Anmelden

Tagebuch der Eselfarm

Tagebuch der Eselfarm

Ou z zwöite Füli isch glücklich vo üs i Empfang gno u het dr Name Dakota über cho, dasmou hani tatchräftigi Hiuf vore richtige Hebamme gha, scho letsch Johr wärs si gärn mou derbi gsi, aber jedesmou weni glüte ha äs göng los isch si säuber grad are Geburt gsi. Wos bim Janosch am eufi z Nacht losgange isch hani grad glüte aber si het nid chönne cho, dasmou het d Dunja am  haubi sächsi agfange u i ha glüte u o Wunder si het Zyt gha, aber si heigi d Chinder. Macht nüt si müesse eifach ganz ruhig si, hani gantwortet u bi sofort wieder i Schtau. D Dunja het gschtöhnet u z Füli isch auem-aschyn-a nid richtig gläge u si isch zwöi drümou wieder ufgschtande u het sich ir Boxe umedräit, di angere Esle hei Reklamiert wo de ömu ou ihres z Nacht bliebi? ke Zyt müesst afang chli Schtrou frässe, zerscht wird jetzt gfühlet. U scho hei d Scheichli usegluegt u i hase a-gführet, jo Dunja drück es chunnt, sobaud i ha chönne apacke hani ghuuefe zieh u zwar so fescht das i hüt Muskukater i de Füdlibacke ha, natürli darf me numme häufe zieh we d Schtuete drückt. Ir zwüschezyt isch d Hebamme do gsi u het mit grosse Ouge zuegluegt, si het Dunja gschtrichelet. D Chinder 4 u 6j. si ufem Fäischtersims gsässe, wo dr Chopf langsam füre cho isch het d Hebamme chönne häufe a d Bei zieh u i am Chopf u gmeinsam hei mir Dakota uf d Wäut brocht. Dunja isch ganz müed gsi u het no nid möge ufschtoh, aber mit dr Zunge het si Schläckbewegige gmacht, z Füli het langsam probiert ufzschtoh u isch immer wieder umgheit, das isch äbe vor Natur so guet igrichtet, jedesmou wes umgheit pressts d Luft us de Lunge u es nimmt e tüüfe Schnuf u so gö d Lunge guet uf. Dunja het geng no kener aschtaute gmacht um ufzschtoh, do hani eis Chind i d Boxe gno u es het chönne häufe mit Schtrou z Füli abrubble. Dunja het ganz ruhig zuegluegt u so het ou z zwöite Chind chönne häufe, wosi äntli uf isch si d Chinder wieder ufe Sims ghocket. I gloub soviu Häufer het no nie e Schtuete gha, es isch u wäutz schön gsi u aui si ganz berührt gsi.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Di liebi Kaila loht sich Zyt mit Füle, sit am 15 Apriu warte mir, letsch Johr bim Decke hani überleit, weni doch aui zäme zur gliche Zyt zum Hängscht bringe de müesst i doch de nid somängi Nacht ufschtoh. Aber äbe, d Esle dänke do ganz angers, aber langsam chumine uf d Schliche was si bezwäcke. Auso zerscht isch dr Janosch am 24 Apriu gebore u woner äntli i dr Gruppe indegriert isch gsi het Dunja d Dakota übercho, u we de di ou ihr Gruppe mitlouft chunnt dänk de dr Kaila ihres, gar nid schlächt wie di Esle ticke und überlege, mängisch gschider aus mir Mönsche. D Esle si uf dr obere Weid am Mittag u dört hets ou grossi Tanne, we si am frässe si de macht dr Janosch mängi mängi rundi ume Boum, im Galopp geits z ringedum, am afang si d Rundine no gross u je müeder är wird umso chliner wärde d Rundine, aber usduur het er, mängisch chunnts mr fascht vor wi wener nüme wüsst wie ufhöre.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Geschter het d Dunja beschlosse sie wöu jetzt wieder i d Gruppe, am Mittag hani d Herde a Waud ufe id Weid glo u dört si si gli einisch zimmli wyt obe gsi. I bi  d Dunja u Dakota go hole u zäme simmer zur Weid, natürli bi ni derbi bliebe, si isch schön bim igang bliebe u het afo grase, zwüschedüre hets si obsi gschilet ob jo kene abe chöm, aber z Grase isch jetzt wichtiger für aui gsi. Nach 10 Minute wo aues ruhig isch bliebe bini go es Kaffi drinke, i dr gwüssheit das Dunja scho guet luegt, woni wieder zuene bi isch Dunja u Dakota mitts i dr Herde gsi. Am obe nachem Schtaune simer go Darinka vom Hängscht hole, di het schön fröid gha wieder hei z cho, wosi düre Schtaugang glüfe isch het jedi dr Chopf usegschtreckt u gfrogt wosi de ömu ou so lang gsi sig? Womer am morge aui useglo hei ,isch Darinka gar nüme drus -cho, " was isch de das wo do bim mim Mami isch? si het wöue go luege aber Dunja hetse furt gjagt u so hetsi haut vo wytem gluegt u gschtuhnet. Nachem Grase am Nomittag het du Dakota chli müeh gha das uf- z mou zwe dunkli Schtuetene het gha "jo weles isch de jetzt mis Mami? het si sich gfrogt u zwöi drümou isch si dr Darinka hingernoche, aber gli einisch hets sich das gnursch glöst u es isch wieder Rueh ikehrt.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Hüt isches ärnscht worde, es het gheisse adiö säge dr Malala, z Härz het mir blüetet aber äbe,mi weiss es jo weme Züchtet. Die ganzi Wuche hare verzeut dass sie jetzt de ufene Füliweid geit wos no zwöi angeri Schtuetli heig, anschienend het se das nid bsunders Intressiert. Mir isches sehr wichtig die Füli guet ufzklähre, nid das si meine si müessi wäg wüesi nid lieb sige, das het me jo bir Malala würkli nid chönne säge. Mis Mandeli het gmeint " wär schmuset jetzt am morge mit mir?" das wirt mir fähle", jo jedes Füli isch ganz angers, dr Janosch u Dakota hei o scho gmerkt dass das sehr schön isch. D Malala het di grossi längi Reis sehr guet überschtande, immerhin isches zwe-e-haub Schtunde gange, u di erschte Föteli si scho cho. Tabea suecht verzwiflet ihres Töchterli, i hase äxtra ine angeri Boxe unter brocht, umse chli ab-z-länke, do muess si leider düre, aber nach zwe Tag we de d Miuch nüme so drückt,begrifft sis de das d Malala nüme do isch.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

D Tabea het über d Nacht es Loch i Betonbode gscharret, si dräit fasch düre i dr Boxe u drückt schier Türe i. Am Tag dünkt si mi zimmli ruhig, werum het si de i dr Nacht so Schtress? hani mi gfrogt , u do ischs mir i Sinn cho u i has äntli begriffe. Tabea u d Kaila si jo Zwillinge, wome nie rächt het mitne chönne go loufe hase z Nacht trennt, dr Tabea het das nid gfaue u do hani d Babette derzue do. Denn isch d Malala gebore u d Babette isch ine angeri Boxe go schlofe, u wo jetzt d Malala furt isch, het Tabea ke Gschpahne meh, do hani di Problematik äntli begriffe, i ha em Babettli erklährt dass si wieder zur Tabea söu go schlofe u es isch ruhig im Schtau. Obwou Tabea gärn di frächi usehänkt isc si doch unsäubschdändiger aus Kaila, di schloft nämli sit dr Trennig allei u es gfaut ihre guet, nume Füle wott si eifach nid, am 15 Mai dreit si genau 13 Monet, dr FüdlibluttWahnsinn.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Mir schtöh e Monet jedi Nacht zwöi drü mou uf zum go i Schtau go glüse, u wenn wird Gfühlet? am obe am sächsi. Am Donschtig Nomittag am viertu ab vieri het Kaila ufem Drocheplatz wöue z Bode go, het sich im letschte Momänt anders überleit u isch hei i Schtau, ganz allei het si sich ufe Heiwäg gmacht, do hei mir gwüsst dass es äntli los geit. Si isch i ihri Box u het afo im Schtrou nüdere, so aui 10 Minute hetsi es Weh gha, das chunnt guet hani mir dänkt, bis i uf d Eiertuur muess isch si fertig. Denkste, es het duuret u duuret, langsam isches Zyt worde zum i-schtaune, eine ume anger isch hei-cho,u so hei mir no schnäu chönne d Esle vorem verhungere rette. Jetzt isches ärnscht worde, mehrmous isch si zBode u wieder ufgschtande, irgend öpis isch nid guet gsi, si het mit de hingere Bei e Usfauschritt gmacht u denn hingere u füre gwiegelet, das hani würkli no nie gseh u bi doch Migottsdüri scho bi mängere Geburt derbi gsi. Si isch wieder abgläge u het äntli afo presse, u do si d Scheichli cho u cho u cho, aber ke Chopf, he was isch do los? i bi go gschpühre aber ke Chopf isch ume gsi, i gloube do bruchi Hiuf, sofort bini go am Tierarzt alüte u blitzschnäu wieder i Schtau. U do äntli isch er cho aber ganz verdräit, fasch so wiesi ne dräie zum go drinke, mis Mandli het müesse häufe zie u ni ha gölet u versucht d Huut übere Chopf z zieh damit nid aues irisst. Mit auer Chraft hei mir a däm Füli zoge, es riesigs Füli isch do äntli use cho grad zäme mitem Tierarzt, Kaila u mir beidi si ganz kaputt gsi, däm seit me e Zangegeburt. Vo denn a wosi zerscht mou abgläge isch bis zur Geburt vom Füli isches 50 Minute gange, scho chli lang. Aber beidi si wohlauf, i ha Muskukater i de Füdlibacke, es isch es Schtuetli u heisst Kalinka. Tabea u d Kaila si jo Zwillinge, wo Tabea i Schtau cho isch hetsi sofort gmerkt dass ihri Schwöschter am Füle isch, si het überhoupt nid gfrässe, ganz noch isch si a dr Boxewand gschtande u het sich nüme bewegt, di het uf aui fäu genau gschbührt was ihri Schwöschter mit macht, dr Fredy het se kräbelet u kräbelet, u z Babettli het di Situation usgnützt u z Höi wo für beidi wär gsi gnüsslich säuber gfrässe. Jetzt chöimer äntli wieder ruhig schlofe, läck isch das schön.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Hüt isch Kaila u d Kalinka z Mittag mit dr Herde go frässe, i ha dänkt do sige aui abglänkt u es herschi Rueh. I ha mit dr Boumschäri junge Böimli gschnitte, hejo e Frou schteit jo nid nume ume u macht nüt,oder? ufzmou isch d Poscht ab, d Dunja u d Kaila hei gschleglet "he was isch de i öich gfahre? was söu das? u do hani gseh das beidi umenes Füli schtritte. Zwe Schtuete u nume eis Füli? jo wo isch de z andere? i ha uf dr Weid ume gsuecht u versuecht Dunja z beruhige, Dakota wo bisch?? Hei isch das es züg gsi, u do äntli hase gseh, Dakota u dr Janosch hei zäme näbe dr Inca gschpiut, di het di ganzi Ufregig chaut glo, Dunja het se ou äntli gseh u het se sofort wieder unger ihri Fittiche gno. Kaila het sich  beruhigt wo niemer me ihres Füli het wöue schtähle u so si aui wieder zum frässe cho.

Bearbeitet von: Dolotelley - 15-Jun-2014 20:27:00

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Dr ganz Tag isch öpis los mit drü Füli, d Kalinka u Dakota si Haubschwöschtere, beidi brun u hübsch, die Müettere hei veiechli z luege weles ihre isch. Dr Janosch macht scho ah-näherigs versueche bim Figaro zum schpiele aber dä luegt ne numme verächtlich a " was wotsch ächt du? du haube Esu", dr Figaro het äbe no dr Sandro zum schpiele, aber we de dä ou geit, de ischer de scho froh mitem Janosch z schpiele. So am Sundig hei mir üsi Esuwanderig, hofffentlich hei mir schöns Wätter.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Auso es heisst doch immer "so wie me i Waud rüeft so tönts z rügg" chaisch dänke, wo d Schwaube wieder cho si hani di gröschti fröid gha, fröidig hase begrüesst "hallo Frou u Herr Schwaube schön sid dir wieder zuenis cho" . U hüt wosi am Junge fuettere si säge si mir wüescht weni di Boxe wott use mischte wo grad ungerem Näschtli isch, dir gloubet gar nid wie die es henne Theater ablöh bis i äntli fertig bi. Mis Mandeli meints jo immer sehr guet mit Tierli fuettere, es schpiut ke Roue wele das es si, aber hüt heter würkli viu z viu gäh. Sitmer jo einisch dr Fuchs ir Schür gha hei, fuetteret er di frömde Chatze bi de Chüngle hinger, z Nassfuetter frässe si geng sofort u de hets für d Nacht no Drochefuetter, mi Maa het gmeint dr Igu frässe di, da am morge immer aues läär isch. Woni vori de Hühner ha wöue go zue tue isch mir doch tatsächlich dr Fuchs übere Wäg glüfe u was het er ir Schnörre gha? z ganze Fuetterschäli mitem Drochefuetter, da mis Mandli soviu ufgfüut het u dr Fuchs si  Buch scho vougschlage het isch dr räschte äuä für sini Junge dänkt gsi.Es isch jo kes Wunder we d Aisha z Nacht mehrmous rüeft, die luegt doch di ganzi Zyt däm Fuchs zue u wotts äuä üs mäude. Söu mir einisch eine zeige wie me mit drüne Füli wott d Weid putze, eine ume angere probiert mi is Füdli z chlemme, so nachem Motto "entweder duesch jetzt mit üs Schmuse oder mir chlemme di is Hingerteil".I bi nume froh hei mir di Wägli so chöi sich di drü so richtig usdobe.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Hurra, mir hei hüt e wunderbare Tag mit Fründe uf üsere aujährige Esuwanderig dörfe verbringe. Vom eufi a si si langsam idrudlet, u wis au Johr isch, si aui sofort zu de Esle anschtatt go Apero näh, di süesse Füli hei natürli niemer chaud glo. Die heiss gnosse im Mittupunkt z schtoh, u mis Mandli isch närvös vo eim Scheichli ufs andere Scheichli gschtande,klar är gseht jo di Füli jede Tag aber üsi Bsuecher äbe nid u de meint er mi müess Pünktlich am 12 ässe. Geng dä Schtress, jedes Johr versuech ihm bi z bringe aus mit meh Ruh a z luege aber vergäbe, är isch erscht ruhig we aui am ässe si, he nu, de hei mir ihm haut di fröid gmacht. D Esle si sider uf dr Weid gsi u hei ganz  intressiert übere Haag glüset, dört si nämli dr Nadja ihrere zwe am frässe gsi, schnäu hei üsi e Schnörre vou gno um sofort wieder go z luege, i wett säge hüt het kene z viu gfrässe vor luter ufregig. Nachem feine z Mittag heimir versuecht die verschiedene Esle uf d Bsuecher z verteile u scho isches los gange,  es si aui Manierlich glüfe bis uf z Neli, es paar mou hare gseit ig sig de nid d Sandra wo gärn mit ihre Tschoget, si  het eifach nid Gmüetlich wöue loufe u d Nadja het scho gmeint i däm Tämpo siger mir de ihre haub Schtund scho wieder dehei. D Guschteli hei gottlob no gschlofe, aber wo mir mitts düre hei müesse isch eis ums andere ufgschtande, aber mir si scho bim zwöite Döri gsi u do si si nid noche cho, i ha nämli nid gärn we di ganzi Herde meint üs z begleite. Nach angerhaub Schtund si mir wieder dehei gsi u z Wätter hät nid besser chönne si, dir dänket jetzt viellicht das isch jo nüt, aber es isch äbe so - di einte wette am liebschte 3 Schtung go Wandere u de andere isch scho e Schtung fascht z viu. Mis Mandeli isch am schnädere gsi anschtatt üs mit Kafi u Chueche z erwarte, e Servis isch das tz tz tz. D Lüt heis sich fasch ke Zyt glo füre di feine Desser, si si lieber sofort wieder zu de Eseli, so ihre Herde Langohre isches haut eifach schön. Chömed doch eifach ou einisch a ne Esuwanderig, di nöchschti isch am 22 Juni bir Nadja Schafroth i Schönbühl, ou si fröit sich über viele Teilnähmer am liebschte mit Esle.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Di chogge Füli si mängisch scho Schtinkefräch, aber geschter het dr Janosch eine bote i ha fasch Buchweh übercho vor lache. D Inca, sini Muetter isch dür z Wägli uf u het e Huufe gmacht, dr Janosch isch go schmöcke, het gflehnet u sich parat gmacht um ou öpis lo z gheie, dr Figaro isch hinger noche cho. Wo dr Janosch isch bliebe schtoh het ihm dr Figaro mit dem Chopf e Mupf gäh, so zum säge "hei du chline Furz gang witer, du bisch es Verchehrshindernis" u do isch das chline 1 Monat aute Füli Namens Janosch explodiert, är het sich umdräit, het däm Figu aui Gottschand gseit u z letscht isch er im no a Chopf ufe gumpet, dr Figaro isch rächt erchlüpft ob dere gwautige Reaktion vom ihm. U mi hets äbe küblet vor lache, am Nomittag si aui ufem Drocheplatz gsi, plötzli isch Kalinka ganz allei zum ungere Schtau cho z Galopiere, si isch ganz ufgregt gsi wüu si ihres Mami nüme gfunde het, Kaila het zerscht gar nid gmerkt das si kes Füli meh bi Fuss het, si isch nämli Rössig u de vergässe si zwüschedüre ufe ihre Nachwuchs uf z passe, natürli hani ihre z Füli wieder brocht, das isch jo schliesslich mini arbeit zum rächte z luege.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Mängisch isch d Esuschbroch nid eifach z verschtoh, z Pflegeseli Nela geit jo mitem Muuhchorb is Gras, nach angerhaub Schtund rüefi i u si chunnt sofort um ne ab z zieh u de darfs si no 10 Minute ohne Chorb grase bis i d Weid putzt ha. D Schpitzgresli frässe si fasch mit de Wurzle u dr rot Chlee verschmähe si, beid site vor Weid lö si 2 Meter z Gras lo schtoh obwous viu Schpitzgras het, i gseh nid i werum i bi 17 Esle söu go nochemäie. I ha aui us dr Weid triebe u de nume no di 2 Meter offe glo wosi nid hei wöue putze, wartet nume hani dänkt dir frässet das jetzt sicher no. Natürli si z Neli u d Ronja am flissigschte gsi, das het jo fröid gmacht ohni Muuhchorb dörfe z frässe. I bi näbe dra gschtande u ha zue gluegt u Füli gschtrichelet, dene isches z äng gsi uf däm chline Schtück Weid, u do isch z Neli zu mir cho z schtoh wie weni sött dr Chorb abzieh, aber si het jo gar nüt a gha. "Was isch Neli? was wotsch du mir säge? i has nid verschtande u de isch si wieder go wyter frässe, nach 10 Minute isch si wieder zue mir cho, "wotsch di cho bedanke dass ohni Chorb hesch dörfe frässe? Auso i dänke das isches gsi, es danke viu mau, isch doch irgendwie ganz nätt, oder meinet dir nid?

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

D Soraya u ihres Mami si 10 Tag bim Hängscht gsi, dr Sandro het sis Mami scho chli vermisst, oder ächt nume d Miuch? Uf jede  Fau het er ächt fröid gha wo si wieder isch hei cho, aber was isch de das? är het sis Mami agluegt use abgschmöckt, irgendwie het si ganz komisch gschmöckt. Aber z schlimschte isch gsi es het ke Miuch meh gha, är het das gar nid chönne begriffe. D Soraya het ihrersits ihre Sandro abgschnüfflet um sicher z si das er ke Hängscht sig, vo däm hei gsi nämli gnue.Ihrer Muetter geits gar nid guet, dr Hängscht het se wahnsinnig verbisse u morn chunnt dr Tierarzt um di schlimme Wunde häufe z Pflege, es het ou Abszässe wo me muess uftue, hoffentlich chaner das bi üs mache u mir müesse nid is Tierspitau.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Dr Cindy geits langsam besser, aber die Narbe vo dene Bissverletzige wird me immer gseh, i ha däm Bsitzer gseit är söu Salami us däm Hängscht mache, eine wo are rössige Schtuete 20 tiefi Wundene bisst dass dr Eiter wie usere Zahnpaschtatube chunnt isch chrank u dä sött me kere angere Schtuete me zuemuete. Exgüsi, i liebe süsch d Esle sehr aber dä Hängscht isch im Chopf chrank, weme nume dänkt, die angscht wo d Cindy di ganzi Zyt het gha u den die Schmärze. Dass me öpe e Schtuete mit eire Wunde zrügg  über chunnt do dermit muess ma fasch rächne, aber nid eso. D Soraya isch ou dört gsi, si het gar nüd, gottlob, i dere Zyt isch d Miuch zrügg, jetzt het dr Sandro solang gsüggelet das d Miuch wieder chunnt , so öpis hani ou no nie erläbt.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Es geit bi üs aues e chli drunder u drüber, dr Kompiuter schpinnt u niemer het Zyt mir z häufe, sit 5 Wuche rüefi Hiufe i d Rundi aber es reagiert kene, weni dänke dass i geng für aui Lüt do bi u Hiufe Problem z löse u für mi het kene Zyt isch das scho e endtüschig. Momentan chumm i mir vor wie ime Tierschpitau, z Neli über chunnt Bachblüete Tröpfli, d Ronnja het Schüsslersauz da si schlimmige Naseusfluss het, d Darinka über chunnt öpis für d Psyche, d Cindy het Antibiotika wäge de Bisswunde u di angere frogi lieber gar nid süsch finde si emänd ou no es Boboli. D Füli entwickle sich sehr guet, es isch e fröid se z beobachte. I ha zwe e haub Tag frei gno u bi uf Interlake anes Zitherschpiuträffe, mir si sage und schreibe 57 Persone gsi us dr ganze Schwyz wo zäme gmusiget hei, am morge, am nomittag u am obe bis am zähni u de simer no go ne Schlofdrunk näh u hei gsunge bis um Mitternacht, es isch uuuuuuuschön gsi. Chumm isch fertig gsi hani fasch nid möge warte bis i wieder dehei bi gsi bi mine gliebte Langohre u natürli mim Mandli wo sider mini arbeit übernoh het, di Zyt het glängt, lenger goni nie wäg, das bring i nid übers Härz.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Hoi Dolores
I würdi diar gern helfa midm Compi. Laider bini bizli wiit wegg.
Hesch den nid gsaid dina Sohn kämi diar go helfa?
Was isch den gnau s Problem?
Vermissa dini Kommentär uf Facebook. :-)
Liabs Grüassli

Msstrawberrycupcake
Saskia
useravatar
Offline
39 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

I ha mou öperem gseit i göng zur Konkuränz go schriebe, di Person het wöue wüsse wär das sig, i ha gantwortet "uf facebook" dört chönn me mit vielne Esulüt schriebe u Diskutiere, u schwupps hets gmacht u i chumme nümme bi facebook ine. I ha aues probiert um Hiuf bäte aber i schaffes eifach nümme ine z cho, ob di gwüssi Person öpis dermit z tue het weiss ig nid, oder obs eifach zuefau isch dass es grad zur gliche Zyt passiert isch. I cha mi amäude u gseh wieviu Nachrichte i ha, aber wese wott aklicke hani nume es graues Blatt, i gseh nume dass ig drin bi aber äbe nume e graui Site. Woni um Hiuf bäte ha u gschriebe ha "i gseh nüt" hei si gschriebe das Problem ken si nid, i müess öper bäte mi wieder ine z loh, aber weni doch nüt gseh chani ou niemer afroge, oder gsehni das fautsch. Viellicht wott mir z Schicksau ou eifach säge i hocki z viu vor däm Chaschte, übrigens het di dr Rudolf wöue cho Bsueche u natürli dr Darius, aber du hesch nid z rügg glüte u jetzt isch er wieder z Biu, si Nummere isch 079 606 68 25, tues doch eifach schpichere u wener wieder sini Schwöschter bsuecht probiert ers no mou. Jo liebe Lüt, dir heit jo rächt we dir öich froget was das mit de Längohre z tüe het? eigentlich nüt. Geschter si zwe Familie mit chline Chinder z Bsuech cho, di einte wette de gärn ou Eseli choufe, aber probieret einisch öpis z erklähre we drü chlini Chinder nonschtopp am Quängle si, jedes mou wesi e frog gschteut het u i ha wöue antworte isch es Chindli derzwüsche cho. I liebe Chinder über aues, aber hier hei si würkli gschtört, bim butze hei si tapfer mitghuuefe, gottlob hani so liebe Eseli, zwe Langohre heimer gsattlet u zwöi gfüehrt, so het so ne chline Hoselupf dr Sandro chönne füehre u zwüschedüre het wieder es anders chönne rite. Hoffentlich chöme si no es paar mou bevor si säuber zwöi choufe.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Gits ächt bi de Esle ou Hippies? was dir wüsst nid was das isch? jo de sit dir äuä z Jung, es het e Zyt gäh wo aui mit Blüemli uf de Chleider si ume glofe u Musig gmacht hei " mach Musik und nicht Krieg" isch Devise gsi. Auso wo mir am morge d Esle use glo hei het üs d Dakota aglachet aber irgendwie hets komisch usgseh, mir hei chli gneuer hiegluegt u do heimer gseh dass sie vomene Hanefuess es Blüeteblettli im Oug het gha, es isch diräkt uf dr Linse gsi. Auam aschyn a hets se nid gschtört aber mi, süüferli hani probiert ds Oug gäge d Nase us z schtriche, den hani e Schwumm gno u mit däm probiert, aber das chogge Blettli het sich immer wieder verschteckt u de hase wieder es Zytli i rueh glo i dr Hoffnig äs chöm de mitere Träne use. Schpöter isches wieder genau uf dr Linse ghocket u si het eim so süess Hippi mässig agluegt, z Oug het nid tränet, es Zeiche dass es nid gschtört het, eifach zum luege isches zum schiesse gsi, normalerwys het si nämli blaui Ouge u jetzt plötzli es gäubs. I ha sicher 5 mou düre Tag versuecht das Blettli use z näh bis es mir äntli am obe glückt isch, so het si grad wieder öpis glehrt, ruhig anehebe weme öpis unangnähms muess mache, aber da sie jo scho so Mönschbezoge si isch das kes Problem gsi.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Mir si jo am Sundig in Schönbüehl a dr Esuwanderig gsi, da d Nadja di letschte zwöi Johr Päch mitem Wätter het gha het si dänkt si bschteue dasmou drümou schön Wätter u mir hei sicher gfüuhti 32 Grad gha, läck mi het fasch nid noche möge mit drinke. Leider isches wie bi mir gsi, di meischte Lüt hei gfäut, aber die wo do si gsi heis mega luschtig gha, i froge mi scho werums so hert het dass d Lüt so öpis mitmache, es isch eifach schad. D Babette, d Soraya mitem Sandro u d Cindy si mitcho, es Chindli het dr Sandro gfüehrt wome übernes Schariise het müesse, är het nid rächt gwüsst wie do drüber, am liebschte het er näbedüre wöue aber das hets nid gäh. Plötzli het er e mords Schprung gmacht u i ha ne wieder em Chindli übergäh u nid Schdutiert dass jo di angere scho witer si u ner doch sofort zu sim Mami wott, wo du das Meitschi zweni schnäu gschprunge isch u vorauem zwyt hinger ne gfüehrt het, isch si Füdli i d Luft u er hets am Bei breicht. Klar hets ne lo go u het afo gränne, es isch uf z Wägeli zum Mami u het verschtäntlich nümme wöue dr Sandro füehre, "lueg jetzt bind ig ne am Wägeli a u är muess zur Schtrof so mit loufe, zerscht het er chli angscht gha, aber nid lang u es het ihm so guet gfaue dass er bschtändig het wöue näbe dra Trabe. D Soraya het angscht gha um ihre Sandro, ou si isch ganz noch bim Wägeli glüefe, nach 10 Minute hane du wieder glöst u z Chindli het gseh dass ou es Esufüli nid eifach cha mache was es wott, i gloube do hets Bei grad nüme weh do.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Irgendwie isch ganz e komischi Schtimmig hie ufem Hof, zerscht bini jo am Sunndig mit vier Esle a dr Esuwanderig gsi, am Mändig bini mit zwene zum Hufschmid da si user Termin hei müesse gschnitte wärde da si ufenes längs längs Trekking gö. Am Zischtig hani d Darinka u d Ronja wieder iglade u is Emmental brocht, dört wärde d Hufschueh u d Baschtsättu no richtig a passt u de gösi zwe e haub Monet quer dür Oeschtrich. Jetzt isch äbe di komischi Schtimmig, kene rüeft, es isch eso Schtiu das i go go Esle sueche wüu i kene gseh, es isch grad wie wesi irgendwie e angeri Ordnig i d Herde müesse bringe. Immerhin sis immer no 15 Esle, oder hani ächt vergässe dr Herde z säge wohi di zwöi angere si u das si wieder hei chöme? i gloube i muess das morn erklähre, dene zwöine wo gange si hani di ganzi Zyt erklährt das si ufenes längs Trekking göngi u när ou Trekking Esle sige u de wieder hei chömi. Hüt isch wieder ganz luschtig gsi, dr Figaro wo doch Beibisitter macht hets fertig brocht mit drüne Füli z schpiele.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Geschter morge woni aui us ihrne Boxe glo ha hets mi dünkt d Babette mach e "exgüsi" verschissne Idruck, "he Babettli was isch mit dir? hesch öpis?" hase ganz bsorgt gfrogt. "Jo klar " het si gantwortet, "lueg doch mini Nase a, woni zu de Schwaubeli ufe gluegt ha was si machi het mir doch tatsächlich eis uf d Nase gschisse." Natürli hani müesse z lache verkneife u hare ihri Nase putzt u do isch si wieder z friede gsi. Normalerwis mache sich d Schwaubeli zerscht ufem Näschtrand zwäg bevor si Flugschtunde hei, aber dasmou si si bi schtrömendem Räge usgfloge ohni drocheüebige ufem rändli. I weiss gar nid wiemängs es si, woni ha afo Schtaune si nume no zwöi uf dr Boxetrennwand ghöcklet u hei gwartet das d Mueter isch cho hole, i ha bis uf 30cm ane chöne ohni das si wäggfloge si.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Das hät hüt schöni Fotine gä, mis Mandli het nämli d Chirschiböim gschnitte u zwar grad rächt u de heimer d Chirschi gäbiger chönne abläse,u den hei mir se zue de Esle ufe Drocheplatz gschleipft, das si jo haubi Böim gsi. Das Biud hätt dir söue gseh, 15 Esle wo am Chirschi frässe si gsi u den si d Bletter dra cho u z letscht no d Rinde, wosi ei site putzt hei gha, bini go di Escht go dräie, damit si ou di angeri Site hei chönne abgnage, das isch es Fescht gsi für di Langohre. Am Nachbar siner Zwärggeisse hei fasch überbisse vor glüschtele u klar hei si ou e Ascht über cho, aber dene isches denume um d Chirschi gange, d Rinde heisi lo si, aber villicht chunntde die morn dra.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Es isch so viu passiert i weiss baud nid wo afo, am Mändig isch d Sandra mit ihrne 5 Häufer ufe Hof cho um aues vor z bereite wos de uf ihrem Trekking brucht, i bi grad ungerwägs gsi mitere Grossmueter u ihrne drü Enkeline u drü Eseli, he klar ou d Sina isch derbi gsi. Z Wätter het sich nid vo dr beschte Site zeigt, aber es het kes zrügg me gäh, am Zischtig morge si d Chinder cho, es sire grad 12 gsi, da dr ganz Tag Rägewätter isch gmäudet worde hei mir churzum de Esle ihre Ufenthautsruum beschlagnahmt u d Chinder hei dört ihres Nachtlager ufgschlage. D Sandra het die 5 Esle vorgschteut u chli ihri Eigenarte erklährt u de hei d Chinder ihres Eseli für di ganzi Wuche usgläse, u scho hets gheisse lehre wie me d Hufschueh aleit, dr Paschtsattu montiert u vorauem die viele Riemli u Schnäueli wo u wiefescht azieh. Für d Babett u d Tabea isches ihres erschte Trekking gsi, am Mittwuch morge hei mir aues u aui nach Le Roselet brocht u vo do us si si du go Wandere, tapfer heisi däm Wätter trotzet, he jo, bi schönem Wätter cha jede aber wär bi Rägewätter trotzdäm ungerwägs isch u de no mit so fröhliche Gsichter das isch e richtige Trekkingmönsch. In Le Noirmont si es paar Chinder zumene grosse nöie Buurehof go chlopfe u wo d Frou isch usecho het d Meret gfrogt" mir si 18 Lüt, ei Hund u 5 Esle u mir sueche e Familie wo üs für d Nacht ufnimmt? Si het di Chinder i Schtau zum Buur gschickt u dä het sofort zuegseit, är het so fröid gha a dene Chinder u Eseli dass er gärn het Platz abote u so isch di ganzi Bandi glücklich is drochne Schtroh gläge. Klar hei di nasse Sache über d Nacht nid möge dröchne u so hei si eifach Hundekotseckli über d Socke agleit u de isches weniger grusig gsi um i di nasse Schueh z schlüfe. Dr Rudolf het di gröschti müeh gha es Fürli a z zünte, d Ursula u när hei e ganzi Schtunde bloset u bloset bis ne ganz trümlig isch worde, aber si heiss gschafft u es het doch no öpis z ässe gä. Am Samschtig Mittag ischs Telefon gange "Tabea schohnet, si cha nüme wyter" blöderwis bini ungerwägs gsi u ha nid chönne häufe u so het dr Rudolf haut mitem Velo vom Buur nach Le Roselet müesse fahre go dr Ahänger hole u de Tabea, z Babettli u hüfe Gepäck i z lade u hei z cho. Am obe nachem Schtaune si mir no go dr räschte Esle u Chinder go hole u aui si glücklich gsi wieder uf dr Esufarm z si. Hüt am Nomittag si d Eutere cho u mir hei zäme ganz viu Föteli chönne aluege u Migottsdüri, fausch uf aune het me glücklichi Chinder gseh, nacheme feine z Nacht si di fein schmöckende Chinder mit ihrne Eutere wieder heizu, nid ohni vorhär no aune Eselis go adiö säge, es isch eifach ganz ganz schön gsi.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

I ha es überglücklichs Füli Namens Janosch, di ganzi Zyt het er Probiert mitem Figaro z schpiele aber dä het ne gar nid ärnscht gno, z Mami het ou nid wöue schpiele u do het ers haut bim anderhaub Jährig Sandro versuecht u dä het sofort jo gseit. Jetzt si di zwe dr ganz Tag am Kämpfe, oder besser gseit Schoukämpf führe si düre u dr Janosch schtraut so glücklich us dr Wösch, es isch eifach schön zue z luege. Es isch so guet dass bis uf d Darinka u dr Ronja wieder aui dehei si, di zwöi si für 6 Wuche nach Oeschtrich.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Da am Janosch sis Mami zum Höi no Churzfuetter überchunnt isch dä chli Maa ganz gwundrig go luege was ächt sis Mami do machi, aber die hetne nid zueche glo. Dr Janosch hets versuecht u versuecht aber sis Mami het nid Platz gmacht, do het das Bürschteli überleit äs müess doch irgendwie z mache si das är ou einisch is Chrüpfli chönni luege. Plötzli het er e Idee gha, är het z Mami is Ohr bisse u di het sofort dr Chopf wägdräit u so het dr Janosch chönne es Muu fou näh u scho het sis Mami ne wieder uf z Site drängt u witer gfrässe, das schpieli het sich es paarmou wiederhout. Da mir jo Tierlifründe si het mis Mandli am angere Tag füre Janosch es zwöits Chrüpfli agschrubt u so chöi jetz beidi i Rueh frässe.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Wo mi Maa zu de Hühner ine isch, het er nid guet ufpasst u eis isch näbe ihm düregschlüfe, da mis Mandli jo jetzt Pensioniert isch het är irgendwie kener Närve me, är het afo usrüefe wie ne Waud vou Affe, aber das het jo nüt gnützt. Es Huehn dusse i z fo isch veiechli schwierig, i bi grad bir Aisha am Höi gä gsi, "chumm triebs do ine de chames besser näh" hani dänkt, aber d Aisha het  do e Schtrich dür mini überlegig gmacht, we nämli das Hüehnli unger ihrne Bei düre pfitzt isch het si blitzschnäu versuecht z Tschaupe. "He Aisha mir bruche das Tierli no, ward i nimes" hm eidütig schnäuer gseit aus gmacht, das dumme Huhn isch eifach schneuer gsi aus i u d Aisha het richtig Tscha-tscha-tscha tantzt, mim Maa isch das schpiu viu z lang gange, är isch ou i d Boxe cho u hets mit sim Fuess gäge d Wang chönne drücke, läck het di Frou Huhn chönne es Zeter abloh aber es het aues nüt gnützt, si het wieder zu de angere übere müesse. Auso wär meint är chönni sim Esu es Huhn aus Gschpahne gä, geit eidütig nid, e Esu brucht e angere Esu paschta.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Mis Mandli het wieder einisch gmeint är wüssi jetzt wie d Esle ticke, wie so mängs mou isches wieder vou i dHose, wener mir so zueluegt wis klappet wie am Schnüerli meint er är chönnis jetzt ou, ha ha ha. Wie fasch überau hets ou bi üs rächt viu grägnet u üser Wägli si rächt Pflotschig gsi, damit di grosse Esel vor Mittuschtatzion nid wieder düre Pflüder hei müesse, hei mir beschlosse si vorem Huus d abchürzig lo näh. "Gäu i go jetzt di chline go ischtaune u de düemer de di grosse i unger Schtau, wartisch uf mi u probiers nid allei, gäu? Jo jo, i warte" het mis Mandli gantwortet u so bini ufe u ha agfange d Boxe putze da jo di ganzi Herde dr ganz Nomittag d obe isch gsi. Chumm hani zwe Esle dine gha het mir mis Gfüuu gseit äs sig sicher besser go luege was mis Mandli macht, Chaos perfekt, är het natürli wieder nid chönne warte u het dänkt, was mis Froueli cha chani i scho lang. Fausch dänkt, di erschte vo acht si schön vorem Huus abe, aber drei hei gwartet u dänkt, wener de mit de angere i Schtau geit chöimer vorem Huus schnöige u viellicht finde mir sogar öpis zum frässe, mis Mandli isch gäge di drei umse z hole, sider hei di angere dänkt "womer vori vorem Huus abe si hets doch verdächtig nach früsche Birli gschmöckt " u si wieder obsi cho u mitts drin mis Mandli am düredräie. "Jo jo Mandli hätsch uf mi gwartet de hätts ou klappet" sehr sehr usdrücklich hani mini Meinig grüeft u aui Langohre si abe i Schtau. "Nei si di Esle blöd,so öpis dumms gits nid no einisch" het er gwätteret, so öpis loni nid über miner Esle säge u de hani haut grad zrügg ghä. "Wär blöd isch bisch du, muesch dir mou di schlaue Esle vorschteue, di drei wo nid cho si hei genau gwüsst uf was si warte, bis du mit de erschte wäg bisch damit si hinger z Bireböimli chöi, u ihri Lischt isch jo vou ufgange, u do heimir beidi so müesse lache u aues isch wieder guet gsi, übrigens hange no es paar Bierli am Böimli.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Nadisna si mir wieder vouzählig, morn chöme d Darinka u d Ronja vo ihrem Trekking dür Oeschtrich zrügg. Eigentlich hets gheisse si blibi bis ändi Ouguscht, aber da  s z Oeschtrich ou sehr viu grägnet het si Bäche z Flüss worde u es isch z gfährlich mit de Esle probiere dürs Wasser z go. Mir isches glich wesi hei chöme i ha nämli wäuts Längizyt gha nach dr Darinka, wie gseht si ächt us? vou Muskle? hets sie ächt zue gno? o i ha 100 Froge, i cha sicher di Nacht nid schlofe. Sit am 25 Juni si si jetzt ungerwägs gsi, zerscht ir Schwyz um di ganzi usrüschtig z teschte, gottlob, nach drei Wuche si d Sohle vor Darinkas Schueh scho düre glüfe gsi u si  heise doch no Bschlage. Lut am SMS geits aune guet u d Esle fröie sich sicher ufene schön igschtröite Schtau u d Lüt nachemene Bett, ere Duschi u es WC zum höckle.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Hüt isch wieder es mou Bsuech vomene Robischpiuplatz agseit gsi, 17 Chinder u drei Begleitpersone, pünktli uf di zwöufi si si idrudlet, natürli si mir aui am ässe gsi u üse Wachhund het se nid emou agmäudet, lo schtrichele het si sich "fautschi Nuss". Si hei ihres Picknick uspackt u i ha doch no chönne fertig ässe, u denn si mir zu de Esle uf d Weid u i ha eis ums andere vorgschteut, d Kalinka het ds Empfangskomite gmacht u isch sofort cho grüezi säge. Das Biud hätit dir söue gseh, 17 Esle u 17 Chinder si friedlich uf dr Weid gschtande, d Eseli hei z verschtoh ghä si chönni de scho beides, sich lo schtrichele u frässe. Es isch luschtig azluege gsi wie sich di Chinder uf di Eseli verteilet hei, u de simmer se go bürschte. D Begleitperson het du gfrogt ob si ächt no dörfi rite, hm, mi dünkts mängisch fasch schad di Chinder u d Eseli us ihrne Schmusisituation z risse. D heufti het wöue rite u di angere füehre, henu de hei mir di Eseli zwäg gmacht, drü zum rite u vieri zum füehre u ab isch dä läng Tatzelwurm. D Eseli hei sich vor beschte Site zeigt u d Chinder si vou Konzentriert uf ihri arbeit gsi. Womer wieder dehei a cho si hets d Chinder Wunder gno wo d Eseli überau Wägli hei u so si si go luege, d Eseli hets natürli Wunder gno was di viele Chinder uf ihrne Wägli mache u so si si grad hinger noche. Das isch es luege gsi, überau het me Chinder gse loufe verfougt vo Eseli u de heisi wieder kehrt gmacht u de si d Esle z vorus u dChinder hinger noche, mir Erwachsne hei das Biud gnosse, es isch e mega schöne entschpannte Nomittag gsi, es het ne so guet gfaue das si scho baud wieder wei cho.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Hüt hani ganz e schwähre Schtand gha, 17 Esle si angerer Meinig gsi aus ig. Am morge hets Wätter no nid so schlimm usgseh u i ha di grosse zu de chline ufe glo, gäge Mittag hets afo abelähre das es nümeschön isch gsi. I ha mi entschlosse di chline wieder i zSchtaune u de grosse im Ufenthautsruum Höi z fuettere, gärn heis si das agnoh u friedlich vor sich här gmümmelet. Am haubi zwöi hani di chline wieder use glo u do hets Theater agfange, "mir wei is Gras" hei si verlangt, "nei nei hüt nid, dir heit jo Höi gha" hani gantwortet aber di cheibe Langohre hei eifach nid wöue begrife. Jedesmou weni usem Huus cho bi hei si afo bätlet u rüefe dass ig grad rächtsumkehrt gmacht ha u wieder ine bi, d Soraya isch vor z Chuchifänschter gschtande u het mi probiert z Hyptnotisiere. I ha dr gliche do i gsengse nid u ha mi minere Konfitüre gwidmet u do hani e luschtigi Beobachtig gmacht, für mini Zwätschgegonfi hani Bire kouft u se lo teigig wärde, wose uspackt ha hets Hingerlasseschafte vomene Tierli im Garton gha. Hm vo wäm si ächt die hani so überleit u vorsichtig ei Bire um di angeri afo ufschniede u do hane gseh, mitts im Birli ischer gsi und um sis Gschäftli z mache ischer use cho het gmacht u isch wieder zrügg, auso das hani würkli nid gwüsst das di Viecher suber si, mi lehrt äbe nie us.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Bi üs gö jo drü Eseli mit Weidemuuchorb is Gras, nach anderthaub Schtunde goni i d Weid go rüefe u normalerwis chöme di drü damit i cha d Muuchrate abzieh. Eis dervo isch di luschtigi Cindy, gägewärtig si si ihre schteile Weid, i schtoh bim igang u rüefe u de chunnt ds Cindy sofort aus erschti, aber nid öpe bis zu mir, nei nei, si bliebt  20 Meter oberhaub schtoh u meint i söu gfäuigscht zu ihre ufe cho. Chaisch dänke Cindy, we du wotsch das i dä Chorb abzieh de chumm zu mir" gibi zur antwort, aber di frächi Nudle chunnt nid, di zwöi angere si scho lang cho abzieh nume d Cindy nid. "He nu Cindy we du nid chunsch de goni haut wieder" u de cher i mim um u due dergliche i göngi. Aber hallo, jetzt geits plötzli ganz schnäu u si schteit näbe mir u lot sich dr Chorb lo abzieh u de dörfesi no 15 Minute ohni frässe, jede Tag ds gliche schpieli. Oder weni dr Chorb alege u si is Gras dörfe geit d Cindy Demonschtrativ i Schtau u seit "mit däm blöde Muuchorb goni nid is Gras" "wär nid wott het gha" sägi u gange dervo, weni de vo wytem luege geit das Fröilein doch, aber äbe probiere duets si jede Tag.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

I ha fasch gmeint mis Mandeli lehri nie d Esu-schbroch aber geschter het er mi ganz verblüft, d Cindy isch fasch wie jede Tag allei i unger Schtau cho um ihres Obligate Gudeli z erbättle u dr Fredely het ere e Bärneroseöpfu gä. Woni e haub Schtung schpöter abe chume schreit d Cindy, "he Mandeli hesch d Cindy nid ghört? hane gfrogt, mou mou het er gmeint aber di schlaue Eselin het dänkt "nöier Mönsch nöis Gudeli, das isch doch e gwautige Vortschritt für mi Maa. Jo u när sig si vor Darinka ihri Boxetüre gschtande u heig verlangt das er se inelöngi, langsam verschteit är di Hingerlischtige Langohre. I ha mehreri Arüef gha dass d Esle so verschtochni Bei heige vo dene Schtächflöige, mis Rezäpt wo 100 Prozänt hiuft isch z "Euergel vo dr Firma Küenzle" es beschlöinigt d Wundheilig u hautet di choge Flöige ab.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Ulala, i ha mi wieder einisch ufes Abentüür iglooh, i ha sones schöns Läbe, e liebe  Maa, Chinder u Grosschinder, ha zwöi schöni Hobby, d Musig u mini gliebte Esle u do hani eifach z bedürfnis gha öpis witer z gä. Es si wieder einisch Gaschtfamilie für schwirigi Jugentlichi gsuecht worde u do hei mir üs gmäudet, wusch hets gmacht u scho isch dr erscht idrudlet. Es het mi dünkt är mach nid e schlächte idruck, natürli bini sofort mit ihm zu de Esle u ha eine ume anger vorgschteut, är het e guete Droht zu de Tier, Gottlob, es muess nämli ou für die schtimme. Wie vili Junge roucht er ou, "hmm do heimer es Problem, we du Zigis bruchsch de hei mir e 2 Schtündigi Wanderig vor üs" am obe nachem Schtaune hei mir üs ufe Wäg gmacht, es isch jo Sunneklar das i nid zum nöchschte Lade bi sondern zum letschte. Mini Lischt isch ufgange, si Zigerettekonsum isch rächt i gschränkt worde, vo eim Päckli am erschte Tag simmer nach 10 Tag no bi 6. I chane allei bi de Esle lo fuschte, si heine aui gärn u wener zwe chönnt usläse de würd er grad d Cindy u dr Figaro mit Hei näh. Am morge simer mit mischte beschäftigt, wo am erschte Tag e Esu isch cho luege wär do mit mir am schaffe sig het dr Jüngling sis Boueletaxi wäggschteut u isch go schmuse, klar hani fröid gha aber er isch jo nid zum vergnüege hie u drum hanim gseit "he mir si am schaffe u nid am schmuse, aber we du e Bürschte i d Händ nimsch u dr Esu bürschdisch de giuts aus arbeit" hi hi hi isch doch schlau gsi oder? I zwe Tag geit er wieder Hei, d e isch sis Timeout fertig, hüt Nomittag isch er uf z mou nüme Motiviert gsi u isch is Bett mt sim Handy go schpiele, henu i ha zwöi mou grüeft aber es isch nüt z mache gsi, am obe het mi Maa es ärnschts Wörtli mit ihm gred, woner fertig isch gsi hani gseit "jetzt isch no eis Problem mis Mandli isch nämli gar nid Motiviert öpis z Nacht z choche, chasch i Chäuer go luege was dir passt u säuber werme, Rache ist süss wie Blut und Leberwurst. Wei de morn am morge luege ober uf toucht zum mischte.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

I muess scho säge dä Jüngling het mi rächt erschtuhnt, vo 16 Tag het er nume ei Nomittag verseit, ou d Betreuere wo zum Abschlussgschpräch am Donschtig cho isch het di Veränderig vo ihm chum chönne begriffe. Dr Zigarretekonsum abegfahre uf 6 Schtück, di ganzi Zyt nie Fernseh gluegt (mir si jo am schpiele gsi u hei ke Zyt gha zum Fernse luege) nume ei chline usraschter wüu i sis Handy zum Zimmer us gno ha woner nid Motiviert isch gsi. Immer aschtändig mit üs u de Tier umgange, dr ganz Tag ghulfe schaffe, mir hei fasch nume Positivs chönne brichte, eis isch ganz klar "ohni mini Langohre aus Therapeute hättis nie allei gschafft. Jede Nomittag ischer 15 Minute z früeh us sire Zimmerschtund cho, isch i d Weid go d Muuchräte abzieh u het nach 10 Minute di ganzi Herde us dr Weid triebe u dr Zuun wieder gschlosse damit d Chüeh wieder zum Wasser hei chönne. Z erschte mou woner di Esle hät söu usetriebe het er se gjagt, i hanim dr underschied erklährt vom triebe und Jage, z nöchschtemou het er ganz süüferli do u d Esle hei ne vou verarscht, si si vo eire Site vor Weid uf di anderi Site, nume jo nid abe, klar hani müesse lache abernume ganz lieslig. Wieder hanim erklährt was passiert isch u das er viu beschtimmter müessi rede mit dene Luuscheibli, i gloube är het di ganzi Nacht a däm Problem ume g schdutiert. Woner mitemene Schtäcke aus Armverlengerig u mit Schtächschritt d Weid uf isch si d Eseli grad vo allei Hei cho, di hei sofort a sire Körperhautig gseh dass ers hüt würkli ärnscht meint u är isch so glücklich gsi dass ers dasmou ganz richtig gmacht het. Hüt nachem Mittag woni no am Zytig läse bi gsi hani nid rächt ghört ob er scho ungerwägs sig um d Chrate ab z zieh? i hane niene gseh auso bini i d Weid u do hane gseh, mitts ihr Herde isch er am Bode ghocket u het abschied gno vo de Eseli, eifach ungloublich. Z Heim het üs agfrogt ob er nid au Monet e Wuche bi üs verbringe chönnt da ihm di Eselitherapie soooooooo guet tuet, werum nid? ihn kenne mir jo jetzt u wär weiss wie dr nöchscht wär.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Zerscht simmer nume froh gsi das Darinka u d Ronja wieder dehei si, so ufe erscht Blick hei si gsund usgseh. Jetzt drei Wuche schpöter si uf ihrem Rügge wiise Hoor noche gwachse, jo do isch öpis gar nid guet glüffe. D Bsitzere vor Ronja u ihre Begleiterin wo scho Johre lang mit de Ross dür Amerika Treeket isch, hei gmeint si müessi d Baschtsättu abändere, zerscht hei si d Houzschitt vorne kürzt. Denn isch das Houz dick ufpouschteret worde, z vorgschirr isch ou abgänderet worde so das beid site vom Haus e breite Rieme gäge vorn i d mitte gfüehrt worde u vo dört unger d Bruscht am Buchrieme abunde. Was vo däm auem tschuld isch a dene grosse Druckschteue isch hie d Frog, leider hani di abgänderete Baschtsättu nüme gseh bevor si 6 Wuche uf Trekking si. Bim heicho hets gheisse "si hei ke Schpass me gha drum hei mir se hei brocht" , jetzt isch dr Fau klar si hei Schmärze gha u drum ke freut me gha am Trekking, armi Eseli,trurig das d Mönsche z Problem nid ungerwägs gseh hei. D Ronja isch grau do gseht me di wiise Hoor nid so guet, aber Darinka isch fasch schwarz u do gseht me di wiise Hoor leider sehr guet u si gö ou nüme wäg, we einisch d Huut offe isch de wachse nume no wiisi Hoor noche.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Heit dir scho mou e Esu verchlüpft? nei? i bis hüt ou no nie. Wie jede Tag hani wöue go d Muuchräte abzieh u d Cindy isch natürli vo däm junge Maa verwöhnt worde, bis uf 15 Meter isch si i däm schteile Gländ cho u när het si gwartet, äbe grad wie geng, wiene Schtatue hets si usgseh. "Jetzt hani drü mou grüeft, endweder du chunsch oder i gange", u wie jede Tag het si gluegt ob i würkli göng, wart nume du Luusmeite hani dänkt. I ha dr gliche do i göng zur Weid us u ha mi hinger dr Schtauswand verschteckt u nume mit eim Oug glüüset ob si chöm, wie z bissiwätter isch si obe abe cho u i däm Momänt wosi näbe mir dürepfitzt isch hani gmacht UAHHH, läck isch die verchlüpft u i ha mi fasch nüme chöne hebe vor Lache. Was so Seich machet dir nie? Isch irgendwie schad, über was chöit dir de Lache? Morn am morge früeh fahre mir ab ufe Ballebärg, we öper no Eutergel brucht de chömet verbi, i nime äxtra mit. Für was söus guet si? äbe das isch z beschte Mittu gäge die chogge Schtächflöige

Bearbeitet von: Dolotelley - 12-Sep-2014 20:12:21

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Uiiiii isch das wieder schön gsi ufem Ballebärg, am Samschtig bir akunft si d Rahel, Alina u d Alexandra mit de Esle grad zum Poschtelouf gschtartet, i ha mi Ahänger wäg gschteut u de hani dr Janosch a d Inca bunde, ha z schwäre Leiterwägeli gno u so simmer ufe zu üsem Platz. D Lüt hei schön glachet, do füehrt di gueti Frou zwe Esle u zieht das Wägeli säuber, klar hani mir müesse blödi Komentare alose aber das si mir üs jo gwohnt we me mit Esle ungerwägs isch. Irgendwo düre hei si jo rächt, i sueche immer no öper wo mir das Wägeli cha ab ändere damit i cha e Esu ischpanne, bis zum nöchschte Ballebärg schaffis beschtimmt. Am Samschtig hets no nid soviu Lüt gha u üsi si jo mit de Esle ungerwägs gsi, aber es isch doch aubot öper cho Eseli schtrichele, am obe heimir üsi Langohre igschtaunet u si go z Nacht ässe. Am Sunndig hets gräblet vo Familie mit Chinder u üsi Eseli si gschtrichlet u bürschtet worde, dr Janosch glänzt immer no, ou zwe Tag schpöter, womer wieder gschtardet si zum Umzug düre Ballebärg het es chlis Meitschi wöue mitcho. D Eutere hei se mit üs lo go u do het di Meite zur Mueter gseit "Mueter gib mer no schnäu z dreiche" när hetsi z Seili vor Cindy gno u isch dervo gscheichlet, di isch sicher nid euter aus 4 Jährig gsi. U üsi luschtigi Cindy isch wienes Schöfli mitglüfe, u jedesmou we di zwöi chli dr aschluss verpasst hei si si eifach nochegschrpunge, di Eseli hei eifach es Gen für Chinder. Es si wieder emou me Chinder u Erwachsni aus Esle im Schtrichuzoo gsi, i bi am Diskutiere gsi u do hani gseh das es Meitschi mitem Schtrigu sehr ruch d Inca putzt het, sofort bini zuenim u ha gseit "gsesch du nid das du däm Esu weh duesch? si geit jo mit em Rügge grad abe, chum gib mir dä Schtrigu i zeige dir uf dire Hand wies duet" do seit doch das Meitschi "i weiss" he hallo? was söu das? jetzt nimsch e Bürschte oder geisch use, do isch si use. Mängisch verschtohni mini Esle nid, werum isch d Inca nid eifach vo däm Chind wäg? um serigi Sache z vermiede isch immer eis vo üs derbi u luegt zum rächte, mir mache gärn so öpis mit aber es muess ou für mini gliebte Langohre schtimme.Aber aus i auem sis wunderschöni Tage gsi.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Wieder einisch het sich e Schuuelklass agmäudet, am 11 si si acho u hei grossi Ouge gmacht wosi di viele Eseli gseh hei. Si hei ihri Ruckseck deponiert u i hane erklährt wie me sich bi de Eseli verhautet u de simmer zuene, aber hoppla was isch de i dä Figaro gfaue? Si Gsichtsusdruck het nüt guets verheisse u i ha de Chinder erklährt dass er nid e guete Tag heig, si söue doch eifach zu de andere Eseli go bürschte u Schtrichele. I ha probiert ihn i ne Ecke ztriebe, aber är isch mitts uf em Drocheplatz bliebe u het ganz böse zu dene Chinder gluegt, so hane no gar nie gseh. I ha es Seili greicht u hane zum Schtau abe brocht, ischer är ächt so hässig gsi wüus gli Zyt zum go grase isch gsi? viellicht isches de nachem grase besser. D Chinder si go Picknicke u d Esle go grase, klar hei d Chinder i 10 Minute fertig gässe aber d Esle nid. Mir si haut uf d Weid go witer putze, d Esle hei sich nid lo schtöre, dr Figaro het e wahnsinnigi aziehigschraft endwicklet, aubot het wieder es Chind probiert zu ihm z go, i has wieder u wieder erklährt dass si hüt eifach dr Figaro müesse lo si, es sig eifach nid si Tag. Schpöter hei si no dörfe rite u den si si wieder glücklich hei zue.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Nei aber ou, am Mittwuch morge woni aui Eseli us ihrne Boxe glo ha gsehni uf zmou das d Kaila Bluet a de Hingerbei het, i bi rächt erchlüpft u ha sofort afo sueche wohär das chunnt. D Hufortophätin isch grad a de Huf vor Aisha mache gsi u wo si ufluegt gseht si z Füli vor Kaila u seit "z Füli muesch luege". Nei, mir isch fasch schlächt worde woni d Kalinka gseh, es riesigs Loch im Kopf, mi het grad dr Chnoche gseh u z Fleisch isch nume so abeghange, isch nume guet bini usbiudeti Pferdesamaritere. I  ha mir di Sache e chli gneuer agluegt u bi du am Tierarzt go lüte, bis er cho isch hani mit Betadin-Wasser di Wunde süferli afo putze, z blöde isch gsi, jedesmou wesi bir Muetter het wöue go drinke isch dräck i d Wunde cho. Gäge Mittag isch er äntli cho u do hets agfange müehsam wärde, säbt zwöit hei mir das Füli gäge d Mischtmuur drückt damit dr Tierarzt het chönne unentpfintlich mache, u när d Wunde no besser putze, luege wiener das abehangende Fleisch wieder cha befeschtige. Obwou si keni Schmärze me het gha het sich d Kalinka gwehrt mit auer Chraft, mi Tapete (Huut) vo mim Arm hanget geng no ar Mischtmuur, he nu, geteiltes Leid isch haubes Leid. Mir hei zäme däm Füli chönne häufe u jetzt heissts zwöi mou am Tag di Wunde wäsche u Saubele, zwöi mou Antibiotika gä, si lot das aues erschtuhnlich guet mit sich mache u i hoffe das es ke Souerei git, schliesslich chame uf dr Nase ke Verband alege. Sofort hani aues abgsuecht wo sich das Füli di Verletzig zuezoge heig, mir wo doch geng so ufpasse das nüt passiert, am Mischtschtockegge hei mir es grüens Plastifizierts Gitter u mitemene Houzpfoschte befeschtigt, da jo d Esle überau sich müesse go rangge, heissi dä Pfoschte zrügg gschobbe u z Gitter het füre gluegt. Dr Durchgang isch dört 1,5Meter breit, aber es het wieder einisch nid schnäu gnue chönne go u do het i däm Durchgang d Kalinka wöue ihres Mami überhole u isch Gringvora is Gitter gsecklet, eigentlich isches nid scharf, aber weme mit alouf dri secklet de isches eidütig schtercher aus e Fülichopf.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Isch das bi öich ou eso, we mis Mandli wäg wott de seit er tschüss u wäg isch er. Hüt hani mit 4 Esle i Jura a ne Esuwanderig wöue u do i äbe e Frou bi hani zerscht no 6 Boxe gmischtet bevor i abgfahre bi, u werum dä Schtress? nume damit mis Näbegrüsch ender i Liegischtuul het chönne. Mis gseht immer wieder schöni Gägende a dene Esuwanderige, hüt hani 2 wunderschöni Eseli gseh, i ha däm 12 Meitschi grad müesse Gratuliere dass sie so guet zu dene luegt, si isch baud verläge worde ab däm Komplimänt. Fröidig het si erklährt dass si mitem 3 Jährige Pat Parelli schuelet, är machs scho ganz guet u es göng de ou besser um mit ihm go zloufe. I hare no es paar Dänkaschtöss chönne gä, da me soviu übergwichtegi Esle gseht isches eifach schön weme ou mou öpis angers gseht. Nöchschte Sunndig isch no mou e Wanderig in Oftringe bim Meier Urs, chömet doch ou.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Mi Jüngling vom Heim isch wieder e Wuche hie, imene Externat, obwou si im Heim gar nid glücklich si mit ihm, hie bi üs geits prima. Vor eim Monet ischer doch 16 Tag bi üs gsi u woner jetzt wieder cho isch, isches grad gsi wie wener gar nid furt wär gsi, i ha ihm überhoupt nüt müesse erklähre, är het no aues gwüsst. Am liebschte möcht i Fiume wiener sich mit de Esle abgitt, ganz lieb red er mit ihne u am liebschte Schmuse u Schmuse, es  chunnt mir vor wiener die Liebi vo de Esle ganz gierig ufsugt, we jetzt nume sini Betröier ihn so chönnte gseh. Letscht Wuche het er blau gno u isch dr ganz Tag im  Bett bliebe. Sini ufgabe die Wuche isch e Schtung sich vou z Konzentriere u säuber z arbeite, är git sich müii aber aubott geit e Esu u probiert ne abzlänke, mit mir zäme arbeitet er guet. Geschter heimir zäme d Sandra u d Esle is Friburgische brocht für ihres 10 Tägige Trekking, obwou doch no 13 Esle hie si het me z Gfüuu es fähli viu meh aus vier.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Letschte Sunndig si mir jo in Oftringe are Esuwanderig gsi u dört hei mir öpis erläbt, so öpis cha gar niemer gloube. Pünktlich am eufi si mir idrudlet u hei baud ke Platz gha zum Parkiere so mänge Hänger isch scho dört gsi, hm gseht doch super us so viu Bsitzer mit ihrne Esle. Mir hei aui zäme ufe Drocheplatz glo u do isch Poscht ab, es paar Schtuete hei ab dene hübsche Wallache ganz dr Chopf verlohre u si grad Rössig worde. Mir Bsitzer hei e feini Schpäckzüpfe dörfe vernichte u ou öpis drunke, so am viertu ab zwöufi wei mir schtarte het dr Urs üs mitteilt, zimmlich Pünktlich hei mir üs uf di zwöi Schtüdndegi Wanderig gmacht, am zwöi simmer bimene Usflugsreschtourant acho u do isch doch tatsächlich es Apero für üs parat gsi. WAS? mir söue mitts zwüsche dene Gartetische mit üsne Esle es Apero näh? Auso so öpis hani doch no nie erläbt are Esuwanderig, u ob mes gloubt oder nid, währendere haub Schtund i dere Beiz het kene vo dene 14 Esle öpis lo gheie, di hagle hei genau gwüsst dass si sich z benäh hei. Hut ab. Am drü simer äntli wieder bim Urs dehei gsi u hei äntli üsi Sache ufe Grill chönne lege, jo z Mittag u s Dessert si scho chli noch binang gsi, aber äbe mir Esufründe näme z läbe mit Humor süsch hätte mir jo kener Esle.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

So äntli isch ou d Sandra mit 4 Esle heicho u mir si wieder vouzählig, isch doch eifach schön we wieder aui dehei si. D Bsitzere vor Ronja het sich schwähre Härze derzue endschlosse es nöis Plätzli für se z sueche. Da si im Früehling e nöii Usbiudig afoht het si ke Zyt u vorauem ke Gäut für zwöi Eseli z zahle, dr 24j. Proffeser Balthasar Benjamin Blümchen Kurz Benj darf natürli bis a sis läbesändi bi üs bliebe "so Gott willche". Jetzt sött eifach dr lieb u luschtig anderhalb j. Sandro liebe Lüt finde wonim es Plätzli hätte, aber äbe nid nume aus Rasemäier, do derfür isch er mir eifach z schad, mir möge warte u hei Platz gnueg, di richtige Lüt wärde scho cho. Dr Nachbar deckt sis Dach nöi, jo do hei d Esle öpis z luege, d Nase immer z vorderscht.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Es isch wieder einisch Zyt gsi ume Mischt use z due u wie jede morge isch d Cindy derhär cho, aber dasmou isch si a grent. Z grosse Tor hei mir zue do damit ke Esu chunnt cho schtöre, u z Tor vorem Huus ufe isch klar offe gsi damit di zwe Traktore hei chönne Manöveriere. D Cindy het lutschdarch Proteschtiert, "aber Cindy du gsesch doch das du nid chasch cho"? "ich will mein Gudeli" het si reklamiert, mis Mandeli het erbarme gha u isch mitemene Oepfeli zuere. Hmm mampf mampf het si gschmatzet u wieder grüeft " ich will reinkommen" "nei nei du Närvesage hör jetzt uf schtürme hare grüeft. Mis Mandeli isch mitem zwöite Oepfeli zuere u het gmeint är chönnt se zum schwige bringe aber si isch unerbitlich gsi u het mit ihrem Gschrei sogar di zwe loufende Traktore übertönt. "Ich will endlich rein und mein Gudeli" auso het mis Mandli es Seili gno u dere Närvesagi ume Haus gleit u het se dür dä 60cm änge durchgang zwüsche Traktorredli u Brunnetrog gfüehrt use i d Boxe vor Darinka gschperrt u äntli isch wieder Rueh i kehrt. I bi fasch sicher wemer ungerwägs dür sone ängpass hätte müesse, hät si gschtreickt, aber was me nid aues für nes Gudeli i chouf nimmt.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

I bi rächt Fruschtriert u mängisch hani mini liebi müeh mit dr Hautig vo de Lüt gägenüber de Esle, was i do aues muess mit erläbe u ghöre, es schteut eim grad d Hoor z Bärg. Hüt hani jo d Ronja a ihre nöi Platz brocht, vo de Lüt här kes Problem, aber di Platzverhäutnis für mini Begriffe e Kataschtrophe, nume e schärme u füre e Winter ke müglichkeit zum vorderfront zuemache, d Esle hei überhoupt nid gärn chaut. Zum schlofe nume e Gummimatte u ke Ischtröi, isch sowiso vom Tierschutz nüme erloubt. Mir isch klar dass nid aui so viu Platz hei wie mir aber e gwüssi grössi mues ou dr Uslouf ha, auso we d Ronja mi Esu wär gsi de hätt se grad wieder hei gno, i weiss nid ob i di Nacht cha schlofe, bschdändig muess i a se dänke. Denn hei sich Ordensschwöschtere für Esle Intressiert wosi säuber ou chönnte rite, das heisst es müesse grossi si, im Internet hei si e Schtuete gfunde u si ou druf gsässe, aber nachem Foti isches schwierig gsi di würklechi grössi z gseh. E Bekannti isch mit ihne di Schtuete go luege u het du vom Chouf abgrate, Hufproblem u nidemou 120cm gross, jetzt macht di Bekannti e drü e haub Jährige Wallach zwäg, i drei Wuche wott si ne parat ha um ne z bringe. Do jo no e zwöite Esu himuess het si es Füfmonetigs Hängschtli lo Kaschtriere wo derbi fasch verblüetet isch, aus erschts geit jetzt dä gross Wallach wo nume e schnäubleiche düre gmacht het zu dene unerfahrene Schwöschtere u ines paar Monet geit de dr chli ou dört hi. Vo mir us gseh chas das nid guet go, am Sunntig nach dr Predig wei de di Schwöschtere rite abiete, zämefassend - unerfahreni Schwöschtere biete rite mit unerfahrene Esle für unerfahreni Chinder a. I ha beidsitig mini bedänke güsseret u do niemer uf mi lost hani mi zrügg zoge, mängisch mani eifach nüme immer z glich widerhole.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Mini Gedanke si bschändig bir Ronja, morn isches e Wuche das si am nöiie Platz isch, bi üs isch scho rife gsi auso rächt chaut scho u di armi muess ohni Ischtröi imene offe Schtau schlofe. Wosi zu mir cho isch us langsam Winter worde isch hetsi fasch nüme zum Schtau us wöue u zletscht hare e Dechi vo mir agleit, auso e Eselin wo nid gärn chaud  het, es nimmt mi Wunder ob d Bsitzere geit go luege was sie macht u mir de bscheid git. Z Babettli het mi hüt schön verwütscht, wosi vom Waud abe cho si hätte di chline nach obe söue u di grosse abe, i ha gseh dases e Schtou gä het u ha grüeft umOrdnig dri z bringe. I ha gseh das i muess go häufe u blöderwis hani wieder nume Schlarpe a gha, auso bini über d Weid u ha vo  dört us wöue igrife, z Babettli het unbedingt obsi wöue, "nei nei du geisch abe" hani gseit u mit mim Schtäckli gwädlet. Zwöimou het si probiert dürs Wägli uf u go u i ha gwädlet was i ha chönne u plötzli het si gseh das mis Schtäckli jo nid übers ganze Wägli ma u scho hets schwupps gmacht u si isch düre gsi, "wart nume du cheibi Gumsle muesch jo glich abe". Si isch mit de chline ufe u derfür isch z Ingeli u dr Janosch abe, äbe wieder einisch es rächts gnursch, aber äbe we di einti oder angeri Rössig isch de nusche si haut.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

I has nüme chönne verchlemme u ha dr Bsitzere vor Ronja aglüte zum Froge was jetzt genau los sig, ob di Familie igsengi das die zwe Esudame zum Schlofe Ischtröi bruche? Jo si heig scho es paarmou aglüte, di zwöi chömi guet mitnang us, dr Ronja zlieb wird am obe chli Schtrou gschtröit u am morge sofort aues wieder wäggrumt damit si nid Schtrou frässi????????
Dr Tierschutz schriebi nume vo Ischtröi aber nid wiuviu, damit se nid a d Bei schprützi bim Brüntsle, hm hm hm. Dä Bsitzer vo däm Platz het mir verzeut gha , das dr Wallach wo bi ihne igschteut sig gsi aubot Kolik heig gha, jetzt woni dä Platz gseh ha isch dr Fau für mi klar, dä arm het Chäutikolik gha. Mir hei mou mitemene Ponyfüli drümou müesse dr Tierarzt ha wäge Kolik, aber i has nid verschtande, da mir jo ke Fuetter gänderet hei, är het mi usgfrogt winis machi. Auso am nüni am morge machi aui Boxe uf u de chöis si dr ganz Tag ine und use, i müess im Winter di Esle unbedingt am Mittag wieder i schtaune damit si sich wieder chönni erwärme, vo do a hanis genau so gmacht u sider kener Problem me gha mit Chäutikolik.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Ja geits öich mängisch ou eso? i ha gseh wie d Esle d Chöpf wyt unger em Droht düre gschtreckt hei um jo no es Gresli z verwütsche, hm i sött äuä wieder e chli Schtrom druf gä hani so überleit, bis i äntli wieder zum Huus abe bi hanis scho vergässe. Am Nomittag wo d Esle langsam vom Waud abecho si het mis Mandeli zum Fäischter us gluegt, "he di Schottischi Chueh het dr Janosch wäg gjagt woner ufem Wägli näbe verbi het wöue", i ha mir kener Sorge gmacht u dänkt wener de würkli verbi wott de schpringt er eifach ufzmou düre. Mis Mandeli het gluegt u gluegt u plötzli ischer uf gjagt "he dä isch jo uf dr grosse Weid bi dr Chueh, weisch wie gfährlich? "Jo jo i chumme", dä  macht immer sofort uf Panik," nimm chli herts Brot mit de chöi mir di Chueh ablänke um dr Janosch wäg z näh". Womer nöcher cho si hei mir gseh wi das Füli dere wiude Chuh isch go z hingere ab schnüffle, hässig het si sich gäge dä frächdachs umkehrt u ganz luut Gmuhet. Hm rächt e gfährlechi Situation, mis Mandli het natürli wieder dr Schoggi tschopp übernoh u het mitem Brot di Chueh wäggglöhkt u i ha hinger ihre i d Weid dörfe go dr Janosch i fo, abinde, u us dr Weid füehre. Ei Chueh u e Kaschtrat si zäme uf dere Weid, aber da  si nie rächt Mönschekontakt hei si si rächt verwiuderet, Rasse Schottischi Hochlandrinder. Weni am morge dr Schtrom hät igschaute wär das nid passiert, ha eifach wieder nid uf mini inneri Schtimm glost, blöd.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

So no es schöns Gschichtli zum härzhaft Lache, mir macht das nüt us, schliesslich hani mi säuber müesse uslache - ine sone blödi Situation hani mi brocht. Wo mir hüt Höipellets hei wöue uffüue, hei mir gmerkt das sie grau si, zerscht heimir gmeint mi chönnt di graue useläse, hei aber sofort gmerkt dass das nid geit u so hei mir üs entschlosse aues ufe Mischt z entsorge. Normalerwis choufe mir nume soviu Seck wie i de blaue Kunschtstofffesser Platz het u so isch z Fuetter immer guet gschützt vor de Müüs u dr Füechtigkeit. Di Höipellets hets aber nume Balletwys gä, das heisst, mi het müesse 25 mou 25 Kg. näh, henu, hani dänkt, das isch jo nume preests Höi, do isch jo nüt angers drin wo cha schlächt wärde u dr eint oder ander chouft de sicher e Sack bi mir u jetzt di Souerei , 150 Kg ufe Mischt. I has fasch nid übers Härz brocht u mir hei gratiburgeret wie me ömu dä Schade chönnt begränze, d Hühner hei nume blöd us dr Wösch gluegt womer mit dene i-gweichte Pellets cho si. Hm so geits nid, wie wärs ächt mit dene zwöi aute Schottische Hochlandrinder??? die chame sowieso nüme verwärte u weme gseht was dr Buur für wüeschts Höi bringt für die zwöi de chöimer sicher di Pellets dene gä. Mis Mandeli isch sider zu de Hühner go Chärne gä u i ha e Chübu vou Pellets gno u bi gäge di Höischtande gange, natürli nid ohni mi vorhär z vergwüssere das keni ume isch. Da bi üs am morge scho Morgefroscht isch het mis Mandli de Chüeh scho chli Höi i d Schtande do, woni mini Esle nach dr Höiration no chli ha i d Weid wöue lo hei di Luuscheibli scho gseh das dört Höi für d Chüeh drin isch u i hase fasch nid verbi brocht. Ok de schperri haut di Schtande angers ab mit de Schnüer damit di Langohre nüme zueche chöi, gesagt getan, u so bi ni mitem Chessu cho - ha di Schtande ufdo bim Döri wo Sitwärts so gross isch das me e Rundbaue cha dri tue. Plötzli gseh ni us de Ougewinkle e Bewegig - i dräie mi um - udi gfährlechi Schottischi Chueh schteit e Meter vo mir wäg u luegt was i do mache, gopffritschtutz, jetzt isch si doch no mitts uf dr Weid gsi?  was mach i ? dr Fluchtwäg isch abgschnitte, i ha nume ei Uswäg gha u das het gheisse i d Schtande schlüfe u z Töri zue haute. Ir zwüschezyt isch ou dr Muni cho luege was do geit u dä het e Schpannwyti vo 120cm vo eim Hornschpitz zum angere, i bi do i dere Schtande ine ghurret u dänkt "hoffentlich vermisst mis Mandeli mi gli einisch, es isch nämli zimmli unbequem gsi u sehr sehr Pinnlich. Do hani mi Maa gseh us em Hühnerfährich cho, i ha grüeft u grüeft so lut i ha chönne, är isch äbe scho chli Schwärhörig, u äntli het er mi ghört. "Was isch? chumm schnäu du muesch mi rette, hani grüeft, vom Huus unger het er mis Problem nid chönne gseh, "nimm chli Fuetter u löck di beide wäg das i äntli use cha, hanim befohle u so het ers gmacht u i bi grettet gsi, danke viumou mis liebe Mandeli, allei wäri rächt ufgschmisse gsi.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

So schwärs mir ou faut aber i muess mi dermit abfinde das i dr Ronja nüme cha häufe, i ha dr Bsitzer aubot aglüte zum froge ob di Lüt äntli ischtröii u igsengi das si mitere Blache müessi zuemache, jetzt nimmt si kes Telefon meh ab u so öper seit är sig mini Fründin. pah do pfiff i druf. I hätt söue zwe Notesle ufnäh u doch zerscht wöue wüsse ob d Ronja wieder zrügg chömi oder nid, aber da di liebi Bsitzere ke bscheid het gä hani überau e angere Platz müesse sueche. Tschüss Ronja es tuet mir leid, i wünsche dir trotzdäm aues gueti u i hoffe di Lüt heis i gseh das si öpis müesse ändere.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Hallo, bi üs louft aues gmüehtlich, d Esle hei äntli kapiert das d Weideseson z änd isch, leider isch dr Bode no nid gfrore u so hei mir d Wägli zue gmacht. I ha wieder e Bursch bi mir u morn darf er mitcho u dr Schmutzli schpiele, i weiss no nid wies geit aber es wird scho guet cho. Siner Lieblingshose hei z Füdli bide Chnöi unger u so öpis darf doch e Schmutzli nid zeige, es wird sicher no überzügigsarbeit bruche ihn z überzüge, aber es wird scho guet cho. Am Samschtig gömer mit 6 Esle i Ort abe am Samichlous go häufe, dr A.. het scho gfrogt obs de dört ou Jugendlichi heig de wett er de siner unmügliche Hose trage. Woni für mis Grossschindli äs Chäpli gliesmet ha het er grad eis bschteut, aber natürli i de Farbe vo de Reggeahänger, da är so schön mithiuft u aschtändig isch lismi gärn für ihn das Chäpi. Hüt simer mit dr Inca u em Janosch go schpaziere, hi hi hi di beide Buebe si rächt müed gsi womer wieder dehei si gsi, dr A het gseit "auso für i Ort abe wett er de gärn e angere Esu füehre aus dr Janosch"  komisch, aber da mir jo e 40 Minute bis i Ort abe hei wird dr Janosch scho ruhig.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Bi rächt ungmüetlichem Wätter hei mir üs ufe Wäg gmacht u do me jo nie weiss wie schnäu me vorwärts chunnt, simmer früeh gnue gschtartet. Dr Jüngling isch scho mit chaute Füess gschtartet da er jo zerscht no e Zigi het müesse hingerezie, ungerwägs ischer gschuenet dass i fasch nid noche ha möge. Dr A.. het dr Benj u z Cindy gfüehrt, d Alexandra het d Inca u dr ufträit Janosch gfüehrt u i bi mit Soraya u Sandro ungerwägs gsi. Wägem Rägewätter hei mir aune Esle es Schtück Plastig mitemene Schnüerli übere Rügge bunde damit si wenigschtens dört droche bliebe. Nachere haubschtund simmer viu z früeh im Ort unde acho, ungerere Ungerfüehrig hei mir am schärme gwartet, dr A het aubot gfrogt "was mache mir jetzt? wie lang müesse mir no warte? i ha chaut Scheiche". I ha gar nid verschtande was eigentlich sis Problem isch gsi, am viertu vor Sächsi si d Lüt langsam idrudlet u mir si mit de Esle ou go i schtoh. U wis immer isch weme mit Esle ufdoucht - simmer sofort umringt gsi vo Familie wo hei wöue cho schtrichele. Plötzli seit dr A.. "i hautes jetzt de nüme us" hä?? hani gfrogt, was isch? "he, du weisch doch dass i Platzangscht ha u di Lüt chöme immer nöcher u nöcher, i dräie de öpe düre", bloss nid. I ha ne mit dr Cindy hingere gschickt wos kener Lüt het gha, jetzt wartisch bis mir aui losmarschiere u de chunsch aus letschte hinger noche, du findisch üs de scho u für d Cindy isches kes Problem wesi di angere nüme gseht. Mischt i ha doch nüme dra dänkt dass er Platzangscht het, henu, jetzt müesse mir z beschte drus mache. Mir hei äntli chönne losloufe u z hingerscht hani dr A.. mit dr Cindy gseh. Ungerwägs hani emene Bekannte miner zwöi i d Hand drückt u bi zum A.. hingere go luege wies geit, är isch ganz näb de Schueh gsi wäge dene vielne Lüt. Zum Schluss simmer no mitts düre Wiehnachtsmärit mit de Eseli u do hani dr A.. vor mi gnoh u ne gäge hingere abgschirmet, mitts ir Autschtadt hei si für d Eseli es Ghegli gmacht wose d Chinder hei chönne aluege. Dr A.. hani ines Siteschtrössli gschickt eis go Rouche, i ha dänkt dass de dört chönni abefahre, di ganzi 14 Tag hane nie so erläbt, aubot het er gfrogt ob mir jetzt äntli wieder hei chönni. U so hei mir üs haut ihm z lieb ufe Heiwäg gmacht, da jo d Eseli sowiso Nass si gsi u sech so nid gärn lö lo schtrichele hets grad aune dienet. Nöchscht Johr bliebe mir de wieder lenger u näme ou chli Höi mit. Ou für hei isch dr A.. wieder gschuehnet wie wener uf dr Flucht wär, ou jo, das ischer jo ou gsi, uf dr Flucht vo dene viele Lüt. D Eseli heis super gmacht, ou dr Janosch isch brav i dene viele Lüt glüfe, u d Lüt u d Chinder hei dr Plousch gha. Deheime isches öpe no ne haub Schtund gange bis dr A.. wieder normau isch gsi u de äntli ou öpis het  chönne ässe. Wener so id d ängi tribe wärdi de fönger aube afo dri schloh, Mensch hei mir Glück gha dass är sich het chönne behersche "gsesch A.. du hesch das super gmacht, du hesch gmerkt dass es für di nüme schtimmt u zäme hei mir e Lösig gfunde,  genau so muesch du das mache, bravo bravo.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Letsche Sunndig hani wieder es Ehepaar z Bsuech gha, si hei zwöi befründeti Meitschi bi sich gha wo ufem Robischpiuplatz d Verantwortig hei für di zwe Esle. Nachdäm i däm Maa aues erklährt u aui Esle vorgschteut ha simmer go Kafi drinke u d Meitschi hei wacker Eseli putzt u gschmuset, isch ou no gäbig weme se eifach cha lo mache.  Mir hei de Gratiburgeret mit welne Esle mir üs wei ufe Wäg mache? mir hei üs für die zwe Schtuetene mit de Füli entschiede. Natürli hei d Füli vorab müesse u si ou rächt ufzoge gsi aber si heise guet möge hebe u mir Erwachsne si mit de Schtuetene hinger noche tschöttelet. Woni ha wöue umchehre hei si no wyter wöue u das isch jo guet gsi für d Füli, mir si düre Weidezuun u de hets agfange, zerscht hei di zwe Junge blöd do u när het Kaila afo schpinne. Sofort hani z Resärv Seili bire ighänkt u hase probiert z Beruhige, mir zwe Froue hei üsi ganzi Chraft brucht um di wiudi Schtuete z haute u säubverschtäntli bini wieder mit Schlärbli ungerwägs gsi u ha ke Schtang gha. I ha mis Seili däm Maa i d Hang drückt u ha d Dunja übernoh, de Meitschi hani gseit si müessi jetzt sofort luege das si di Füli chönni ruihig füehre u nüme d Kaila wiud mache. Mit dr Dunja bini vor dr Kaila glüfe u ha gseit si söue mit dr Kaila ganz noch hinger dra loufe um se z beruhige, auso so hani die no nie erläbt -  e richtigi Wiudsou. Nach 10 Minute über d Weid loufe simmer wieder ufemene Wäg gsi u aui si wieder ganz ruhig glüfe, i ha gschtudiert was de di Kaila ou gha heig? u plötzli isches mir wi Schuppe vo de Ouge, sit emene Monet si si doch nüme im Gras gsi u d Kaila het ganz dütlich gseit "Judihui mir dörfe is Gras judihui judihui", mi Gottsdüri nieme goni im Winter überne schöni grüeni Wiese.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Mir si igschneit, ir Höchi öpe 40cm u ihr breiti hani nid gmässe. Geschter bini mit mim Hung düre Waud, Mückslischtiu isches gsi mit het nume z Knirsche vo de Schueh ghört, aui Eschtli wome normalerwis gar nid beachtet u eifach wägdrückt si dasmou vou Schnee gsi. Hmm das hani natürli vorhär nid bedänkt, henu de luegis haut aus Fitnesstuur a, einisch bini ungerdüre wobi i ha müesse ufpasse jo nid a z cho süsch hani di ganzi wiisi bracht im Nacke gha, oder de hami Elegant näbe düre gschlänglet. Woisch ächt dr Wäg? ke ahnig, de loufi haut eifach em Hung hingernoche, blödi Idee, heit dir scho mou gseh wieviu Meter sone Hung zuesätzlich macht? einisch um dä Boum ume u de wieder z Bord ufe um gli wieder abe z cho. Was i ou luschtig finde i frömde Schpure z loufe, luege was die Person für ne Schrittlengi het. Zwüschdüre em Hung sini Hingerlasseschafte go zämeputze, was ganz Komisch isch, si macht erscht geng nachem Robidog u so muess i haut wieder zrügg oder nime das Seckli hei. Auso wieni erklährt ha bini i frömde Schpure glüfe, "e das isch jetzt komisch, di Person louft grad wieni, ei Fuess dräit si ou chli use, komisch, komisch, u was macht si ächt jetzt dört näbe use? MENSCH, bini blöd, das isch jo mini eigeni Schpur gsi, das chunnt äbe dervo weme so i Gedanke isch, werum ke Esu derbi isch gsi? I ha gfrogt wär mitchömi u aui hei gseit nei danke, bi däm Wätterchunnt ke Esu freiwiullig mit, u so bini haut nume mitem Hung gange.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Schnee sei dank, der Auslauf ist Blitzeblank, dank des hohen Schnees werden alle Bollen sofort geschluckt und man sieht nur Schnee Schnee Schnee, wunderschön und Praktisch. ABER wenn der Schnee schmilzt kommt die ganze Bescherung wieder zum vorschein und lädt zum Putzen ein, aber wen stört das? ist eh erst nächstes Jahr soweit, äs guets Nöis wünsch i öich aune vo dr Esufarm

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Auso im Winter isch z mischte jede Tag angers, das mit dem Schnee hani jo erklährt, wes kene me het aber aues sofort agfrührt gits nume ei Müglichkeit, mi luegt aune Esle ufs Hingerteil u we sich eine parat macht de chame eifach z Boueletaxi drungerhebe u si mache schön dri, das Sischdem brucht eifach u viu Zyt u wär het das scho. Oder me geit go probiere z putze wes scho agfrohre isch, cheibe Seich, zerscht versuecht me mit dem Chröieli di Bolle z näh, geit natürli nid, auso de gits nume eis, i hoffe dir heit gueti herti Schueh? De schtüpftme eis chreftig dergäge u di cheibe gfrohrne Bouele flüge grad bis nach Honolulu. U de gits no di letschdi Müglichkeit, mi wartet bises douet u putzt den u i dr Zwüschezyt luegt me über di Hüfe.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Wos so ischig chaud isch gsi, ei morge am nüni isches minus 15 Grad gsi, hei d Eseli überhoupt nid usem Schtau wöue, isch jo ou klar gsi, i ha e Wulldecki bir Türe aneghänkt damit dr Schtau nid z fescht uschüelet. D Cindy isch bliebe schtoh u het ke aschdaute gmacht ine angeri Boxe go noche zputze, das kennt me gar nid vo ihre. Woni dr Cindy ihri Boxe usegmischtet ha simmer zimmli dünni Hüfe ufgfaue, "oje Cindy hesch du so chaut? muess i dir ächt e Dechi alege? i ha witer gmischtet, do isch d Cindy näbe mi cho schtoh u het es Pfung gmacht,so dünn wie ne Chueh, mir fascht über d Schtifu. I ha verschtande was si mir het wöue säge "mir isch Arsch chaut, i bruchi di Dechi sofort" i ha mis Boueletaxi wäggschteut u bi schnäu e Dechi go reiche u hase dr ungerchüute Cindy agleit, hättet di Ouge söue gseh, "danke Chefi, aber das hät dir scho geschter chönne i Sinn cho" jo do het si rächt. I Probiere jede Winter obi ohni z Decke düre chumme, bis i nämli aui 16 Esle deckt ha isch dr Tag düre. D Cindy isch vo do a im Mittupunkt gschtande, isch jo klar, si isch di einzigi gsi mitere gäube Dechi, eine ume anger hetse müesse abschnüffle.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Woni so am mischte bi gsi hani plötzlich Huf ghört uf Metau, i ha zum Schtau us gluegt u was hani gseh? di 6 Monet auti Dakota isch uf dr Mischtrampi gschtande u het fräch obe abe gluegt, so zum säge "ätsch i bi haut di gröschte". Mir het das gar nid gfaue u so hani zum Schtau use grüeft "pass uf das isch gfährlich, cher di um u chum langsam wieder abe" si het gmacht was ere gseit ha u i bi wieder go wyter schaffe. Si isch abe cho u när zu mir  i d Boxe glüset "gäu i ha schön gfouget? het si mi gfrogt, jo aber das machsch de nüme gäu? Kener 2 Minute schpöter isch si scho wieder uf dere Rampi gschtande, auso no einisch z gliche schpiele "cher um u chumm abe aber ganz vorsichtig gäu? wosi dunde isch gsi hani dr Mischtschtock zuegschperrt. Z blöde a dere Sach, jedes mou weni mit dr voue Garette usem Schtau chumme muess i zerscht go d Bänder löse wäge dere vorwitzige Gumsle. I ha jo miner Füli aui gärn aber Dakota hani äbe chli gärner, am liebschte möcht se bhaute, aber i ha jo ke Platz. Am obe bim Fuettere muess me immer derzwüsche schtoh süsch frisst d Schtuete em Füli z churzfueter wäg, mis Mandeli schteit zwüsche dr Dunja u dr Dakota u ni muess bir Kaila u Kalinka u dr Tabea u em Babettli luege, i wett gärn mou dusche, de chönnt i nämli mit dr Dakota schmuse aber mis Mandli seit nei. I gloube dä wott eifach nid das i mi no me id Dakota verliebe u so luegi haut vo wytem u tröime vore.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Judihui ich bin so glücklich, morgen kommt Ronja zurück, ihre Besitzerin hat endlich eingesehen dass es am neuen Platz  nicht stimmt und der Besitzer der andern Stute einfach nicht einsieht dass ein Esel nicht gern kalt hat. Auch sieht er nicht ein dass sie im Winter einen Stall brauchen und Einstreu, als wir ihn darauf hinwiesen dass es verboten sei die Tiere nur auf einer Matte zu halten meinte er nur es stehe nirgens geschrieben wie viel Einstreu und so Puderte er den Boden nur Hauchdünn ein. Aber morgen ist Ronjas Leidenszeit vorbei nach fast 4 Monaten, ich frage mich ob sie überhaupt noch aus dem Stall kommt? vielleicht bleibt sie ja Tagelang in ihrer warmen Boxe und geniesst. Als dieser Herr fragte wie warm es denn in unserem Stall sei und wieviel Grad unterschied zu draussen? haben wir extra Thermometer gekauft und in die Ställe gehängt. Draussen Minus 3 Grad im Stall plus 5 Grad, so in etwa kam das Resultat raus, es sagt ja niemand es müsse 20 Grad sein, aber einfach angenehmer als draussen.Als Ronja weg ging, übernahm Cindy ihre Boxe, aber nicht für lange, plötzlich wollte sie wieder ihre alte Box, na den halt, nun hat sie ein neues Spiel erfunden um mir zu zeigen ob sie in der Nacht kalt hatte oder nicht, wenn sie am abend wieder nach hinten in Ronjas Boxe geht, weiss ich das sie letzte Nacht kalt hatte und wenn sie in ihre geht dann stimmte die Temperatur. Wenn nur Minus 2-3 angesagt sind so langt es wenn ich die untere Türe zu mache und oben die Plachen schliesse, sind aber Minus 6-7 Grad angesagt dann schliesse ich zusätzlich die obere Scheibe mehr oder weniger.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Hei isch das es Fescht gsi, d Sandra isch mitemene Meitschi cho um ihri 3 Esle z bewege, genau i däm Momänt isch d Bsitzere u dr Rudolf mit dr Ronja i troffe, da dr Figaro jedesmou muess zeige är sig de do dr Scheff, isches grad guet gsi dass er zerscht isch go loufe. Di räschtliche 13 Esle hei d Ronja wiukomme gheisse u hei wöue wüsse wo si ömu ou so lang sig gsi, sofort isch si i ihri Box gschtühret u het afo im Schtrou nüschele, dr Benj isch Wach gschtande u het sini Fründin gäge aui, wo eigentlich gar nüt hei wöue mache, verteitiget . Obwou är doch nume 95cm chli isch het är sich benoh wie dr Deckhängscht vore ganze Herde, jedesmou we eine s gwagt het ine z Güggele, het er d Ohre agleit u so bös us dr Wösch gluegt dass es gar niemer gluschtet het z probiere ine z cho. Si isch sofort wieder dehei gsi, nacheme haub Schtündli ischsi ine u use, immer wieder, es isch eifach schön gsi z luege wieses gnosse het. Hüt am morge woni i Schtau chumme het mi d Ronja mit somene glückliche Gsicht agluegt, "uahh i ha soooooo guet gschlofe uf dere dicke Matratze, ke Minute hani as Füdli gfrohre". Am Mittag hani di chline wieder i ihri Boxe gschperrt u im Ufenthautsruum für di grosse z Höi zwäg gmacht, i due ou im Schtaugang no es Hüfeli mache, faus eine ke Platz findet. Hüt isch dr Figaro dört go frässe, genau vor dr Box vor Ronja, är het es paar Häumli gno u sofort wieder d Ronja bös agluegt, so zum säge "wart nume bis i di verwütsche de zeig i dir de wär dr Scheff isch. Woni nachere Schtung ufe bi isch dr Figaro grad mit dr Rössige Tabea beschäftigt gsi u i ha di chline wieder use glo, woner äntli fertig isch gsi mit dr Tabea ischer sofort cho luege wo d Ronja sig, aber di isch sider scho lang ufem Drocheplatz unge gsi. Suechend ischer dür di Herde, är het gluegt u gsuecht u derbi ischer es paarmou näbe dr Ronja düre, aber da di angere jo kes Problem mit ihre hei gha isch si gar nid ufgfaue u dr Figaro het nüt chönne usrichte, i ha schön müesse lache. Si isch mit de Füli im Galopp ufe u abe u het ihri fröid so richtig usgläbt, es isch eifach schön das sie wieder do isch. Womer am obe hei gschtaunet si so viu Lüt do gsi zum Huf uschratze dass si baud aui Esle zwöi mou gmacht hei. Wosi d Ronja si go hole, het er scho zwöi angeri Eseli dört gha u so isch d Nuria ömu nid allei, u ob mes gloubt oder nid, är het d Schopftüre uf gmacht so das si ine hei chönne u ig schtröit isch ou rächt gsi. Fazit vo dere ganze Gschicht, dr Ronja het sich 3 e haub Monet z Füdli abgfrohre damit är äntli i-gseht das Eseli nid gärn chaut hei  u so chunnt sini Isicht de andere Eseli z guet.

Bearbeitet von: Dolotelley - 04-Feb-2015 20:30:05

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Am Figaro chunnt di ganzi Gschicht irgendwie immer no komisch vor, jedesmou wener glägeheit het de geit er go adr Ronja schnüffle, nachem 10 mou het sich d Ronja ganz hässig umträit u em Figu gseit "es längt de öpe, lomi äntli i Rueh" dä het se ganz verdatteret agluegt u het gar nid verschtande werum si ihm so wüescht seit. Mi merkt ere gar nüd a, si isch wi geng u het di ganzi Gschicht hinger sich glo, isch guet so, mi muess vorwärts luege. Irgendwie hani chli es Boxe gschtürm, do dr Sandro jo dr Platz vor Ronja het ig gno gha u z Babettli mit dr Tabea gschlofe het, hani wieder angers müesse iteile. I ha d Inca mitem Janosch i unger Resärv Schtau gno u ou z Babettli, i ha dänkt so chönni de dr Figaro u dr Janosch scho am morge zäme schpiele, aber wieder einisch hei d Esle angers schtudiert aus i. Die zwe hei überhoupt nid wöue schpiele u im obere Schtau het dr Sandro gar nid verschtande wo de si Schpiukamerad sig, so hani haut z Ingeli mit Suhn am morge wieder ufe brocht u am Mittag hei si i ihrer aute Boxe gfrässe, u dr Sandro het mit sim Mami z Mittag ignoh, aber irgendwie passt das dr Soraya gar nid, ach z läbe isch mängisch scho chli kompliziert grad wie di Gschicht.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

L a n g s a m, langsam geit dr Schnee u schnäu schnäu schnäu chömme di schön bis jetzt verschteckte Eselhingerlasseschafte zum vorschin, mängi mängi Garette hani scho gfüuut u wäggschtosse, vorem obere Schtau biudet sich e See u i muess z Wasser mitem Taxi (Stallboy) ufnäh. Es het no soviu Schnee dass ig gar ke Abflussrinne cha mache, aber ou das Problem überchöme mir i Griff.  Gli gli isches Zyt dass d Füli ihrne Müettere tschüss säge, es macht mir jedesmou meh müeh.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

Jede Nomittag weni mitem Hung go nimmi i e Esu oder zwe mit, jedesmou het mir d Ronja Sehnsüchtig nochegluegt, he nu hani dänkt de nimmi doch si hüt mit, obwou si im Winter mängisch fasch nid zfüehre isch. I hase schnäu chli dürebürschtet u när simmer dr Wäg uf, plötzli isch si wieder bliebe schtoh, "chumm Ronja mir zwöi oder besser gseit mir drü gö jetzt allei" si isch öpe 50m cho u de wieder bliebe schtoh. Uf einisch hani begriffe was i ihre vorgeit, si het angscht gha dass si wieder wäg müessi, "nei nei Ronja mir gö numme go Schpaziere u chömme de wieder zum Benj u de andere Hei, muesch ke angscht ha." I gloube si het mirs erscht gloubt wo vorem Waud ke Pferdetransporter gwartet het u vo do a het sis chönne gniesse.

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.

Re: Tagebuch der Eselfarm

I bi ganz truurig, geschter hani gläse das dr Noah u dr Isidor vor es paar Tag am morge Tod i ihrem Schtau gläge sige. Die zwe Luusbuebe si mou bi üs i de Ferie gsi u vor zwöi Johr hanise i Robischpiuplatz Aumänd in Basel vermittlet, letschte Herbscht simmer no dört gsi u hei gseh wie guet zuene gluegt isch worde. Si hei e schöne Schtau gha mit uslouf, währenddäm mir dört si gschtande isch aubot es Chind düregfahre, het aghaute u schnäu d Eseli gschtrichlet bevors wieder witer gfahre isch. U jetzt si di zwe Tod u mi weiss no nid was passiert isch, dass zwüschedüre es Tier schtierbt isch jo normau, aber doch nicht zwe mittenang wo am obe no Purlimunter si gsi, was was isch ächt dört passiert??

Dolotelley
Eselfarm Moutier
useravatar
Offline
662 Beiträge
Anonyme Beiträge sind nicht gestattet. Bitte einloggen oder registrieren.
Es sind 0 weitere Gäste in diesem Thema. Es sind 0 weitere Mitglieder in diesem Thema.

Board Info

Board Statistiken
 
Gesamtzahl Themen:
140
Gesamtzahl Umfragen:
5
Gesamtzahl Beiträge:
1109
Beitr. der verg. 24 Std:
1
Benutzer-Info
 
Gesamtzahl Benutzer:
593
Neuester Benutzer:
Lazzi