a ihrne Bei umegnagt bis si blütet het, aues Essigwasser u Saube het nid lang Linderig brocht u do bini nach drei Tag doch zum Tierarzt u dä het sofort uf ne Nahrigsallergie tippet u gmeint ig mües sofort z Fuetter wächsle, i has gmacht bi aber gar nid siner Meinig gsi. Mir hei sicher fasch drei Wuche so müesse düresüche bises äntli het afo abklinge, do schickt mir doch mini Tochter e Bricht vore grosse Pflanze wo so grusigi Verbrönnige hingerlot weme mit dr blutte Hut i Kontakt chunnt we d Sunne druf schint. Di chlini Pflanze nimmt me gärn für d Chüngle u si heisst Bäretaupe, di grossi cha bis zwe Meter gross wärde u heisst irgendwie Bärenklau??? u we de d Sunne druf schinnt de gits verbrönnige, da mi Hund jo Beharrte isch hets si kener Blottere übercho aber d Hut isch wahnsinnig rot gsi u het bisse. I ha ungerwägs mi Hund gschtrichelet u so mit mine Händ de hei das uf mi Haus übertreit, ig wo jo säute bis nie Medikamänt nime ha müesse Fenistil gäge Allergie näh zäme mitem Essigwasser. Ir zwüschezyt het dr Buur das Gras gmäit, aber sobaut di Pflanze wieder wachst wird ig uf dr Gmeind mäude dass si die gö go usmache, es isch wichtig u mäudepflichtig so gfährlechi Pflanze z Liquidiere.

06-Jun-2017 19:20:11
Lustige Geschichten
Kategorie: Esel
Forum: Diverses

Es isch e uuuschöni Esuwanderig gsi nume leider viu viu z heiss, wo mir so am Wandere si gsi isch mir e gäbige Boumschtamm is Blickfäud cho, da ei Bsuechere scho chli euter isch gsi u Problem mitemene Chnöi het gha hani dr Vorschlag gmacht "mir zwe Pensionierti mache hie es Pöiseli bis dir wieder hie verbi chömet". Komisch komisch plötzli si no meh Teilnähmer "Pensionäre gsi" hi hi hi, es Meitschi wo d Cindy gfüehrt het isch de grosse hingernoche, ungerwägs heisi dr aschluss nach vorne verlohre u vo hinge isch ou niemer meh cho. Plötzli hets sich d Cindy vo aune verloh gfült u das Meitschi heigsi jo schliesslich ou nid kennt, sie het am Seili zoge u das Meitschi het logoh u d Cindy isch cho dr Bärg ab z Galoppiere. Mir si do gmüetlich am Pouse mache gsi do gsehni d Cindy im voue Galopp dr Wäg ab cho, brüellet het si wie am Schpiess, "hei Cindy isch jo guet i bi do" hani grüeft aber si isch so im schuss gsi dass si grad witer gäge hei zue Galoppiert isch. D Soraya het gmeint "wes Mami abhout de goni grad mit" ou si het sich losgrisse u isch hinger em Mami noche. Di Teilnämer wo di zwöi hätte söue hebe hei grad hinger noche wöue, schtopp hani gseit di zwöi chöme scho wieder, si chöi jo niene hi d Weidetor si zue. U genau so isches gsi, d Cindy het äuä äntli begriffe dass si jo mini Schtimm ghört het u scho si si wieder cho, ganz user Atem aber glücklich wieder bi mir z si. Sider si ou di grosse zrügg cho u mir hei üs ufe Heiwäg gmacht, nume no Hei zum Kaffi u de Chüeche u viu viu z drinke, 30 Grad si eidütig z heiss gsi.

01-Jun-2017 19:56:13
Parasiten im Ohr zwischen Fell und Hautansatz
Kategorie: Esel
Forum: Fellpflege

Hallo ein Tuch mit Essigwasser nass machen und damit die Ohren ausreiben anschliessend einen Ohrenschutz anziehen aber erst wenn man sicher ist dass wirklich keine Insekten mehr drin sind, keine Parasiten sondern kleine Kribbelmücken sind dafür verandwortlich.

27-Mai-2017 19:28:04
Lustige Geschichten
Kategorie: Esel
Forum: Diverses

Judihui morn hei mir üsi aujährlechi Esuwanderig u es hei sich mega viu Lüt agmäudet, i fröie mi nume leider hei sis mitem Wätter e chli zguet gmeint si erwarte 30  Grad, hoffentlich hei mir gnueg z drinke Poschtet. I ha jo einisch verzeut wieni Esuwinterdechine abgänderet ha u mitts im Winter weni ha wöue aprobiere jedesmou mi ha müesse warm alege u do hani mir gschworre dass ig das vo nuna im Summer wärdi mache u genau das hani geschter u hüt gmacht. Womer dr Figaro hei müesse schärre hetne d Bsitzere mitere warme Dechi deckt aber o Schreck di het jo hinger u vorne nit passt, das het mir grad i d Ouge gschtoche das do arbeit uf mi wartet. Erschtens isch si sitwärts viu z läng gsi u um siner Scheiche gschlabberet, d Bsitzere het scho probiert ufem Wiederischt mit zwe Inäier Schtoff wäg z näh het aber nid viu brocht. Auso hani ufem Rügge beidsits 12cm tiefer gnäit, das het zäme 24cm gmacht u so schtimmt jetzt d lengi bis under e Buch. I ha dä Schtoff abgschnitte u bi zum Figaro go aprobiere, passt genau, zwöit Schritt vor ar Bruscht d Verschlüss wägnäh scho dr Wöschmaschine z lieb u zämenäie, jetzt isch dr Haususchnitt immer no z gross auso hani di Schtoffbahne woni am Rügge usegnoh ha am Haus agnäit, hei es passt jupi. Die Dechi isch für Grössi 105cm agschriebe gsi u dr Figaro misst 120cm, i gloube ig gschtiege de öpe is Esudechi Näigschäft i das isch nämli e Marktlüke. Woni di Dechi wieder bi go aprobiere hani gseh das sis Füdli nid ganz deckt isch, ke Problem woni nämli die zwöi teili bir Bruscht zämegnäit ha hani zerscht dr Dopplet Schtoff wäg gnoh u genau dä hani jetzt hinde chönne anäie. Z letscht no z Bändeli ringsum wieder agnäit u fertig isch di Dechi uf Mass u erscht no aues Gratis us eifach fröid ar Sach. Mis Mandli het fasch e Krise gschobe dass ig so lang a dere Näimaschine dusse im Garte hocki u morn sig doch Esuwanderig u mir müessi no so viu vorbereite, ke angscht dass schaffe mir scho. D Bsitzere vom Figaro wird am Mändig cho ui di wird Ouge mache wesi di Dechi gseht u es paar Küssli zum merci säge wirds uf aui fäu gä. We  dir einisch Luscht oder Inträsse heit öiem Esu sini Dechi abzändere de chömmet ruhig verbi i hiufe gärn u ha erfahrig dermit.

20-Mai-2017 19:53:21
Lustige Geschichten
Kategorie: Esel
Forum: Diverses

Es isch nid grad luschtig ei Tag isches 27 Grad u zwe Tag schpöter hei mir no 7 Grad gha vorem Mittag, mis Mandli u nig teile üs d arbeit. Am morge am siebni gö mir go fuettere u de gits ou für üs z morge, aschliessend goni mit em Hung u mi Maa geit go d Zytig hole, mi Hündin wird immer lengsemer bis si bliebt schtoh "hei Sina chumm mir müesse hei i muess i Schtau". D Sina macht wieder es paar müedi Schritt, geschter het üs doch würkli e Schnägg überhout, do chunnt vor angere site mis Mandli mitem Outo u plötzli cha üsi auti gebrächlechi Hündin woni doch vorhär no rächt beduret ha putzmunter hingerem Outo härschpringe am liebschte grad bis hei. Schtopp Sina du bisch mit mir ungerwägs" si chert sich um u schläckt d Lippe zum säge "weni zum Fredeli hei schpringe de überchummi äs Söiöhrli", sone durchdribni Hündin . Auso geschter wos so grägnet het hani churz überleit ob ich ächt d Esle würkli söu is Gras lo, aber es het jo verschiedeni Tanne uf dr Weid de chöisi jo dört  drunder go frässe. I ha bi de Chüeh abgschperrt , d Weid uftoh u de d Esle grüeft, eine ume anger isch näbe mir verbi u plötzli es Kamel, häääää? sit wenn läbt bi üs es Kamel? i ha chli besser higluegt u do gsehni dass das jo dr Figaro isch gsi. I ha doch ganz vergässe dass er jo gschorre isch u bi dere cheuti viu z chaut het ohni Hoor u drumm es Buggeli gmacht het, ojemine Figaro dass duet mir schülinachthafe leid, chumm chaisch afang e Plache übere Rügge ha i chumme de schpöter mit dr Rägedechi", dä isch würkli froh gsi dä arm Tropf.

12-Mai-2017 19:43:40
Lustige Geschichten
Kategorie: Esel
Forum: Diverses

Es isch cheibe schad aber i ha immer no ke Jagge übercho oder heit dir emänd vergässe go z sueche??? De Esle geits ordeli guet, jo zuegäh dr Figaro hei mir wieder müesse Schäre da er vou Piuz isch gsi, no zwe Tag vorhär het me nüt gseh u plötzli si nim d Hoor grad Büschlewis usgheit, da är sone Alaskapeuz het gsehtme di Piuzschteue gar nid guet u drum isches besser grad z Schäre de chame se besser gseh u behandle. Klar het er e Dechi übercho u komischerwys macht de das nüt we nume är eini dreit, aber wehe öper angers het e Deschi de git er nid ender Rueh aus das er die Dechi het chönne abzieh so nachem Motto "entweder aui oder keine paschta". Da mir immer no nid sehr viu Gras hei gits am Mittag zerscht no e Portion Höi, bis si fertig si dermit go ni ou go ässe, chumm si si fertig schtöh si aui i Reih u Glied vorem Huus u luege dürs Fäischter. Säg mir eine wieme do söu i Rueh ässe weme vo 15 Esle dürs Fäischter beobachtet wird oder besser gseit Hypnotisiert wird "iss schnäuer mir wei is Gras". Da igs jo nid übers Härz bringe di arme Esle lo z verhungere schtohni haut uf u gose go is Gras lo damit si äntli Rueh gä u ig  gmüetlich cha mi Zytig läse. Wasi dür miner Esle glehrt ha? i weiss jetzt äntli wie sich d Tier im Zoo füehle wesi immer vo de Lüt beobachtet wärde.

04-Mai-2017 18:52:20
Kategorie: Esel
Forum: Diverses

Habs heute beim Hufeputzen wieder gespürt, unser Pflegeesel Proffesor Balthasar Benjamin Blümchen ist 27j. alt und hat an seinem Hinterbein seit über 20j. Knochenwucher der immer gleich gross ist und ihn kein bisschen stört, Durchmesser etwa 4cm breit und 1cm hoch, ich denke dass du wirklich keine angst haben musst.

26-Apr-2017 19:29:09
Lustige Geschichten
Kategorie: Esel
Forum: Diverses

I wett öich do die truuurigi Gschicht vo mim Jäggli verzeue, "es war einmal " genau so vö doch d Märli a aber bi mir isches keis, nei nei es isch di bitteri Wohrheit. Vor 30 - 35 Johr het mir mis Mandli äs chogge tüürs u guets Helly Hansen Jäggli gschänkt u das mit so viu Liebe wies nid oft vorchunnt uf dere Wäut, i säge dere Farb Violett angeri nennes Altrot. Da ou di beschti Qualität einisch ihre Geischt ufgit isch äbe genau das passiert. Au di Johr hani dr ganz Winter das Jäggli a gha weni bi de Tier use am wärche bi gsi u mit de Johre hets haut afo liede, zerscht hani dr Rissverschluss müesse ersetze u denn aus nöchschts hei d Armabschlüss ganz usgfranslet usgseh, auso hani ou die gwächslet. Aber es hiuft aus nüt jetzt si di ganze Ungerarme so abgwetzt dass me nüme cha säge si gäbi no warm. Klar mit de Johre hani no verschiedeni kouft oder übercho aber kes isch gsi wie das violette wo mit so viu Liebi isch gschänkt worde. Dr Maa hani jo immer no dr glich, d Liebi wär ou no vorhande numme überchunnt me das violette Helly Hansen Jäggli niene meh u i ha schier angscht d Esle würde mi de nümme erkenne weni inere angere Farb derhär chiem. Uf minere Eiertuur hani bimene Chunt genau das Jäggli gseh hange, hmm chönnti am änd ächt einisch froge ob igs über chiem? I ha sini Nachbari gfrogt ob ichs  chönnti wage das z froge, mir hei beide müesse lache u si hett gmeint sicher scho, irgendwie kennt me jo di Lüt nach 17j. Eierliefere zimmli guet. Di nöchschti Wuche hani mi ganz Muet zäme gno u hane gfrogt ob är di Jacke no bruchi? bevor i mi Gschicht ha chönne verzeue het er afo schtrahle u gseit är wüssi no genau woner di Jagge kouft heig vor 30j. sch....... hani dänkt die überchunsch nid. Die Jagge die lieb er heiss, di leger immer im Winter a wener öpis ums Huus chnuschti, werum i de frogi u do äntli hani mi Gschicht chönne verzeue aber leider ischer nid bereit gsi se abz gäh. Wieder e Wuche schpöter het er mir gseit är sig im Internet go sueche ob me se no chönni choufe aber är heig nüt gfunde, u was no viu schlimmer isch , mi gseht überau no Lüt mit genau dere violette Jagge mit dr grüene ifassig ume Riisverschluss u Chrage, dir weit mir doch nid säge dass aui Lüt wo äbe genau die violetti Helly Hansen Jagge heige se aui 30j. tragi?. I gloube i setzt e Finderlohn us für dä wo mir e sone Jagge findet, auso föt afo sueche u mäudet nech bi mir.

21-Apr-2017 19:24:42
Lustige Geschichten
Kategorie: Esel
Forum: Diverses

E Maa het geschter aglüte, sini ehemaligi Fründin göngi mit ihrne zwöi Eseli wäg u de heig är nume no eis, jetzt bruchi är sofort wieder es Schtüetli ob ig emänd öpis wüssi? Uf minere Lischte hets grad kes chlises Schtüetli gha, i ha überleit wär ächt do chönnti häufe? do isch mir e Kollegin vom Juraesuhöck i Sinn cho, villicht heig die no öpis, schnäu hani bire nochegfrogt u o  Wunder si het no eis gha. I ha ihri Telefonnummere sofort däm Maa gäh u ha gseit dr räschte müess er säuber erledige, är isch u froh gsi u het verschproche grad azlüte. Hüt isch z Telefon cho, das Schtüetli sig scho bi ihm u si vertragi enang, es sig es härzigs u liebs, er danki mir viumou. Jo jo mängisch geits rassig u de wieder harzets so wie bi mine Zwillinge, si si so schön, lieb, guet Usbiudet, umgänglich mit Chinder u Erwachsne u glich klappets nid, aber werum?????? ke Ahnig we d Lüt eims jo nid säge? villicht meini si si sötte Gratis si aber schliesslich chani ou nid is Garage go u säge gäbet mir doch das Occasionsouto es schteit jo bi öich nume ume, oder?  E Kolleg het gmeint "jetz hörsch uf angerne Lüt ihri Esle z verchoufe bis diner äntli Plaziert hesch", dä het Humor, das isch doch min Tschopp aus Esuvermittlerin. Hets bi öich ou soviu Schnee gä wie bi üs? ganzi 10cm hets anegheit, wo d Esle am morge usem Schtau cho si hei si ganz verdatteret us dr Wösch gluegt "jo woisch de üses Gras"? i hane probiert z erklähre dass es hüt nüt sig mit is Gras go. I hane tou Höi u Gärschteschtrou im Ufenthautsruum verteilet, i gloube fasch di chogge Esle hei bättet, wo si nämli fertig si gsi het d Sunne dr Schnee gschmolze gha, i bi go z Gras gschbüre u es isch nid chaut gsi do hanis gwagt u hase no e Schtund dri glo, es het sowiso nid viu gha.

09-Apr-2017 19:26:28
Lustige Geschichten
Kategorie: Esel
Forum: Diverses

Hurra ou üsi Esle dörfe äntli is Gras, zerscht gits no es bizeli Höi i Mage, si verweigeres mängisch de sägi zuene "erscht we dir das Höi gfrässe heit machi d Weid uf" u potzdussig do chöisi de aber Gas gä, när lose e Schtund ir Weid. Es het no nid viu aber füre afang längts, i ha di angere Johr immer es Schtück abtrennt u bi jede Tag mitem Band e Meter witer u dr hinger hani ou grad umene Meter fürezoge. So heisi suber abgfrässe u i ha d Bolle viu schneuer putzt gha, es isch aber doch jede Tag e rächti arbeit gsi, jetzt probieri es angers Syschtem. I ha beidi Weide i 5 abteilige antrennt u so si si jede Tag ire angere abteilig, mou luege obs e gueti Idee isch, eso chöme si jede 10 Tag wieder i glich Teil vo dr Weid u ds Gras het 10 Tag Zyt zum noche wachse. Es geit aune guet, es si scho verschiedeni Lüt cho d Zwillinge aluege, i nime mir Zyt für die Bsuecher, zeige di zwe Schtuetene, mir gö go loufe oder Rite, schteue meischtens no öpis z drinke uf. Di Lüt chöme meischtens no amene Sundig, di zwone gfaune aune guet, d Lüt verabschiede sich u mi ghört nieme öpis vone. Isch das würkli zviu verlangt weme sich no mou Telefonisch mäudet u seit was Sache isch????? es macht ou nüt we sich di Lüt angers entscheide, aber mindeschtens antwort gä chönnt me doch erwarte, aber es isch äuä nüme modern u bi haut vo geschter, aber i ha immer gmeint das verschtöng me unger ASCHTAND!!!!!!

26-Mär-2017 19:51:25
Lustige Geschichten
Kategorie: Esel
Forum: Diverses

I ha ganz vergässe gha dass sich dr Hufschmid agmäudet het, es si aui Esle im obere Schtau am nocheputze gsi u mir natürli im Wäg gschtande. Woni ne ha gseh cho, hani dr Vorschlag gmacht i  chönni jo eine ume anger am Boum abinde de heig er Rueh zum schaffe, nei nei das sig nid nötig är chönni guet im Ufenthautsrum arbeite die schtöhri in überhoupt nid. Ha ha ha jede het gmeint är müessi am Schmied häufe, d Tabea isch Solidarisch näbem abundne Esu gschtande so nachem Motto "i bliebe bi dir muesch ke angscht ha du arme abundne Esu" u natürli so noch dass dr Schmid gar nid derzwüsche het chönne. Dana Datooba isch im go hinger de Ohre schnüffle ober ächt ou so guet schmöcki wie nig, dr Figaro het immer wieder probiert em Schmied z Wärchzüg zu de Hose use z näh, so nachem Motto "säg weles bruchsch aus nöchschts i gibs dir sofort". Dr Profässer Benjamin Balthasar Blümchen churz Benj het z gfühl gha är müessi grad jetzt sofort ungerem Seili vom abundne Esu düre drücke. Zwe grossi hei sich entschlosse cho nes Sandbad näh u hei soviu Schtoub ufgwürblet dass dr Schmid fasch nüme het gseh. Aus letschti isch no d Darinka dra cho, die hets sich ufgfüehrt wie wesi zur Schlachtbank gfüehrt wurdi, vorem Ufenthautsrum isch si bliebe schtoh u hets verschtoh gä "do ine bringsch mi nie i mim läbe". Dr Schmid het gseh das ig es chlis Problem ha gha u isch vo hinge cho, i ha dänkt är düegse chli atriebe aber was het er gmacht????schnäu het er es Hingerbei gnoh u grad Darinka ufglüpft dass si bimene Hoor dr Chopfschtand gmacht het. I ha so müesse lache dass igs se fasch nid ha chönne abinde. Was het das söue? heschere wöue dr Chopfschtand lehre? hane gfrogt, nei nei aber das bringt se so usem Konzept das si vorwärts loufe. Bi aune aktione wo di 15 Esle abgloh hei ischer ruhig bliebe u het si arbeit gmacht, eis Hüfli ums andere ohne sich z närve, i wett mou gseh wele anger Hufschmid so ruhig chönnti bliebe, aber er hets jo so wöue auso hase lo mache, ganz eifach, es isch si Wunsch gsi u dä hanim erfüut.

26-Mär-2017 19:25:05
Kategorie: Esel
Forum: Diverses

Hallo unsere Aisha hat das seit Jahren ohne irgendwelche einträchtigungen, hatte nicht das Gefühl dass es sie stöhrt, was es genau ist ist mir unbekannt, kann leider nicht helfen nur beruhigen

21-Mär-2017 19:58:09
Lustige Geschichten
Kategorie: Esel
Forum: Diverses

D Cindy isch jo üsi chlinschti het aber vo ihrne Trächtigkeiten leider e dicke Buch zrügg bhaute, si  het immer gmeint si müessi Rekordverdächtigi grossi Füli mache, ihri Tochter wo gueti 6 cm grösser isch aus si het im Durchschnitt 3 Kg liechteri Füli gha aus d Cindy. I bi im obere Schtau am mischte gsi, es hät nume no zwöi Taxi vou gäu aber d Garette isch vou gsi u i hätse söue go lähre, es het mir aber gschtunke. Do hets hinger mir bouderet u woni luege was das für ne Lärme sig, gsehni dass d Cindy näbeverbi drückt het u di ganzi Garette usglährt het. Do hets aber es Donnerwätter gä, üse Dialog het sich eso aghört " D- Cindy du blödi Nuss meinsch es mach mir fröid zwöi mou di gliche Bolle zäme z läse?
            C- i ha gseh dass du zwenig Platz hesch füre Mischt, chaisch luege jetzt het er de Platz
            D- du suechsch nume e dummi Usred um nid z Schuld si, we so Seich machsch de LIEBENI di wahnsinnig
            C- tue jetz d Garette wieder lade wirsch gseh es het aues Platz
            D- i darfs fasch nid säge aber d Cindy het rächt gha, woni aues wieder i dr Garette ha gha hei sogar di zwöi Taxi vou no Platz gfunde, aber das hare natürli nid gseit süsch meint si emänd no si müessi mir jede Tag mini Garette cho uslähre. Mis Mandeli isch wieder do u tuet d Hüehner wieder säuber ine u es klappet wie am Schnüerrli.

16-Mär-2017 19:54:35
Lustige Geschichten
Kategorie: Esel
Forum: Diverses

Mis Mandli isch für ne Wuche wäg u het mir sini Hüehner aferdrout, jede obe geit är normalerwis mitem Chesseli vou Chärne u löckt se ine u das Fädervie macht das schpieli mit. He nu hani dänkt was dä cha chani scho lang, i bi mitem Chesseli i Hühnerfährich u ha afo rüefe "chum put put u derzue Chärne verschtröit" . Vo aune site si si cho z schpringe, hmm das klappet jo ganz guet bini überzügt gsi, woni aber i Fährich abe luege gsehni dass dört no drü am Scharre si. U do het mis Dilemma agfange, i ha grüeft si söue de öpe cho u ha glichzitig müesse luege dass di wo dini si gsi nid wieder use cho si. Irgendwie gseht das bi mim Mandeli aube ganz eifach us, langsam aber sicher hani mi afo ufrege, blödi Hühner hani dänkt, i ha es paar Schteine abegschosse u plötzli chunnt dr Figaro i Hühnerfährich. "Nei aber ou schpinsch"  dä hagu het gseh dass ig z Törli nid gsicheret ha u het dergliche do är wöu mir cho häufe u isch näbem Hühnerhuus hingere. Dört isch gli einisch fertig gsi u är het sich ufemene chline Plätzli kehrt, chumm Figaro gang wieder use du bisch do am fautsche Platz, i ha z Töri ufgha damit är wieder usechönni go u gluegt das nid emänd no e angere Esu di glichi blödi Idee heig. Dr Figaro isch scho fasch bi mir gsi do isch er uf d Idee cho är chönnt doch go zeue wieviu Hühner scho im Schtau ine sige, grad wie wene Esu chönnti zeue, u schwupps hets gmacht u är isch im Wintergarte vo de Hüehner gschtande . SANDRA Z Hiuf hani gschroue u do het si mis Dilemma gseh mit ihrem Esu u ischne du mitem Seili cho usefüehre, mir isch di ganzi Sach z blöd worde u i ha dene Hüehner gseit "machet doch was dr weit, we de Fredely do isch chanär sich de wieder mit öich vergnüege, i chumme de cho zuetue we dr im Bett sid.

07-Mär-2017 20:44:52
Lustige Geschichten
Kategorie: Esel
Forum: Diverses

Eigentlich heisse mir Dolores u Fredy aber i gloube fasch dass ig mi muess lo umtoufe. D Cindy üsi chlini frächi Muus wo jo immer meint si heig me rächt aus di angere ( u ganz unger üs gseit si het me rächt wüu si sone schlaui isch) aber pscht nid witer verzeue, äbe genau die chunnt i unger Schtau u schteit vor Darinka ihri Boxetüre. Erschtens isch Darinka sehr sehr suber, si macht aues hinger a dr Wand u drum möcht ig nid dass angeri dört ine gö u we d Türe offe isch de macht si grad dr Wäg zu de zwe hingere Boxe zue, us däm grund isch si immer zue. Darinka lot immer e chli Höi u Höiblüemt lo liege, irgendwie isch si nid so verfrässe wie angeri u genau das weiss äbe di chlini Cindy. We di grosse zu de obere Schtäu gö de chunnt d Cindy im Schtächschritt abe u schteit vor Darinkas Boxetüre u när schtieretsi fasch Löcher i d Türe u mi hets dünkt si heig öpis brümelet. I ha verschtande "Sesam öffne dich" komisch hie heisst doch gar niemer eso, aber si lot sich nid lo beiire u brümelet wieder "Sesam öffne dich" u öpe nachem siebedemou brümele chunnt äbe de d Dolores u macht di Türe für d Cindy uf u si cha go nocheputze. So öpis chunnt äbe nume dr Cindy i Sinn u drum bhoupti dass si e sehr schlaui Eselin sig u ig lo mi lo umtoufe i Sesam.

04-Mär-2017 19:56:12
Lustige Geschichten
Kategorie: Esel
Forum: Diverses

I gloubes nid was d Aisha wieder gleischtet het eigentlich bini dr überzügig dass mi nüme chöni überrasche aber d Aisha hets gschafft. Auso weni zue dr Aisha i d Boxe go u säge "so Hufkontroue bitte" de chunnt si grad sitwärts gäge mi zue um mi a d Wand z drücke aber i lo mir das nid lo biete u hebe eifach dr Hufus-chratzer gäge ihre Buch u wesi de nid säuber ufhört drücke de piekts haut. Ok si begriffts langsam sehr langsam, drei Huf chani putze u de fots Theater erscht rächt a, dr vorder rächts wott si eifach nid gä u i lüpfi mir sicher ke Bruch um das Huf us z chratze. "De bhautisch haut d Schteine drin we nid wotsch anehebe" u go zum Neli ine go d Huf us chratze, die lüpft immer scho dr nöchscht bevor ig überhoupt dört bi, "jo jo Neli we doch nume d Aisha vo dir chönnt abluege wie du schön eis Bei ums andere lüpfsch um mir d arbeit z erlichtere". I bi zur Box vom Neli use u was gsehni do????? d Aisha lüpft ihres Bei woni vorhär nid ha chönne us chratze u lot mi mini arbeit mache, hmm werum de nid grad scho z erschte mou? isch doch glich mir heis gschafft oder si het mi gschafft wiemes ou wott aluege. Ei Tag schpöter isches no verrückter use cho, mis obligatorische "bitte Hufkontrolle" d Aisha chunnt wieder gäge mi u bevor i mi Fuess cha i Sicherheit bringe schteit si mir doch tatsächlich uf miner Schlarpe u i cha im letschte Momänt mi Fuess zrüggzieh, woni abe luege isch mi Fuess Nackt ??? woisch mi Socke? hei di hets gschafft mir mi Schlarpe u  dr Socke ab z zieh?? aber mine blutte Zeie geits guet gottlob, äbe es git nüt wos nid git, klar weiss ig das me söu mit guetem Schuehwärch zu de Tier aber nach dem lange Winter mit Muunbuts hei miner Füess Sehnsucht nach Luft u Liecht.

19-Feb-2017 20:18:18
Lustige Geschichten
Kategorie: Esel
Forum: Diverses

I probiere jo miner Zwillinge z verchoufe u do isch ei Tag e Frou cho wo interässe het u mir sigo loufe, läck hei di zwone gschpunne im Waud, zwöimou hani müesse d Kaila lo go süsch wär i gschtürzt, i ha mi fasch nüt ufgregt aber di Bsuchere het gfunde das sigi guet gsi so heigs si ömu ou gschpührt wieviu Chraft di zwone heige. Hüt hani dänkt i göng mit dr Darinka u dr Babette go loufe, d Darinka het scho es paarmou gseit si wett ou gärn mitcho, für Notfäu hani es paar Rüeblischtückli mitgno, fertige blödsinn - wie bini ächt nume uf di komischi Idee cho?? chumm hani zerschte Rüeblischtückli verteilet natürli ohni Notfau hets Theater agfange, vo beide Site bini a kaflet worde, i hami nume einisch gnärft vom erschte Rüeblischtückli bis wieder dehei, u derbi isch d Darinka glüfe wie usem Biuderbuch so aschtändig, ha äuä no d Zwillinge im Chopf gha. Isches würkli nid müglich di zwe Schtuetene z verchoufe?? i verschtoh d Wäut nüme, di beide si super lieb, guet usbiudet, wunderschön, im beschte Auter, beide hei scho mou es Füli gha u ou das hei si super gmacht. Ihre einzig "Fähler" das si Zwillinge si, aber mi cha guet nume mit eire go loufe u di anderi bliebt dehei, zwöimou im Johr geit eini für es paar Tag mit uf Trekking u di anderi bliebt ohni Problem dehei aber sobaud si wieder zäme si merkt me das si Zwillinge si. Wär cha mir häufe e schöne Platz z finde? irgendwo muess doch öper si wo für di zwöi beschtimmt isch, jo si bruche e Schtau e uslouf u e Weid. Es git immerno Lüt wo ärnschthaft froge ob Esle e Schtau bruchi u ob me jede Tag mitne müess go loufe? muess me nid aber de sötte si wenigschtens e rächte uslouf ha wo si sich säuber chö bewege. I bi für jedi Hiuf froh, danke im vorus.

03-Feb-2017 20:28:31
Lustige Geschichten
Kategorie: Esel
Forum: Diverses

Afang Johr isch jo bi üs grossi Impfaktion gsi, d Füli hei jetzt müesse z zwöitemou Gimpft wärde zum Grundimunisierig z gewärleischte, wo d Tierärztin cho isch si d Eseli aui dusse gsi, i ha es Seili gno u dr Yakari ume Haus gleit u di chlini het sich ganz friedlich lo Impfe. Mir si zu de grosse abe u ou dört hani dr Dana Datooba genau wi dr Yakari nume z Seili ume Haus gleit u ou si het das ganz ruhig lo gscheh, wo d Tierärztin fertig isch gsi hani mirs nid chönne verkneife u em Figaro wo jo jedesmou sones Theater abloht z säge "hesch gseh wieme das macht? du Angschthas". Er het no es Zitli dranume gschdudiert wie ächt di Dana Datooba so öpis gfährlichs so eifach lot lo gscheh, do het er doch sone blödi Meinig vo dene Wibervöucher u när hei si viu viu me Muet aus dr Figaro dä Matscho, irgendwie scho chli blöd für ihn. I bi mängisch ou rächt grossschpuhrig wie d Froue chönni mehreri Sache mitenang mache, i ha wöue dr Schwiegertochter alüte i glichzytig mi Zeigfinger verbinde, dört hani nämli e grosse Kleck wo rächt schmärzhaft isch. Ds Telefon het glütet u glütet, i has mit dr Schultere a mis Ohr drückt u ha mis Fingerbeeri verbunde, hmm komisch es nimmt niemer ab, de probiers ig haut schpöter nomou. Schtouz hani mi Finger agluegt ob ächt das Pflaschter ou häbi' jo aber werum isch de mi Dumme verbunde i ha doch dr Kleck im Zeigfinger??????hmm viellicht chöi mir Froue doch nid mehreri Sache mitenang mache, hi hi hi ha äuä mis Muuu chli vou gno, aber usser mir hets jo niemer gmerkt u dir wärdet das jo sicher nid witerverzeue u über mi lache ODER?

31-Jan-2017 20:50:57
Lustige Geschichten
Kategorie: Esel
Forum: Diverses

Si hei gottlob wieder normali Themperature gmäudet u i ha mi entschlosse wese de am Mittag i ihri Boxe schperri di Dechine wieder ab z zieh u so chönni si sich wieder ohni gwöhne im Schtau. Uiii het das es protescht gschrei gä "bisch verruckt? hei mir hei chaut? i wott mini Dechi zrügg" genau so hets tönt us 15 Chehline aber i bi hert bliebe, schliesslich isches 5 Grad gsi.  Nachem Mittag wose ha usegloh si di meischte grad zum Schtau us u heis vergässe oder akzeptiert? nume dr Benj het sini no es paar Tag lenger brucht. D Babette het aume aschin drunder gschwitzt, si het nämli hinger de vorder Bei nässendi Schteue gha, zerscht schlottere si vor cheuti u när schwitze si mit de Dechine es isch u schwierig auses richtig z mache. Jetzt isch wieder grossi Wösch a gseit bis die Dechine aui gwäsche u verumt si, dr Schnee isch fasch wäg nume dört wosi immer düre glofe si hets no räschte wo sehr sehr glischig si, vorem obere Schtau hei mir müesse Jurachies drüber schtröie, i dänke no zwe Tag u aues isch wieder normau. Schnee isch jo scho gäbig jede Bolle wo abgsetzt wird verschwindet eifach "aus den Augen aus dem Sinn" aber we de dr Schnee wieder wäg isch de gits de z putze bis wieder aues normau usgseht. Geschter isch d Sitzig wäge gfährliche Schtrosse verhäutnis abgseit worde u mir hei gägewärtig 8 Grad scho fasch Früehlig.

24-Jan-2017 19:58:20
Lustige Geschichten
Kategorie: Esel
Forum: Diverses

Mängisch lis ig vo Lüt wo nume einisch am Tag zu ihrne Esle gö u i bi dr ganz Tag ums se ume u zwüschedri passiert wieder so öpis blöds wome sich fasch nid cha vorschteue. Am morge woni i Schtau bi gange zum fuettere gsehni d Soraya wo sich säuber kneblet het, di vordere Verschlüss vo ihrer koufte Dechi het si dürs Muuh gha. Wie i Gottes Name het si sich säuber so chönne chneble? i ha mi ganzi Chraft brucht um di Verschlüss usem Muh z löse, mir isch ganz komisch worde us beduure, wie lang isch si ächt äso do gschtande, isches  bim ufschtoh passiert? di Dechi passt ganz guet u ums Füdli hets si jo no es Bändeli wos dehinde bhautet. Weni jetzt dänke das öper nume einisch am Tag zu sine Tier geit u genau e haub Schtund schpöter passiert so öpis u dr Esu muess 23,5 Stunde so kneblet warte. Langsam aber sicher hani gnue vo dere cheuti, hüt morge hei mir wieder minus 15 Grad gha u woni mit dr Hündin bi go loufe het mir z schnufe vo der chaute Luft grad weh do u so hani mis Hausduech vor d Nase bunde um d Luft chli z erwärme bevor se igschnufet ha. Schön u guet aber mini Brüue isch aglüfe u kener zwe Minute schpöter wose ha wöue putze isch dr Dampf igfrohre gsi, do chaisch de go luege we nüt gsesch u so isch haut mini Bärner Sennehündin zum Blindehund ufgschtiege. Düet dir o so gärn Schpure im Schnee düte? wos früsch gschneit het hani am morge woni usem Hus gange bi Schpure vomene Müsli gseh u de Chatzetäupli, wär isch ächt ender verbi cho? dernäbe si ou Fuchsschpure gsi u de när no viu grösseri, was um Himmelswille isch de do z Nacht aues cho um Asyl bitte? Di groose Tatze hei kener Chröieli Schpure gha wie se üse Hung hinterlot, die isch sowieso no igschperrt gsi, langsam hani e Verdacht gha, dass cha nume dr Luchs gsi si u richtig woni schpöter miner Esle ha wöue go useloh hani 30 Meter witer dr Hang z deruf gseh wiener am Muuuse isch gsi, mi het guet dr rund Chopf erkennt u dr läng dünn Schwanz. D Reh gsehmer jede Tag, si kenne auem aschin d Outo, ei obe woni uf d Eiertuur ha wöue si si grad bim Nachbar ir Weid gsi, sofort hani d Schinwärfer abgschteut u genau näbe ihne ghaute, si hei mi ganz ruhig agluegt, i ha d Outo Schibe langsam abedo u de hani mi bine bedankt dass ig si so noch dörfi aluege, vom Outo bis zu de Reh si kener 5 Meter gsi, nach zwe Minute enang aluege si si ganz gmüetlich gäge Waud ufe u ibi miner Eier go verchoufe, z läbe isch doch eifach schön weme so Sache darf erläbe.

19-Jan-2017 20:26:05
Lustige Geschichten
Kategorie: Esel
Forum: Diverses

Dechine u kes ändi vo dene Gschichte aber mi cha ou uwäuts fröid derbi ha, was dir chömed nid noche was ig meini? he wartet doch bis i afo verzeue u de müesst dir sicher ou grad lache we dir öich di Situation vorsteuet. Auso es isch jo so das di Dechine säute passe u de sitz i haut a d Näimaschine u ändere ab, i ha dr Sandra  zeigt wie ni d Dechi vom Benjamin abgänderet ha, si het gluegt u gmeint "gar nid schlächt aber am Haus hei si doch ou chaut, es sötti irgendwie ou dört besser decke", si het mir ihres ok gä dass ig d Dechi vom Neli ou dörfi abändere. D Sandra het vorne mitemene Schnüerrli d Verschlüss verlängeret wüu süsch z Füdli nid deckt isch gsi, auso hani di Verschlüss abtrennt u es Stück Stoff inegnäit u denn bini go probiere wies usgsengi. Jetzt chame eifach di Dechi umdräie u schlüft de mitem Chopf ine u de wieder zrügg dräie, e wala gseht doch guet us, aber eis isch wohr ume Haus isches e chli wit offe, auso wieder i d Stube a d Näimaschine go witer us-tüftele wie me das Problem cha löse. I froge mängisch Rossbsitzer ob ig ihri kaputte Dechine dörf ha do hets nämli no ganz viu ganze Stoff dra, di Dechine si jo meischtens nume bi de Verschlüss verrisse. I chönnt doch e chli Stoff asetze ume Haus hani so für mi dänkt u ha mi as Wärk gmacht, zerscht grob gmässe wie läng u breit das Stück dörfi si u de grad zuegschnitte u agnäit. He was isch de das? ha migottsdüri z churz bemässe es hei genau drei Zentimeter gfäut, mischt muess ig jetzt würkli das chline Stückli no isetze? das stinkt mir jetzt aber. Woni so ghöcklet bi u chli endtüscht us dr Wösch ha gluegt isch mir uf einisch öpis z Sinn cho, es passiert nämmli nüt vergäbe, es het genau so müess se si, süsch wärs amänd no z äng worde u wesi de wei Höi frässe u dr Chopf abehei de isch das grad ideau wes offe isch. Z blöde a dr ganze Sach isch gsi dass i mi jedesmou ha müesse d Schtifu, Kappe u d Jagge alege das jo dusse so chaud isch gsi, i gloube z nöchschtemou nimm ig mis Modäu i d Schtube. I bi zur Nela u ha ihri di Dechi mitem SCHTEHCHRAGGE agleit, u genau jetzt müesst dir öich das Eseli vorschteue mitere Dechi mit Schtehchragge, i ha mi fasch nümme chönne erhole vor lache, nei gseit das luschtig us, o weni doch numme chönnt es Föteli ine tue damit dir di geniale arbeit chönntet gschoue. Obe ufem Widrischt liegts uf u uf dr Site isches eifach es paar Zentimeter vor Huut wäg u vor am Haus isches offe wie ne Hemlis-chragge, i gloub i näie dört uf eire Site e Chnopf a u uf dr andere Site e chlini Schloufe u de chame weme wott dä Chnopf zuetue. Dir söttit z Neli gseh di cha nümme normau loufe, di schtouziert mit ihrer wunderschöne Dechi mit Stehchragge, i ha grad müesse dr Sandra alüte u ha fasch nid chönne verzeue was ig gmacht heig so hani müesse lache, u eis isch klar "gratis eifach us Spass a dr Sach u us Liebi zu de Eseli nimm ig mir soviu Zyt um so öpis z erfinde. Auso we dir ou Dechine heit wo vorne u hinger nid passe de chömmet doch eifach zu mir u zäme wärde mir das Problem löse.

17-Jan-2017 19:45:56
Lustige Geschichten
Kategorie: Esel
Forum: Diverses

Jo d cheuti isch wieder zrügg cho u d Eseli hei ihri Dechine wieder gfasset, i lo di grosse Esle am Nomittag zu de chline ufe u dene wirds z äng u  chöme haut de i di ungere Schtäu, so heisi ömu Bewegig. I bi am Bouele sammle gsi do hani d Dana Datooba gseh umegalopiere wie ne gschtörti, jo jo dr Jugendlich übermuet hani dänkt für mi u witer gmischtet. Hmm di het jetzt aber lang ustuur hani so für mi dänkt, u komisch das ke anger hiuft spinne, plötzli isch si i Schtau cho - isch sofort z Bode hets sich trölet isch ufgschtande u scho wieder dervo galopiert. Kener zwe Minute schpöter hani gseh wiesi im Ufenthautsrum sich trölet het, auso do schtimmt öpis gar nid hani zu mim Mandli gseit u genau higluegt werum si ächt gäge Buch ufe schtüpfi. Do hani ihres Problem begriffe, bi dr Dechi hets sich hinger es Schnüerli wo ums Bei söt go glöst u das het se bschdändig am Bei kuzelet, ok Dana chumm i hiufi dir, schneuer gseit aus gmacht. Zäme heimirs se chönne ifo, mis Mandli hets se gha u i ha das chogge Schnürli komplet wäg gno u Dana isch wieder go ihres Mami sueche um e Schluck Miuch z drinke uf dä Schreck abe.

12-Jan-2017 19:06:56
Lustige Geschichten
Kategorie: Esel
Forum: Diverses

Es git Lüt di dänke i redi viu, he nu, aber dir söttit emou üse Hung ghöre di chifflet praktisch dr ganz Tag, i ha ke ahnig mit wäm oder über was si so muess chiffle, villicht isches haut ou wüu mir e chli meh ir Wohnig si. Mir si ungerwägs gsi u do isch gottlob öper zum schnörrle ufdoucht, mir beide hei über Gott und die Welt plouderet u d Sina het immer wieder gseit "chumm jetz, gömer? Pscht bis jetzt ruhig mir gö de wemer gö, chaisch jo go schnüffle im Umkreis vo 30 Meter" hase wäggschickt aber di dummi Nuss het witer kifflet mir wöui jetzt go. Entnärft hani mi vo dere Frou verabschiedet u ha wöue gäge hei zu loufe, aber was macht mi Hung? au 20cm schnüfflet si wär ächt dört biselet heig, wie aut är sig, wener sig verbi cho wiener heissi und so witer, u was ha ni gmacht? "chumm jetzt Sina mir wei hei - öpe nachem dritte mou rüefe hets i mim Chopf klingelet, i ha jo genau z gliche gmacht wie vorhär mi Hund - wie der Meister so der Hund". I ha mi zäme gno u ha kes Wort me gseit sondern d Natur uf mi lo iwürke u komisch d Hündin het bis dehei ou kes Wort me gseit.Jo jo so lehrt me jede Tag wieder öpis nöis.  Mir hei jo d Aisha vo dr Kinesologin lo dürefroge wüu si es gnursch im Chopf het gha, langsam aber sicher veränderet sie sich zum guete, jedesmou weme öpis vore het wöue het si eim verständnislos agluet u nume Bahnhof verschtande, woni hüt am Hufschmid bir arbeit zuegluegt ha isch d Aisha plötzli im hingertsi Gang gäge mi cho mit dr bitti zum hingere chräbele. Mache mir doch gärn, i ha kräbelet u kräbelet u langsam hani gnue gha aber sie no nid, i bi zwe Schritt rückwärts u si ou bis si mir fasch uf Zeie gschtande isch, chräbele chräbele u chräbele, "so jetzt längts aber Aisha hani gseit u bi dasmou zwe Schritt sitwärts gange.  I ha gseit "jo Aisha we jetzt zu mir wotsch cho de muesch e Kurfe mache, si het hingere gluegt woni sig u när het si sich tatsächlich so boge das si wieder mit ihrem hingere zu mir gluegt het, hei das isch e mega mega ufgweckti Reaktion gsi für si i ha so fröid gha, mach witer so Aisha äs chunnt guet, bravo.

10-Jan-2017 12:54:23
Lustige Geschichten
Kategorie: Esel
Forum: Diverses

Uiiii am morge am nüni woni ha wöue go d Esle use lo hets immer no Minus 16 Grad azeigt, auso das geit jetzt aber gar nid hani für mi dänkt u bi go Dechine füre hole, das isch e henne arbeit bisme 15 Dechine agleit het aber 30 Ouge hei mi dankbar agluegt. Jedes mou weni se alege passt wieder em eint oder anger öpis nid, i gloube fasch di chogge Dechine verändere sich i dr grosse Chischte weme se lang nid brucht. Wüsst dir was z schlimmschte isch was cha passiere? we genau i däm momänt d Näimaschine dr Geischt uf git, nei aber ou, i ha probiert u probiert aber es isch nüt z wöue gsi, si het eifach gschpunne, ob si ächt ou z chaut het gha? i gloubes nid, villicht hanis mit em öle z guet gmeint. Aber gottlob het mini Generation no glehrt vo Hand z näie u so hani di Bschleg haut so agnäit, gseht nid ganz so schön us wie mit dr Maschine aber es het haut scho hert dür d Dechi u de no dür d Bschleg, mängisch isch d Nodle hingertsi i mi Finger, autsch het nid bsunders wou do aber was nimmt me nid aues i chouf für üsi gliebte Esle. Genau zwe Tag hani di Dechine brucht u när hets gheisse wieder abzieh "NEI NEI hei 15 Esle gschroue üs gführt jo z hingere ab" . Wosi nume no vo Minus zwöi drü gschriebe hei hani di Dechine am obe wosi i Schtau cho si abzoge u so hei si sich über d Nacht wieder dra gwöhne ohni z si. 14 Esle heis akzeptiert aber dr 26j. Benjamin het fasch nümme noche möge mit schlottere u do het er si Dechi wieder über cho u jetzt ischer er Häppy, was wott me meh. Es isch scho chli blöd für zwe Tag di Dechine dräckig z mache u när wieder aues z Wäsche aber es bliebt mir nüt angers übrig, mängi Winter geits ohni u dasmou hei mirs se haut wieder einisch brucht, für das hei mirs se jo schliesslich.

10-Jan-2017 12:37:02
Gibt es Schwierigkeiten mit 3 Eseln als Kleingruppe?
Kategorie: Esel
Forum: Diverses

Ich finde eine dreier Gruppe gar nicht schlecht, man kann nur mit einem Spazieren gehen und ein bisschen Schulen, es ist eine Ehre für den der mit dem Chef alleine unterwegs sein darf  und er wird das sehr geniessen, besser gesagt beide werden es geniessen. Auch wenn ich eine Herde von 15 Eseln halte nehme ich oft nur einen mit auf den Spaziergang, manche zögern erst und fragen "kommt den niemand sonst mit? nur wir beide? aber bald einmal geniessen sie die Situation. Zu Hause haben ja auch nicht immer alle Lust zum spielen und somit finden sich die zwei die bewegung brauchen.

05-Jan-2017 19:12:09
Lustige Geschichten
Kategorie: Esel
Forum: Diverses

Dr Figaro wo bi üs i Pension schteit isch so ne richtige Macho, usert wes um z Impfe geit do wird er zur Memme, also jedesmou wemir Hängschtfüli gha hei het dr Figaro Schtundelang mitne gschpiut u we de es Schtuetli ou het wöue mithäufe het er so Schnippisch gmacht "phh mit Wibervöucher schpil ig nid". Sit dr Dabasco furt isch het er niemer meh zum schpiele, langsam aber sicher wirt's ihm längwilig, geschter woni i Schtau bi cho hani d Dana Datooba ir hingerschte Boxe gseh, si isch ganz närvös gsi. I dr Türe isch dr Figaro gschtande u het jedesmou wesi näbim düre het wöue se versucht schpielerisch i d Bei z chlemme, d Dana isch überhaupt nid drus-cho was dä Figaro vore wott. Es paarmou hetsis versuecht u wose dr Figaro nid düre glo het, het si nach ihrem Mami gränet, dr Figaro het se düre glo u mi het uf sire Schtirne chönne läse "blödi Wiber". He nu wen ers viellicht öfters probiert de merkt de d Dana um was es geit, si si äbe scho sehr verschiede d Schtuete oder d Wallache.

01-Jan-2017 12:36:49
Lustige Geschichten
Kategorie: Esel
Forum: Diverses

Es isch jo ganz klar bi aune mine Gschichte woni verzeue dass ig miner Esle nid äxtra i Gfahr bringe aber weme viu ungerwägs isch de chas mou passiere dass me ine blödi Situation gratet, i bi ehrlich u schtoh derzue was mir zueschtosst u dä Esubsitzer wo no nie ine ungmüetlechi Lage isch cho dä wett i lehre kenne. I bi i mire Tätigkeit als Esubeschützere u Behüetere amene Esubsitzer uf Zeie gschtande u do hets du tönt dass me mi ou chönnti Azeige was ig do für Sache verzeui, uf mini Frog was de gnau so gfährlich sig gsi hani ke antwort übercho, henu mir si d Esle wichtiger aus ihri Bsitzer, di chöi nämli öpis verbessere dr Esu isch üs Hilflos usglieferet. So lang i cha wird i mi für d Esle isetzte u haut em eind u angere uf Zeie tschaupe, i weiss i cha alei nid di ganzi Wäut rette aber jedem Eseli woni cha häufe macht mi glücklich.           
Bis üs isches gägewärtig u chaut, z Nacht isches öpe 10 Minus, mir hei aui Schtäu guet zue gmacht u gö erscht e chli schpöter go mischte, d Blache düe mir nume e chli uf das d Eseli schnäu use chöi go luege wie chauts isch. Si chöme no so gärn wieder ine u de machi nachem Schtaune aues wieder zue u si gö eifach vo eire Box i di angeri go nocheputze u dr Schtau bliebt einigermasse warm. Hüt am zäni isch no Minus 7 Grad gsi u im Schtau 4 Grad das macht 11 Grad ungerschied u so het me zgfüu weme vo dusse ine chunnt es sig warm, bis jetzt isches no ohni Dechine gange aber wes no lang so chaut bliebt muess i de doch no afo idecke, i luege eifach uf d Eseli u sobaud eine afot schlottere de wird er deckt. So i wünsche aune e gute Schtart is nöiie Johr mit vielne schöne Schtunde mit üsne gliebte Langohre.

16-Dez-2016 20:44:17
Immer wieder kleine Löcher in den Hufen
Kategorie: Esel
Forum: Hufpflege

Wir haben manchmal die gleichen Probleme, erstes Gebot die Steine mit grösster Vorsicht rausnehmen damit das Loch nicht jedesmal grösser wird. Wenn wir ein wirklich grosses Loch haben, stopfen wir ein bisschen Watte rein damit nicht Schmutz und Steine reingedrückt werden, die Watte alle zwei Tage auswechseln.

16-Dez-2016 20:39:34
Kategorie: Esel
Forum: Fütterung

Mein Tierarzt hat mir einmal erklährt dass man einen Esel daran gewöhnen könne ohne Futter auszukommen, das blöde sei nur wenn er es endlich kapiert hätte wäre er Tod. Esel nur mit Stroh füttern ist etwa wie wenn ein Mensch nur Wasser und Brot kriegt, er überlebt auch aber wie. Man kann das Heu mit Stroh strecken um sie länger zu beschäftigen, es braucht nicht unbedingt Bio Stroh zu sein aber sauberes und nicht verschimmeltes, Gerstenstroh und Haberstroh werden meistens razbutz verspiesen, Weitzenstroh wird gründlich erlesen, das feinste davon gefressen und der Rest bleibt liegen und gibt mit der Zeit eine schöne saubere Matratze zum schlafen

13-Dez-2016 13:00:19
Lustige Geschichten
Kategorie: Esel
Forum: Diverses

I bi agfrogt worde ob i ächt nid möchti Esurite abiete zwe Tag am Wiehnachtsmärit, nei danke dass dueni mir nid a, erschtens bringi ei Esu schlächt vo de andere wäg, wär luegt mir de sider zue de angere? u weni drü mou dr glich Cher gmacht ha seit mir mi Esu plötzli "das isch mir z blöd chaisch säuber go" u när bschtändig Chind ufe - Chind abe - Helm uf Heum ab, nei nei das finde mir gar nid Luschtig. Aber was mir natürli gärn abiete isch Schtrichuzoo für d Chinder, dr Maa het sich dermit iferschtande erklährt u mir hei üs geinigt uf 4 - 5 Schtund am Samschtig u Sunndig. Am Samschtig hani no e Arzttermin gha u d Gloria üses Behinderete Pflegchind het scho ungeduldig gwartet bis mir mit üsne Esle hei chönne abmarschiere. Si het d Cindy u d Soraya gfüehrt u ig di hochbeladeni Babette, zur vorsicht hani drei Dechine mitgnoh, es Schüfeli u Chröieli damit dr Platz immer schön suber isch u d Chinder u d Eseli nid i de Bolle umeloufe, üses Picknick u natürli Heu für di drü nid das si amänd no verhungere. D Gloria het das ganz guet gmacht mit ihrne zwöi Eseli, dr Waud z derfüre denn übernes Schtopufäud übers Plateau u denn dürs Quartier ab, unger dr Ungerführig vor Bahn düre u denn mitts dür Moutier, über Zebraschtreife u z letsch mitts düre Wiehnachtsmärit zu üsem Gheg. Es isch nid lang gange si scho mängs Chind bi de Eseli ine gsi u heise gschtrichelet u Bürschtet, üsi Babette isch jo fasch schwarz aber wo di chline Chinder oft gäge d Hoor gfahre si mit de Händ oder Bürschte hani u plötzli e graue Esu gha, "jo migottsdüri wo chunnt de ömu ou au de Schtoub här????" I ha veiechli müesse Bürschte bisi wieder e schwarzi Babette gha ha, d Sunne het am Samschtig wundervou uf üses Plätzli gschune u mir hei schier e Sunnebrand übercho, doch  wosi hinger de Hüser verschwunde isch hani hantli de Eseli ihri Dechine agleit, mi hets de dünne Mischte agseh dass es nötig isch worde. Am viertu ab vieri hei mir üs wieder ufe dreiviertu Schtündig Heiwäg gmacht, mir si froh gsi üs äntli wieder chönne z bewege. Am Sunndig no einisch z gliche Schpili, grad wo mir dehei hei wöue abmarschiere hets churz chli grägnet u i ha schnäu Ghüderseck über d Dechine gleit nid das si nass wärdi, chumm ungerwägs hei mir gmerkt dass es überau Glatt isch gsi, u so mir übers Land marschiert. D Schtrossene si scho gsauze gsi aber d Trottuar no nid u so heimir haut mitts uf de Schtrosse müesse loufe, d Lüt wo z Bredig hei wöue si a de Gartezüün entlang düsselet, ir Autschtadt ischs Chopfschteipflaschter ou chumm z passiere gsi, nume guet hani no Schtrou mitgschleipft um üses Plätzli chönne izschtröie. Mir hei zwe schöni Tage chönne verbringe u mängs Chind glücklich gmacht, mängs Mami het gseit "chumm mir wei witers " u z Chindli gmeint het "nei i wott bi de Eseli bliebe", eso hets für aui gschtume, i findes immer wieder dass dr Schtrichuzoo viu besser achunnt bi de Chinder. Zwüsche dri weni vor cheuti ganz schtief bi gsi hani de Chinder gseit "chömed mir mache e Schpaziergang düre Wiehnachtsmärit de chöi d Eseli u ni üs wieder e chli bewege u gesh mou e chli öpis angers". Es isch u Härzig dene Chinder i d Gsichter z luege wesi mitemene ganz verklährte usdruck ihres Eseli füehre u d Eseli ganz brav mit dene Chinder loufe, i bi sicher dass mir nöchscht Johr wieder dörfe go.

09-Dez-2016 20:24:11
Lustige Geschichten
Kategorie: Esel
Forum: Diverses

Wieder einisch bini mit dr Cindy u dr Soraya u natürli mitem Hung ungerwägs gsi, plötzli isch d Cindy bliebe schtoh "he was isch los? i gseh niemmer, chumm witer" aber d Cindy het sich nid bewegt u immerno nach hinge gluegt. Uf einisch heis ou miner Ohre ghört, d Ise vomene Ross hetme vernoh, i weiss nid ob dir das mit öine Esle ou heit, miner müeine immer si müessi bliebe schtoh bis si gsenge weles Ross do derhär chömi, grad wie wenns si aui würde kenne. I ha mi schön a Schtrosserand gschteut u dr Sina gseit si söu Sitz mache, scho vo witem het das mindeschtens 165cm groose Ross angscht zeigt, es isch geng wieder bliebe schtoh u het ganz verdatteret zu üs gluegt. Wemer doch nume einisch es Ross chönnt verzeue werum si so viu angscht heige vor üsne chline Esle? Mir si ganz ruhig gschtande u hei dere Riterin fründli entgäge gluegt, für mi hani scho dänkt "hoffentlich schaffsches näbe üs düre z cho" ufere Schtrecki vo 20 Meter si si mindeschtens 5 mou bliebe schtoh. Mini zwöi hei däm Schpieli vo däm Ross ruhig zuegluegt u auem aschin heissi ou gmerkt dass sis nid kenne, genau i däm momänt wosi näbe üs düre het wöue het mini chlini 89cm Cindy zwe Schritt nach vorne gmacht u das Ross isch 30 Meter is Fäud abe Galopiert. I ha so müesse lache dass ig mi fasch nid ha chönne entschuldige bi dere Riterin, aber si het sich gottlob nid ufgregt u isch rächt Sattufescht gsi. I gloube fasch das d Cindy gar nid het wöue luege wärs isch sondern wie sis cha verchlüpfe, sones Lusmeite.

03-Dez-2016 20:07:14
Lustige Geschichten
Kategorie: Esel
Forum: Diverses

Jede Tag weni a dr Dana Datooba zueluege wesi vomer wäg louft muess i lache, si isch jo im Mai gebore u i ha ihre d Mähne no nie gschnitte. Dir kennet sicher no d Sängere Dodo Hug? di het doch es Lied gsunge wo dr ganz Tegscht nume öpe so tönt "söui söui nid? söui söui nid? u das ganzi drei Minute lang u bis am ändi di glichi Frog söui söui nid. Bir Dana Datooba frogt ihri Mähne "söui oder söui nid, söui nach rächts gheie oder nach links, äbe söui söui nid gheie. Si isch ihr zwüschezyt sicher 15cm höch u bi jedem Schritt bambelet si hin u här, i gloube i muess e entscheidig träffe, entweder i schnidese bis uf 5cm ab oder i mache chlini Züpfli uf ei Site abe u nachere Wuche heisich de d Hoor dra gwöhnt. I muess no einisch drüber schlofe u villicht erschint si mir de im Troum e de weiss ig d Lösig, miner angere Esle hei aui e Schtehmähne wües se immer schön zrügg schniede.

22-Nov-2016 20:14:16
Lustige Geschichten
Kategorie: Esel
Forum: Diverses

I ha jo einisch verzeut wie mir dr Esuschtuete wo z Warzevirus vom Hängscht bim Decke verwütscht hei, mit Blutegle hei chönne heile. Jetzt hani dänkt i chönnti das bi mir ou einisch probiere, vom viele mischte isch mi ling Euboge mängisch endzündet u de hani einisch bimene Unfau mi Mittufingerchnoche a-broche, do ig so müeh ha mi de Dökter hani haut dä Finger eifach a Ringfinger kläbt, z blöde a dere Gschicht isch das dä Mittufinger schregg zämegwachse isch u genau dört drin hani jetzt Artrose. Geschter isch mini Kinesologin cho, si het dr ganz Tag es riese Programm gha, zerscht simer zäme i Jura zu zwene Esle, u den bi üs het si dr Figaro behandlet, sis ganze Hingerteil isch plockiert gsi, är isch jetzt 26j. u si Sänkrügge lot nüme zue dass är Chinder oder dr Trekkingsattu treit, sehr schwär für sini Bsitzer das z akzeptiere. Bi dr Tabea het si Schulterglänk glokkeret, u denn isch d Aisha dra cho," u wenn chumme ni dra? i muess de am obe no a d Vorschtandsitzig" hani ganz schüch gfrogt, d Kinesologin hät mir doch söue d Egle asetze. Di het gantwortet "das chasch vergässe, Zyt längt nüme, nach de Egle muesch e chli ruehig liege u nid ir Wäutgschicht ume Furze. Cheibe blöd was söu i de jetzt mache? Si het gantwortet "dänk morn säuber alege" ups ups so isches de scho nid dänkt gsi, schliesslich grüsslets mi dervo, aber äs git äuä ke angeri Lösig, i hase zaut u si isch mit mim Maa is Zimmer um ihn ouno z behandle u i bi go schtaune u när a d Sitzig. Hüt nachem Mittagässe hani aues z rächt gleit u mis Mandli het mir ghulfe, woner dr Dechu vom Glas het gno hei di Egle scho afo useschnogge u gsuecht wo si ächt chönni adogge, äs isch nid lang gange u di erschte drei si a mim Euboge ghanget, äs tuet nid unbedingt weh, es isch es gfühl wi weme sich mit Brönnessle brönnt. Jetzt isches no um di zwe angere gange wo a mim Finger hätte söue abisse, es isch es paar Minute gange u do het äntli eine am richtige Finger adogget u dr zwöit het am Ringfinger zuebisse, "hei das isch dr fautsch Finger, aber i hane nüme chönne wägnäh u so het är haut dört Blutabzapft. Vorsorglich hani es grosses Plastigbecki ufem Tisch gha, äsisch zerschte mou gsi woni das gmacht ha u mini überlegig isch gsi das jo nid aui mitenang wieder lö logo us de sofort afoht blüete u de chani jo nid verbinde we di angere no hange. Nid schlächt überleit nume isch z Becki z chli gsi, wos nämli am Euboge u a dr Hand mitenang blüetet het, hets überau anedropfet, i ha wöue ei Tropf putze u ha sider drei angeri Tröpf verlohre uf dr Zitig, em Tisch am Bode, äs het usgseh wie im Schlachthuus, nüt für schwachi Närve oder Lüt wo ke Bluet chöi gseh. D Egle si um di eis abgheit u blüetet hets bis am obe am achti. I wett säge i ha nid schlächt Bluet gschpändet, z nöchschtemou geits de besser, hi hi hi

19-Nov-2016 13:05:49
Lustige Geschichten
Kategorie: Esel
Forum: Diverses

Mängisch ghöri vo de Lüt dass ihri Esle Problem heige we dr Hufschmied chömi, das dünkt mi eigentlich komisch weme doch jede Tag d Hüfli uschratzet söttis die jo kenne. Bi üs louft das folgendermasse ab, i lege aune wo söttit bim Hufschmid verbi ihres Häufterli a. Sobaud eine fertig isch, zieht er ihm das Häufterli ab u bindet dr nöchscht a, so chani ir zwüschezyt mischte, är arbeitet im Ufenthatsrum u i bi näbedra im Schtau. Mir hei es Fäischter vom Schtau i Ufenthautsrum, es isch sehr luschtig z luege we e Esu dört schteit u übere luegt es gseht grad us wie wener würdi Fernseluege. Woni so am mischte bi gsi u überegluegt ha hani gseh wie d Eseli schön näbedra schtöh u warte bis d Reihe a ihne isch, d Ronja isch no bi mir bliebe. "Hei Ronja muesch jetzt de ou übere es isch sicher baud a dir" hare gseit, si isch dervo träppelet zum Hufschmid übere, isch churz bliebe schtoh u woner kener aschtaute gmacht het se azbinde isch si wieder zu mir cho, "werum chunsch jetzt wieder Ronja ? hani gfrogt, "är het no ke Zyt für mi" het si mir gantwortet, jo genauso louft bis üs, alles klar?

10-Nov-2016 18:56:25
Lustige Geschichten
Kategorie: Esel
Forum: Diverses

Letschte Fritig hani es Telefon übercho vomene besorgte Vater, är het mir verzeut dass sis Bebe Küchhueschte heig us no z chli sig für Antibiotika, dr Arzt heig gseit do häufi nume no Esumiuch. Was? Esumiuch isch jo scho guet aber grad aus letschti müglichkeit i somene Chrankheitsfau? i has nid rächt chönne gloube. Grad im momänt isch mir niemer i Sinn cho wo erscht grad es Füli um die Zyt het übercho, i ha sicher 10 Telefonat gmacht. Am Samschtig hani scho wieder e bsorgte Vater dra gha, aber nid dr glich, i ha nim z gliche gseit wie scho am erschte, i sig am sueche, miner Füli sige äbe scho grösser u de heige d Müettere nüme soviu Miuch. Am Mittwuch hani immer no a dere Gschicht umegschtudiert, u bi zum ergäbnis cho dass ig säuber bi mine muess mäuche. Es isch e richtige Schturm gsi u trotzdäm si d Sandra, dr Rudolf u ig mit dene zwe Müettere u Füli e Schtung go loufe, plotschnass simmer heicho u d Sandra het sofort afo mäuche, d Füli hei proteschtiert, mir sige Scheume dass sig de gfäligscht ihri Miuch. Jo Jo Dana Datooba u Yakari, müesst eifach no chli warte di nöchschti Miuch ghört de wieder öich, mir bruche di Miuch für zwöi chranki Chinder. 2 Fläsche het d Sandra abgmulche, i bi zum Telefon u ha versuecht di zwe Vätere z erreiche, i hane uf ihre Telefonbeantworter gschproche. jetzt zwe Tag schpöter u nach mindeschtens 10 Versuch di zwe Herren z erreiche muess ig äuä igseh das ig verarschet bi worde, he nu wesi das luschtig  finde? i wirde di Miuch haut igfrühre, viellicht chase plötzlich öper bruche.

01-Nov-2016 13:23:06
Lustige Geschichten
Kategorie: Esel
Forum: Diverses

Wie so mängisch hei mir Bsuech gha wo de irgend einisch Eseli wott ha, i findes guet we sich d Lüt früehzitig informiere was di Längohre so für bedürfniss hei. Vieli Lüt dänke , mir nähme e Esu mit däm het me nüt z tue, falsch dänkt, ou e Esu het Bedürfniss wemene rächt wott ha u süsch lot me gschider d Finger dervo. Auso wie gseit isch das Ehepaar mit sine drei Töchtere cho luege, mir hei aues erklährt u zeigt wie mirs mache u vorauem wiso, si hei viu Froge gschteut was zeigt dass si das Thema würkli intressiert. Natürli hani ou Gschichte vo de verschiedene Esle verzeut, d Cindy isch i üsere nöchi bliebe, werum ächt? mir si i d Fuetter u Sattuchammere go zeige was die verschiedene Tier z frässe über chömi, komischerwis isch mir grad es Gudeli i Sack gumpet. Mir si witer go dr gross Schtau zeige, d Cindy isch mitts zwüsche üs cho schtoh u het mi mit grosse Ouge agluegt - zum säge "woisch mis Gudeli"? jo Cindy do hesches, gnüsslich hets sis gfrässe. Aber das het däm Fröilein natürli nid glängt, si het eis ums andere mit ihrne tröie Ouge agluegt u gfrogt "hesch du ou eis für mi? was du nid? u de duuuu? si hets garnid chönne verschtoh das niemermeh öpis für si im Sack het gha, arms arms Eseli. Irgendwie isch das die chlinschti aber luschtigschdi, was dere immer wieder i Sinn chunnt u vorauem mi verschteit si guet, mi chas grad uf ihrer Schtirne läse. I ha im Sinn gha Schtrou u Höi vo dr Resärve übere i z chline Böxli im Schtau z näh vo dört us woni de Fuettere, es isch nume d Cindy ir nöchi gsi, i ha natürli scho gwüsst dass si wird cho aber es het jo nüt chönne passiere. Chumm hani d Türe offe gha u afang zwe Schtrohbaue ufe Sackcharre bige isch si scho derhär cho " aha so gseht das hie us, aha intressant, do bini jo no nie gsi" ganz intressiert het si im Lager umegluegt grad wie wen si würdi d Baue zeue. I bi mit minere fuer zum Böxli übere gfahre u ha abglade, isch jo klar das si sider es paar Muhvou gno het, wo si mi het ghört cho het si sofort ufghört frässe u het wieder ganz unschuldig di Rundbaue Höi u Schtrohbaue agluegt, wie zum säge si heig de öpe ir zwüschezyt sicher ke Seich gmacht, i hare wieder dr Rügge zuedräit u Schtrohbaue glade u us de Ougewinkle gseh wie si gfrässe het u mi beobachtet, woni mi dräit ha het si wieder ganz intressiert der räschte vo dere bigi zeut wie wits ächt no längi oder ob si ächt baud müessi Hunger ha. I findes eifach herrlich wie u was me mit dene Esle immer wieder cha u duet erläbe, aber äbe mi muess offe si us gseh u verschtoh.

30-Okt-2016 20:11:01
Lustige Geschichten
Kategorie: Esel
Forum: Diverses

Es warte jo immer mehreri Esle um go z loufe, "hmm Sina wär weimer äch hüt mitnäh?" Cindy u Soraya heimer geschter mitgnoh, z Ingeli u d Yakari chöme am Sunndig mit uf d Esuwanderig im Jura, ajo d Babette ou. D Dunja isch ganz noch as Töri cho zum zeige si wetti gärn mitcho, aber wie hei di zwöi usgseh? im Matsch hei si sich tröhlet, auso soviu Zyt hani nüme gha zum di beide z bürschte. Do gsehni wie mi Darinka bittend aluegt, e jo du chaisch mitcho chumm nume chos Haufter alege, d Sina het scho e mordsschpektaku abgloh vor Fröid, i ha schier müesse Ghörschutz montiere. Mir drü hei e wunderbare Schpaziergang gmacht, z Wätter hät nid schöner chöne si, e wahri fröid so ungerwägs z si. Langsam simmer wieder gäge hei zue cho, nid langsam im Tämpo sondern vo dr Schtrecki, Darinka het nämli e rächte Zagge druf gha. Jedes vo üs isch so sine Gedanke nache ghanget, d Sina het sicher dänkt "weni hei chumme de goni sofort zum Fredeli de über chummi sicher es Gudeli, dä isch nämli immer sehr schpändabu". D Darinka het usgrächnet ob mir ächt zur rächte Zyt hei chöme oder ämänd di angere scho am Znacht sigge? dass wär de gar nid rächt. I für mi ha dänkt was ächt Tabea wieder gmacht heigi? si isch schier nüme uf ihres Bei gschtande  aber z Huf isch nid heiss u am Bei hani ou kener warme Schteue gfunde???? Do seit doch plötzli e Maa 1,50m näbem Wäg "Bonjour", drei Läbewäse wo töif i Gedanke versunke si so go z verchlüpfe geit jo gar nid, vo mir hets natürli e Schrei gä, d Sina het ganz verdatteret gluegt, wie ihre aus Wachhund soöpis het chöne passiere dass sie dä Ma nid gseh het u Darinka het ne mit grosse frogende Ouge agluet"was machsch de du da? är chömi jede Tag i d Schwümm, es heig mega vieli, guet für ihn.

27-Okt-2016 20:20:09
Lustige Geschichten
Kategorie: Esel
Forum: Diverses

Mi Bärner Sennehündin Sina het ufem Chopf es Summerekzem übercho, dass gits bi länghörige Hünd no gärn. Zerscht hani gmeint si heig sich i öpisem grusigem tröhlet, aber es isch immer e grössere nasse Fläck worde u woni gneuer gluegt ha hani di Souerei gse, "chumm Sina mir düe wäsche u säubele". Mitere ganz gwöhnliche Seife hase gwäsche, es isch nid sehr guet gange "Sina mir müesse chli Hoor schniede süsch chummi nid guet derzue, weisch das wachst de schnäu wieder noche" gesagt getan, denn hani mit Betadin Desinfiziert u när natürli e rächti Portion Eutergel mi Gheimwaffe drufgschmieret. Obwohl i mir di gröschti müeh ha gäh isches doch grösser worde, i ha i Tierarztpraxis aglüte u gseit i bruchi e äxtra Seife zum wäsche u e angeri Saubi, si het gfrogt "weiter nid lieber cho dr Hund zeige" äuä chumm hani zur antwort gä, dir wüsst jo sicher wie e Bärner Sennenhund usgseht, hi hi hi, mir kenne üs guet drum darfi so rede. Geschter woni wieder mit ihre ungerwägs bi gsi het si sich immer a mir wöue cho riebe oder de hets si wieder versuecht sich z chraue, "nei due warte sobaud mir dehei si düe mir wieder säubele das nimmt de dr Juckreiz". Womer ufe Hof cho si hani überau Esubolle gseh, sofort hani mis BoueleTaxi gno u ha afo putze u mi Hung ganz vergässe, di isch ganz beleidigt i ihri Hundshütte u het kifflet. Woni zu mim Maa abe chume seit dä "es nimmt mi de scho no wunder mit wäm üse Hung so chifflet, jesses di hani jo ganz vergässe i hare doch gseit mir düege de grad säubele" sofort hani ghandlet u mi Hund isch wieder zfriede gsi, a jo no d übersetzig vo ihrem gekiffu "äs isch doch immer z gliche, chumm gseht si ihri Esle vergisst si aus andere, exgüsi Sina.

27-Okt-2016 20:00:00
Kategorie: Esel
Forum: Diverses

Was ist mit den zwei Wallachen die ich euch genannt habe? hattet ihr schon Kontakt?

23-Okt-2016 11:06:17
Kategorie: Esel

Meine Geschichten schreibe ich ja in "Anektoten mit unseren Langohren", da gibt es ja allerlei lustiges oder trauriges zu lesen, man kann meine Eselfarm auch gerne Besuchen kommen und die Esel selber ausfragen.

18-Okt-2016 19:40:40
Lustige Geschichten
Kategorie: Esel
Forum: Diverses

Oje mine, es schriebt würkli niemer meh, de muess i äuä wieder emou öpis verzeue. I dänke immer wieder "so mir cha ke Esu meh öpis vormache i kenne se in und uswändig" denkste, di lusscheibli verwütsche mi doch geng wieder. Auso mir hei für 5 Esle e Hufortophädin, di macht ihri arbeit super u drum duurets haut e chli, i bi jo gwunderig u luege zue schliesslich chame immer wieder öpis lehre. Bim zueluege chräbele natürli mini Finger dr Esu, mit dr Zyt dänki "i chönnt jo go witer mischte, chumm loufi dervo wird dr Esu unruehig u wott sich umdräie zum luege woni hie göng. Hmm so öpis geit jo gar nid, wie söu ächt die Ortopädin i Rue arbeite we das verflixte Längohr sones Theater macht? Auso schtohni wieder zum Esu u chräbele witer, sie cha i Rueh arbeite u dr Esu verdräit d Ouge vor wöhli u mir wird bewusst das dr ESU WIEDER GWUNNE HET, aber i cha dermit läbe u schmunzle für mi. Ou dr Hufschmid het sich scho gwunderet wie miner Esle uf mi fixiert si, aber i finde das isch doch fasch normau weme dr ganz Tag mitne zäme isch. Vo wäge uf mi fixiert - do isch no e angeri Gschicht passiert, i ha jo scho mou verzeut vo de Hochlandrinder wo bi üs läbe aber nid üs ghöre, mis Mandli luegt füre e Buur zuene u di si jo komplett verwiuderet wüu si eifach frei uf de Weide si Tagi u Tagus. Ei Tag chunnt dr Buur u frogt "woisch d Chueh? i weiss nid i muess luege" gib i zur antwort, "do chaisch lang luege di isch nämli sit 2 Tag bi de Guschti uf dr Gmeinsweid, dir sit no Senne merket nid emou wen es Tier fäut" furzt er mi a. Schön blöd, aber immer wieder seit me ihm er söu besser cho Zuune u är verschiebts immer wieder bis äbe so öpis passiert wie jetzt, wie söu me ächt die wieder zrügghole? D Gmeindsweid chunnt genau bis zu üsere Weid u we d Guschti chömme de göi üsi zwöi bis a Zuun um mit dene z schnörrle u dasmou isch si haut grad mit. E ganzi Wuche het dr Buur schtudiert wieners söu mache u när het er di verruckti Idee gha di Chue z Narkotisiere u wesi de schloft mit dr Schufle vom Weidemann se ufzlade u di fasch 2 Kilometer zu üs z bringe. Am haubi zwöi het er se gschtoche i weiss zwar nid wie,da si sich jo nid lot lo alänge, i ha dr ganz Nomittag gwartet aber es isch niemer cho auso bini nachem Schtaune go luege. Di Chue het nid gschlofe isch aber waggelig uf de Bei gsi, irgendwie het ers gschafft ihre es Schpannset über d Hörner z lege u ume Haus, langsam ischer hingerzi gäge Hei zue gfahre u het di Chue abschleppet. Mir het si schön leid do u so bini di ganzi Zyt hinger ihre nocheschpaziert u hare Muet gmacht, "chumm Marie das schaffsch mir hei scho baud d heufti vor Schtrecki gschafft" ehrlich gseit hani nid dänkt das di Chue das überläbt. Womer äntli dehei si gsi hani für mi dänkt die hät ke Meter me gschafft, si het pumpet vor aschträngig u het ke Schritt me gmacht, i bi mit dem Hung go loufe u woni nachere Schtung wieder dehei bi gsi het si immer no so pumpet. Dr ganz ander Tag isch si gläge, i ha ihre Name grüeft u do het si dr Chopf bewegt so hani gseh das si no läbt. Normalerwis het di Chue eim übere  Zuun so bös agluegt zum säge "entweder geisch oder i schpiess di uf u do bini haut aube gange.  Sit dere Gschicht luegt si immer woni bi, sobaud si mini Schtimme ghört luegt si abe u i rüefe ufe "gäu Marie bliebsch hie so öpis mache mir nieme mit, si macht ganz e angere Chopf u luegt mi richtig lieb a.

27-Sep-2016 18:58:48
Lustige Geschichten
Kategorie: Esel
Forum: Diverses

Wie dir sicher heit mitübercho, si Esubsitzer gsuecht worde wo in Solothurn am "Tag des Pferdes" wette mit ihrne Esle am Umzug teilnäh. Klar si mir do derbi hani mir dänkt, do isch d Gisela  mit dr frog cho "was wei mir für nes Thema?" "am liebschte chöme mir wie mir si d Esle si schön gnue u i due mi nid gärn verchleide, hani gantwortet u so heiss di angere akzeptiert. Woni so noche dänkt ha hets mi dünkt öpis chlises wär jo scho schön, hmm hmm aber was??? i bi chli i mine Schublade go nusche u do si mir Schpitzebändeli i d Finger cho woni scho Johrelang hüete. U wie söii ächt di befeschtige? am beschte machi Schtirnbänd drus, i ha fini churzi Schuebändle gno u se am Rand vo dene Schpitze düregfädlet u den am Haufter befeschtigt, d Yakari het dörfe Modäu schpiele. I ha müesse lache, si het uwäuts guet usgseh, irgend öpis fäut aber no. weme  nöii Schueh chouft do isch doch immer mitemene chline Chötteli es Schtückli Läder abunde zum säge di Schueh sige us Läder, u äbe genau die Chötteli hani chönne bruche. D Schpitze si so wie 6 Rondeli gsi u genau so mängs Chötteli hani gha, unger jedes Rondelli isch eis cho, u wieder aprob, d Yakari het scho chli komisch gluegt, genau über jedem Oug het es Chötteli baummelet, si isch eifach e Guldschatz u macht  aues mit, denn isch no es Fulaar ume Hals gschlunge worde u fertig isch mis Wärk gsi, mega Hammer mässig. Di andere hei ou aui es Schpitzschtirnband übercho eifach ohni Chetteli u es farbigs Fular, d Inca het es Sätteli dreit zum zeige si trage mängisch Chinder ume. D Babette het di Marokanische Chörb dreit womer üsi Sache hei chönne verschtoue u obe drüber isch u Jutesack mit Höi cho. Da d Cindy mit ihrem dicke Buch immer hochträchtig usgseht het si d Ehr gha u dr Rahel ihres Decheli mit dr ufschrift "Eselfarm Moutier"dörfe trage u d Soraya het e schöni Dechi dreit. Mir si 5 Persone u 5 Esle gsi, d Yakari het d Esuparade agfüehrt wie wesi jede Tag so öpis würd erläbe,  mir hei dä wunderschön Tag gnosse.

18-Sep-2016 11:42:37
Lustige Geschichten
Kategorie: Esel
Forum: Diverses

Jo di hei mi Wunsch grad e chli z gnau gno, d Aisha het scho es Zytli problem gha mit de Huf gä, ömu vorne, wosi vo de Ferie hei isch scho nach vier e haub Schtund Fahrt, isch si ganz süfferli glüfe u jedesmou wesi schtiu gschtande isch so het si ihres rächte Bei wyyyt füre gschteut. Hm was isch ächt das wieder?? hesch öpis am Huf oder i dr Schultere vom versteue im Ahänger? Gli drufabe isch d Hufortopädin cho u het gmeint das sig uf au fäu d Schultere, si het afo Stretsching mache, si het das Bei gno u was ganz wichtig isch immer zerscht ungere Buch schtrecke u denn gäge vorne bi de vorder Bei u nach wyt hinde bi de Hingerbei. Mou es het mi dünkt es gfauere guet u es lösi di verspanntheite, aschliessend het si d Huf gmacht u isch wieder hei. Mi hets dünkt es sig besser u doch het d Aisha immer no Problem gmacht bim Huf us chratze. Do eines Tages woni mitem scharfe Löffeli ha wöue es Schteinli usegrüble hanis wou no witer abe drückt u äbe dört het scho lang öpis gschlummeret, äs isch sehr empfindlich gsi u do im blötschte momänt het d Aisha mitem Huf zuckt u i bi grad mitem Löffeli inegheit u es het afo blüete. Mein Gott so öpis isch mir jetzt würkli no nie passiert, so töif abe hani doch gar nid grüblet? i bi sofort ine gone Schprütze mit Betadin-Wasser go hole u has i di Wunde gschbrützt u den das Huf no grad für 5 Minute is Wasser gschteut woni ou no mou e gutsch Betadin dri do ha. Hoffentlich git das ke Souerei hani dänkt oder emänt no e Abszäss, am andere morge hani ganz gschpannt gluegt wiesi loufi aber si het no nüt azeigt. Nach drei Tag het si afo schone, na bravo, es het doch wieder e Abszäss gä hani dänkt , gottlob chunnt d Hufortopätin i zwe Tag de chasi de grad luege. I ha mir di gröschte Vorwürf gmacht das mir soöpis passiert isch aber d Bsitzere het mi tröschtet u gmeint "dört isch sicher scho öpis nid guet gsi süsch hätsch du nid chönne düregheie" u genau so isches gsi. D Hufortopätin het afo uftue u do isch wyt unde dä Abszäss gsi u i bi den mitem Löffeli dört dri gheit. Es isch scho e riesige ungerschied ob me emene Ross oder Esu soöpis muess uftue, es Ross probiert eim z schlo aber dr Esu drückt eim eifach a d Wand zum säge "hör jetz uf du duesch mir weh". D Hufortopädin hets guet gha si isch nämli immer uf mir glandet, äbe schön weich, i hase scho afo froge ob si öpis vo mir wöui, hi hi hi, gmeinsam hei mirs gschafft, nume das mit de Hufverbänd muess si no chli lehre, am angere Tag si si meischtens scho abgheit. Da d Aisha jo Schueh het machi gar kener Verbänd meh, nume einisch e chli Watte is Loch den e chli Isolierband drüber u den dr Schueh u z Nacht ir Boxe ohni Schueh, so geits prima.

18-Sep-2016 11:08:57
Behandlungsmethoden
Kategorie: Esel
Forum: Diverses

Sie hätten nach der ersten Operation Hömeopatische Chügeli verabreichen müssen erhältlich bei Vet. Luder in Säriswil, haben etliche male sehr gute erfahrungen gemacht damit. Zuerst mehrmals Operiert - sind immer wieder nachgewachsen und erst als wir mit den Chügeli das erneute Nachwachsen unterbunden haben hatten wir endlich Ruhe. Die letzte Stute hatte ein Sarkoid an der Zitze und war trächtig, eine Op kam an dieser Stelle nicht in Frage da sonst die Milchkanäle beschädigt worden wären. Meine Kinesologin Frau Weisgram 079 757 01 58 gab mir den Tip mit den Blutegeln, mein Tierarzt hat sich bereit erklährt diese zu setzen, nach 2 maligen ansetzen der Egel fiel das Sarkoid nach 2 Wochen ab und das Fohlen konnte an der Zitze drinken, bis jetzt ist nichts nachgewachsen. Was ich nicht weiss ob es auch am Schlauch möglich ist, das erste mal hat der Egel am Sarkoid angebissen und die Stute merkte überhaupt nichts, beim zweiten mal hat er oberhalb des Sarkoid am gesunden Fleisch angebissen da hat sie sich gewehrt. Versuchen sie doch Frau  Weisgram zu erreichen um diese Frage zu klähren und vielleicht ist ihr Tierarzt auch bereit die Egel zu setzen, ist übrigens alles viel billiger als Op. Wenn die Egel abfallen blutet die Wunde noch lange nach und das ist gut so, es geht darum soviel Blut wie möglich rauszuziehen via Egel und nachbluten, danach strömt frisches Blut an diese Stelle. Falls sie noch genauer darüber Diskutieren möchten können sie mich ruhig anrufen, teile meine Erfahrungen gerne, 032 493 35 01

13-Sep-2016 18:51:23
Kategorie: Esel
Forum: Diverses

Achtung jetzt wärde sicher grad es paar Lüt über mi verruckt, aber mir ässe jo jede Tag Fleisch, äs würdi eifach aune Lüt guet tue wesi chli weniger dervo würde ässe. Was ganz wichtig isch wie me di Tier hautet, uf ihrem letschte Wäg söuesi mit Reschpäkt behandlet wärde u ou so tötet wärde. Jedes Tier wett viellicht no lenger läbe wemes würdi froge, aber mir hei immer Fleisch gässe, i gloube es geit würkli nid drum sondern wieme die Tier, egau wele Gattig , behandlet. Ou mir hei scho müesse es Ross u es Füli id Metzg bringe, säubverschtändlich hei mir di Tier uf ihrem letschte Wäg bis zum Schuss begleitet, klar hani es ganzes Päckli Nastücher brucht aber das het doch ke Roue gschpiut. Beidi Tier si ganz ohni Schtress vertrouenswürdig mit üs is Schlachthuus gange, i hane bis zletsch gseit wie nise ha gärn gha u ne danket für di Zyt wo mir zäme hei dörfe verbringe.

29-Aug-2016 12:02:20
Lustige Geschichten
Kategorie: Esel
Forum: Diverses

I findes scho no schad dass üseri schöni Site nid meh brucht wird, mängisch muess ig mir lo säge es sig längwilig nume geng miner Gschichte z läse, aber i cha jo nüt derfür we niemer angers schriebt, de bliebe haut nume ig übrig. Wieder isch bi üs e Huusrenovation agschdande, u di Esle wo mängisch ungerwägs säge si heige vor öpisem angscht hei d Nase nid noch gnue chönne ha. Do isch z aute Houz vom dritte Schtock abegheit worde, Isolation isch nidsi gsäglet, es isch Ghämmeret u gschosse worde, ke angscht natürli nid mit Munition sondern mit dr Nagupischtole. Ping u Päng dr ganzi Tag u d Längohre si i Reih u Glied gschtande u hei dere Sach intressiert zuegluegt. Mir hei bau di zwe Handwärker leid do, so  mängs Ougepaar het gluegt dass ömu ou aus rächt gmacht wärdi. Jo nähr isches drum gange d Farb use z läse um d Fassade nöi z schtriche, mi Maa isch für öpis Gremefarbigs gsi, ig aber ha chli Farb wöue bimische, mir hei di Farbpallette dürebletteret. Das isch feiechli schwierig weme nume sones chlises Papierli vo 4 mou 5 cm gseht u de nähr sich z ganze Huus sött vorschteue, mir hei üs für es FINS häugrüen entschiede, woner di Farb het wöue bschteue ischim gseit worde d Sunne bleiche de das no us u de heigemer nume no Gremfarbig. Nei nei das hani nid wöue u drum hani schnäu gseit de söu er haut di nöchschti Schterchi nä, mim Mandli hani nüt gseit, am angere Tag simmer uf üsne Beobachtigspöschte ghöcklet u dr Maler het afo schtriche -hmm- mg-mg-mg das heisst, mir hei drümou lähr gschlückt, he nu ufem Papier het das ganz angers usgseh het mi Maa gmeint, mi hets fasch küblet vor Lache. Eis isch 100% sicher jede Mönsch wo zu üs chunnt dänkt sofort "mou das isch de ömu ou no schön farbig" äs gseht us wienes nöis Huus, obe z Houz häubrun, d Fäischter u d Fäischterläde brun, d Fassade im Schatte grüenlich u ar Sunne gäub u de z ungerscht dr Socku vom Huus wieder brun, äs gfaut üs guet, mir hei üs eifach zerscht müesse dra gwöhne. Dir froget öich was de das ömu ou mit de Esle z tüe heig, es isch eifach d Esufarm wo sich nöi useputzt het, da mir jo im Winter zwe Monet ke Sunne hei gha bis jetzt -  wird das nöchschte Winter ganz angers usgseh. So miner Esle si gnue lang im Gras gsi, i muess se wieder go usehitzge u säge ne de si söue wieder e chli Seich mache damit ig öpis z verzeue heig.

15-Aug-2016 10:56:01
Lustige Geschichten
Kategorie: Esel
Forum: Diverses

I ha sider scho drümou nochegfrogt wies mit dr Salome u em Söffeli göngi, i ghöre nume guets. Zerscht hei di Lüt gmeint di zwöi choschti de ömu ou no gnue u do hane aues vorgrächnet was si im däm Johr koschtet hei u was i dra "verdiene"u schliesslich isch doch mini arbeit ou öpis wärt oder? Jetzt nachem dritte Telefon hase gfrogt "weisch jetzt werum si söfu choschte? wüu si ganz pflegelicht si u z Esu ABC glehrt hei, do het sis igseh. Für d'Müettere isch d Situation ganz e angeri, nid nume dass si d Miuch nüme loswärde, si si sich gwöhnt gsi dass immer z Füli hingernoche dässelet isch, u jetzt loufe si dür d Wägli u wesi hingere luege isch niemer do u si schtöh ganz allei. Jetzt müesse si i dr Herde wieder nöi ihre Platz sueche, d Miuch isch baud ganz wäg. Drei Pensionsesle si 4 Wuche in Frankrich i de Ferie gsi u geschter wieder heicho, langsam isch d Herde wieder vouzählig u es chunnt wieder Rueh dri.
. He jo zerscht si di drei i d Ferie abgreist u do heiss sich di angere scho gfrogt "was söu das? chömme si wieder ume? wen jo, wie lang si si wäg?. Klar hani versuecht dr Herde z erklähre dass si nume i d Ferie sige, aber si si aui ganz ruhig gsi u hei a dere Sach umegschtudiert, u denn si di zwöi Füli wäggange, ou das het wieder müesse verarbeitet wärde u jetzt si di Ferieesle zrügg cho, isch guet wes ir nöchschte Zyt ruhig bliebt.

10-Aug-2016 20:11:22
Lustige Geschichten
Kategorie: Esel
Forum: Diverses

Ok do bini wieder einisch, ha wieder e Ougeoperation müsse ertrage u zwe Wuche nüt dörfe mache, chaisch dänke dass ig mi do dra ha chönne haute? i ha eifach probiert nid zviu i Schtoub z cho, ha mis Mandli lo z Schtrou i d Boxe z Gable. Klar hei miner Esle fasch d Ohre a dr Dieli agschlage do mis Mandli haut ganz es angers Gfüu het wieviu es würkli brucht, wenis gseh sägim "gäu es isch grad e chli viu, morn gisch de VIU weniger" jo jo meint er droche u hets scho 10 Sekunde schpöter wieder vergässe, nume weni säge überchunsch me Sackgäud de vergisst ers nid. Ou mitem Höi gä isches so ne Sach, är meints immer viu z guet, auso hani mis Oug zue kläbt u bi säuber go fuettere. Letschte Sunndig si d Salome u d Sofia a ihre nöi Platz züglet, i ha scho di ganzi Wuche mitne gred u erklährt dass we me scho so gross wie z Mami oder sogar grösser isch, es langsam Zyt wird um amene angere Ort z läbe. Mir heine mit schwärem Härze di nöie Haufter agleit, si schön bürschtet u de hani de Müettere gseit " lueget öii Füli gö jetzt furt", d Cindy hets verschtande u üs noche gluegt. "Hei Soraya lueg d Sofia geit jetzt nid dass se när suechsch", aber si het nid gluegt u do simmer haut go ilade, z ganze Outo isch vou Sache gsi womer vorsorglich mit gno hei. Mir hei soviu Sache dass ig guet ihri Chrüpfli ha chönne mitgäh u ou dr Wasserchessu mit Hauterig, so gsehts am nöie Ort fasch e chli us wie dehei. Ufe Mittag simmer acho u hei di zwöi usglade, nöigierig heissi aues agluegt u de hei si afo ihri Müettere sueche, "nei nei do si kener angere Eseli, dir sit jo säbszwöit". Langsam simmer düre Schtau bis zu ihrem Böxli, si hei sofort agfange Schtrou u Höi z frässe, mir si dür z Tenn wo es Wägli abtrennt isch worde hinger use u es isch nid lang gange wo di zwöi scho dr Wäg use gfunde hei. Ruihig heisi afo Gras frässe, mir si wieder zum Böxli u d Eseli si nachemene churze Ougeblick ou cho, das het jo sofort klappet, guet so, mir si go z Mittag ässe. Am Nommitag simmer go e Schpaziergang mache, klar heisi aues müesse intressiert aluege aber im grosse u ganze hei si sich super verhaute, chumm simmer wieder bim Schtau gsi hets Bsucher gschneit, aui Töchtere mit ihrne Familie hei nümme chönne warte u si cho luege, di zwöi Eseli hei gschtuhnet dass si ufeinisch so im Mittupunkt gschtande si u mir hei üs am vieri wieder ufe heiwäg gmacht. Dehei si di zwe Schtuetene uf dr Suechi nach ihrne Füli gsi, i hane erklährt dass es dene zwöine guet geit, beide hei z Uter vou Miuch gha u do hase mit Gamfer dick igschmieret, ines paar Tag wird di Miuch wäg si. Für aui wosich froge ob i di Füli z früech verchouft heig? nei nei d Salome isch im Mai u d Sofia im Juli Jährig gsi, aber miner Schtuetene hei immer sehr lang Miuch da si guet gfüetteret wärde.

06-Jul-2016 20:14:42
Lustige Geschichten
Kategorie: Esel
Forum: Diverses

Am Sunndig si zwe Esle für drei Tag i d Ferie cho, si wei nämli mit uf Trekking u so hei si sich chönne anang gwöhne. Am Mändi si Begleitpersone itrudlet u hei afo Gepäck büschele u Wääge, wele Esu wieviu dreit, was aues mitmues, isch gar nid so eifach dass me nüt vergisst. Am Zischtig morge si d Chinder mitem Zug in Moutier acho u si scho fröidig vo de Esle erwartet worde, es isch e schöni überaschig gsi für d Chinder, si hei grad am Bahnhof ihre Esu fürs Trekking usegläse u si mitim uf d Esufarm glüffe. Mini ufgab isch gsi ihri schwähre Rucksäck mitem Outo ufe Hof z Kutschiere, he jo einisch darf me se scho verwöhne, ufem Trekking müessi si de säuber trage. Es isch veiechli e Rummu gsi um di Esle, am Nomitag hei jewills zwöi Chinder glehrt ihre Esu z packe, dass jo jedes Riemli richtig azoge wird, dr Sattu am richtige Platz ufgsetzt u di wo Schueh trage ou di richtig alege. Am obe si si i Wald füre go schlofe so gseht d Leitere grad wär das nid cha verchrafte u suber het ei Bueb Problem übercho u het wieder hei wöue u vo hie us geit das natürli viu besser aus wesi de irgendwo wit absits vomene Bahnhof si. Hüt morge auso Mittwuch heisi am nüni afo d Esle zwäg mache u mi gloubts fasch nid aber am haubi eufi isch di ganzi Gruppe dervo tschöttelet, wott heisse 11 Chinder, 5 Erwachsni, 6 Esle u e Hung. Ihre Wäg füehrt si wia Berscherie de Eschert - übere Wisseschtei -  Gränchebärg - Büren, dört sötte si am Sunndig acho, hoffe mirs bescht, ömu am Wätter chas nid liege, di andere Esle wo si dehei bliebe si irgendwie ganz verlohre gsi, kene het grüeft, si hei äuä überleit ob si wieder hei chömi.

04-Jul-2016 21:05:37
Lustige Geschichten
Kategorie: Esel
Forum: Diverses

Woni ei Tag hingerem Söffeli gloffe bi hani öpis gse bi de Zitze unger, hmm was isch ächt das? hani mi gfrogt, im Schtau obe hani unger dä Buuch gluegt u ne Gschwulscht gse sitwärts näbe de Zitze. Si isch hert gsi u öpe so läng wiene Dumme u drei Zentimeter dick, es het sich grad wiene Hode agfüehlt, mi het mit de Finger di Gschwulscht guet chönne umfasse si isch auso nid mit dem Buuch verwachse gsi. Am andere Tag hani em Tierarzt bscheid ghä obs ächt mügli wär soöpis dehei z Operiere de chöms viu biuiger aus im Tierschpitau, är het jo gsei u we Tag schpöter si si sogar z dritt cho, zwe Tierärzt u e Schnupperschtifti. Si hei das Ding untersuecht u si när genau glich schlau gsi wieni, ke ahnig was das sig uf au fäu müessis use u so hei mir aues vorbereitet, d Soraya hani id Quarantänebox gschberrt so hei di zwöi enang gseh. D Sofia isch Narkotisiert u di Schteu guet gwäsche worde, i ha wieder dörfe z Bei ufehebe damit dr Arzt freis Arbeitsfäud het gha. Langsam het er di Huut ufgschnitte u es het grad wie imene Grusufium usgseh, plötzli hei schwarzi schpitzi Sache usegluegt, woner dra zoge het isches grunnigs Bluet gsi grad so chrumm wie chlini Babane. Uf einisch isch öpis angers zum Vorschin cho so wie frömts Gwäb so gross wienes Fingerbeeri, intressiert hets eis ums angere agluegt u niemmer het usegfunde was es ächt gsi isch, dr Tierarzt hets de ihr Praxis wöue untersueche. Das Loch ihr Buchwand isch no guet gschbüehlet  u de wieder zuegnäit worde u de het das Fröilein wieder dörfe erwache, si het auerdings gmeint "dir heit mi igschlöfft ause de schlofi jetzt no grad e rundi". I ha d Soraya wieder useglo u di isch nid öpe ihres Töchterli go wecke, chaisch dänke, go Bluet schläcke isch si u het schier nümme wöue ufhöre, d Wunde het no rächt blüetet schliesslich isches jo viu z warm gsi, do heimir haut mitemene Ischbüttu küehlet u do hets äntli ufghört. Vom angere Tag a hani sofort drü bis viermou dick Eutergel drufgschmieret damit kener Viecher a d Wunde gö u es verheilet wunderbar.

02-Jul-2016 18:56:36
Lustige Geschichten
Kategorie: Esel
Forum: Diverses

U wieder einisch öpis vom Figaro dä het nämli immer wieder so luschtigi Ifäu. Momentan gösi wieder e Weid nach de Chüeh go nocheputze u do müesse si näbe dr Schtande vo dene verbi, dört hets no chli auts Höi drin, di zwöi Schottische Hochlandrinder si grad am frässe gsi. Dr Figaro het si Chopf ganz noch a d Schtande gha u intressiert zuegluegt, dr Schtier het e Schpannwiti vo 1m20cm vo eim Hornschpitz zum andere, aues andere aus e schmusi Schtier, wo das Monschtrum dr Chopf dräit het mitem Muu vou Höi het dr Figaro si Chopf  dräit u isch zwüsche de  Pänels düre em Schtier go z Höi zur Schnörre us frässe, es isch würkli schad chani so Aktione vo de Esle nid Fiume, jetzt müesst dir öich das haut Biudlich vorschteue.

25-Jun-2016 18:58:44
Lustige Geschichten
Kategorie: Esel
Forum: Diverses

I ha richtig vermuetet mit de Schwaubeli, letscht Johr si si z letschtemou im Schtau gsi u hei zwe Bruete ufzoge u si so zuetroulich gsi dass me bis uf 30cm a se ane het chönne, das Johr si früschi cho luege wo si ächt ihri Eier wöue lege. Woni i Schtau bi heiss si uwäuts angscht übercho u si sofort wieder use, jetzt hei si im Ufenthautsruum e Bruet ufzoge u wehe i go dört ine go putze de geits Gschrei scho los. Bi dene heisse Thämparature hei di arme Vögeli natürli wieder viu z heiss gha grad ungerem  Eternitdach u so si si ufe Rand vom Näschtli ghocket, woni ine bi go putze hani eis am Bode gseh höckle "hei du chaisch nid hie bliebe gli chömme de d Eseli do ine u vertschaupe di". I bi mitem Rächeli langsam gäge ins do isches use gfloge aber nume öpe 20cm überem Bode, ojemine we jetzt e Chatz chunnt de isch das arme Vögeli gfrässe. D Muetter vonim isch cho u het Zeter Mordio kifflet derbi hani doch wöue häufe, wieder bini mitem Rächeli gägins u do isches mit dr Muetter dervo gfloge, je witer je höher isches gfloge, guet so. I has dr ganz Tag niene meh gseh u jetzt hei mir doch letsch Nacht sones riese Gwitter gha, i froge mi scho wos ächt gschlofe het u obs überhoupt no läbt.

15-Jun-2016 20:47:59
Lustige Geschichten
Kategorie: Esel
Forum: Diverses

D Cindy het wieder eine bote, wini scho es paarmou gschriebe ha het si e Sonderschtatus wüi si sone luschtegi Nudle isch darf si sich eifach chli meh erloube aus di angere, da si Gwichts problem het heissts haut ou für das verwöhnte Froueli e Weidechrate azlege. Aber o ha lätz, dass geit jetzt gar nid i ihre Chopf dass si das muess ertrage u si lot es henne Theater ab, es isch eidütig unter ihren Niveau sones verhassts Ding müesse alege, he jo de isch si jo wie di angere 4 Esle wo ou mitem Chrate is Gras gö. Die angere heis sofort akzeptiert nume d Cindy het müeh dermit aber es muess jetzt eifach si, woni schpöter zum Fäischter useluege gsehni d Cindy im Gras liege. I giebi ihre no zwe drei Minute Zyt viellicht wott si mir nume es schlächts Gwüsse irede aber si schteit nid uf auso Alarmschtufe rot, we sone verfrässni Cindy schtatt frässe im Gras liegt de schtimmt öpis gar nid. I bi zuere use u ha gfrogt was de los sig mit ihre, si isch langsam ufgschtande u i hare dr Chrate abzoge, l a n g s a m het si zwöi drü Häumli abgrisse. Hmmm das isch nid mini Cindy, während desse i bi go dr Fiebermässer hole hani überleit was ächt los sig, i ha grad uf dr Weid Fieber gmässe für so öpis eifachs muess i ömu miner Esle nid äxtra abinde. Es het nüt azeigt, woni so näbe ihre gschtande bi het si plötzli grad aschtaute gmacht wiesi wett Brünzle oder äbe bim Gebähre die erschti richtigi Pressweh. Es isch öpis sehr zäiflüssigs use cho u do isch dr Fau für mi klar gsi, es isch nämli grad drei Wuche här gsi dass mir im Tierschpitau si gsi um z probiere di Chugle id Gebährmuetter z tue u obwou doch dört suber isch garbeitet worde het d Cindy e Gebährmuetter endzündig übercho. Wosi im Gras gläge isch het si ihre warm Buch küehlet, i bi zum Telefon ine u ha em Tierarzt mini beobachtige gmäude u är het mir es Homeopatisch Mitteli zwäg gmacht, hüt geits ihre wieder guet. E viertuschtund bevor d Esle wieder us dr Weid müesse ziehni dr Chrate ab u si chöi no e viertu Schtund normau frässe, i go id Weid u rüefe si söue cho d Chörb abzieh. 4 Esle chöme sofort nume d Cindy macht wieder e äxtra tur, 3m vor mir bliebt si schtoh u luegt mi a "chumm Cindy abzieh" locki si u si antwortet "chaisch zu mir cho schliesslich hesch du mir das blöde Ding agleit"  Cindy sägi wieder dasmou scho chli gnärvter "chumm äntli süsch goni wieder u du bhautisch ne a" es richtigs kräftemässe zwüsche üs zwone, weli het dr herter Gring. Innerlich muesse i natürli lache aber ig zeiges nid, genau so isch äbe d Cindy si liebt wieni die Diskusione. "auso de bhautisch ne haut a " sägi u chere mi um u due der gliche i göng uu do chasi de plötzli ganz ganz schnäu cho, jupii i ha gwunne, viellicht lose de morn gwinne es macht doch so fröid di schpieli.

12-Jun-2016 20:10:16
Lustige Geschichten
Kategorie: Esel
Forum: Diverses

Es passiert soviel dr ganz Tag dass ig gar nüme derzue chumme hie öpis z verzeue, aber jetzt bini do. I ha mi vor dr Esuwanderig uf di nöiie müglichkeiten vo dr Wättervorhärsag verloh, am Samschtig obe hei si gmäude bis am 5fi ke Räge. Isch doch super de chöimers doch düre füehre, sofort hani aune bscheid gä u de heimer afo Salat mache, wo aues parat isch gsi simer müed is Bett. Am andere Tag hets gheisse pressiere mit mischte bevor d Gescht chömmi, nah dis nah si si idrudlet u natürlich sofort zu de Esle uf d Weid anschtatt zerscht mim Mandli go grüezi säge, jo jo das passiert dene Esu verückte Lüt immer wieder. Uf z Apero heimer bewusst verzichtet, het jo sowiso niemer inträsse gha, überau het me Lüt mit Esle gseh schmuse. Jedes Johr het mis Mandli z Fleisch VIU VIU z früeh ufe Grill gleit u üs dermit gschtresset dass es de öpe schwarz wärdi wemer nid SOFORT chömi, dass Johr nid, hani dänkt u mit dr Hiuf vo de Froue aues schön ufs Büffet gschteut. Hmmm nüt isch passiert, mis Mandli het nid reagiert u witer gschwätzt, nach 5 Minute hani mou grüeft "Fleisch!!!!! ke Reaktion, aui hei afo merke um was es gange isch u z glächter isch los gange, u mis Mandli? dä het witer gschwätzt u nüt gmerkt. HALLOOOOOOOOOOOO   HERR TELLEY MIR HEI HUNGER hei mir afo rüefe u do äntli het er reagiert. Mir si no am ässe gsi wos het afo rägne, nei nei mir hei nid bis am 5fi gässe, di Wättervorhärsag isch vou i d Hose, z nöchschte mou verlohni mi wieder uf mini eigeni Vorhärsag u di geit nämli so, i schtrecke d Nase use u wesi nass wird de rägnets ganz eifach u schtimmt immer 100 %. Nachem ässe hei mir d Esle zwäg gmacht u de si mir natürli go loufe, es bizzeli räge het üs sicher nid dervo chönne abhaute. Nach dr Wanderig simmer füre Kaffe u Chueche natürli du id Schtube ghöcklet, es isch zwar rächt äng worde aber umso luschtiger isches gsi, no einisch aune e härzleche dank wo trotz em schlächte Wätter doch cho si. Mir si 15 Erwachseni u eis Chind u vo de Esle si 13 mitcho, nume di zwe Müettere si dehei bliebe.

23-Mai-2016 20:17:24
Lustige Geschichten
Kategorie: Esel
Forum: Diverses

Hurra i has gschafft, nach 25 Johr Esel züchte isches mir glunge aus Krönig e Schäggesu z Kreiire. Lang lang hanis probiert, eigentlich sit d Inca vor 12 Johr zu mir cho isch, i ha verschiedeni Hängschte usprobiert, jedesmou mit grosser Spannig z Füli erwartet u das mitem male het eifach nie wöue klappe. Geschter z Nacht hani no einisch vorem z Bett go bir Inca inegluegt u es het mi dünkt si sig rächt närvös, totmüed bini no chli go Huushaute u hare no 15 Minute Zyt gä, woni wieder bi go luege hei d Scheichli scho use gluegt u mi gloubts fasch nid aber es isch e wiise Chopf noche cho. Jetzt woni eigendlich nüme dra gloubt ha isch es Schäggeseli zum vorschin cho, mir hei üs jo vorgnoh mit dr Zucht uf z höre, es wird jedesmou schwieriger gueti Esulüt u Plätz z finde u de isch doch das d Krönig vo mire Jahrelange arbeit, ds Schtüetli hei mir ufe Name Yakari touft. D Muetter us Chindli si beidi wohluf, hüt bi däm Rägewätter heis haut müesse drine bliebe, i ha z Fäischter e Schpaut offe glo, es het e Esuuflouf gäh, jede het wöue das Füli go beschtuhne u dr nöchscht het afo dränge "heb de öpe di Gring wieder einisch use i wott ou ine luege". Mi hets dünkt d Dunja heigi sehr kritisch gluegt u äuä überleit wär ächt das Füli so farbig a-gmahlet heig, ihres brune Füli sig ömu grad so schön u do het si rächt. D Lehrerin vo üser Pflegtochter het agfrogt ob i ächt nid e chli Esumiuch hät si näme ihr Schuul grad z Thema Miuch düre, o je mine wie söi i ächt das wieder aschteue?, d Füli gö jo aubot go drinke do bliebt wäggerli ke Tropf übrig. I ha scho wöue säge es göng nid aber haut es geit doch, di zwöi letschjährige schlofe jo ohni z Mami u de si di Uter am morge vou Miuch, auso hani es Tassli mit gno, di zwöi Füli zue de Müettere glo u säuber sofort näbe dr Soraya abknöilet u afo mäuche. Ds Söfeli het a eire Zitze drunke u ihr ar angere gmulche, e ganz e luschtigi innigi Situation u d Soraya isch mir cho ihre warm Atem i Nacke,  blose äuä zum säge "gäu losch mim Chindli ou no chli Miuch?"

20-Mai-2016 20:04:46
Lustige Geschichten
Kategorie: Esel
Forum: Diverses

Auso i weiss scho hüt dass d Dana Datooba e Concouresu wird, si isch nämli bschdändig im Transporter u luegt vo dört fräch i d Wäutgschicht use, ob mitem Mami oder ohni schpiut ihre ke roue, si findet eifach dä transporter mega mässig luschtig. Es  isch sowieso e chlini Wiudsou, dr ganz Tag schpringt si hin und här u di armi Dunja hinger noche, abgläge wird dr ganz Tag nie u e haub Schtund nachem z Nacht liege beidi u schlofe wie d Herrgöttli so si sie kaputt. Di erschte Tage hase nachem Weide i ne Boxe gschberrt damit di chlini chli chönni schlofe, aber dr Dunja het das gar nid gfaue u si het dr chline geng wieder e mupf gä, si söu gffäligscht bliebe schtoh, jetzt wärdi sicher nid gschlofe u das arme Chindli het müesse fouge. Si isch mega mässig verschmust, di erschte Tage hase immer wieder müesse ifo, si het eifach ke Zyt gha zum schmuse, aber hüt ischs ihre äuä längwilig gsi, si isch mir di ganz Zyt hinger noche cho u het mi am Rockzipfu zupft. Chumm lose am morge us dr Boxe galoppiert si grad zum ober Schtau u d Mueter hinger dri, di angere chömme aube gar nid drus wo di zwöi jetzt sige. Vom Dabasco ghört me nume z bescht, aui hei sich guet anang gwöhnt, jo bi mir isch das so, ou wesi verchouft si wott i sicher si dass aues klappt, schliesslich hani es heiss gliebts Füli vo mir verchouft.  D Sina üsi Hündin wird langsam aut, si wott nüme wyt go loufe, womer geschter bim Bovischtopp niemer atroffe hei hase  gfrogt, "was meinsch Sina mache mir no di grossi Tuur? si het mi agluegt u de bäuet wie zum säge klar, auso simmer dä gäi Schtutz uf u de wyter gäge di aute Böim zue, woni umeluege gsehni mini Hündin wyt hinge sitze. "Sina chumm " hani gfrüeft aber ke Reaktion oder besser gseit, si isch dört ghocket  zum säge "bis hierher und kein Schritt weiter" mir isch nüt angers übrig bliebe aus wieder um z chehre, super für was heimer ächt dä blöd schteil Schtutz uf müesse numme für wieder abe z go. Z nöchschte mou wese froge söu si de chli düttlicher rede ob jo oder nei wese froge ob si no wyter mögi.

20-Mai-2016 19:43:45
Kategorie: Esel
Forum: Diverses

Ja und ?? was ist nicht klar?

10-Mai-2016 13:12:03
Lustige Geschichten
Kategorie: Esel
Forum: Diverses

Wie chönnts angers si, mir hei am Muettertag äntli chönne Füle, d Miuch isch scho zwe Tag glüffe u i ha überleit ob ig ächt söu abmäuche u i Chülschrank due, aber de hani wieder überleit we de z Füli gli druf abe chunnt de muess igs jo Schöppele u das isch ou nid grad schlau. E ganzi Wuche simmer z Nacht aui zwe Schtund go luege was si machi, immer z gliche Biud, wesi gläge isch de hets ihre aues zäme drückt u si het gschtöhnet dass me schier dänkt het es göngi los, u wesi gschtande isch de het si gschwantzet wie verruckt u de ab u zue mitem Bei gschtampfet. He nu am Sundig wo miner Ching aui wieder hei si u ni no mi obeschpaziergang mitem Hung ha absolviert hase du grad verwütscht wie si het afo drücke am achti. I bi schnäu mim Mandli ine go säge es göngi jetzt aber sicher los do isch är mir grad entgägecho, gschlotteret vor Schüttufroscht u eme Gring das mer grad het chönne angscht übercho, "du bisch wägerli ke Hiuf gang lieber is Bett u dek di zue" hanim gseit u bi haut du wieder säuber i Schtau "selbst ist die Frau". Im Schtau isch Dunja gläge u het vo Zyt zu Zyt presst aber mi hets dünkt nume haubpatzig,"was isch los Dunja? du muesch scho me presse i cha erscht häufe zie we öpis useluegt" Zyt isch vergange, scho e haub Schtund verbi u mi het immer no nüt gseh, langsam hani mir afo Sorge mache. Si isch wieder ufgschtande u ume glüffe, i dänke z Füli het nid e gueti Schtellig gha, wieder isch si z bode u het drückt u do äntli het eis Hüfli use gluegt,"jo witer so drück drück u ou z zwöite isch witer hinger cho, i ha versuecht z chürzere chli meh z zieh damits gschtreckt wird. Langsam hani chönne häufe u z Näsli het sich zeigt, aber wo dr Chopf immer breiter isch worde isches ernöit bi de Ouge nüme witer gange, i ha zoge was i ha chönne u d Dunja het irgendwie nid rächti Presswehe gha. I muess hiuf ha aber wär froge? dr Tierarzt het 20 Minute, i bi zum Nachbar go klopfe u dr Nachbarin gseit i bruch sofort ihre Maa zum häufe Füle, o dä sig grad vouer Seife unger dr Duschi, het si gmeint. I bi scho wieder ungerwägs i Schtau gsi do isch si ufdoucht u het gfrogt ob si chönni häufe, klar geit ou , i hare zeigt wie zieh u denn jedesmou we Dunja drückt het hani gseit "Maintenant", mi muess wüsse das di Frou eigendlich angscht het vor de Esle aber es isch äbe ou e Muetter u si het aus angere vergässe. Zäme hei mirs gschafft u das Schtüetli uf d Wäut brocht,jetzt hani i zwe Tag 4 mou dr Name gänderet, zerscht hani wöue säge DATOOBA, denn Donka, mi Maa isch cho mit Dorina, weni zum Füli bi hani ghirnet wie söusch du jetz heisse? wie heisst dä Anke oder Oel?  nei nei du heisisch DANA DATOOBA, du u di Name si einmahlig.

07-Mai-2016 19:18:37
Lustige Geschichten
Kategorie: Esel
Forum: Diverses

So geschter isch am Dabasco si gross Tag gsi, i ha ihn u Darinka guet vorbereitet u es isch Bilderbuech mässig abglüfe, zerscht hei mir dr ganz Papierkram erledigt u de isch sini nöii Bsitzere mit ihm gäge Transporter, langsam het si ihn aues lo abschnüfle. I ha wöue häufe ilade aber si hets  uf ihri art gmacht u do bini haut go mischte, Darinka isch am Zuun gschtande u het zuegluegt was do mit ihrem Büubu passieri, zwüschedüre bini näbe si gschtande, beidi hei mir Träne i de Ouge gha, "lueg Darinka mir müesse ihn lo go, är isch jetzt e grosse u cha nid immer bim Mami bliebe. Wo dr Dabasco immer wieder vom Ahänger zrügg cho isch het si nim vorgmacht wieners söu mache u isch i üse Transporter gschtiege u het ume Egge glüset ob ärs ächt gseh heig. Am afang ischer scho einisch dine gsi aber niemer vo üs isch do gsi um hinger zue z mache u so ischer haut wieder usecho, Darinka het bis do no nie gröchelet, si isch u brav gsi aber do het Bsitzere e Fähler gmacht. Si isch im Outo go e Sack Höi hole um ihn wieder zum Transporter z lööcke, aber für di ganzi Herde isch das zviu gsi u si hei aui afo gränne si wöui ou Höi. Dr Dabasco het natürli gmeint si rüefe aui ihm är söu wieder zu ihne cho, i ha für mi dänkt "liebi Frou langsam aber sicher geits z lang, lo dir doch lo häufe" für mi hani dänkt i gibe ihre no 10 Minute u wes bis denn nid klappet de wird ghuulfe, plötzli hets bouderet u är isch dine gsi u mir hei schäu chönne zuetue. Mir hei üse Transporter scho zwe Wuche ufem Trocheplatz gha u är isch dört ine u use grad wies in dünkt het, aber äbe vo sire gliebte bekannte Umgäbig allei i di ungwüssi Zuekunft isch scho e grosse Schritt gsi, aber är het das super guet gmacht. Am obe isch z zwöite Telefon cho u do ischer scho schier am nöiie Platz dehei gsi, überau ischer go schnöigge u schnüffle, aues isch uuu intressant gsi u di zwe Wallache heine ganz lieb begrüsst. Eso machts fröid we aues so guet klappet.

07-Mai-2016 18:58:20
Kategorie: Esel
Forum: Diverses

Gestern am 6.5.16 ist Dabasco an seinen neuen Platz umgezogen, nun hat Darinka viel viel Milch zum verschenken, falls ein Fohlen in den nächsten paar Tagen eine Amme sucht bitte sofort melden vielleicht klappst ja 032 493 35 01

07-Mai-2016 18:52:35
Dringend, Eselfohlen sucht Amme
Kategorie: Esel
Forum: Diverses

Geschter am 6.5.16 isch üse Dabasco a si nöi Platz umzoge, jetzt het Darinka es riese Uter vou Miuch, we i de nöchschte drei Tag e Amme gsuecht wird de mäudet öich sofort bi üs, viellicht chöimer jo häufe 032 493 35 01

05-Mai-2016 20:00:51
Lustige Geschichten
Kategorie: Esel
Forum: Diverses

Eine vo mine Pflegesle heisst jo Figaro u das isch so ne richtige Macho, är het immer z gfüu är sig dr Schef. Wies jo so  im Fäuwächsu isch gseh si mängisch rächt verhudlet us, genauso isches mit ihm gange, langsam het er wieder Manierlich usgseh. Sini Bsitzere het drei Wuche nid chönne cho u jetzt hei mir se erwartet, i ha zu ihrne Esle gsei "morn chunnt öii Schefi u de wärdeter de wieder u wäuts guet putzt u verwöhnt. Auem anschin a isch das füre Figaro no nid gnue gsi u är het sich dr haub Gring über d Nacht bis uf d Huut abgwetzt. Woni das am morge gseh ha hets mir fasch eine gä" super Sürmu het das müesse si? jetzt meint dini Bsitzere emänd no i heig nid guet zue dir gluegt, hesch es äxtra gmacht gäu damit si beduure het mit dir? Chumm isch si ume Egge cho het si das Malheur scho vo wytem gseh "o mi lieb Figaro was hesch de du wieder gmacht? chumm mir düe chli wäsche u säubele u de gits no es Gudeli wüu doch sone arme bisch" i wett säge am Figaro sini Lischt isch vou glunge, äbe grad eso si si di gliebte Längohre-Schlitzohre.

01-Mai-2016 17:50:49
Lustige Geschichten
Kategorie: Esel
Forum: Diverses

Jo di zwöi Schtüetli si scho guet igschpiut nume das mitem mischte isch äuä es Problem gsi, i ghöre se grad wies si zäme Diskutiert hei "Sophia seit - i muess mischte aber ig weiss nid wo? schliesslich hets ke früsche Mischt vom Mami, wo söui jetzt mache? u d Salome git zur antwort "he dänk am Rand oder meinsch öpe i wöu im Mischt schlofe? Es isch nämli so d Cindy d Mueter vor Salome isch suber u macht aues am Rand endlang u d Soraya macht grad vo si schteit u drum het ds Söffeli nid gwüsst wo mache. Am morge lose jo sofort zu ihrne Müettere u do isches ou sehr verschiede wie di beide reagiere, d Soraya isch froh dass z Uter glährt wird u dr Cindy duets weh wüus so prall isch u de chlemmt si d Salome am afang geng is Bei u erscht nach zwe Minute wird si ruig. Geschter hani zerscht mou Schwaubeli gse übers Huus flüge aber es isch no kes i Schtau cho grüezi säge, viellicht isch das Päärli wo letscht Johr ihri Junge ufzoge hei u so Zuetroulich si gsi no nid cho. Hei ächt die Schwaubeli schpührt dass es bi üs no so chaud isch dass si 14 Tag schpöter aus letsch Johr ufdoucht?

  • Index
  • » Benutzer
  • » Dolotelley
  • » Profil

Board Info

Board Statistiken
 
Gesamtzahl Themen:
143
Gesamtzahl Umfragen:
5
Gesamtzahl Beiträge:
1136
Beiträge diese Woche:
1
Benutzer-Info
 
Gesamtzahl Benutzer:
656
Neuester Benutzer:
Baumann Nicole