Anmelden

Samichlaus und sein treuer Helfer

Samichlaus und sein treuer Helfer

Hallo lieber Samichlaus
Hasst Du schon daran gedacht, dass du am 6. Dezember mit deinem treuen Begleiter auf deine grosse Tour gehen musst? Hasst Du auch schon daran gedacht, mit deinem Esel vorher zu üben damit er dich auch unterstützen kann? Nein - dan ist es höchste zeit dich daran zu erinnern! Geh also mit deinem Esel den Weg den du am 6.12. machst bei Tag und auch bei Nacht. Nimm deine Laterne und deinen Stock mit damit sich dein Esel daran gewöhnen kann. Leg ihm den Packsack auf seinen Rücken um ihm zu zeigen dass er für dich arbeiten soll
Ja noch etwas lieber Samichlaus, lass deinen Esel NIE alleine ohne Aufsicht bei einem Haus oder einer Wirtschaft angebunden stehen. Schnell ist etwas passiert und dein treuer Helfer hatt Angst für immer!
Ja und zu guter lezt sind dan auch viel Paparazzis da und schreiben wüdte Berichte am 7.12. in der Zeitung! Das haben die Esel nicht verdient! Danke
Solltest Du Hilfe brauchen melde dich ohne zu zögern bei mir. Ich helfe dir gerne Weiter.

Anonyme Beiträge sind nicht gestattet. Bitte einloggen oder registrieren.

Re: Samichlaus und sein treuer Helfer

Jo ou i ha üsi Esle wöue guet vorbereite für di wichtigi Ufgab em Samichlous z häufe, i bi mitemene chline Glöggeli i Schtau u bi plötzli ganz allei dini gsi u aui Esle dusse. No dis no hase a das Glöggeli chönne gwöhne, i bi mit mine Esle ufe Chiucheparkplatz gfahre u hase usglade. Woni so schön am alege bi gsi hei d Chiucheglogge afo Lüte dass me sis eigene Wort nüme ghört het, isch scho guet hani mini Esle as Glöggeli gwöhnt hani dänkt u när so richtig härzhaft glachet. U d Esle hei gar nüt dergliche do wie wesi jede Tag so luti Glogge ghöre u derbi wohne mir ir Schtiue Natur vome nume d Vögeli ghört Pfiffe u d Esle rüefe oder d Chefi.

Dolotelley
Eselfarm Moutier
useravatar
Offline
664 Beiträge
Anonyme Beiträge sind nicht gestattet. Bitte einloggen oder registrieren.

Re: Samichlaus und sein treuer Helfer

Falls die Esel per Anhänger zum Samichlaus reisen, lohnt es sich auch, das Verladen und Anhänger fahren seriös zu üben. "Unser" Samichlaus von letztem Winter erzählte uns immer wieder, wie die vorigen Esel während einer geschlagenen halben Stunde von mehreren Personen in den Anhänger gezerrt und geschoben werden mussten. Unsere Esel hingegen waren innert Sekunden im Anhänger. Sind wir wohl deshalb auch für dieses Jahr wieder engagiert worden :)?

Anonyme Beiträge sind nicht gestattet. Bitte einloggen oder registrieren.

Re: Samichlaus und sein treuer Helfer

Woni zerschte mou bi go Samichlöisle hani mi äuä ou nid grad guet vorbereitet, aber äbe mi lehrt jo nie us. I ha aues usglade, d Esle zwäggmacht u ne chli Höi z frässe gä u de hani mi afo verchleide,woni fertig gsi bi u mini Esle ha wöue näh hei die ganz blöd us dr Wösch gluet wie weni e frömdi Person wär. Da si am Höi frässe si gsi hei si mir gar nid zuegluegt wienimi agleit ha u drum mi nüm erchennt. I ha müesse dr Bart no einisch abzieh u mis Gsicht zeige u när isch du aues wieder guet gsi. Da i Brüuetregere bi hani geng es Problem mit dem Schnoutzbart, dä verschtopft mir fascht Nase u de louft mir immer Brüue a u i cha nüme läse was mir d Eutere zuegschteckt hei, scho chli blöd, wie maches ächt angeri? Wäri froh um gueti Ratschläg.

Dolotelley
Eselfarm Moutier
useravatar
Offline
664 Beiträge
Anonyme Beiträge sind nicht gestattet. Bitte einloggen oder registrieren.

Re: Samichlaus und sein treuer Helfer

Letscht Johr hani gwärweiset ob ächt d Strosse nach Biel no suber gnue sige um go z Samichlöisle, so gärn i go wott i doch ke Unfau riskiere dass chunnt mer de eitütig z tüür. Mir hei scho bis üs schwierigkeiten um überhoupt vo Huus z cho, u de loni eifach dr Transporter vorne bim Wäudli lo schtoh bis mir fertig Klöislet hei u loufe dr räscht z Fuess hei. Mi Maa isch go schaffe u het vo ungerwägs aglüte, d Schtrosse sige de suber gnue, auso hei mir üs ufe Wäg gmacht. Ungerwägs hets immer meh afo schneie u mir het das gar nüme gfaue, aber dr Rudolf het gmeint "ke angscht du hesch jo Auradatrieb", womer in Tavanne uf d Autobahn hei wöue uffahre hani äuä im fautsche momänt chli abbrämset u mir si plötzli quer gschtande. Läck hani do dr Gag i de Hose gha, hinger üs e ganzi Kolone wo ungeduldig worde isch u ni wo nid gwüsst ha was mache, umchehre isch nid gange wäge de nachfougende Fahrzüg auso vorwärts. Mir hei üs säuber Muet gmacht u gseit z Biu hets sowiso ke Schnee, aber je nöcher mir gäge Biu zu cho si je meh Schnee hets gha, i ha gmeint i chöm nie meh a, i bi aues mit ca. 40 Schtundekilometer gfahre u de Warnblinki. Das isch genau dä Winter gsi wo Biu zerscht mou 20 cm Schnee het übercho u i mit mim Ahänger mitts drin, mir hei dene Lüt mit de Eseli e grossi fröid gmacht, aber woni däm Veranschtauter gseit ha, " i cha de nid verschpräche das i nöchscht Johr cha cho, wenns wieder so viu Schnee git fahri nüme" do het är gmeint de näm är öper angers. He nu, üsi Sicherheit geit vor, mängi Lüt verschtöh das u angeri nid.

Dolotelley
Eselfarm Moutier
useravatar
Offline
664 Beiträge
Anonyme Beiträge sind nicht gestattet. Bitte einloggen oder registrieren.

Re: Samichlaus und sein treuer Helfer

Einisch hani grad zwe Aläss gha, isch gäbig gsi so hani nume einisch müesse fahre, do i geng gnue Zyt irächne, schliesslich nimmt sich dr Samichlous Zyt für d Chinder genau so lang wis tuuret, hani plötzli nid rächt gwüsst was mache. D Esle hani nid solang im Ahänger wöu lo warte, he nu hani dänkt de loufi haut chli im Ort ume, unger einisch bini vorem Autersheim gschtande u dört hei 3 euteri Froue mitenang Diskutiert. Zerscht hei si glachet wo si üs hei gseh cho aber woni du zuene bi, heis si afo komisch luege, schliesslich si di Zyte wo dr Samichlous zuene cho isch scho lang lang verbi. Jo Samichlous säg wär suechsch? heisi gfrogt, " i sueche niemer i chume zu öich, hani gantwortet u z lache schier nid chöne ungerdrücke. D Ouge si immer grösser worde u di guete Froueli si grad i ihri Chindheit zrügg versetzt worde, Zyte heige sich nid gänderet hane gseit, dr Samichlous warti o hüt no uf Färsli, nei aber ou heisi gschtagelet, mir wüsse doch keis meh. Aber dr Samichlous het nid luggloh" schtudieret nume chlei, es chunnt nech sicher no eis i Sinn" u do het di erschti afo es Färsli ufsäge, u när di nöchschti u ou di dritti het nid wöue hinger a schtoh u het  öpis verzeut. Dr Samichlous het no es paar Wort gseit u sech de verabschidet u isch mit sine Eseli wieder derfo gscheichlet. I dänke mir, di Froue hei no lang öpis z brichte gha, dass dr Samichlous zuene isch cho u mir isch ou ganz warm ums Härzli gsi.

Dolotelley
Eselfarm Moutier
useravatar
Offline
664 Beiträge
Anonyme Beiträge sind nicht gestattet. Bitte einloggen oder registrieren.

Re: Samichlaus und sein treuer Helfer

Bi üs gits immer am 6.12. e grosse Samichlousumzug dür ganz Moutier u do simer natürli derbi. Ohni Hiuf geits nid so guet u drum hani e Familievater gfrogt ob är ächt nid chönni cho häufe mit dene Esle vom Bärgli abe z loufe u när chönni doch de sis Töchterli mitem Eseli dr Umzug mache. Doch doch das sig e luschtegi Idee, dass mach är gärn, heige doch sini zwöi Meiteli geng so fröid a dene Langohre. Wosisch Zyt gsi zum schtarte isch ke Maa ume gsi u Zyt het drängt, he nu hani dänkt, de mach i mi afang ufe Wäg, är muess jo uf däm Wäg cho. Mit Hung u 4 Esle hani probiert vo Huus z cho, di hei gar nüd verschtande, jetz sig doch Zyt zum frässe jetz wöue si nid furt, mou mou chömid d Chinder warte doch am Bahnhof uf üs hane gseit u do si si doch du cho, aber i was füremene Tämpo? Wes nid so chaud wär gsi hät üs sicher no e Schnägg überhout, di einzigi wo vorwärts  zoge het isch di chlini jungi Samantha gsi, d Inca, d Soraya u d Cindy hei gschlärpelet was si nume hei chönne. Miner Arme si geng lenger u lenger worde, wärs nid gloubt cha cho nochemässe, u d Schrosse si Schbiugeglatt gsi, mir hei probiert am Rand ufem Schnee z loufe, aubott si ihri Scheichli i aui Himmusrichtige dervo u i ha wieder gseit "ufpasse ufpasse. Woni baud im Ort unger bi acho isch dä Maa äntli ufdoucht, är heig es Familiärs Problem gha u het sech mindeschtens 20 mou entschuedigt. Jo i sig scho grad e chli ufgschmisse gsi so ohni Hiuf aber jetz siger jo do, u do isch ou d Alexandra ufdoucht, u mit soviu Häufer ischs du kes Problem meh gsi. Am Bahnhof hei scho uviu Lüt u Chinder mit säuberbaschtlete Latärne gwartet, aber wo isch de ou z Rossgschpann für e Samichlous? Normalerwis isch si immer e haub Schtund z früeh aus z schpoht, di cha sicher nid cho mit Ross u Wage we d Schtrosse so Glatt si hane gseit, u mir hei gwartet u gwartet, äs isch sächsi gsi u geng no kes Rossgschpann, so si ömu miner Esle zu gnue Ufmerksamkeit cho. Mir hei üs grad entschlosse das dr Samichlous haut mite Esle z Fuess göngi wesi bis am haubi siebni nid uftouchi, u do isch si äntli cho, si hei de Ross müesse Mortax id Hufise montiere u d Gmeind het müesse go Sauze damit si isch vo Hus cho. Di Chinder hei afo loufe mit dene Eseli, äs isch e wunderschöne Umzug gsi, eis Döchterli vo däm guete Maa isch erscht zwöi jährig u isch dr ganz Wäg. mit em Cindy glüfe, u härzig dä chli Chnopf. Ir Autschtadt heisi äxtra es Plätzli für üseri Esle zwäggmacht, d Chinder hei am Samichlous ihres Värsli chönne verzeue u di grosse si mit heissem Tee verwöhnt worde, wo du di meischte Lüt gange si hei mir üs ou wieder ufe Schtündig Heiwäg gmacht u dehei di angere Eseli vorem verhungere grettet. Hüt z Nacht wärde nid nume d Eseli guet schlofe i sicher ou u de chöisich miner längzogne Arme wieder verchürze dass si wieder zum räscht vo mir passe.

Dolotelley
Eselfarm Moutier
useravatar
Offline
664 Beiträge
Anonyme Beiträge sind nicht gestattet. Bitte einloggen oder registrieren.

Re: Samichlaus und sein treuer Helfer

Mir hei am 06. Dez. üse erscht uftritt als Samichlous gha. Mir si scho e chli ufgregt gsi. Wo mir am Namitag üsi Esle si ga parat mache, si di zwe gar nid druss cho. Wills so vil Schnee het gha, hani dr Aahänger witer unde la stah. Dr Spirou het richtig freut gha, dürre Schnee Z'loufe. Dr Carlos isch nid e so z?fride gsi aber het doch ou mitgmacht. Bim Verlade isch dr Carlos grad nonstop i Aahänger ine, bim Spirou hei mir e chli überzügig bruucht. Ds Niederried aacho, hei mir gmerkt, dass Stras Spiegelglatt isch. Langsam simer opsi glofe, u d Esle im Schneewalm la loufe. Für e Spirou isch das kes Problem gsi, aber dr Carlos het immer wider i dr Stras wölle loufe. Bim Chlouseplatz aacho, heimer de Esle e chli Heu gä. U d`chind hei em Samichlous ihri Versli verzellt u es Seckli übercho. Dr Spirou isch ja gar gwunderig u het D`Nase immer zforderscht gha. Das isch em Carlos zguet cho. Im hets eifach zvil Lüt gha u Chind hei ne Gstrichlet, dass het er o nid so gärn gha. Ig bi nid verchleidet gsi, u ha mi e chli um Carlos kümmertet. Ig bi eifach bi im blibe u im eso chli sicherheit gä. Dr Spirou hets Gnosse so vil Chind hei ne gstrichlet, är het gar nid gnue übercho. Ir zwüschezyt hani mit dr Verantwortliche gred, ob me nid chönnt d`stras cho Salze. Im Fistere mit de Esle di Stras nids izloufe chönnt gfährlich wärde. U Gmeind isch tatsöchlich cho Salze. Nach cirka 2 Std. simer wider Nidzi zue. Ds Loufe  u Verlade isch tiptop gange. Deheime heimer uuslade u D`Esle si nonstop hei zue gloffe. Es isch wunderschön gsi u dÈsle hei sicher guet gschlafe.

Anonyme Beiträge sind nicht gestattet. Bitte einloggen oder registrieren.

Re: Samichlaus und sein treuer Helfer

Weme doch nume meh Zyt hät zum Chöisle, aber mi sött immer glichzitig überau si. Do mir wieder 2 Ufdräg am gliche Tag hätte söue mache hani d Alexandra u dr Rudolf um Hiuf gfrogt u di hei fröidig zue gseit. I ha schön aues Plahnet, das machi gärn äs chunnt sowiso immer angerscht, zerscht hani di zwöi mit ihrne Esle drü Dörfer witer brocht u ha mittne abgmacht wesi fertig sige söie si bis is nöchschte Dorf loufe dört house de ab. Mit mitne zwöi angere Eseli bini uf Biu go Chlöisle, dört chani immer guet ufem Chiucheparkplatz parkiere, woni wieder bim Ahänger bi trifft mi fasch dr Schlag. Dr ganz gross Platz isch mit Outo überschteut gsi u mi Ahänger mittsdrin, i ha nidemou chönne d Esle ilade do eis Outo bis 30cm a d Rampi isch gfahre. Mi schön Zytplan isch i Bach gheit, i bi is Chiuchgmeinshus go säge i chönni nid wägfahre si söu doch so guet si u ihri Outo wägnäh. Di hei es Westernfescht gha u hei gmeint äs sig öper mitem Ross cho, äs het ewig tuuret bis di ihre Outo hei wäggnoh u när hani no dörfe mi Ahänger uf chlinem Platz dräie, aber das isch mer e Lehrplätz gsi jetz Parkieri immer so das i grad cha wägfahre. I ha Gas gäh so viu i ha chönne mit mine Eseli aber natürli het mir di Zyt gfäut woni dört verlammeret ha, " hoffentlich chunnts dene zwöine z Sinn witer z loufe u nid bi dere cheuti dört Schtundelang z warte. Woni äntli bine bi itroffe si aui schtiff grohre gsi u obwou d Eseli ideckt si gsi hei ou si chaud gha, werum sit dir nid zueglüffe? hättet mir jo chönne Lüte wonech söu uflade, aber i gloube dene isch ou z Hirni igfrore gsi. Jo do erläbt me Sache, d Eseli si am angere Tag ke Sekunde usem Schtau cho, di si schön ar wermi bliebe, rächt gha hei si.

Dolotelley
Eselfarm Moutier
useravatar
Offline
664 Beiträge
Anonyme Beiträge sind nicht gestattet. Bitte einloggen oder registrieren.
Es sind 0 weitere Gäste in diesem Thema. Es sind 0 weitere Mitglieder in diesem Thema.

Board Info

Board Statistiken
 
Gesamtzahl Themen:
140
Gesamtzahl Umfragen:
5
Gesamtzahl Beiträge:
1111
Benutzer-Info
 
Gesamtzahl Benutzer:
603
Neuester Benutzer:
walterk21082848